Ileta Evela Kwiqumrhu Elilawulayo

Mthandi KaYehova Othandekayo:

UYesu wathi: “Niya kuyazi inyaniso, yaye inyaniso iya kunikhulula.” (Yohane 8:​32) Loo mazwi akhuthaza ngokwenene! Ewe, sinako ukuyazi inyaniso nakule “mihla yokugqibela” yamanqam ezaliswe bubuxoki. (2 Timoti 3:⁠1) Ngaba usakhumbula xa wawuqala ukuva inyaniso ecaciswe kwiLizwi likaThixo? Oko kwakubangel’ imincili ngokwenene!

Noko ke, kanye njengokuba kubalulekile ukuba nolwazi oluchanileyo lwenyaniso nokusoloko uxelela abanye ngayo, kubalulekile nokuba siziphathe ngendlela ehambisana nenyaniso. Ukuze senjenjalo, simele sizigcine kuthando lukaThixo. Kuquka ntoni oku? Oko kwathethwa nguYesu ngobusuku bangaphambi kokufa kwakhe kuyawuphendula lo mbuzo. Wathi kubapostile bakhe abathembekileyo: “Ukuba niyayigcina imiyalelo yam, niya kuhlala eluthandweni lwam, kanye njengoko nam ndiyigcinile imiyalelo kaBawo ndaza ndahlala eluthandweni lwakhe.”​—⁠Yohane 15:⁠10.

Phawula ukuba uYesu wahlala eluthandweni lukaThixo ngokuthobela imiyalelo kaYise. Nathi sifanele senjenjalo namhlanje. Ukuze sizigcine kuthando lukaThixo, simele siphile ngokuvisisana nenyaniso mihla le. Kwangobo busuku bunye, uYesu wathi: “Ukuba niyazazi ezi zinto, ninoyolo ukuba nithi nizenze.”​—⁠Yohane 13:⁠17.

Sinethemba lokuba le ncwadi iza kukunceda uqhubeke uphila ngenyaniso ukuze uzigcine ‘kuthando lukaThixo ukhangele kubomi obungunaphakade.’​—⁠Yude 21.