Imibuzo Evela Kubafundi
◼ Kwaqalisa nini ukuvakala kokuvuthela kwezithunywa zezulu amaxilongo asixhenxe ekuthethwa ngako kwiSityhilelo?
KwiSityhilelo izahluko 8, 9 nese-11, sifunda ngezithunywa zezulu ezisixhenxe ezavuthela amaxilongo asixhenxe, zivakalisa ngezibetho ezinamandla gqitha kwizahlulo zoluntu. Ezi zimela ukuvakaliswa kwemigwebo kaYehova eye yabhengezwa ngabantu bakaYehova ukutyhubela ixesha lesiphelo okwaqalisa ngokuphawulekayo ngendibano yowe-1922 eyayiseCedar Point.—Bona ISityhilelo—Incopho Yaso Ezukileyo Isondele!, isahluko sama-21 ukuya kwesama-23 nesahluko sama-26.
Ukuvuthelwa kwamaxilongo amane okuqala kubhenca imeko yokufa ngokomoya kwesahlulo ‘somhlaba’ ‘nolwandle’ seNgqobhoko, kwanemeko ewileyo yabefundisi nokuba sebumnyameni ngokomoya kweNgqobhoko.—ISityhilelo 8:7-12.
Imbali ibonisa ukuba ukubhencwa ekuhleni kwezi nyaniso enyanisweni kwaqalisa ngaphambi kowe-1922. Ngokomzekelo, intetho eyayinomxholo othi “Izigidi Eziphilayo Ngoku Azisayi Kuze Zife,” eyanikelwa okokuqala ngowe-1918 yaza yapapashwa njengencwadana ngowe-1920, yachaza ngokusilela kweNgqobhoko nangokusondela kwesiphelo seli hlabathi. IThe Golden Age kaSeptemba 29, 1920, yayibhenca ngokuphandle iNgqobhoko njengeziphethe kakubi, ibhedengu, nomlahlekisi wabantu.
Ngoko, kutheni le nto incwadi ethi Incopho YeSityhilelo isithi la maxilongo mane aqala ukuvuthelwa kwindibano eyayiseCedar Point ngowe-1922? Kungenxa yokuba kwaba ngelo xesha ekwathi kwakhutshwa isibhengezo esithi “mbhengezeni, mbhengezeni, mbhengezeni uKumkani noBukumkani,” nto leyo eyagxininisa ngamandla ukuqhubela phambili kumsebenzi wokushumayela. Inkupho yeMboniselo (yesiNgesi) kaNovemba 1, 1922, ithi: “Izihlobo . . . zayithabatha njengembalasane yendibano into yokuba ilungelo nomsebenzi wokwenene wabangcwele ngoku abasemhlabeni ukukubhengeza ubukho beNkosi, uKumkani omkhulu wookumkani, nokuba ubukumkani bakhe buyalawula, yaye le yeyona nto ibalulekileyo abafanele bayenze.”
Kwakhona ifanele iphawulwe into yokuba ngoxa zonke ezi zigidimi zomgwebo zine ziye zabhengezwa ekuhleni ngamaNgqina kaYehova ukususela ngowe-1922, kwathi ke ngethuba lokwamkelwa kwezigqibo ezine kwiindibano ezaqhutywa phakathi konyaka we-1922 nowe-1925 kwagxininiswa ngamandla kwisigidimi ngasinye. Imibhalo yezi zigqibo engamashumi ezigidi ngokulandelayo iye yasasazwa njengoncwadi olubhaliweyo, ngokucacileyo ibhenca imeko yokufa ngokomoya kweNgqobhoko.—Bona incwadi ethi Incopho YeSityhilelo, iphepha 133, isiqendu 15.
Ukuvuthelwa kwamaxilongo amathathu okugqibela kuquka ‘ooyeha.’ (ISityhilelo 8:13) Kwahlukile ekuvuthelweni kwamaxilongo okuqala amane kuba kona kubhekisela kwiziganeko ezingqalileyo. Ukuvuthelwa kwexilongo lesihlanu kubhekisela ekukhululweni kwabantu bakaThixo ‘enzonzobileni’ ngowe-1919. Okwesithandathu kunento yokwenza ‘nomkhosi wamahashe’ nohlaselo olukhulu lomsebenzi wokushumayela wezizwe ngezizwe owaqalisa ngowe-1922. Okwesixhenxe kunxulunyaniswa nokuzalwa koBukumkani bukaThixo ngowe-1914.—ISityhilelo 9:1-19; 11:15-19.
Ngasinye kwezi ziganeko sezisa uyeha kuSathana nehlabathi lakhe. Ukukhululwa kwabathanjiswa ngowe-1919 kwinzonzobila yokungasebenzi kwaba lulwamvila kubefundisi beNgqobhoko kwaza kwabonakalisa ukuyicekisa kukaYehova ngokupheleleyo. Ukususela ngowe-1922 ukuza kuthi ga namhlanje, umkhosi omkhulu wamahashe uye wayibulala iNgqobhoko, ngokomoya, ubhenca imeko yayo efileyo yaye ulumkisa ngentshabalalo yayo esondelayo. Ibe emva kokuzalwa koBukumkani ngowe-1914, uSathana wakhutshelwa ngaphandle ezulwini, eqhwaya inkathazo enkulu phakathi koluntu. Kungekudala uBukumkani buya kushenxisa inkqubo yoluntu ebonakala izinzile athe uSathana wayimisela (umhlaba), bulutshayela ngokupheleleyo uluntu olunemvukelo (ulwandle) eArmagedon.—ISityhilelo 11:17–12:12; 21:1.
Kwindibano eyayiseCedar Point ngowe-1922, bobathathu ‘ooyeha’ bathi bacaca kulo lonke ihlabathi. Uhlaselo lokushumayela olwaluqalisile ngoko lwakwenza kwacaca, ukuba “iinkumbi” zaziphumile ‘enzonzobileni’ ibe uhlaselo ‘lomkhosi wamahashe’ lwaluqhubeka. Ibe isibhengezo esichukumisayo sokubhengeza uKumkani noBukumkani sasivisisana ngokupheleleyo nokuvuthelwa kwexilongo lesixhenxe. Inkupho yeMboniselo (yesiNgesi) kaMatshi 1, 1925, yacacisa ukuba iziganeko zowe-1914, zowe-1919 nowe-1922 zazixelwe ngenx’ engaphambili kwiSityhilelo isahluko 12. Oku yayikukuqondwa okunzulwana kokuzalwa koBukumkani, ibe kwavakaliswa ngokuthembekileyo ngamaNgqina kaYehova. Ukongezelela, ukuvakaliswa kwale nkcazelo ingcungcuthekisayo kwagxininiswa ngokungakumbi ukususela ngexesha lokwamkelwa nokusasazwa kamva kwezigqibo ezinamandla ebudeni beendibano ezaqhutywa ukususela ngowe-1926 ukuya kowe-1928.—Bona ISityhilelo—Incopho Yaso Ezukileyo Isondele!, amaphepha 147, 149, 172.
Ngenxa yoko, ukuvuthelwa kwamaxilongo asixhenxe kwaqalisa ngowe-1922 kwaza kwaqhubela phambili ebudeni beminyaka yee-1920. Ukususela ngoko, abantu bakaYehova baye basebenzisana ngokungenaloyiko nezithunywa zezulu ekuxeleleni abantu bonke ukuba iNgqobhoko ifile ngokomoya, abefundisi bayo baziinkokeli eziwileyo, ibe kungekudala yona nayo yonke inkqubo yehlabathi ebusathanarha iya kutshatyalaliswa.