Yintoni Eza Kutshintsha?

“Uhlanga aluyi kuphakamisela uhlanga ikrele.”

“Akakho ummi wakhona oya kuthi: ‘Ndiyagula.’”

‘Akusayi kubakho kufa.’

LA MAZWI angasentla asenokuvakala njengentsomi. Kodwa siyaqiniseka ukuba aya kuzaliseka. Ngoba? Kaloku akazozithembiso nje zililize ezenziwa ngabezopolitiko abangenawo amandla okutshintsha ihlabathi. Zizithembiso eziphuma eBhayibhileni.a

Abaninzi bavakalelwa ukuba iBhayibhile yincwadi yakudala engenakusebenza kumhla wethu. Ngaba ukholelwa loo nto nawe? Ukuba kunjalo, kutheni ungakhe uhlolisise oko kuqulethwe yiBhayibhile? Isibakala kukuba, iBhayibhile kuphela kwencwadi engcwele eyichaza ukususela ekuqaleni imbali yoluntu. Ichaza ezi zinto zilandelayo:

● Indlela uluntu olwangena ngayo kule meko imaxongo.—Roma 5:12.

● Indlela uThixo anenjongo yokuyilungisa ngayo le meko.—Yohane 3:16.

● Isizathu sokuba oorhulumente bengenako ukulitshintsha eli hlabathi.—Yeremiya 10:23.

● Isizathu sokuwathemba amadinga kaThixo okulungisa le meko.—Yoshuwa 23:14.

Ngaba ngokwenene uThixo uya kuyiphelisa indlala, imfazwe, ukugula nokufa izinto ezithwaxa uluntu? Akubi nzima emntwini ukukholelwa xa eye wakwamkela oku:

1. UThixo wasidala.

2. Usikhathalele.

3. Unamandla okulitshintsha ihlabathi.

4. Unenjongo yokulitshintsha.

Ngaba zikho izizathu ezivakalayo zokukholelwa ezi ngongoma zine? AmaNgqina kaYehova, abapapashi beli phephancwadi, ayakucela ukuba uzifumanele impendulo ngokuqhutyelwa isifundo seBhayibhile.

Kungenzeka ukuba unayo iBhayibhile nto nje akufane uyifunde okanye akuyifundi kwaphela. Nabantu abaninzi abafunda iBhayibhile bathi kunzima ukuyiqonda. Ukuba nawe uvakalelwa ngolo hlobo, siyakucela ukuba uqhagamshelane namaNgqina kaYehova ukuze akuqhubele isifundo seBhayibhile sesisa. Zizigidi zabantu abaxhamla elo lungiselelo ehlabathini. Siqhutywa njani?

Ngaphandle kwentlawulo, veki iNgqina likaYehova okanye amabini anokuza kwikhaya lakho okanye kwenye indawo ngokuvumelana neemeko ukuze axubushe nawe iBhayibhile. Esi sifundo seBhayibhile siya kukunceda ukwazi ukufumana iimpendulo kwimibuzo efana nethi, Kutheni sibandezeleka nje? Kutheni oorhulumente babantu bengakwazi kulitshintsha ihlabathi? Buyintoni uBukumkani bukaThixo, yaye buya kuzifeza njani izinto ezoyise oorhulumente babantu?b

Ukuze ufumane inkcazelo engakumbi ngendlela onokuzuza ngayo kwisifundo seBhayibhile, nceda uqhagamshelane namaNgqina kaYehova akwindawo ohlala kuyo okanye ufunde iWebhsayithi yethu ethi www.pr2711.com. Ungabhalela nakwiadresi efanelekileyo kwezo zidweliswe kwiphepha 5 leli phephancwadi.

[Imibhalo esemazantsi]