Ukuchitha Unyaka Nabelusi BaseWales
EHLABATHINI jikelele, abelusi balusa iigusha ezingaphezu kwebhiliyoni. Xesha ngalinye lonyaka lineengxaki zalo ezahlukileyo. UGerwyn, uIoan noRhian basichazela ngomsebenzi wabelusi kwiintaba zaseWales, apho kukho iigusha ezininzi ngaphezu kwabantu.
Ukwalusa Entwasahlobo
Entwasahlobo abelusi basebenza imini nobusuku benceda iigusha ezizalayo.
UGerwyn: “Ixesha lokuzala kweegusha lelona sixakeka kakhulu ngalo kodwa ikwalelona linomvuzo yaye kubalulekile ukuba nenja eqeqeshwe kakuhle. Xa igusha inengxaki, inja yam iye iyibambe ngoxa mna ndiyincedisa ukuze izale.”
UIoan: “Kungakhathaliseki nokuba zininzi kangakanani iigusha ekufuneka ndizincedise xa zizala ndisoloko ndivuya xa ndibona itakane!”
Ukucheba Iigusha Ehlotyeni
Ehlotyeni abelusi bayazicheba iigusha zabo yaye gusha nganye inokuba noboya obuziikhilogram ezilishumi kuxhomekeka kuhlobo lwayo. Umalusi unokucheba iigusha ezingama-250 ngosuku.
URhian: “Xa ndicheba igusha ndiqala emsileni. Xa unesikere esisebenza ngombane uyakwazi ukucheba igusha ngemizuzu nje emibini. Ndidla ngokuncedisa ekucoceni uboya, ndize ndibufake engxoweni ukuze buthengiswe.”
Abelusi bayavuya xa kunganethi mvula kangangeeveki ezimbini kuba batsho bakwazi ukusika ingca eza kutyiwa ziigusha zabo. Iigusha zabo zitya le ngca ebusika. Iintsapho nabahlobo bayancedisa ukuze ithuthwe ize isiwe ekhaya.
Uloan: “Ndiyakuthanda ukuhamba emasimini emva kokuba kuvuniwe.”
Ukubuyisela Imihlambi Ekhaya Ekwindla
Ukuze abelusi bakwazi ukwahlukanisa iimazi namatakane azo, imihlambi iyaqokelelwa ize ibuyiselwe ekhaya.
Uloan: “Nangona amadlelo engabiyelwanga, iigusha azifane zilahleke okanye zibhadule. Eyona mazi yasekhaya indala iyazi kakuhle imida yefama yethu. Le mida eyayifunda kunina okanye kubelusi iyifundisa namanye amathokazi. Noko ke, ngamanye amaxesha kuye kudlule iiyure okanye iintsuku sikhangela iigusha ezilahlekileyo.”
Kwakhona abelusi bakhangela baze bathenge iinkunzi eziza kukhwela amathokazi neemazi zabo. Nkunzi nganye iyakwazi ukukhwela amathokazi angama-25 ukuya kwangama-50. Ezi nkunzi zibalulekile kuba ziyawandisa umhlambi.
Kwiiveki ezili-10 ukusa kwezili-12 emva kokuba iinkunzi ziye zadibana namathokazi, umalusi uye ahlole amathokazi ukuze abone ukuba ngawaphi amithiyo nokuthi amithi amatakane amangaphi. Amathokazi angamadlolo ayathengiswa. Aza kuzala itakane elinye aye ahlaliswe odwa ngoxa umalusi ebeka iliso ngokukhethekileyo kulawo aza kuzala amawele nangaphezulu yaye uwapha ukutya okongezelelekileyo.
Ukondla Izimvu Ebusika
Ebusika umalusi uchitha ixesha elininzi esondla iigusha zakhe ezimithiyo. Kungakhathaliseki ukuba imozulu injani, umalusi usoloko ekufutshane nezimvu zakhe ukuze aqiniseke ukuba ziyatya xa kuneqabaka.
UGerwyn: “Ngamaxesha anjalo izimvu kufuneka zibe nomalusi ibe zixhomekeke kuye ukuze zifumane ukutya zize zikhuseleke.”
URhian: “Kumnandi ukuba semadlelweni ngalo lonke ixesha lonyaka ukuze ndibone utshintsho olwenzeka endle—lo ngumvuzo endiwufumanayo njengoko ndisenza umsebenzi endiwuthandayo wokwalusa umhlambi wam.”
[Imaphu ekwiphepha 12]
(Ukuba ufuna inkcazelo ehlahlelwe kakuhle, yiya kwimpapasho)
NORTHERN IRELAND
IRELAND
SCOTLAND
WALES
ENGLAND
[Umfanekiso okwiphepha 14]
UIoan ehlola inkunzi yegusha
[Umfanekiso okwiphepha 14]
UGerwyn ekunye nenja yakhe