Ngubani Onokulitshintsha Eli Hlabathi?

“Ehlabathini abantu bafuna iimpendulo kwiinkokeli zabo. Balindele izicombululo, hayi imigudu eziyenzayo okanye izizathu ezingavakaliyo.”—UNOBHALA JIKELELE WEZIZWE EZIMANYENEYO UBAN KI-MOON.

SIPHILA kumaxesha iBhayibhile ewabiza ngokuba ‘ngamaxesha amanqam ekunzima ukujamelana nawo.’ (2 Timoti 3:1) Ayikho into oyivayo ezindabeni ngaphandle kweemfazwe,ubunqolobi, iingxaki zoqoqosho, nokonakaliswa komhlaba.

Ngaba likho ithemba lokuba izinto ziya kuphucuka? Ngaba oorhulumente babantu bangakwazi ukulungisa iingxaki zehlabathi? Okanye kufuneka sifune uncedo kwenye indawo?

Oko Kuthethwa Ngamazwe Amaninzi

Amazwe amaninzi athi axhaswa nguThixo. Ngokomzekelo, kumazwi Okukhahlela iFlegi, iUnited States of America yenza ibango lokuba yiyo “isizwe esiphantsi kukaThixo,” kwaye nemali yayo inamazwi athi, “In God We Trust, [Sithembele KuThixo].”

Yinyaniso ukuba, abaninzi kubantu abahlala eUnited States abakholelwa ukuba ukho uThixo—ibe oku kunjalo nakwamanye amazwe athi axhaswa nguThixo. Nabo bakholelwayo kubukho bukaThixo, baneembono ezahlukeneyo ngomkhamo angenelela ngawo kwiingxaki zoluntu.

● Abanye bathi uThixo akanamdla kwaphela kuluntu uyekele kulo ukuba luzilawule.

● Abanye bathi uThixo usebenzisa oorhulumente babantu yaye unokusikelela imigudu yabo ukulungisa eli hlabathi.

Yiyiphi, oyikholelwayo wena kwezi mbono zimbini?

Cinga ngoku: Ukuba amazwi okuqala ebechanile, oko bekuya kuthetha ukuba imeko yethu imaxongo. Ukuba la wesibini ebechanile, bekuya kufuneka sizibuze oku: ‘Ngaba uThixo unesizwe asikhethayo kunesinye? Ukuba izizwe ezibini ziyalwa yaye zozibini zithandazela uloyiso ngokunyanisekileyo, uThixo uma nasiphi?’ Ngaba inokwenzeka into yokuba singabikho ama naso?

Oko Kufundiswa YiBhayibhile

1. Umntu akazange adalelwe ukuzilawula. IBhayibhile ithi: “Asikokomntu ohambayo ukwalathisa inyathelo lakhe.” (Yeremiya 10:23) Imbali ibungqina phandle ubunyani baloo mazwi. Oorhulumente babantu abakezi nalo ihlabathi elibhetele, kwanokuba abalawuli sele beneembono neenjongo ezintle. Endaweni yoko, ‘umntu uye walawula omnye yaba kukwenzakala kwakhe.’—INtshumayeli 8:9.

2. UThixo unovelwano ngentlungu esikuyo. Uyazi kakuhle imeko yethu yaye uyavakalelwa. Ngapha koko, uza kuyiphelisa ukuze asincede. Njani? Uza kusebenzisa uBukumkani bakhe, “obungenakuze bonakaliswe.”—Daniyeli 2:44.

3. UBukumkani bukaThixo bungurhulumente wokwenene. Bobo Bukumkani busoloko buthandazelwa zizigidi zabantu umhla nezolo xa besenza uBawo Wethu Osezulwini, okanye uMthandazo weNkosi. Kulo mthandazo, babongoza uThixo besithi: “Mabufike ubukumkani bakho. Makwenzeke ukuthanda kwakho nasemhlabeni, njengasezulwini.” (Mateyu 6:10) Phawula ukuba uBukumkani bukaThixo abupheleli nje ezulwini; bubangela ukuba ukuthanda kukaThixo kwenziwe nasemhlabeni.

4. NgoBukumkani bakhe, uThixo unako ukutshintsha ihlabathi, ibe uza kulitshintsha. Ukuba uyakuthandabuza oko, cinga ngoko kufundiswa yiBhayibhile.

● UThixo wanika abantu isiqalo esihle kwiimeko ezifanelekileyo.—Genesis 1:27-31.

● Phezu kwazo nje iingxaki ezikhoyo, uThixo usemile kwinjongo anayo ngomhlaba.—INdumiso 37:11, 29.

● UThixo sele ethabathe amanyathelo okubuyisela umhlaba—kunye noluntu—kwimeko yantlandlolo.—Yohane 3:16.

Ngaba ungathanda ukufunda ongakumbi ngoBukumkani bukaThixo nendlela obuza kutshintsha ngayo umhlaba? AmaNgqina kaYehova, abapapashi beli phepha ncwadi, angakuvuyela ukukunceda. Kutheni ungaxubushi nawo le mibuzo ilandelayo xa efika kwikhaya lakho.

● Buyintoni uBukumkani bukaThixo?

● Ziziphi iinguqu obuya kuzenza?

● Buya kuzenza nini yaye njani?

NGABA WAKHA WAZIBUZA?

● Kutheni oorhulumente babantu bengenakukwazi ukufeza izinto abanqwenela ukuzenza kweli hlabathi?—Yeremiya 10:23.

● UThixo ubonise njani ukuba usikhathalele?—Yohane 3:16.

● Yintoni uBukumkani bukaThixo obuza kuyenza emhlabeni nakubantu abahlala kuwo?—INdumiso 37:11, 29.

[Amagama acatshulweyo akwiphepha 27]

Ngaba oorhulumente babantu bangakwazi ukujamelana neengxaki zomhlaba? Okanye ngaba sifanele sikhangele uncedo kwenye indawo?