Imibuzo Evela Kubafundi
◼ Ngokuyintloko sisiphi isiluleko IMizekeliso 27:23 esinikelayo kubalusi bokomoya nakuwo onke amaKristu?
Le ndinyana ifundeka ngolu hlobo: “Khuthalela ukubazi ubume bempahla yakho emfutshane, yibhekise intliziyo yakho emihlambini yakho.” (IMizekeliso 27:23) Esi sibhalo siye sasetyenziswa ngokufuthi ukukhuthaza abalusi bokomoya ukuba babonakalise umdla kumaKristu asebandleni yaye bazazi iimeko neengxaki zawo. Ekubeni iBhayibhile ifanisa abadala nabalusi, yaye ibandla nomhlambi wezimvu, ukhuthazo olunjalo lufanelekile. (IZenzo 20:28, 29; 1 Petros 5:2-4) Kanti, nangona umgaqo ongasentla usebenza, ngokuyintloko le ndinyana ayibhekiseli kubalusi bokomoya.
Incwadi yeMizekeliso ineendinyana ezininzi ezizimeleyo njengamazwi angqalileyo asisiluleko, kodwa IMizekeliso 27:23 iyinxalenye yeqela leendinyana ezifundeka ngolu hlobo: “Khuthalela ukubazi ubume bempahla yakho emfutshane, yibhekise intliziyo yakho emihlambini yakho. Ngokuba ayingonaphakade ingqwebo; nesithsaba sesezizukulwana ngezizukulwana, yini na? Sithe tshabalala nje isikhotha, kuvela uhlaza, ihlanganisiwe imifuno yeentaba: amatakane ngawokukwambesa, ixabiso lentsimi ziinkunzi zeebhokhwe; amasi eebhokhwe alingene ukudla kwakho, nokudla kwendlu yakho, nokuphila komthinjana wakho.”—IMizekeliso 27:23-27.
Esi sicatshulwa siphefumlelweyo sibalaselisa ukubaluleka kokuba nenyameko ebomini, ukukhuthala, ukuphila ubomi obulula, nokwamkela isibakala sokuba sixhomekeke kuYehova. Sikwenza oku ngokubonisa ubomi bokwalusa bomalusi ongumSirayeli, mhlawumbi ngokwahlukileyo kubomi obutofotofo obusekelwe kushishino nobutyebi obufunyanwa ngokukhawuleza.
“Ingqwebo,” okanye ubutyebi obuzuzwe kushishino olutyebisa ngokukhawuleza, nokubaluleka (‘isithsaba’), zinokuthi shwaka lula, njengokuba abaninzi besenokukungqina oku. Ngaloo ndlela kuninzi okunokuthethwa ngobomi obulula, njengohlobo lobomi obabuphilwa ngabalusi bamandulo ukuze banyamekele imfuyo. Obo bomi babungelula ngengqiqo yokwenza unothanda. Kwakufuneka ukuba umalusi awunyamekele umhlambi wakhe, eqinisekisa ukuba izimvu zazikhuselekile. (INdumiso 23:4) Ukuba, ngoxa ezinyamekela, wayefumene imvu egulayo okanye eyenzakeleyo, wayenokuyithambisa ngeoli ephilisayo. (INdumiso 23:5; Hezekile 34:4; Zekariya 11:16) Kwiimeko ezininzi umalusi onenyameko owayebhekise intliziyo yakhe emihlambini yakhe wayeyibona imigudu yakhe isiba neziqhamo—ukwanda ngokuthe ngcembe komhlambi wakhe.
Umalusi okhutheleyo nonenyameko wayenomthombo onokuthenjwa woncedo—uYehova. Ngoba? Kaloku, nguThixo onika amaxesha nemijikelo ebangela kubekho utyani oluninzi lokondla umhlambi. (INdumiso 145:16) Xa, ngenxa yokuguquka kwamaxesha, utyani luphela kwimimandla esezantsi, lusenokuba luninzi kwiindawo eziphakamileyo, apho umalusi ophaphileyo anokuyisa khona impahla yakhe.
IMizekeliso 27:26, 27 ikhankanya omnye umphumo womsebenzi onjalo—ukudla nokwambesa. Kuyavunywa ukuba, inkcazelo ayichazi oni nooni bokudla okungaqhelekanga, yaye inganiki nomsébenzi isizathu sokulindela ezingayiwayo iimpahla zodidi oluphezulu. Kodwa ukuba wayekulungele ukwenza umgudu, umalusi nentsapho yakhe babenokufumana ubisi kumhlambi (yaye kulo isonka samasi), kwanoboya bokuluka iimpahla ezomeleleyo.
Ngoko icebiso elithi: “Khuthalela ukubazi ubume bempahla yakho emfutshane” ngokuyintloko alibhekiseli kubaveleli bokomoya; libhekisela kuwo onke amaKristu. Libalaselisa imbaluleka yokwaneliseka yinto edliwayo neyambathwayo ezuzwe ngokusebenza ngentembeko nangenkuthalo, sikholose ngelokuba uThixo akayi kusishiya. (INdumiso 37:25; 2 Tesalonika 3:8, 12; Hebhere 13:5) Xa sithelekisa IMizekeliso 27:23-27 nesiluleko esikuLuka 12:15-21 nesikweyoku-1 kuTimoti 6:6-11, sibona indlela icebiso likaThixo kulo mbandela ebelisoloko lilungelelene ngayo. Ngoko ngamnye wethu usenokuyifunda kwakhona IMizekeliso 27:23-27, aze azibuze, ‘Ngaba ndiwathabathela entliziyweni la mazwi ndize ndiwasebenzise kubomi bam bemihla ngemihla?’
[Inkcazelo Ngomfanekiso okwiphepha 30]
Pictorial Archive (Near Eastern History) Est.