Isiqhamo Esithandwa Gqitha Ngabenzi Beziqholo

NGUMBHALI KAVUKANI! EITALI

IZIQHOLO kudala zasetyenziswa. Kumaxesha okubhalwa kweBhayibhile, iziqholo zazisenza indlu, impahla, umandlalo nomzimba womntu onemali yokuzithenga unuke kamnandi. Ezi ziqholo zazixutywa nekhala, ioli yebhalsam, isinamoni, nezinye iziqholo.—IMizekeliso 7:17; INgoma yazo iiNgoma 4:10, 14.

Kanti incindi yemifuno iseyinto ephambili xa kusenziwa iziqholo. Size eCalabria, ummandla osemazantsi eItali, ukuze sibone indawo eyenziwa kuyo le ncindi. Kusenokwenzeka ukuba akuyazi ibergamot, kodwa ivumba lesi siqhamo lifumaneka phantse kwisiqholo esinye kwezintathu zamabhinqa nakwisiqingatha seziqholo zamadoda ezithengiswayo. Makhe sikuchazele ngebergamot.

Umthi webergamot uba luhlaza unyaka wonke. Udubula entwasahlobo yaye isiqhamo sawo sigudile yaye simthubi—siphantse silingane neorenji—sivuthwa ngasekupheleni kokwindla okanye xa kuqalis’ ubusika. Iingcali ezininzi zithi ibergamot yintlanganisela yemithi emibini, yaye ayaziwa ukuba yavela njani. Lo mthi awukhuli endle, yaye awunambewu. Ukuze iveliswe, abalimi bamilisela igatya lalo mthi kweminye imithi efana nayo, njengomthi welime okanye weorenji ekrakrayo.

Kubenzi beziqholo, asikho esinye isiqhamo esinjengebergamot. Enye incwadi xa ithetha ngayo ithi, incindi yesi siqhamo iyakwazi “ukuhlanganisa nokuyondelelanisa amanye amavumba abe livumba elinye elimnandi, yaye iyakwazi nokulenza elo vumba libe ngathi lelemvelo,” nto leyo enqabileyo.a

Indlela Elinywa Ngayo ECalabria

Iincwadi zithi ibergamot yafunyanwa eCalabria ekuqaleni kwenkulungwane ye-18 yaye abemi balapha babedla ngokuthengisa incindi yayo kubahambi abadlulayo. Noko ke, abalimi baberhweba ngesi siqholo. Ngowe-1704, uGian Paolo Feminis, umTaliyane owafudukela eJamani, wenza amanzi endlu yangasese abizwa ngokuba yiAqua admirabilis, okanye “amanzi anevumba elimnandi.” Ngokuyintloko la manzi ayegalelwe incindi yebergamot. Esi siqholo sabizwa ngokuba yieau de Cologne, “amanzi aseCologne,” okanye ngokulula nje icologne, igama lesixeko aveliswa kuso la manzi.

Igcume lokuqala lemithi yebergamot lalinywa eReggio mhlawumbi ngowe-1750, yaye imali eninzi eyafunyanwa ngokuthengwa kwencindi yebergamot yabangela ukuba kulinywe eminye imithi. Le mithi ithanda imozulu ezolileyo nokukhuselwa kwimimoya yasentla ebandayo, kodwa ayivani nokutshintsha kwemozulu ngokukhawuleza, imimoya emikhulu, nokufuma ixesha elide. Ekuphela kwendawo enemozulu entle ngolu hlobo sisiqwengana somhlaba esiziikhilomitha ezi-5 ububanzi nezili-150 ubude, esikufuphi nonxweme olungasemazantsi eItali. Nangona abantu bezama ukulima iibergamot kweminy’ imimandla, imveliso eninzi ehlabathini lonke ivela kwiphondo laseReggio. Elinye ilizwe elivelisa le mithi emininzi yiCôte d’Ivoire, eAfrika.

Kwixolo lesi siqhamo—kufumaneka ioli exabisekileyo yebergamot—incindi eluhlaza bumthubi. Ngokuqhelekileyo le oli ikhanywa ngokusika phakathi esi siqhamo, ukhuphe ipete, ucudise amaxolo de kuphume incindi eqokelelwa ngesiponji. Ukuze kufunyanwe ikhilogram nje enye yencindi, kufuneka kucudiswe iibergamots ezinokuba ziikhilogram ezili-180. Namhlanje, phantse yonke incindi ikhanywa ngoomatshini abanecwecwe okanye iirola zentsimbi ezincwela onke amaxolo kwesi siqhamo.

Asaziwa Kangako Kodwa Sisetyenziswa Kakhulu

Kusenokwenzeka ukuba abantu abazi nto ingako ngesi siqhamo ngaphandle kwabo bahlala eCalabria, kodwa omnye umbhali uthi, “iindwalutho ziyixabise gqitha ibergamot.” Ivumba layo elingathi sisiqhamo alifumaneki kuphela kwiziqholo kodwa nakwizinto ezinjengesepha, izinto zokuqaba amakhwapha, intlama yamazinyo nakwizithambiso. Ukuze inik’ incasa, incindi yebergamot igalelwa etini, kwi-ice cream, kwiilekese nakwiziselo. Kuba ikwazi ukujika ibala, isetyenziswa kwizithambiso zokuzikhusela elangeni. Ekubeni inamandla okubulal’ iintsholongwane, ixatyiswe gqitha ngabenzi bamayeza njengesibulala-zintsholongwane xa kusenziwa utyando, kunyangwa izigulo zamehlo nezolusu. Ibergamot inechiza ekuthiwa yipectin elinamandla okujiyisa izinto, yaye lisetyenziswa ekujiyiseni igazi ize igalelwe nakwiyeza lokunqanda ukuhambisa kwesisu.

Iingcali zifumene imichiza enokuba ngama-350 kwincindi yebergamot nto leyo eyenza ibe nevumba elimnandi ize ibe luncedo kwizinto ezininzi. Onke la machiza afumaneka kwisiqhamo nje esinye!

Kusenokwenzeka ukuba ababhali beBhayibhile babengayazi ibergamot. Noko ke, nabani na onomdla wokusazi esi siqhamo noMdali waso osisilumko, ngokuqinisekileyo uya kusibona isizathu sokuvumelana namazwi omdumisi athi: “Dumisani uYehova . . . nina mithi yeziqhamo.”—INdumiso 148:1, 9.

[Umbhalo osemazantsi]

[Umfanekiso okwiphepha 25]

Incindi ye-“bergamot” ikhanywa ngokuncwela onke amaxolo kwesi siqhamo

[Inkcazelo]

© Danilo Donadoni/Marka/age fotostock