Izimvo Zabafundi BakaVukani!
Imibhalo-ngqangi Yamandulo—Yaziwa Njani Ukuba Yabhalwa Nini? (Februwari 2008) Eli nqaku liyandicaphukisa. Ngokwazi kwam uC.E. umela “iXesha Eliqhelekileyo” yaye uB.C.E umela “Ngaphambi kweXesha Eliqhelekileyo.” Kuyo yonke iminyaka yam engama-70, ndiye ndasibona isibizo esithi B.C. nesithi A.D. zisetyenziselwa ukubhekisela kwixesha elingaphambi nasemva kokuzalwa kukaYesu. Xa kusetyenziswa uB.C.E. okanye uC.E. kuba ngathi ngandlel’ ithile anikholelwa ekuzalweni kukaYesu.
UR. W., waseUnited States
“UVukani!” uyaphendula: Nangona uA.D. (Anno Domini, othetha “unyaka weNkosi”) noB.C. (ngaphambi kukaKristu) besetyenziswa kumazwe apho kukho abantu abazibiza njengamaKristu, siye sakhetha ukusebenzisa amabinzana athi C.E. (iXesha Eliqhelekileyo) nelithi B.C.E (Ngaphambi kweXesha Eliqhelekileyo). Kutheni? Okokuqala, kukho ubungqina obubambekayo obalatha kunyaka we-2 B.C.E. njengonyaka wokuzalwa kukaYesu. Okwesibini, iincwadi ezishicilelwa ngamaNgqina kaYehova zisasazwa ngokubanzi ngeelwimi ezifundwa ngabantu abaninzi abangengomaKristu. Okwesithathu, isibizo esithi “Kristu” sithetha “Othanjisiweyo.” UYesu waba nguMesiya, okanye uKristu, xa wathanjiswa ngomoya kaThixo ngoxa wayebhaptizwa ngowama-29 C.E. (Mateyu 3:13-17) Noko ke, uYesu akazange azalwe enguKristu, waba nguKristu ngonyaka awayebhaptizwa ngawo. Ngokuqhelekileyo, amabinzana athi C.E. noB.C.E. asetyenziswa kakhulu, yaye akho kwizichazi-magama zakutshanje nakwiincwadi ezininzi zabaphengululi. Nceda uqiniseke ukuba amaNgqina kaYehova akholelwa ukuba uYesu nedini lakhe lentlawulelo badlala indima ebalulekileyo kwinjongo kaThixo nasekusindisweni kwethu.
Abantu Abaselula Bayabuza . . . Ndinokuhlangabezana Njani Nempilo Enkenenkene? (Februwari 2008) Ndiye ndaba nombulelo gqitha xa bendifumana eli nqaku ngexesha kanye elifanelekileyo! Ndagula ndaza ndalaliswa esibhedlele kangangeeveki ezintathu. Ukufumana kwam eli phephancwadi bendisandul’ ukuphuma esibhedlele. Ndiyayiqonda indlela abavakalelwa ngayo abaninzi abaselula abacatshulwe kweli nqaku. Enkosi kakhulu ngale mizekelo nangamacebiso.
UK. P., waseKhanada
Kwandichukumisa gqitha ukwazi ukuba uYehova uThixo uyabathuthuzela abantu, kuquka nabo baneziphene njengam. Xa ndandiselula, ndaba necerebral palsy. Nangona ndingakwazi ukuhamba, ndinguvulindlela ongumncedani. Ndikhangele phambili kumhlaba oyiParadesi xa bonke abo baneziphene ‘beya kutsiba njengexhama.’—Isaya 35:5, 6.
UJ. J., okwiRiphabliki yaseKorea
Ndiye ndaliphindaphinda eli nqaku. Andizange ndikwazi ukuzibamba kodwa ndalila, kukwazi indlela uYehova avakalelwa ngayo. Kwakungathi usisongele ngengubo eshushu ukuze singenzakali kwaphela. Enkosi kakhulu.
UM. T., waseJapan
Ngaba Ngokwenene Siphelela Kwantsonga Nyawana? (Disemba 2007) Bendisandul’ ukufelwa ngumama kwiinyanga ezimbalwa ezidluleyo, yaye inkcazelo ekweli nqaku iye yandichukumisa, ngokukodwa ithemba lovuko. Ndinibulela gqitha. Liye landithuthuzela laza landomeleza.
UM. R., waseMadagascar