Isahluko 16

Ukuzondelela Unqulo LukaYehova

ABAZALWANA bakaYesu ngonina—abanye oonyana bakaMariya—nguYakobi, uYose, uSimon noYuda. Ngaphambi kokuba bonke aba bahambe noYesu nabafundi bakhe ukuya eKapernahum, isixeko esingakuLwandle lwaseGalili, mhlawumbi bemisa kwikhaya labo eNazarete ukuze intsapho ilungiselele izinto eziya kuba yimfuneko.

Kodwa kutheni uYesu esiya eKapernahum, kunokuqhubeka nobulungiseleli bakhe eKana, eNazarete, okanye kwenye indawo kwiinduli zaseGalili? Phakathi kwezinye izinto, iKapernahum imi kwindawo entle gqitha yaye ngokucacileyo isisixeko esikhudlwana. Kwakhona, inkoliso yabafundi abatsha bakaYesu ihlala eKapernahum okanye kufuphi nayo, ngoko akuyi kufuneka bashiye amakhaya abo ukuze baze kufundiswa nguye.

Ebudeni bokuhlala kwakhe eKapernahum, uYesu wenza imimangaliso, njengoko engqina ngokwakhe kwiinyanga ezithile kamva. Kodwa kungadlulanga thuba lide uYesu nezinxulumani zakhe basendleleni kwakhona. Kusentwasahlobo, yaye basendleleni esinga eYerusalem besiya kwiPasika yowama-30 C.E. Ngoxa belapho, abafundi bakaYesu babona into ethile kuYesu mhlawumbi ababengazange bayibone ngaphambili.

NgokoMthetho kaThixo, amaSirayeli ayeyalelwe ukuba enze amadini ezilwanyana. Ngoko, ukubenzela lula, abarhwebi eYerusalem bathengisa izilwanyana okanye iintaka ukulungiselela le njongo. Kodwa bathengisa kanye phakathi etempileni, yaye bayabaqhatha abantu ngokubahlawulisa kakhulu.

Efuthekile ngumsindo, uYesu wenza isabhokhwe ngentsontelo aze abagxothele ngaphandle abo bathengisi. Uyichithela phantsi imali yabananisi aze azibhukuqe iitafile zabo. Abo bathengisa ngamahobe uyabangxolisa esithi: “Ezi zinto zisuseni apha; musani ukuyenza indlu kaBawo indlu yokuthengisela!”

Xa abafundi bakaYesu bekubona oku, bakhumbula isiprofeto esingoNyana kaThixo esithi: “Ukuzondelela indlu yakho kundidlile kanye.” Kodwa amaYuda ayambuza: “Usibonisa mqondiso mni na, uzenza nje ezi zinto?” UYesu uphendula esithi: “Yichitheni le tempile, mna ke ndiya kuyivusa ngeentsuku ezintathu.”

AmaYuda acinga ukuba uYesu uthetha ngetempile yokoqobo, ibe ayambuza: “Yayiminyaka imashumi mane anesithandathu nje isakhiwa le tempile, ke wena woyivusa ngeentsuku ezintathu na?” Noko ke, uYesu uthetha ngetempile engumzimba wakhe. Yaye kwiminyaka emithathu kamva, xa evuswa kwabafileyo abafundi bakhe bayawakhumbula la mazwi akhe. Yohane 2:12-22; Mateyu 13:55; Luka 4:23.

▪ Emva komtshato waseKana, ziziphi iindawo uYesu ahambela kuzo?

▪ Kutheni uYesu enomsindo nje, yaye wenza ntoni?

▪ Abafundi bakaYesu bakhumbula ntoni xa bebona izenzo zakhe?

▪ Uthini uYesu ‘ngale tempile,’ yaye uthetha ukuthini?