Okwenzeka Ehlabathini

◼ Uphando oluye lwenziwa ngeekorale lubonise ukuba ama-32,8 ekhulwini azo “sele eza kuphela” ngenxa yokuguquka kwamaqondo obushushu nangenxa yabantu.—ISCIENCE, EUNITED STATES.

◼ Kubantwana abangaphezu kwama-2 000 abanengxaki yokuphefumla kwisibhedlele saseAthens, eGrisi, bamalunga “nama-65 ekhulwini abafunyaniswe ukuba baye bachanabeka kumsi [wecuba] womnye wabazali okanye bobabini.”—IENGLISH EDITION, EGREECE.

◼ “Ukunyuka kwamaxabiso e-oli, ukunyuka kwamaxabiso, . . . ukudodobala kwezoqoqosho . . . , neentlekele zemvelo ezisibeka engozini: zonke zisenza singabi nako ukuzicombulula ngoku nakwixesha elizayo.”—ILLUÍS MARIA DE PUIG, PRESIDENT OF THE PARLIAMENTARY ASSEMBLY OF THE COUNCIL OF EUROPE.

◼ EPoland, abafana abali-17 namantombazana ali-18 ekhulwini aye azama ukusebenzisa iziyobisi xa ayeneminyaka eli-15 ubudala.—IŻYCIE WARSZAWY, EPOLAND

Ubutshaba Phakathi Kweengonyama Nabantu

IAfrica Geographic, engulindixesha waseKapa, ithi, njengoko inani labantu eAfrika lisanda, inani lezilwanyana liyancipha, nto leyo ekhokelela “kugonyamelo.” Xa iingonyama “zibona abantu, zibona ukutya.” Ngokomzekelo, eTanzania, iingonyama bezibulala abantu abangama-70 nyaka ngamnye ukususela ngowe-1990. Lo lindixesha uthi, kwezinye iimeko “iingonyama zizingela abantu, zibafuna nasezindlwini, zize zigqobhoze uphahla lwengca, zidilize neendonga eziwohlokileyo zodaka.”

Ukufumaneka Koovimba Bamandulo EYiputa

Abembi bezinto zakudala beYunivesithi yaseChicago ababesemba kumazantsi eYiputa baye bafumana iingqayi ezisixhenxe zeenkozo, ezona zinkulu zaziwayo kuloo ngingqi. Izinto zakudala ezafunyanwa kufuphi nalapho, ziye zanceda aba bembi baqonda ukuba ezo zinto zazenziwe phakathi kowe-1630 nowe-1520 B.C.E. Ukuba bachanile, ezi ngqayi zazikho ngomhla kaMoses. Ezi ngqayi zingqukuva nezenziwe ngodongwe, ziziimitha ezi-5,5 ukuya kwezi-6,5 yaye kusenokwenzeka ukuba ziziimitha ezisi-7,5 ukuphakama, zazigcinwa kwindawo karhulumente eyayinika abantu ukutya. Ingxelo yale yunivesithi ngokuphathelele ezi ngqayi ithi, ezi ndawo “zazigcina ukutya kukarhulumente okuvela kwiNtlambo umNayile. Ekubeni ezi nkozo zazisetyenziswa njengemali, oku kwakusenza oofaro babe zizityebi.” Yongezelela yathi “ekubeni ezi nkozo zazisetyenziswa njengemali, ezi ndawo zazisetyenziswa njengeebhanki kwakunye neendawo zokufumana ukutya.”

Iphepha Eliqine Njengesinyithi

Abaphengululi kwiRoyal Institute of Technology yaseSweden baye banendlela yokuvelisa iphepha kwincindi yomthi ekuthiwa yicellulose elenza liqine. Indlela eqhelekileyo yokwenza iphepha ibangela ukuba lingaqini. Kodwa iqela laseSweden lasebenzisa iienzyme laza lahlula iifiber zecellulose emanzini, lisebenzisa umatshini wokukhanda. Xa iifiber ezingonakalanga zikhanywa, zidibana ndawonye, zize zivelise amaphepha aqine ngaphezu kwesinyithi nawaqine njengentsimbi.