Ubomi Nobulungiseleli BukaYesu

UYesu Ubafundisa Ukuthobeka

EMVA kokuphilisa inkwenkwe ephethwe yidemon kummandla okufuphi neKesareya yakwaFilipu, uYesu unqwenela ukubuyela kokwabo eKapernahum. Phofu ke, ufuna ukuba yedwa nabafundi bakhe kolu hambo ukuze abenze bakulungele ngokungakumbi ukufa kwakhe neembopheleleko zabo emva koko. Ubacacisela esithi: “UNyana woMntu unikelwa ezandleni zabantu; baya kumbulala; uya kuthi ebulewe, abuye avuke ngomhla wesithathu.”

Nakubeni uYesu wathethayo ngaphambilana ngako oku, yaye nabapostile abathathu bambona ngokoqobo xa wayesenziwa kumila kumbi ngexesha awayebachazela ‘ngokuphuma’ kwakhe, sekunjalo abalandeli bakhe abakawuqondi lo mcimbi. Nakuba kungekho namnye kubo ozama ukukhanyela ukuba uza kubulawa, njengoko wenjenjalo uPetros ngaphambilana, bayoyika ukumbuza okungakumbi ngalo mbandela.

Ekugqibeleni bafika eKapernahum, ebilikhaya likaYesu ngandlel’ ithile ngexesha lobulungiseleli bakhe. Kwakhona ikwayidolophu awazalelwa kuyo uPetros neqela labanye abapostile. Apho, amadoda aqokelela irhafu yetempile eza kuPetros. Mhlawumbi ezama ukubandakanya uYesu ukuze atyeshele isiko elamkelekileyo, ayabuza esithi: “Umfundisi wenu akayirholi na imali yetempile [irhafu yetempile]?”

UPetros uphendula esithi, “Ewe, uyayirhola.”

UYesu, osenokuba ufike emva nje kancinane kuloo ndlu, uyayazi into eyenzekileyo. Ngoko nangaphambi kokuba uPetros awuthethe lo mcimbi, uYesu uyabuza esithi: “Uthini na wena, Simon? Ookumkani behlabathi bamkela kubaphi na irhafu nomnikelo? koonyana babo, kwabasemzini, kusini na?”

UPetros uphendula esithi: “Kwabasemzini.”

UYesu uthi: “Bakhululekile ngoko bona oonyana.” Ekubeni uYise kaYesu enguKumkani wendalo iphela, Lowo unqulwayo etempileni, ngokwasemthethweni akuyomfuneko ngenene ukuba uNyana kaThixo ahlawule irhafu yetempile. “Kodwa ukuze singabakhubekisi, hamba uye elwandle, uphose umlobothi wakho, uthabathe loo ntlanzi ithe yavela tanci. Wothi wakuwunqika umlomo wayo, ufumane ishekele (iidrarhima ezine]; thabatha yona leyo ubanike, usenzelelela mna nawe,” utsho njalo uYesu.

Xa abafundi behlanganisana emva kokubuya kwabo eKapernahum, mhlawumbi endlwini kaPetros, bayabuza besithi: “Ngubani na ke omkhulu kunabanye, ebukumkanini bamazulu?” UYesu uyayazi into ebangela lo mbuzo wabo, ekubeni wayeyiqonda into eyayiqhubeka phakathi kwabo njengoko babehamba emva kwakhe endleleni evela eKesareya yakwaFilipu. Ngoko uyababuza esithi: “Nibe nicamanga ntoni na phakathi kwenu endleleni?” Bedanile, abafundi bathi tu, kuba babephikisene ngokuba ngubani omkhulu kunabanye.

Ekubeni sekudlule malunga neminyaka emithathu uYesu ebafundisa, ngaba ibonakala ingakholeleki into yokuba abafundi babe nempikiswano enjengale? Enyanisweni, oku kubonisa impembelelo enamandla yokungafezeki komntu, kuquka nemvelaphi engokonqulo. Unqulo lwamaYuda ababekhuliselwe kulo abafundi lwalubalaselisa isikhundla okanye isigxina akuso umntu kuyo yonke imicimbi. Ngaphezu koko, mhlawumbi uPetros, ngenxa yokuthenjiswa nguYesu ukuba wayeza kufumana “izitshixo” ezithile zoBukumkani, wazibon’ ubukhulu. UYakobi noYohane kusenokuba babeneengcinga ezifanayo ngenxa yokubabalwa ngokubona ukwenziwa kumila kumbi kukaYesu.

Enoba sasiyintoni na isizathu, uYesu wenza into eshukumisayo ngokuzama ukulungisa isimo sengqondo sabo. Ubiza umntwana, ammise phakathi kwabo, amwole, aze athi: “Ukuba anithanga niguquke, nibe njengabantwana aba, aniyi kukha ningene eBukumkanini bamazulu. Osukuba ngoko ethe wazithoba njengalo mntwana nguye omkhulu kunabanye ebukumkanini bamazulu. Kanjalo othe wamkela umntwana onje, noko amnye, egameni lam, wamkela mna.”

Enjani yona ukumangalisa indlela abaluleka ngayo abafundi bakhe! UYesu akathethi nabo ngokucaphuka aze athi banekratshi, bangamabawa okanye banamabhongo. Hayi, kodwa imfundiso yakhe yokululeka uyizekelisa ngabantwana, abaphawuleka bengabathozamileyo, abangenamabhongo nabathi ngokuqhelekileyo bangacingi ngesikhundla phakathi kwabo. Ngaloo ndlela uYesu ubonisa ukuba abafundi bakhe kufuneka bahlakulele iimpawu ezifanayo eziluphawu lwabantwana lokuthobeka. Kunjengokuba uYesu equkumbela ngokuthi: “Lowo umncinane phakathi kwenu nonke, ngoyena mkhulu.” Mateyu 17:22-27; 18:1-5; Marko 9:30-37; Luka 9:43-48.

◆ Ekubuyeni kwabo eKapernahum, yiyiphi imfundiso uYesu ayiphindayo, ibe yamkelwa njani?

◆ Kutheni uYesu enganyanzelekanga ukuhlawula irhafu yetempile, kodwa kungasiphi isizathu le nto eyihlawula?

◆ Mhlawumbi yintoni eyaphembelela impikiswano yabafundi, ibe uYesu wabaluleka njani?