AbaFarisi Babuza Indoda Ebingaboni

AbaFarisi abafuni ukuvuma ukuba uYesu uphilise indoda eyazalwa ingaboni, ngenxa yaloo nto babiza abazali bayo. Abazali bale ndoda bayayazi ukuba ‘banokugxothwa kwindlu akhonzela kuyo amaYuda.’ (Yohane 9:22) Le nto ibiza kuba nzima kakhulu, ingakumbi kwintsapho esokolayo.

AbaFarisi bababuza imibuzo emibini. Bathi: “Ngulo nyana wenu lo, lo nithi wazalwa engaboni? Kwenzeka njani ke ukuba abe uyabona ngoku?” Aba bazali baphendula bathi: “Into esiyaziyo kukuba, lo ngunyana wethu, ibe wazalwa engaboni. Le yokuba kwenzeke njani ukuba abone, asiyazi; singazi nokuba ngubani omvule amehlo.” Nokuba unyana wabo ebebaxelele ukuba kwenzeke ntoni, aba bazali bayigadile into abayithethayo. Bathi: “Buzani kuye. Mdala kaloku. Makaziphendulele.”​—Yohane 9:19-21.

AbaFarisi baphinda babize le ndoda, bayayoyikisa ngokuthi banobungqina ngakuYesu. Bathi: “Zukisa uThixo ngokusixelela inyani; siyazi ukuba lo mntu ngumoni.” Le ndoda ibaphendula ithi: “Le yokuba ungumoni, andiyazi. Mna into endiyaziyo kukuba bendingaboni, ngoku ndiyabona.”​—Yohane 9:24, 25.

Aba baFarisi abayiyeki, baphinda bayibuze bathi: “Ukwenze ntoni? Uwavule njani amehlo akho?” Ngesibindi iphendula ithi: “Ndinixelele nje, kodwa anamamela. Kutheni nifuna ndiphinde? Okanye nani nifuna ukuba ngabafundi bakhe?” AbaFarisi baba nomsindo, baze bathi: “Nguwe umfundi walaa mntu, thina singabafundi bakaMoses. Siyazi ukuba uMoses wayethunywe nguThixo, kodwa yena lo mntu asimazi ukuba uvela phi.”​—Yohane 9:26-29.

Le ndoda iyothuka ize ithi: “Sisimanga into yokuba ningamazi ukuba uvela phi, akugqiba ukuvula amehlo am.” Emva koko, ithetha into abangenakuyiphikisa yokuba ngubani uThixo ammamelayo namthandayo. Ithi: “Siyazi ukuba uThixo akabamameli aboni, kodwa uyammamela nabani na omoyikayo, aze enze ukuthanda kwakhe. Akuzange nanini na kuviwe ngomntu owakhe wavula amehlo omntu ozelwe engaboni.” Yonke le nto yenza le ndoda ithi: “Ukuba lo mntu ebengaveli kuThixo, akukho nto ebenokukwazi ukuyenza.”​—Yohane 9:30-33.

Kuba bengakwazi ukuyiphikisa le nto ithethwa yile ndoda, abaFarisi bayayithuka besithi: “Singathini ukufundiswa nguwe, wakugqiba ukuzalelwa esonweni?” Emva koko bayayigxotha.​—Yohane 9:34.

Xa uYesu esiva into eyenzekileyo, udibana nayo aze ayibuze athi: “Uyakholwa na kuNyana womntu?” Iyambuza ithi: “Ngubani lowo mhlekazi, ukuze ndikholwe kuye?” UYesu uyiphendula athi: “Sowumbonile, nguye lo uthetha nawe.”​—Yohane 9:35-37.

Le ndoda ithi: “Ndiyakholwa Nkosi.” Iyaqubuda ibonisa ukuba inokholo kuye kwaye iyamhlonipha. UYesu uthi: “Ndize kweli hlabathi ukuze izinto endizenzayo zenze abangaboniyo babone, ababonayo bangaboni.”​—Yohane 9:38, 39.

AbaFarisi ekubonakala ukuba bakhona apha bayazazi ukuba bayabona. Bacinga ukuba uYesu uthetha ngabo esithi abakwazi ukukhokela abantu. Ngenxa yaloo nto bayazithethelela bathi: “Uzama ukuthi nathi asiboni?” UYesu uthi kubo: “Ukuba beningaboni, ngeningenasono. Kodwa nithi, ‘Siyabona.’ Ngoko ke ninesono.” (Yohane 9:40, 41) Ukuba bebengengobafundisi bakwaSirayeli bebengazokuba nesono kakhulu xa bengamamkeli uYesu ukuba unguMesiya. Kodwa ngenxa yokuba bewazi uMthetho ukungamamkeli kwabo uMesiya kusisono esikhulu.