Isahluko 8
Ukusaba Kumlawuli Okhohlakeleyo
UYOSEFU uvusa uMariya ukuze amxelele iindaba ezingxamisekileyo. Kusandul’ ukubonakala kuye isithunywa sikaYehova, sisithi: “Vuka, umthabathe umntwana nonina, usabele eYiputa, uze ube khona apho ndide ndikuxelele; kuba uHerode uhlalele ukumfuna umntwana lowo, ukuba amtshabalalise.”
Ngokukhawuleza, bobathathu bayasaba. Ibe ke basaba kanye nje ngexesha elifanelekileyo kuba uHerode usandul’ ukufumanisa ukuba izazi zimkhohlisile yaye zihambile kweli lizwe. Khumbula ukuba, zazimele zibuye ziye kumnika ingxelo xa zimfumene uYesu. UHerode unomsindo. Ngoko ezama ukubulala uYesu, uyalela ukuba kubulawe onke amakhwenkwe aseBhetelehem nakwizithili zayo aminyaka mibini ubudala nangaphantsi koko. Umisela obu budala ngokusekelwe kwinkcazelo awayeyifumene ngaphambilana kwizazi ebezivela eMpuma-langa.
Kuyinto eyoyikeka gqitha ukubona ukubulawa kwazo zonke iintsana ezingamakhwenkwe! Amadindala kaHerode ayigqogqa yonke imizi. Ibe xa efumana usana oluyinkwenkwe, ayaluhlutha ezingalweni zikanina. Asazi ukuba abulala iintsana ezingaphi na, kodwa isililo nesijwili esikhulu soonina sizalisekisa isiprofeto esiseBhayibhile somprofeti kaThixo uYeremiya.
Ngeli xesha, uYosefu nentsapho yakhe baye bafika eYiputa bekhuselekile, yaye ngoku bahlala apho. Kodwa ngobunye ubusuku isithunywa sikaYehova kwakhona sibonakala kuYosefu ephupheni. Isithunywa sezulu sithi: “Vuka, umthabathe umntwana nonina, uye ezweni lakwaSirayeli; kuba bafile abo babezonda ubomi bomntwana.” Ngoko, izalisekisa esinye isiprofeto seBhayibhile esithi uNyana kaThixo wayeya kubizwa aphume eYiputa, le ntsapho ibuyela kwilizwe lakowayo.
Kubonakala ukuba uYosefu uzimisele ukuhlala kwelakwaYuda, apho babehlala khona kwidolophu yaseBhetelehem ngaphambi kokuba basabele eYiputa. Kodwa ufumanisa ukuba uArkelawo unyana ongendawo kaHerode ngeli thuba ungukumkani welakwaYuda, yaye kwelinye iphupha uYehova uyamlumkisa ngale ngozi. Ngoko uYosefu nentsapho yakhe bayahamba baya kumntla welo lizwe baze bahlale kwidolophu yaseNazarete eGalili. UYesu ukhulela apha, kude lee nesazulu sobomi bonqulo lwamaYuda. Mateyu 2:13-23; Yeremiya 31:15; Hoseya 11:1.
▪ Xa izazi zingabuyi, yintoni eyoyikekayo uKumkani uHerode ayenzayo, kodwa ukhuselwa njani uYesu?
▪ Ekubuyeni kwakhe eYiputa, kutheni uYosefu engaphindi ahlale eBhetelehem?
▪ Ziziphi iziprofeto zeBhayibhile ezazalisekiswayo ebudeni beli xesha?