Ulonwabo Lokwenyaniso Ekukhonzeni UYehova
“Hayi, uyolo lwalowo uluncedo lunguThixo kaYakobi, lwalowo ulinde kuYehova uThixo wakhe.”—INDUMISO 146:5.
1, 2. Kuye kwathiwani ngendlela yokuchaza ulonwabo, yaye luthetha ntoni ulonwabo kubantu abaninzi namhlanje?
LUYINTONI ulonwabo? Kangangeenkulungwane abahleli bezichazi-magama, izithandi zobulumko nabafundi ngezakwalizwi bebezama ukuluchaza. Kodwa abakaluchazi ngendlela eyamkelwa ngamxhelo-mnye. IEncyclopædia Britannica ithi: “‘Ulonwabo’ lelinye lawona magama angaqondakaliyo.” Kucacile ukuba igama elithi ulonwabo lithetha izinto ezahlukahlukeneyo kubantu abahlukahlukeneyo, kuxhomekeka kwimbono yabo ngobomi.
2 Kubantu abaninzi ulonwabo lusekelwe ekubeni nempilo entle, nezinto eziphathekayo, nobuhlobo obuvuyisayo. Sekunjalo, kukho abantu abanazo zonke ezo zinto kodwa abangonwabanga. Kumadoda namabhinqa azinikele kuYehova uThixo, iBhayibhile inikela ingcamango yolonwabo eyahluke gqitha kwimbono eqhelekileyo.
Imbono Eyahlukileyo Yolonwabo
3, 4. (a) Ngoobani uYesu awathi bonwabile? (b) Kunokuthiwani ngokubhekisele koothunywashe bolonwabo abakhankanywa nguYesu?
3 KwiNtshumayelo yakhe yaseNtabeni, uYesu Kristu akazange athi ulonwabo luxhomekeke kwimpilo entle, kwizinto eziphathekayo, nakwezinye izinto ezinjalo. Wathi bonwabe ngokwenene abo ‘bayiphapheleyo intswelo yabo yokomoya’ nabo ‘balambele nabanxanelwe ubulungisa.’ Aba thunywashe babini bafunekayo ukuze kubekho ulonwabo lokwenyaniso bahlobene nala mazwi kaYesu abonakala ephikisana nokuqhelekileyo: “Banoyolo abo balilayo, ekubeni beya kuthuthuzelwa.” (Mateyu 5:3-6, NW) Ngokucacileyo, uYesu wayengathethi kuthi ngokuzenzekelayo abantu babeya konwaba xa belahlekelwe ngumntu abamthandayo. Kunoko, wayethetha ngabo balusizi ngenxa yemeko yabo yesono nemiphumo yayo.
4 Umpostile uPawulos wathetha ngendalo engabantu encwinayo ngenxa yesono enethemba lokuba iya “kukhululwa ebukhobokeni bokonakala.” (Roma 8:21, 22) Abantu abamkela ilungiselelo likaYehova lokucamagushela izono ngedini lentlawulelo likaKristu nabenza ukuthanda kukaThixo bayathuthuzelwa ngokwenene baze bonwatyiswe. (Roma 4:6-8) KwiNtshumayelo yaseNtabeni, kwakhona uYesu wathi bonwabile “abanobulali,” “abanenceba,” “abahlambulukileyo intliziyo,” ‘nabaxolisi.’ Wanikela isiqinisekiso sokuba nakubeni betshutshiswa, abo bantu balulamileyo babengayi kuphelelwa lulonwabo lwabo. (Mateyu 5:5-11) Kubangel’ umdla ukuphawula ukuba aba thunywashe babalaseliswayo bolonwabo abenzi mahluko phakathi kwesityebi nehlwempu.
Isiseko Solonwabo Lokwenene
5. Lusekelwe enini ulonwabo lwabakhonzi bakaThixo abazahluleleyo?
5 Umthombo wolonwabo lokwenyaniso awukho kubutyebi bezinto eziphathekayo. UKumkani uSolomon owayelumkile wathi: “Intsikelelo kaYehova, yiyo etyebisayo, imbulaleko ayongezi nento kuyo.” (IMizekeliso 10:22) Kwizidalwa ezilwamkelayo ulongamo lukaYehova lwendalo iphela, ulonwabo nentsikelelo kaThixo yintlaka nexolo. Umntu ozinikeleyo onayo noyivayo intsikelelo kaYehova kuye wonwabe ngokwenyaniso. Ngokwembono yeBhayibhile, ulonwabo lubandakanya ukwaneliseka nokuxola kwinkonzo kaYehova.
6. Yintoni efunekayo kubantu bakaYehova ukuze bonwabe ngokwenene?
6 Ulonwabo lokwenyaniso luxhomekeke ekubeni nolwalamano oluhle noYehova. Lusekelwe kuthando ngoThixo nokuthembeka kuye. Abakhonzi bakaYehova abazinikeleyo bavumelana ngentliziyo epheleleyo nala mazwi kaPawulos: “Kuba akukho namnye kuthi uzidlelayo ubomi . . . sibudlela iNkosi . . . singabeNkosi.” (Roma 14:7, 8) Ngoko ke, ulonwabo lokwenyaniso alunakufunyanwa ngaphandle kokuthobela uYehova nokuzithoba ngovuyo ekwenzeni ukuthanda kwakhe. UYesu wathi: “Banoyolo abo balivayo ilizwi likaThixo baligcine.”—Luka 11:28.
Oothunywashe Bolonwabo Bokwexeshana
7, 8. (a) Oothunywashe bolonwabo banokwahlulwahlulwa njani? (b) Kunokuthiwani ngokutshata nokuba nabantwana?
7 Oothunywashe bolonwabo abangasentla basenokubizwa ngokuthi “ngabasisiseko,” okanye “abasisigxina,” kuba bayimfuneko ngamaxesha onke kubakhonzi bakaYehova abazinikeleyo. Ukongezelela, kukho abo kusenokuthiwa ngabokwexeshana, oothunywashe abasenokuluzisa ulonwabo ngaxa lithile kodwa ngelinye ixesha banikele ulonwabo olungephi okanye lungabikho kwaukubakho. Kumaxesha oosolusapho nawangaphambi kobuKristu, ukutshata nokuzala abantwana kwakugqalwa kungundoqo wolonwabo. Oku kubonakala kwisibongozo esibuhlungu uRakeli awasibhekisa kuYakobi: “Ndinike abantwana; ukuba akundiniki, ndofa.” (Genesis 30:1) Esi simo sengqondo ngokuzala abantwana sasifanelekile kwinjongo kaYehova ngelo xesha.—Genesis 13:14-16; 22:17.
8 Phakathi kwabantu bakaYehova bamandulo ukutshata nokuzala abantwana kwakugqalwa njengeentsikelelo ezivela kuThixo. Noko ke, kwakuphelekwa yimbandezelo nezinye iimeko ebudeni bamaxesha eentlekele kwimbali yabo. (Thelekisa INdumiso 127, 128 noYeremiya 6:12; 11:22; IZililo 2:19; 4:4, 5.) Ngoko ke, kucacile ukuba ukutshata nokuzala abantwana asingabo oothunywashe abasisigxina bolonwabo.
Ukonwaba Ungatshatanga Kumaxesha Angaphambili
9. Kutheni intombi kaYifeta yayibongwa minyaka yonke?
9 Abakhonzi bakaThixo abaninzi baye baluzuza ulonwabo lokwenyaniso bengatshatanga. Ngenxa yokuhlonela isifungo sikayise, intombi kaYifeta yahlala ingatshatanga. Kangangethuba elithile yona namaqabane ayo angamantombazana babulilela ubunyulu bayo. Kodwa olunjani lona uvuyo eyaba nalo ngokukhonza ixesha elizeleyo endlwini kaYehova, mhlawumbi phakathi ‘kwabafazi ababekhonza emnyango wentente yokuhlangana’! (Eksodus 38:8) Ngenxa yoku, yayibongwa minyaka yonke.—ABagwebi 11:37-40.
10. UYehova wafuna ukuba enze ntoni uYeremiya, yaye ngaba kubonakala ngathi waphila ubomi bokungonwabi ngenxa yoko?
10 Ngenxa yamaxesha anzima umprofeti uYeremiya awayephila kuwo, uThixo wafuna ukuba ahlale engatshatanga yaye angakhulisi bantwana. (Yeremiya 16:1-4) Kodwa uYeremiya wazibonela ubunyaniso bamazwi kaThixo: “Isikelelwe indoda ekholose ngoYehova, enkoloseko ikuYehova.” (Yeremiya 17:7) Kuyo yonke iminyaka engaphezu kwama-40 yokukhonza njengomprofeti, uYeremiya wamkhonza uThixo ngokuthembeka eyindoda engatshatanga. Ngokolwazi lwethu, akazange atshate aze abe nabantwana. Kanti, ngubani onokukuthandabuza ukuba uYeremiya wayonwabile, njengentsalela ethembekileyo yamaYuda eyathi ‘yavuyiswa kukulunga kukaYehova’?—Yeremiya 31:12, NW.
11. Yiyiphi imizekelo engokweZibhalo yabakhonzi bakaYehova abathembekileyo ababonwabile nangona babengenawo amaqabane omtshato?
11 Kukho nabanye abantu abaninzi abaye bamkhonza uYehova ngovuyo bengenamaqabane omtshato. Babengatshatanga, bengabahlolokazi okanye bengabahlolo. Phakathi kwabo kwakukho umprofetikazi uAna; mhlawumbi uDorkas, okanye uTabhita; umpostile uPawulos; noyena ungumzekelo obalaseleyo kubo bonke—uYesu Kristu.
Ukonwaba Ngoxa Ungatshatanga Namhlanje
12. Yintoni abanye babakhonzi bakaYehova abonwabileyo nabazahluleleyo abaye bayivulela ithuba namhlanje, yaye ngoba?
12 Namhlanje, amawaka amaNgqina kaYehova akhonza uThixo ngokuthembekileyo engenamaqabane omtshato. Wambi aye akwazi ukwamkela esi simemo sikaYesu: “Lowo unokuvulela ithuba [lesiphiwo sokungatshati] makakuvulele ithuba.” Oku bakwenze “ngenxa yobukumkani bamazulu.” (Mateyu 19:11, 12, NW) Oko kuthetha ukuba baye bayisebenzisa kakuhle inkululeko abayinikwe nguThixo ngokunikela ixesha namandla angakumbi ekuhambiseleni phambili izilangazelelo zoBukumkani. Abaninzi kubo bakhonza njengoovulindlela, abavangeli basemazweni, okanye amalungu entsapho yaseBheteli kwikomkhulu lehlabathi leWatch Tower Society okanye kwelinye lamasebe ayo.
13. Yiyiphi imizekelo ebonisa ukuba umKristu unokungatshati aze onwabe?
13 Omnye udade othandekayo nosele ekhulile wabhala ibali elingobomi bakhe kwibali elinomxholo othi “Ukuhlala Ndingatshatanga Yaye Ndonwabile Njengovulindlela.” (IMboniselo kaMeyi 1, 1985, iphepha 23-6) Omnye udade ongatshatanga owachitha iminyaka engaphezu kwama-50 ekhonza eBheteli wathi: “Ndaneliseke ngokupheleleyo bubomi bam nangumsebenzi wam. Ngoku ndixakeke ngakumbi kunanini na ngaphambili kumsebenzi endiwuthanda ngokuncamisileyo. Andinazinto ndikhala ngazo. Bendiya kwenza kwaesi sigqibo kwakhona.”—IMboniselo kaDisemba 1, 1982, iphepha 17.
14, 15. (a) Ngokutsho kompostile uPawulos, kufuneka ntoni ukuze ubani ahlale engatshatanga? (b) Kutheni uPawulos esithi umntu ongatshatanga “nguyena ukholisayo” yaye “unoyolo ngakumbi”?
14 Phawula elo gama lithi ‘isigqibo.’ UPawulos wabhala: “Ukuba nabani na umile eqinile entliziyweni yakhe, engaxakwe nto, enegunya ke lokwenza ngokuthanda kwakhe, kananjalo esenze entliziyweni yakhe esi sigqibo, ukuba azigcine enyulu, wenza kakuhle. Ngenxa yoko nalowo unikela ubunyulu bakhe emtshatweni wenza kakuhle, kodwa lowo ungabunikeliyo emtshatweni nguyena ukholisayo.” (1 Korinte 7:37, 38, NW) Kutheni kusithiwa “nguyena ukholisayo”? UPawulos wacacisa: “Ndithanda ukuba ningabi naxhala. Ongazekileyo uxhalela izinto zeNkosi, ukuba angathini na ukuyikholisa iNkosi. . . . Ongendileyo uxhalela izinto zeNkosi . . . Oku ke ndikuthetha ndisingisele kokunilungeleyo, . . . ukuba nizibeke, nihlale nihleli kakuhle eNkosini, ningakruthakrutheki.”—1 Korinte 7:32-35.
15 Ngaba ‘ukuhlala uhleli eNkosini ungakruthakrutheki’ ngenxa yolonwabo ‘lokukholisa iNkosi’ kunxibelelene? Kubonakala ukuba uPawulos wayecinga ngolo hlobo. Ethetha ngomhlolokazi ongumKristu, wathi: “Ukhululekile, angendiselwa kwayithandayo, kodwa ke ngokwaseNkosini. Noko ke unoyolo ngakumbi, ukuba uthe wahlala enjengoko anjalo, ngokwam mna ukubona; ndiba ke ndinaye nam uMoya kaThixo.”—1 Korinte 7:39, 40.
Iingenelo Zokungatshati
16. Ziziphi ezinye zeengenelo ezinanditshwa ngamaNgqina kaYehova angatshatanga?
16 Enoba umKristu akatshatanga ngenxa yesigqibo sobuqu okanye unyanzelwa ziimeko, imeko yokungatshati imzisela iingenelo ezininzi. Ngokuqhelekileyo abantu abangatshatanga banexesha elingakumbi lokufundisisa iLizwi likaThixo nokucamngca ngalo. Ukuba bayisebenzisa ngokunenzuzo le meko, ubumoya babo buyakhula. Ekubeni bengenaqabane lamtshato lokwabelana nabo ngeengxaki zabo, abaninzi bafunda ukukholosa ngakumbi ngoYehova nokufuna ulwalathiso lwakhe ezintweni zonke. (INdumiso 37:5) Oku kwenza babe nolwalamano olusondele ngakumbi noYehova.
17, 18. (a) Ngawaphi amathuba enkonzo awandisiweyo avulekele abakhonzi bakaYehova abangatshatanga? (b) Abakhonzi bakaYehova abathile abangatshatanga baye baluchaza njani ulonwabo lwabo?
17 AmaKristu angatshatanga avulekelwe ngamathuba awandisiweyo enkonzo yokudumisa uYehova. Uqeqesho olukhethekileyo ngoku olunikelwa kwiSikolo Sokuqeqesha Abalungiseleli lupheleliselwe kubazalwana abangatshatanga okanye abahlolo. Kwanoodade abangatshatanga bakhululeke ngakumbi ukuba bazabalazele amalungelo angakumbi kwinkonzo kaThixo. Udade okhulileyo okhankanywe ngaphambilana wazinikela ukuba aye kukhonza kwilizwe laseAfrika ngexesha laxa wayesele ‘engumfazi ongenamzimba noneminyaka engaphaya kwama-50 ubudala,’ xa sicaphula amazwi akhe. Yaye wahlala apho, kwanasebudeni bokuvalwa komsebenzi, xa bonke abavangeli basemazweni babegxothiwe. Usakhonza apho nangoku njengovulindlela, nangona ngoku eneminyaka engaphezu kwama-80 ubudala. Ngaba wonwabile? Kwibali lobomi bakhe wabhala: “Ndandikwazi ukusebenzisa inkululeko engakumbi nokuhambahamba abantu abangatshatanga abanayo ukuze ndizigcine ndixakekile kubulungiseleli, yaye oku kundizisele ulonwabo olukhulu. . . . Ukutyhubela le minyaka ulwalamano lwam noYehova luye lwanzulu ngakumbi. Njengomfazi ongatshatanga kwilizwe laseAfrika, ndiye ndambona enguMkhuseli.”
18 Kwakhona, okuphawulekayo ngamazwi omzalwana owakhonza kwikomkhulu leWatch Tower Society kangangamashumi eminyaka. Wayonwabile, nangona engazange atshate yaye enethemba lokuya ezulwini apho kungekho themba lakutshata. Xa wayeneminyaka engama-79 ubudala, wabhala: “Yonke imihla ngomthandazo ndiyamcela uBawo wethu othandekayo wasezulwini ukuba andincede aze andiphe ubulumko bokuzigcina ndiphilile ngokomoya nasemzimbeni yaye ndomelele ukuze ndiqhubeke ndisenza ukuthanda kwakhe okungcwele. Ngokwenene kule minyaka ingamashumi amane anethoba ndikwinkonzo kaYehova ndiye ndanandipha ubomi obonwabisayo, obunomvuzo nobusikelelekileyo. Yaye ngobabalo lukaYehova ndikhangele phambili ekuqhubekeni nenkonzo yakhe ukuze ahlonelwe yaye azukiswe nokuze abantu bakhe basikelelwe. . . . Uvuyo lukaYehova luyandinceda ukuba ndilulwele ukholo, ndikhangele phambili kwixesha lokupheliswa kweentshaba zikaYehova kwaye wonke umhlaba uzaliswe luzuko lwakhe.”—Numeri 14:21; Nehemiya 8:10; The Watchtower kaNovemba 15, 1968, iphepha 699-702.
Ulonwabo Lokwenyaniso Luxhomekeke Enini?
19. Ulonwabo lwethu luya kuhlala luxhomekeke enini?
19 Ulwalamano lwethu oluxabisekileyo noYehova, inkoliseko yakhe nentsikelelo yakhe—aba ngoothunywashe abaya kusizisela ulonwabo lokwenyaniso lukanaphakade. Benale mbono ifanelekileyo ngomthombo wolonwabo lokwenyaniso, kwanabakhonzi bakaYehova abatshatileyo bayaqonda ukuba umtshato wabo awuyiyo eyona nto ibalulekileyo kubomi babo. Bathobela isiluleko sompostile uPawulos: “Nditsho ke, bazalwana, ukuthi, ixesha lifinyele, ukuze kwelisaseleyo bathi nabo banabafazi, babe njengabangenabo.” (1 Korinte 7:29) Oku akuthethi ukuba bayabatyeshela abafazi babo. Amadoda angamaKristu aqolileyo abeka inkonzo kaYehova tanci, yaye benjenjalo nabafazi bawo abahlonel’ uThixo, abanothando nabawaxhasayo amadoda abo, bambi bade bakhonze ixesha elizeleyo njengamaqabane awo.—IMizekeliso 31:10-12, 28; Mateyu 6:33.
20. Sisiphi isimo sengqondo esifanelekileyo amaKristu amaninzi anaso ngamalungelo awo omtshato?
20 Abazalwana abatshatileyo abangabaveleli abahambahambayo, abasebenzi bokuzithandela baseBheteli, abadala bamabandla—eneneni, onke amaKristu atshatileyo abeka izilangazelelo zoBukumkani tanci—‘abalixhamli eli hlabathi’; basebenzela ukuvisisanisa amalungelo abo omtshato nobomi babo bokuzinikela kwinkonzo kaYehova. (1 Korinte 7:31) Sekunjalo, bonwabile. Kutheni? Kungenxa yokuba isizathu esibalaseleyo solonwabo lwabo asingomtshato wabo koko yinkonzo yabo kuYehova. Yaye amadoda nabafazi abaninzi—ewe, kwanabantwana babo—bonwabile kuba izinto zimi ngolo hlobo.
21, 22. (a) Ngenxa yoko kutshiwo kuYeremiya 9:23, 24, yintoni efanele isizalise ngolonwabo? (b) Ngabaphi oothunywashe bolonwabo abakhankanyiweyo kwiMizekeliso 3:13-18?
21 Umprofeti uYeremiya wabhala: “Utsho uYehova ukuthi, Isilumko masingaqhayisi ngobulumko baso, igorha malingaqhayisi ngobugorha balo, isityebi masingaqhayisi ngobutyebi baso. Oqhayisayo makaqhayise ngale nto yokuba endiqiqa, endazi mna ukuba ndinguYehova, owenza inceba, nesiko, nobulungisa, ehlabathini; ngokuba ndinanze ezo zinto; utsho uYehova.”—Yeremiya 9:23, 24.
22 Enoba asitshatanga okanye sitshatile, owona mthombo mkhulu wolonwabo lwethu ufanele ube lulwazi lwethu ngoYehova nolweyiseko lokuba uya kusisikelela ngenxa yokuba senza ukuthanda kwakhe. Kwakhona sonwabile kuba sikuqonda oko ikuko imilinganiselo yokwenyaniso, izinto uYehova avuyiswayo zizo. UKumkani uSolomon owayetshate izihlandlo ezininzi wayengawugqali umtshato njengokuphela kwesikhokelo solonwabo. Wathi: “Hayi, uyolo lomntu ofumene ubulumko, lomntu ozuze ingqondo! Kuba lulungile urhwebo lwabo ngaphezu korhwebo lwesilivere, nongeniselo lwabo ngaphezu kwegolide embiweyo. Bunqabile bona ngaphezu kwekorale, nezinto zakho zonke ezinqwenelekayo azilingani nabo. Imihla emide isesandleni sabo sokunene, kwesokhohlo sabo bubutyebi nozuko. Iindlela zabo ziindlela ezimnandi, wonke umendo wabo uluxolo. Bungumthi wobomi kwababambelela kubo, unoyolo obubambayo.”—IMizekeliso 3:13-18.
23, 24. Kutheni sinokuqiniseka ukuba bonke abakhonzi bakaYehova abathembekileyo baya konwaba kwinkqubo entsha yezinto?
23 Kwanga abo batshatileyo kuthi bangafumana uvuyo oluhlala luhleli ekwenzeni ukuthanda kukaThixo. Yaye ngamana abazalwana noodade wethu abathandekayo abangatshatanga ngokuzikhethela okanye ngokunyanzeliswa ziimeko bangazinyamezela zonke iimvavanyo abahlangana nazo yaye bafumane ulonwabo nolwaneliseko ekukhonzeni uYehova ngoku nangonaphakade. (Luka 18:29, 30; 2 Petros 3:11-13) Kwinkqubo yezinto kaThixo ezayo, ziya kuvulwa “iincwadi.” (ISityhilelo 20:12) Kwezi kuya kuba kubhalwe imithetho nemiyalelo emitsha nechulumancisayo eya kuba negalelo kulonwabo lwabantu abathobelayo.
24 Ngokuqinisekileyo, sinokuqiniseka ukuba ‘uThixo wethu owonwabileyo’ usigcinele izinto ezilunge ngokumangalisayo eziya kusizisela ulonwabo olupheleleyo. (1 Timoti 1:11, NW) UThixo uya kuqhubeka ‘esivula isandla sakhe azihluthise zonke izinto eziphilileyo.’ (INdumiso 145:16) Akumangalisi ke ngoko ukuba kukho yaye kuya kuhlala kukho ulonwabo lokwenyaniso ekukhonzeni uYehova.
Ubuya Kuphendula Uthini?
◻ Lusekelwe enini ulonwabo lwabakhonzi bakaYehova abazahluleleyo?
◻ Ngamaxesha okubhalwa kweBhayibhile, yayingoobani abanye babakhonzi bakaYehova abangatshatanga ababonwabile?
◻ Kwakutheni ukuze uPawulos ancomele ukungatshati, yaye amanye amaKristu aye ayifumana njani le iyindlela eyonwabisayo yobomi?
◻ Ulonwabo lwethu luya kusoloko luxhomekeke enini?
◻ Kutheni sinokuqiniseka ukuba bonke abathembekileyo baya konwaba kwinkqubo entsha yezinto?
[Umfanekiso okwiphepha 16]
Oodade abaninzi abangatshatanga bakhonza uYehova ngolonwabo njengabalungiseleli bexesha elizeleyo
[Umfanekiso okwiphepha 18]
Ukukhonza izilangazelelo zikaYehova kungumthombo oyintloko wolonwabo