Imfundo Enika Ubomi
“IBhayibhile ilukhokelo olubalaseleyo ebomini.”—UThomas Tiplady, 1924.
ASIYIBAXI xa sisithi imfundo esekelwe eBhayibhileni inokutshintsha indlela yokuphila. Iye yanika intsingiselo nethemba kwabo baziva bengaxabisekanga nabasentlungwini. Omnye umzali ongatshatanga kwilizwe laseNamibia walibhalela oku isebe lamaNgqina kaYehova laseMzantsi Afrika:
“Ndineminyaka engama-29 ubudala, yaye ndiye ndafunda incwadi ethi Imibuzo Yabantu Abaselula—Iimpendulo Eziluncedo ngeentsuku nje ezimbini. Iye yandichukumisa ngokunzulu kuba ndililolo ngokwenene. Isithandwa sam safa kwingozi yenqwelo-mafutha sindishiya nabantwana ababini. Sitsala nzima ngokwenene. Maxa wambi bendidla ngokucinga ukuba eyona nto ibhetele kukubabulala ndilandelise ngam. Kodwa ndithe ndakufumana le ncwadi, ndatshintsha ingqondo. Ndincedeni ngesifundo seBhayibhile sesisa.”
IBhayibhile yincwadi yesikhokelo enokunceda abantu baphumelele kulo naliphi na icandelo lobomi—kulwalamano neentsapho zabo, abo basebenza nabo, nabantu basekuhlaleni. (INdumiso 19:7; 2 Timoti 3:16) Inikela ukhokelo oluluncedo ngendlela yokwenza okulungileyo nokuphepha okubi. Iyincwadi exubusha ngendlela esengqiqweni ngobomi. Njengoko uyifunda uya kufumanisa ukuba izaliswe ziingxelo ezingabantu bokwenene. Uya kubona oko kwabangela abanye bonwabe baze bafumane umvuzo nokwabangela ukuba abanye babe sentlungwini nasebubini. Uya kuziqonda ngokucacileyo izinto ezibalulekileyo nezingabalulekanga.
Imfundo Enika Ubomi Ngoku
IBhayibhile ibethelela ukubaluleka kobulumko. Ithi: “Ubulumko yinto eyintloko. Zuza ubulumko.” (IMizekeliso 4:7) Kwakhona iyachaza ukuba abantu badla ngokungabi nabulumko, yaye iluleka ngelithi: “Ukuba kukho nabani na kuni oswele ubulumko, makaqhubeke ebucela kuThixo, kuba unika bonke ngesisa.”—Yakobi 1:5.
UMdali wethu, uYehova uThixo, unikisa njani ngobulumko ngesisa? Ukwenza oko ngeLizwi lakhe iBhayibhile, akhuthaza ukuba silifunde. UThixo ubongoza ngelithi: “Nyana wam, ukuba uya kuwamkela amazwi am uze uyigcine kuwe imiyalelo yam, khon’ ukuze unikele ingqalelo kubulumko . . . , uya kwandula ukukuqonda ukoyika uYehova, ukufumane ukumazi uThixo. Kuba uYehova unika ubulumko.” (IMizekeliso 2:1, 2, 5, 6) Xa sisebenzisa isiluleko esiseLizwini likaThixo size siyibone indlela esisebenza ngayo, siyaqonda ukuba sichaza ubulumko bukaThixo.
Ngokomzekelo, khawucinge nje ngombandela wokuhlangabezana nobuhlwempu. IBhayibhile ikhuthaza ukukhuthala ize ilumkise nxamnye nokusukela ukuchitha imali encinane. Ngenxa yoko, imikhwa enjengokusebenzisa icuba nokuzinkcinkca ngeziselo ezinxilisayo ngokucacileyo inxamnye nemigaqo yeBhayibhile.—IMizekeliso 6:6-11; 10:26; 23:19-21; 2 Korinte 7:1.
Kuthekani ngendlela anokusichaphazela ngayo amaqabane ethu? IBhayibhile ithi: “Ohamba nezilumko uya kuba sisilumko naye, kodwa osebenzisana neziyatha uya kuhlelwa bububi.” (IMizekeliso 13:20) Ngaba uye waphawula ukuba ingcinezelo yoontanga iye yakhokelela abantu—abaselula nabakhulileyo ngokufanayo—ekunxileni, ekusebenziseni kakubi iziyobisi nasekuziphatheni okubi? Ewe, ukuba sinxulumana nabenza ezo zinto, siya kufana nabo, kuba iBhayibhile ithi: “Unxulumano olubi lonakalisa imikhwa elungileyo.”—1 Korinte 15:33.
Ngokuqinisekileyo, sonke siyakufuna ukonwaba. Kodwa kunokwenzeka njani oko? Ngaba uye waqonda ukuba iBhayibhile ithi asizozinto ezinokusenza sonwabe kodwa sisimo sengqondo nolwalamano oluhle, ingakumbi ulwalamano oluhle noThixo? (1 Timoti 6:6-10) UYesu Kristu, kwiNtshumayelo yakhe edumileyo yaseNtabeni, wathi abo bonwabe ngokwenene ‘bayiphaphele intswelo yabo yokomoya,’ “banomoya wobulali,” “banxanelwe ubulungisa,” “banenceba,” ‘basulungekile entliziyweni,’ yaye “banoxolo.”—Mateyu 5:1-9.
Xa ucingisisa nzulu ngeemfundiso zeBhayibhile, uya kubona indlela ezinokubalathisa ngayo ubomi bethu. IBhayibhile ihamba yodwa, njengomthombo wecebiso. Icebiso layo lisoloko liyingenelo—ayize ithethe nje, yaye ayinakusenzakalisa. Abo basebenzisa icebiso leBhayibhile basoloko bephumelela.
Imfundo Enika Ubomi
Kodwa, ukongezelela ekubeni yingenelo kuthi ngoku, iBhayibhile inikela ithemba lobomi kwikamva. Isixelela ngokucocwa ngokupheleleyo komhlaba nokutshintshwa kwawo ube likhaya elihle labo bakhonza uThixo. Phawula le ngxelo ichukumisayo ingekamva: “Khangela! Intente kaThixo iphakathi koluntu, yaye uya kuhlala nalo, lube ngabantu bakhe. Naye abe nguThixo walo. Uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili zidlule.”—ISityhilelo 21:3, 4; IMizekeliso 2:21, 22.
Khawufan’ ucinge: Akusayi kubakho mntwana ugulayo, akusayi kubakho ndlala, akusayi kubakho loyiko ngenxa yezifo ezitheza amandla omzimba, akusayi kubakho mntu unkqenkqethwa yintlungu! Iinyembezi zodandatheko, ezodano, nezentlungu ziya kuphela, njengoko iimeko ezibangela ezo zinto ziya kutshintshwa okanye zishenxiswe. Ekubeni abantu abathanda ubungendawo beya kutshatyalaliswa yimikhosi yeengelosi zikaThixo, amasela, ababulali, amaxoki, nabanye abenza ubomi bungakhuseleki baya kuba bengekho. Abantu baya kuba namakhaya abo baze bahlale kuwo bekhuselekile.—Isaya 25:8, 9; 33:24; 65:17-25.
Ngaba oko kukhangeleka kulungile kuwe? Ngaba ungathanda ukufunda okungakumbi ngokusebenzisa imigaqo yeBhayibhile ukuze ungenelwe ngoku nakwikamva? Ukuba kunjalo, nceda uqhagamshelane namaNgqina kaYehova, yaye aya kukuvuyela ukubandakanya wena nentsapho yakho kwinkqubo yawo yomhlaba wonke “yemfundo enika ubomi.”