“Musani Ukuxhalaba”

“Sasala singenayo nepen’ emdaka kwiakhawunti yethu yebhanki yaye kwakungasekho naleyo sasiyibhalise ngabantwana. Zaqengqeleka iinyanga singafumani mali.”

● Ndandinesikolo kumaphandle aseIndiya yaye sasiqhuba kakuhle kakhulu. Ngaxa lithile kwabhalisa abafundi abamalunga nama-500. Noko ke, isikolo esithile sasedolophini saqalisa ukuthumela iibhasi kummandla wethu yaye kwakulula ukubhalisa kuso. Siyavakala isizathu sokuba abafundi abaninzi batshintshe baye kufunda kwisikolo esisedolophini. Inani labafundi besikolo sam lehla kuma-500 laya kutsho kuma-60. Eyona nto yenza izinto zambi kakhulu kukuba, igosa elaliza kusinceda ngemali larhoxa nangona lalisandityal’ imali. Ekubeni kwakusekho abasebenzi kweso sikolo endandingekabahlawuli ndaba neengxaki zemali.

Sahlala phantsi nentsapho yam saza sathetha ngalo mba. Kwafuneka sibophe ibhanti njengokuba sasizama ukulandela isibongozo sikaYesu sokugcina ‘iliso lingenakumbi’ ngokwasezimalini—ngamany’ amazwi singathengi izinto ezininzi esingenakukwazi ukuzifikelela. (Mateyu 6:22, 25) Kangangexesha elithile kwafuneka ukuba sikhe siyibeke imoto yethu ngenxa yeendleko zepetroli nezokuyinyamekela. Sanciphisa iindleko zokutya ngokuthenga ngorhatya xa amaxabiso okutya okuseleyo ethotyiwe. Kwakhona sawunciphisa umlinganiselo wokutya esikutyayo.

SingamaNgqina kaYehova yaye ngenxa yoko kubalulekile kuthi ukuhlanganisana namanye amakholwa kwiintlanganiso zamaKristu. (Hebhere 10:25) Nangona sasingenamali sazixelela ukuba asizi kuphoswa ziintlanganiso neendibano—enoba loo nto ithetha ukuba siza kuhamba imigama emide. Sasisiya kwimimandla ekude siye kufundisa abantu iBhayibhile. Sasishiya imoto sikhwele isithuthuthu xa sisiya kushumayela. Kambe ke, esi sithuthuthu sasikhwelwa ngabantu ababini kuphela.

Oku akuthethi kuthi sasichitha ixesha elifutshane xa sishumayela. Kwelinye icala, inkosikazi nentombi yethu babechitha ixesha elingakumbi bethetha nabanye ngeBhayibhile. Maxa wambi babehamba umgama ongangeekhilomitha ezintandathu ukuya kwezisibhozo xa besiya kufundisa abantu abanomdla iBhayibhile emakhayeni abo. Nam nonyana sazama ukuchitha ixesha elininzi sifundisa abantu iBhayibhile.

Noko izinto azisafani nakuqala ngokwasezimalini. Iingxaki ebesinazo njengentsapho, ziye zasifundisa ukungathi tyuu iintliziyo zethu kwizinto eziphathekayo. Kwakhona siye safunda ukungazixhalabisi kakhulu ngezinto esingenakwenza nto ngazo. INdumiso 55:22 isikhuthaze gqitha. Ithi: “Umthwalo wakho wulahlele kuYehova, yaye yena wokuxhasa. Akayi kuliyekela ilungisa lishukunyiswe.” Loo mazwi abe yinyaniso kuthi ngoxa besithwaxwa ziingxaki zemali!—Linikelwe.