Olunjani Uvuyo Lokuhlala Esithebeni SikaYehova!
Ngokubaliswa nguErnst Wauer
Namhlanje ngokwentelekiso kulula ngam ukuya kwiintlanganiso zamaNgqina kaYehova, ukufundisisa iBhayibhile, nokushumayela iindaba ezilungileyo zoBukumkani. Noko ke, oko bekungasoloko kunjalo apha eJamani. Xa uAdolf Hitler wayengumlawuli onguzwilakhe, ukususela ngowe-1933 ukusa kowe-1945, ukuba nenxaxheba kwimisebenzi enjalo yobuKristu kwakuthetha ukubeka esichengeni ubomi bukabani.
UNYAKA ngaphambi kokuba uHitler alawule, xa ndandineminyaka engama-30 ubudala, ndaqala ukudibana namaNgqina kaYehova eDresden. NgoJanuwari 1935, ndazahlulela kuYehova ndaza ndavakalisa umnqweno wam wokubhaptizwa. Umsebenzi wethu wawusele uvaliwe ngowe-1933, ngoko ndabuzwa oku: “Ngaba uyakuqonda oko kuthethwa sisigqibo sakho? Ubeka intsapho yakho, impilo, umsebenzi, inkululeko kwanobomi bakho esichengeni!”
Ndaphendula ndathi: “Ndizibalile iindleko, yaye ndikulungele ukwenza ukuthanda kukaThixo nokufa ngenxa yako.”
Nangaphambi kokubhaptizwa kwam, ndandisele ndiqalile ukushumayela kwindlu ngendlu. Kwenye indlu, ndadibana nenkokheli yolutsha inxibe iyunifomu yamaSS (Iqela likaHitler elinxiba Iihempe Ezimnyama/Umlindi Okhethiweyo) eyakhwaza isithi: “Akuyazi into yokuba oku ukwenzayo akuvumelekanga? Ndiza kukubizela abakwantsasana!”
Ndaphendula ngokuzolileyo ndathi: “Hamba ngoyibonayo. Ndithetha ngeBhayibhile kuphela, kwaye akukho mthetho uchasene noko.” Ukusuka apho ndaya kwindlu elandelayo yaye ngoko nangoko ndamkelwa linene elinobuhlobo. Akukho nto yandehlelayo.
Kungekudala ndanikwa imbopheleleko yokuba ndinyamekele isifundo seqela samaNgqina amahlanu ukuya kwasixhenxe awayedibana veki nganye. Sasifundisisa iinkupho zeMboniselo ezazingeniswe ngokungekho mthethweni eJamani zivela kumazwe aselumelwaneni. Phezu kwako nje ukuvalwa komsebenzi, sasihlala rhoqo “esithebeni sikaYehova” ukuze somelezeke emoyeni.—1 Korinte 10:21, NW.
Ukujamelana Nezilingo
Ngowe-1936, uJ. F. Rutherford, umongameli weWatch Tower Society, watyelela indibano eLucerne, eSwitzerland, waza wamema abazalwana ababekwizikhundla zokongamela ngokobuthixo eJamani ukuba beze. Ekubeni iincwadi zokundwendwela zabazalwana abaninzi zazihluthiwe nabazalwana abaliqela babebekwe esweni ngamapolisa, ngabambalwa kuphela abaphumelelayo. Umzalwana owongamela umsebenzi eDresden wandicela ukuba ndiye kummela eLucerne.
Ndabuza: “Ingathi ndisemncinane gqitha nje yaye andikabi namava?”
Wandiqinisekisa esithi: “Okubalayo ngoku kukuthembeka. Oko kokona kubalulekileyo.”
Kungadlulanga thuba lide ndibuyile eLucerne, ndabanjwa ndaza ngokukhawuleza ndahlulwa nomfazi wam, uEva, nakubantwana bethu ababini abancinane. Endleleni eya kwisikhululo samapolisa eDresden, ndaziqhekeza intloko ndicinga ngesibhalo esinokundikhokela. Ndakhumbula IMizekeliso 3:5, 6 ethi: “Kholosa ngoYehova ngentliziyo yakho yonke, ungayami okwakho ukuqonda. Uze umazi yena ezindleleni zakho zonke; wowulungelelanisa umendo wakho.” Ukukhumbula esi sicatshulwa kwandomeleza ndamelana noko kuncinwa okwesihlandlo sokuqala. Emva koko ndatshixelwa kwisisele esincinane, ndaza okwethutyana ndaziva ndilahliwe. Kodwa umthandazo onyanisekileyo kuYehova wandenza ndanoxolo.
Inkundla yandigweba iinyanga ezingama-27 entolongweni. Ndavalelwa ndedwa kangangonyaka kwintolongo yaseBautzen. Ngenye imini, umgwebi wenkundla odla umhlala phantsi—owayebambele omnye ummtu—wavula ucango lwesisele sam waza wathi ngovelwano: “Ndiyazi ukuba akuvumelekanga ukuba ufunde nantoni na, kodwa mhlawumbi ufuna okuthile kokuphumza ingqondo.” Akuba etshilo wathubelezisa amaphephancwadi amadala nambalwa athetha ngemicimbi yentsapho waza wathi: “Ndiza kuwaphuthuma ngokuhlwanje.”
Enyanisweni ndandingafuni nto ‘yokuphumza ingqondo.’ Ngoxa ndandivalelwe ndedwa, ndakhumbula izicatshulwa zeBhayibhile ndaza ndavelisa iintshumayelo ndaza ndazinikela ngokuvakalayo. Kodwa ndakrwaqula nje kula maphephancwadi ndifuna ukubona ukuba ayenazo na izicatshulwa zeZibhalo—ndaza ndafumana eziliqela! Esinye sasikumaFilipi 1:6, esifundeka ngolu hlobo ngokuyinxenye: “Ndikholose ngayo le nto, yokuba lowo wawuqala ngaphakathi kwenu umsebenzi olungileyo, wowufeza.” Ndambulela uYehova ngolu khuthazo.
Kamva ndasiwa kwinkampu yomsebenzi. Ndaza, ngentwasahlobo yowe-1939, xa ndandiseza kukhululwa, umlindi kule nkampu wandibuza enokuba iimbono zam zazingekaguquki na. Impendulo yam yathi: “Injongo yam kukuhlala ndithembekile elukholweni lwam.” Wandula ke wandazisa ukuba ndandiza kuthunyelwa kwinkampu yoxinaniso yaseSachsenhausen.
Apho ndanikezela ngeempahla zam zobuqu, ndahlamba, ndachetywa zonke iinwele ezisemzimbeni, ndaza ndanikwa iimpahla zasentlolongweni. Emva koko kwathiwa mandikhe ndihlambe, ngoku ndinxibe iimpahla—inkqubo eyayibizwa ngamaSS ngokuba “lubhaptizo.” Emva koko ndanyanzelwa ukuba ndime phandle, de kube sebusuku, ndimanzi tixi.
Kwezi nkampu amaNgqina kaYehova ayephathwa ngenkohlakalo ngokukhethekileyo ngamaSS. Kwizihlandlo ezininzi kwafuneka sime kwibala ekwamatshelwa kulo kangangexesha elide. Maxa wambi omnye wethu wayedla ngokungqukruleka athi: “Ngaba akunakuba mnandi ukufumana isidlo esimnandi ngokwenene?” Omnye wayedla ngokuphendula ngokuthi: “Musa ukumilisela ingqondo yakho kwizinto ezinjalo. Khawucinge nje ngendlela okuluzuko ngayo ukumela igama likaYehova noBukumkani bakhe.” Yaye omnye ebengongezelela athi: UYehova uya kusomeleza!” Ngale ndlela sasikhuthazana. Maxa wambi ukunqwala nje ngentloko ngobuhlobo kwakwanele ukuthi: “Ndifuna ukunyaniseka, nawe yenjenjalo!”
Ukudla Kokomoya Enkampini
Abathile babekhokela ekondleni abazalwana ngokomoya, yaye ndakhethwa ukuba ndibancedise. SasineBhayibhile eyinguqulelo kaLuther etyebileyo kuphela. Kambe ke, ukuba nayo kwakungavumelekanga. Ngoko obu butyebi babufihlwa, yaye kwisahlulo ngasinye sezisele yayingumzalwana omnye kuphela owayenelungelo lokuyisebenzisa okwexeshana elifutshane. Xa yayilithuba lam, bendidla ngokuzimela phantsi kwebhedi nesibane esincinane ndize ndifunde kangangemizuzu eli-15. Ndacengceleza izibhalo endandiza kuthi kamva ndizixubushe nabazalwana kwesi sahlulo sezisele zethu. Ngaloo ndlela, ukwabiwa kokudla kokomoya kwakulungiselelwe ukusa kwinqanaba elithile.
Bonke abazalwana babekhuthazelwa ukuba bathandaze kuYehova bacele ukudla kokomoya okungakumbi, yaye waziva izibongozo zethu. Ngobusika bowe-1939 ukusa kowe-1940 umzalwana owayesandul’ ukubanjwa wakwazi ukungenisa ngokungekho mthethweni iinkupho ezintsha eziliqela zeMboniselo enkampini ezifake emlenzeni wakhe womthi. Oku kwabonakala njengomlingo ekubeni bonke abantu babegocwagocwa ngenyameko.
La maphephancwadi, ukuze akhuseleke, ayefumaneka kubazalwana abathile abakhethekileyo imini enye ngexesha. Xa kwakusakhiwa igaraji, ngokutyhwatyhwa ndazimela emseleni ndaza ndafunda ngoxa umzalwana wayengumlindi ngaphandle. Ngesinye isihlandlo ndabeka IMboniselo phezu kwamathanga ebudeni “beyure yokuthunga” (ngengokuhlwa sasihlala kwizindlwana zethu zokwexeshana size silungise iiglavu zethu nezinye izinto), ngoxa abazalwana behleli emacaleni njengabalindi. Xa wayesiza umlindi weSS, ngokukhawuleza ndayifihla IMboniselo. Ukubhaqwa ndiyiphethe ngekwakuthethe ukuphulukana nobomi bam!
UYehova wasinceda ngendlela engummangaliso ukuba sizikhumbule iingcamango ezomelezayo kula manqaku. Ukudinwa gqitha ngokufuthi kwakudla ngokundibangela ukuba ndilale obentlombe ebusuku. Kodwa ngeengokuhlwa endithe ndafunda ngazo IMboniselo, ndandidla ngokuvuka amaxesha amaninzi ndize ndikhumbule ezo ngcamango ngokucacileyo. Abazalwana ababekhethiwe kwezinye izahlulo zezisele babesenza okufanayo. Ngaloo ndlela uYehova wayilola inkumbulo yethu ukuze sikwazi ukwaba ukudla kokomoya. Sakwenza oku ngokuthetha nomzalwana ngamnye ngokobuqu size simomeleze.
Ukuthembeka Kude Kuse Ekufeni
NgoSeptemba 15, ngowe-1939, iqela esasabelwe ukusebenza nalo kwafuneka limatshe ukubuyela enkampini ngaphambi kwexesha esasiqhele ukubuya ngalo. Sisiphi isiganeko esasiza kwenzeka? UAugust Dickmann, omnye wabazalwana bethu abaselula, wayeza kubulawelwa esidlangalaleni. AmaNazi ayeqinisekile ukuba oku kwakuza koyisela inali elikhulu lamaNgqina ukuba likhanyele ukholo lwalo. Emva kokubulawa kwakhe, onke amanye amabanjwa andululwa. Kodwa thina maNgqina kaYehova sasikhatshelwa ngokuxwaxwa njengoko sasisihla sinyuka ebaleni lokumatsha, sikhatywa yaye sibethwa nangeenduku de asakwazi nokushukuma. Saxelelwa ukuba sityobele isigqibo sokukhanyela ukholo lwethu; kungenjalo, nathi sasiza kudutyulwa.
Ngosuku olulandelayo, kwakungekho namnye utyobeleyo. Enyanisweni, ibanjwa eliselitsha, elalityobele ukufika kwalo, ngoku larhoxa kwisigqibo salo sokutyobela. Lakhetha ukufa nabazalwana balo kunokuba lishiye inkampu njengomngcatshi. Kwiinyanga ezilandelayo, sohlwaywa ngomsebenzi onzima kakhulu, ukuphathwa kakubi okuqhubekayo nokuvinjwa ukutya. Abazalwana bethu abangaphezu kwekhulu bafa ebudeni bobusika obabubanda gqitha bowe-1939 ukusa kowe-1940. Bayigcina ingqibelelo yabo kuYehova naseBukumkanini bakhe kwada kwasekupheleni.
Wandula ke uYehova wanikela isiqabu esithile. Abazalwana abaninzi basiwa kwezinye iinkampu ezazisandul’ ukwakhiwa ukuya kusebenza khona, apho bafumana ukutya okungakumbi. Ngaphezu koko, ukuxhatshazwa ngandlel’ ithile kwathotha. Ngentwasahlobo yowe-1940, ndasiwa kwinkampu yoxinaniso yaseNeuengamme.
Amalungiselelo Okomoya ENeuengamme
Ukufika kwam, kwakukho iqela lamaNgqina ayenokuba ngama-20, engenayo iBhayibhile okanye ezinye iimpapasho. Ndathandaza kuYehova ukuba andincede ndisebenzise izinto endandizifundile eSachsenhausen ukomeleza abazalwana eNeuengamme. Njengenyathelo lokuqala, ndakhumbula izibhalo ndaza ndakhetha zona njengengxubusho yemihla ngemihla. Kwenziwa amalungiselelo eentlanganiso apho ndandinakho ukucacisa iingongoma ezivela kumanqaku eMboniselo endandizifunde eSachsenhausen. Xa abazalwana abatsha bafikayo, banikela ingxelo ngezinto ababezifunde kwiiMboniselo ezazintsha ngoko.
Ngowe-1943 inani lamaNgqina kaYehova eNeuengamme lenyuka ukuya kuma-70. AmaNgqina kaYehova akhethelwa ukusebenza ngaphandle enkampini, njengokucoca emva kweentlaselo zasemoyeni. Ngenxa yoko, sasikwazi ukuza neeBhayibhile, imibhalo yeMboniselo, nezinye iincwadi zoMbutho neencwadana ezinemifanekiso ngokufihlakeleyo enkampini. Saphinda safumana iipasile ngeposi, zinoncwadi olongezelelekileyo kunye newayini ebomvu nesonka esingenagwele seSikhumbuzo sonyaka. Ngokucacileyo uYehova wabamfamekisa abo babehlola ezo pasile.
Sithe saa sinjalo kwezo ndlwana zethu zokwexeshana zahlukahlukeneyo, sabumba amaqela eSifundo seMboniselo asixhenxe, ngalinye linomqhubi nombambeli. Imibhalo yeMboniselo yayisenziwa ngokufihlakeleyo eofisini yenkampu yomphathi womzi wamajoni, apho ndandisebenza khona okwexeshana. Ngoko ke, ubuncinane iqela ngalinye lesifundo lalifumana inkupho yalo epheleleyo ukwenzela isifundo seeveki ngeeveki. Akukho nanye intlanganiso eyayirhoxiswa. Ukongezelela, ntsasa nganye kwibala lokumatshela, amaqela ayefumana umbhalo wetekisi yosuku, kuquka namagqabaza athatyathwe kwiMboniselo.
Xa amaSS ayesekhefini sakwazi ukuba nendibano yesiqingatha semini sixubusha ngendlela yokushumayela enkampini. Sayahlula-hlula inkampu yayimimandla saza sazama indlela yobuchule yokufikelela amabanjwa ‘ngeendaba ezilungileyo zobukumkani.’ (Mateyu 24:14) Ekubeni amabanjwa ayevela kumazwe ngamazwe, senza amaqweqwe obungqina ngeelwimi ezininzi awayechaza umsebenzi wethu noBukumkani. Sashumayela ngenzondelelo kangangokuba amabanjwa ezobupolitika akhalaza athi: “Apho uhamba khona, okuvayo yintetho engoYehova!” Ingxelo yenkonzo yasentsimini yomsebenzi wethu yada yafikelela kwiofisi yesebe laseBern, eSwitzerland.
Konke kwahamba kakuhle de amaGestapo ahlola zonke iinkampu zoxinaniso ngowe-1944. Indawo yethu yokugcina uncwadi eNeuengamme ayizange ifunyanwe, kodwa izinto ezimbalwa zafunyanwa kum nakuKarl Schwarzer. Kangangeentsuku ezintathu sasincinwa ngemibuzo yaye sibethwa. Xa ukulingwa okwakuqatha kwafikelela esiphelweni, sobabini sasigruzuke kanobom. Noko ke, ngoncedo lukaYehova, sasinda.
Iintsikelelo Zokomoya Ngobuninzi Bazo
Ndakhululwa ngamajoni omkhosi waMazwe Amanyeneyo ngoMeyi 1945. Usuku emva kokuba ndikhululwe, saqalisa uhambo kunye neqela elincinane labazalwana nabantu abanomdla. Sidiniwe, sahlala phantsi ngasequleni kwidolophana yokuqala esafika kuyo saza sasela amanzi. Ndiziva ndihlaziyekile, ndaya kwindlu ngendlu ndifake iBhayibhile ekhwapheni lam. Ibhinqa eliselula lalichukumisekile kukwazi ukuba amaNgqina kaYehova ebekwiinkampu zoxinaniso ngenxa yokholo lwawo. Lanyamalala ekhitshini lalo, labuya liphethe ubisi kunye namaqebengwana ukwenzela iqela lethu.
Emva koko, sisanxibe iimpahla zethu zasenkampini, savakalisa isigidimi soBukumkani kuyo yonke loo dolophana. Omnye ummi waloo dolophana wasimemela kwisidlo esikhulu. Wasilungiselela izinto ezazisinqabele kangangeminyaka. Onjani wona umbono oginyis’ ingwiqi! Kanti, asizange sikugxavule nje oko kutya. Sathandaza saza satya sizolile, ngendlela enesimilo. Oku kwabachukumisa ababukeli kangangokuba xa saqalisa iintlanganiso emva koko, bayiphulaphula intetho yeBhayibhile. Elinye ibhinqa lasamkela isigidimi yaye namhlanje lingudade wethu wokomoya.
Sahamba sinamava enyameko kaYehova ngeendlela ezimangalisayo. Enjani yona ukuzuka imvakalelo ekube yiyo ukuqhubeka sinandipha konke ukudla kokomoya okupapashwa yintlangano kaYehova yaye sisabelana ngako nabanye, ngoku sikhululekile! Kwiminyaka eyalandelayo, ukukholosa ngokupheleleyo ngoYehova bekunika umvuzo ngokuphindaphindiweyo.
Ukususela ngowe-1945 ukusa ngowe-1950, ndaba nelungelo lokukhonza kwiBheteli yaseMagdeburg yaye emva koko, de kwangowe-1955, kwiofisi yeWatch Tower Society eBerlin. Emva koko, ndakhonza njengomveleli ohambahambayo de kwangowe-1963, xa umfazi wam, uHilde, wavakalisa ukuba wayelindele umntwana. (UEva, umfazi wam wokuqala, wafa ebudeni bexesha lokubanjwa kwam, ndaza ndaphinda ndatshata ngowe-1958.) Kamva intombi yethu yaba liNgqina elinenzondelelo.
Kuthekani ngabantwana endabafumana kumtshato wokuqala? Ngelishwa, unyana wam akazange abonakalise mdla enyanisweni. Kodwa intombi yam uGisela yawubonakalisa, yaye waya kwisikolo sobuvangeli basemazweni saseGiliyadi ngowe-1953. Ngoku ukhonza kwenye yeeHolo zeNdibano eJamani, kunye nomyeni wakhe. Ngoncedo lukaYehova, ndiye ndakwazi ukukhonza apho uncedo belufuneka khona, okokuqala eFrankfurt naseTübingen.
Kude kube namhlanje ndiqhubeka ndinandipha onke amalungiselelo enziwa yintlangano kaYehova ukwenzela abendlu yakhe yokholo. (1 Timoti 3:15) Kule mihla yethu, kulula ukufumana ukudla kokomoya, kodwa ngaba sisoloko sikuxabisa? Ndiqinisekile ukuba uYehova uneentsikelelo azigcinele abo bakholosa ngaye, abahlala bethembekile, nabazondlayo esithebeni sakhe.
[Umzobo okwiphepha 26, 27]
(Ukuba ufuna inkcazelo ehlahlelwe kakuhle, yiya kwimpapasho)
INKAMPU YOXINANISO YASESACHSENHAUSEN
A. Izindlwana zokwexeshana zama-SS
B. Intendelezo ekubizelwa kuyo amagama abantu ukuze kubonwe ukuba bakho na
C. Isakhiwo sezisele
D. Ukuvalelwa wedwa
E. Indawo yokubulala iintwala
F. Indawo yokubulala
G. Igumbi elinegesi erhaxayo
[Picture of Ernst and Hilde Wauer on page 25]