Isahluko 104
Ilizwi LikaThixo Liviwa Okwesihlandlo Sesithathu
NGOXA esetempileni, uYesu ebesoloko ebuhlungu ngenxa yokufa amele ajamelane nako kamsinya. Eyona nto ayixhalabele ngokuyintloko yindlela oluza kuchaphazeleka ngayo udumo lwegama likaYise, ngoko ke uyathandaza esithi: “Bawo, lizukise igama lakho.”
Akuba etshilo, kuvakala ilizwi elinamandla liphuma emazulwini, lisithi: “Ndilizukisile, ndiya kubuya ndilizukise.”
Isihlwele esimi kufutshane sikhwankqisiwe. Bambi baqalisa ukuthi, “Kuthethe isithunywa sezulu kuye.” Abanye bathi liyaduduma. Kodwa, eneneni, nguYehova uThixo obethetha! Noko ke, esi ayisosihlandlo sokuqala ukuba ilizwi likaThixo liviwe ngokuphathelele uYesu.
Kwiminyaka emithathu enesiqingatha ngaphambilana, ngexesha lokubhaptizwa kukaYesu, uYohane uMbhaptizi wamva uThixo esithi ngoYesu: “Lo nguNyana wam oyintanda, endikholisiweyo nguye.” Kwandula ke, ngaxa lithile emva kwePasika edluleyo, xa uYesu wenziwa kumila kumbi phambi kwabo, uYakobi, uYohane noPetros bamva uThixo esithi: “Lo nguNyana wam oyintanda, endikholisiweyo nguye; mveni yena.” Ibe ngoku, okwesihlandlo sesithathu, ngoNisan 10, kwiintsuku ezine ngaphambi kokufa kukaYesu, ilizwi likaThixo liyeviwa kwakhona ngabantu. Kodwa ngesi sihlandlo uYehova uthetha ngendlela yokuba izihlwele zibe nokumva!
UYesu uyacacisa: “Eli lizwi alibangakho ngenxa yam; libekho ngenxa yenu.” Linikela ubungqina bokuba ngokwenene uYesu unguNyana kaThixo, uMesiya othenjisiweyo. UYesu uyaqhubeka esithi: “Kungoku ukugwetywa kwalo eli hlabathi; kungoku umphathi walo eli hlabathi aya kukhutshelwa phandle.” Ikhondo lobomi bokuthembeka likaYesu, ngokungathi kunjalo, liqinisekisa ukuba uSathana uMtyholi, ongumphathi weli hlabathi, ukufanele ‘ukukhutshelwa phandle,’ atshatyalaliswe.
Esalatha kwimiphumo yokufa kwakhe okusondelayo, uYesu uthi: “Mna ke, ukuba ndithe ndaphakanyiswa emhlabeni, ndiya kubatsalela bonke kum.” Ukufa kwakhe akuthethi kuthi woyisiwe nangayiphi na indlela, kuba ngako, uya kutsalela abanye kuye ukuze babe nokunandipha ubomi obungunaphakade.
Kodwa isihlwele siyachasa sisithi: “Thina sivile emthethweni, ukuba uKristu yena uhlala ngonaphakade; utsho ngani na wena ukuthi, UNyana woMntu umelwe kukuthi aphakanyiswe? Ungubani na lo Nyana woMntu?”
Phezu kwabo bonke obu bungqina, kuquka ukuva ilizwi likaThixo ngenkqu, inkoliso ayikholwa ukuba ngokwenyaniso uYesu unguNyana woMntu, uMesiya othenjisiweyo. Ukanti, njengokuba wenzayo kwiinyanga ezintandathu ngaphambilana kuMthendeleko wemiNquba, uYesu kwakhona uthetha ngaye siqu ‘njengokhanyiso’ aze akhuthaze abo bamphulaphuleyo esithi: “Nisenalo nje ukhanyiso, kholwani kulo ukhanyiso, ukuze nibe ngabokhanyiso.” Emva kokuba ethethe ezi zinto, uYesu uyemka aze azimele, ngokucacileyo kuba ubomi bakhe busengozini.
Ukungakholwa kwamaYuda kuYesu kuzalisekisa amazwi kaIsaya ‘angamehlo abantu amfanyekisiweyo neentliziyo zabo eziqaqadekisiweyo ukuze bangaguquki ukuze baphiliswe.’ UIsaya wabona embonweni iinkundla zikaYehova zasezulwini, kuquka uYesu ekuzuko lwakhe lwangaphambi kokuba abe ngumntu ekunye noYehova. Ukanti, amaYuda, ngenzaliseko yoko kwabhalwa nguIsaya, ngobuntamo-lukhuni ayabugatya ubungqina bokuba Lo nguMkhululi wawo othenjisiweyo.
Kwelinye icala, abaninzi kwanakubaphathi (ngokucacileyo amalungu enkundla ephakamileyo yamaYuda, iNtlanganiso Yamatyala) baba nokholo ngokwenene kuYesu. Ababini kwaba baphathi nguNikodemo noYosefu waseArimati. Kodwa abaphathi, ubuncinane okwangoku, bayasilela ukuvakalisa ukholo lwabo, kuba besoyika ukukhutshwa kwizikhundla zabo endlwini yesikhungu. Hayi indlela abalahlekelwa ngayo abo banjalo!
UYesu uhlabela mgama esithi: “Lowo ukholwayo kum, akakholwa kum, ukholwa kulowo wandithumayo. Lowo undibonayo, ubona owandithumayo. . . . Nokuba umntu uthe weva amazwi la am, akakholwa, mna andimgwebi; kuba andize kuligweba ihlabathi, ndize kulisindisa ihlabathi. . . . Ilizwi endilithethileyo, lilo eliya kumgweba ngomhla wokugqibela.”
Ukulithanda kukaYehova ihlabathi loluntu kwamshukumisela ukuba athumele uYesu ukuze abo bakholwayo kuye babe nokusindiswa. Ukusindiswa kwabantu kuya kuxhomekeka ekubeni bayazithobela na izinto uThixo awayalela uYesu ukuba azithethe. Umgwebo uya kufika “ngomhla wokugqibela,” ebudeni boLawulo lukaKristu Lwewaka Leminyaka.
UYesu uqukumbela ngokuthi: “Andithethanga okuphuma kum; owandithumayo, uBawo ngokwakhe, nguye owandiwisela umthetho wokuba ndithini na, nokuba ndithethe ntoni na. Ndiyazi nokwazi ukuba umthetho wakhe lowo bubomi obungunaphakade. Ngoko izinto endizithethayo mna, njengoko uBawo andixeleleyo, ndenjenjalo ukuzithetha.” Yohane 12:28-50; 19:38, 39; Mateyu 3:17; 17:5; Isaya 6:1, 8-10.
▪ Kungaziphi izihlandlo ezithathu elathi ilizwi likaThixo leviwa ngokuphathelele uYesu?
▪ Umprofeti uIsaya walubona njani uzuko lukaYesu?
▪ Bangoobani abaphathi ababonisa ukholo kuYesu, kodwa kutheni bengamvumi ekuhleni nje?
▪ Uyintoni ‘umhla wokugqibela,’ ibe kungasiphi isizinzi abaya kugwetywa ngaso abantu ngoko?