Ukubandezeleka Kwentsapho—Umqondiso Wamaxesha Esiphila Kuwo

UKUNXUNGUPHALA kwentsapho—abaninzi bakugqala njengomqondiso wokuba imigaqo engokwesithethe yomtshato neyokukhulisa abantwana iphelelwe lixesha. Abanye bakubona njengomphumo weepolitiki, ezoqoqosho nowokuguquka kwezentlalo. Sekunjalo abanye bakubona kusongeza kwenye intlekele yobugcisa banamhlanje. Enyanisweni iingxaki iintsapho ezilwisana nazo namhlanje zalatha kwinto ebaluleke ngakumbi. Phawula amazwi eBhayibhile akweyesi-2 kuTimoti 3:1-4:

“Kwazi oku, ukuba ngemihla yokugqibela kuya kufika amaxesha anomngcipheko. Kuba abantu baya kuba ngabazithandayo, abathandi bemali, abaqhankqalazi, abakratshi, abanyelisi, abangeva bazali, abangabuleliyo, abangengcwele, abangenabubele, abangenatarhu, abatyholi, abangenakuzeyisa, izibhoja, abangenakuthanda kulunga, abancethezi, izityhuthutyhuthu, abathiwe lwale likratshi, abathandi beziyolo kunokuba bathande uThixo.”

Ngaba la mazwi awachazi kanye isizekabani seengxaki zanamhlanje? Ngokucacileyo ukubandezeleka kweentsapho namhlanje kungumphumo ongqalileyo weemeko ekwaprofetwa ngazo ezaziza kwenzeka ebudeni bale mihla yokugqibela yehlabathi. Yaye kukho ubungqina obuqinisekileyo bokuba eli xesha lokubandezeleka laqala ngowe-1914.a Ukususela ngoko, impembelelo yesidalwa esingumoya esingaphezulu kunomntu esibizwa ngokuba nguSathana uMtyholi iye yaba yetshabalalisa ngokukhethekileyo.—Mateyu 4:8-10; 1 Yohane 5:19.

Ephoselwe kummandla wasemhlabeni ukususela ngowe-1914, uSathana ‘unomsindo omkhulu, esazi nje ukuba ixesha analo lincinane.’ (ISityhilelo 12:7-12) Ekubeni uSathana elutshaba oluvunyiweyo lukaThixo “ebizwe ngaye yonke imizalwane esemazulwini nesemhlabeni,” ngaba kuyamangalisa ukuba umhlaba uye wayindawo eyingozi kakhulu kwiintsapho? (Efese 3:15) USathana uzimisele ukutyekisa bonke abantu kuThixo. Yiyiphi indlela elunge ngakumbi anokukufeza ngayo oku kunokuhlasela iintsapho ngeengxaki?

Kuya kufuneka okungaphezulu kuneenkcazelo ezingacingisiswanga neziqikelelwayo zeengcali ukuze kukhuselwe iintsapho kuhlaselo olunjalo olungaphaya kwamandla omntu. Sekunjalo, iBhayibhile ithi ngoSathana: “Kuba amaqhinga akhe siyawazi.” (2 Korinte 2:11) Kukho umlinganiselo othile wenkuseleko ekwazini ezinye zeendlela ezingqalileyo azisebenzisayo ekuhlaseleni.

Imali Nomsebenzi

Ingcinezelo yezoqoqosho isesinye sezona zixhobo zinamandla uSathana azisebenzisayo ekuhlaseleni. La ‘ngamaxesha anomngcipheko,’ okanye njengokuba iRevised Standard Version iyiguqulela ngolu hlobo eyesi-2 kuTimoti 3:1, “amaxesha onxunguphalo.” Kumazwe asakhasayo, iingxaki ezinjengokungaqeshwa, imivuzo ephantsi nokunqongophala kwezinto ezisisiseko ezifunekayo kubangela ubunzima ezintsatsheni. Noko ke, nakwiUnited States ebonakala ililizwe elifumileyo, ingcinezelo yezoqoqosho inomphumo onzulu gqitha. Olunye uhlolisiso lwaseUnited States lwatyhila ukuba imali ingomnye unobangela oyintloko weengxwabangxwaba zentsapho. Incwadi ethi Secrets of Strong Families ichaza ukuba “ixesha, ingqalelo, namandla” anikelwa ekuhlangabezaneni neemfuno zempangelo asenokuba “lutshaba oluchuliweyo” lokutshabalalisa ukuzibophelela emtshatweni.

Iimeko ziye zanyanzelela amabhinqa amaninzi ukuba afune umsebenzi. Umbhali uVance Packard uthi: “Okwangoku, ubuncinane enye kwiimveku nakwiintsana ezine zaseMerika ezingaphantsi kweminyaka emithathu inomama ophangelayo.” Ukunyamekela iimfuno eziphantse zinganeliswa zabantwana abancinane kuquka nezempangelo kusenokuba ngumgudu onzima nodinayo—kunemiphumo emibi kubazali nakubantwana. Lo kaPackard walek’ umsundulo esithi ngenxa yokunqongophala kwamalungiselelo okunyamekela abantwana ngokufanelekileyo eUnited States, “izigidi ezimbalwa zabantwana namhlanje azifumani nyameko ifanelekileyo kwiminyaka yazo yokuqala.”—Our Endangered Children.

Ngokufuthi kwindawo yempangelo imvisiswano yentsapho ijongelwa phantsi. Abasebenzi abaninzi bahendelwa ekuziphatheni okubi ngokwesini nabanye abantu abasebenza nabo. Sekunjalo abanye babandakanyeka kusukelo olulilize lwempumelelo baze bancame ubomi babo bentsapho ukuze benze inkqubela kumsebenzi wabo. (Thelekisa INtshumayeli 4:4.) Enye indoda yaxakeka gqitha kumsebenzi wayo njengommeli wentengiso kangangokuba umfazi wayo wazichaza ‘njengomzali ongenaqabane lomtshato noyide facto [ofanele akhulise abantwana eyedwa].’

Amaqhina Omtshato Abuthathaka

Umanyano lomtshato nalo luye lwahlaselwa. Incwadi ethi The Intimate Environment ithi: “Mandulo, kwakulindeleke ukuba isibini sihlale sitshatile de elinye iqabane lenze isono esinzulu emtshatweni—ukukrexeza, inkohlakalo nokutyeshela ngokugqith’ emgceni. Ngoku inkoliso yabantu ibona injongo yomtshato njengokuzanelisa komntu siqu.” Ewe, umtshato ugqalwa njengeyeza lokuphelisa ukungonwabi, ukukruquka, okanye ukuba lilolo—ingekokuzibophelela komnye umntu ubomi bakho bonke. Ngoku kujongwe koko ukuzuzayo emtshatweni, ingekuko oko ukunikelayo kuwo. (Thelekisa iZenzo 20:35.) Le “nguquko ingaka kwimilinganiselo engqonge umtshato” iye yawenza buthathaka gqitha amaqhina omtshato. Xa inzuzo yobuqu ingasafumaneki, ngokufuthi izibini zibhenela ekuqhawuleni umtshato njengesicombululo esikhawulezileyo.

Abantu bale “mihla yokugqibela” bachazwa kwisiprofeto seBhayibhile ‘njengabanokumila kokuhlonela uThixo, ukanti bayawakhanyela amandla ako.’ (2 Timoti 3:4, 5) Iingcali ezininzi zivakalelwa kukuba ukuphambuka elunqulweni kuye kwanendima ekuwusingeleni phantsi umtshato. Kwincwadi yakhe ethi The Case Against Divorce, uGqr. Diane Medved wabhala oku: “Ngokutsho kwenkoliso yeenkonzo, uThixo wathi umtshato wawumele uhlale ngokusisigxina. Xa ungaqinisekanga ngoThixo okanye ungakholelwa Kuye, ngoko yenza oko kufunwa nguwe.” Ngenxa yoko, xa umtshato uneengxaki, izibini azisifuni isicombululo esisengqiqweni. “Ngokungxama zisuka ziwuqhawule umtshato.”

Ulutsha Oluhlaselwayo

Abantwana batsala nzima ngenxa yeengcinezelo zanamhlanje. Amanani awothusayo abantwana babethwa ngokunogonyamelo baze bathukwe okanye baxhatshazwe ngokwesini ngabazali babo. Ngenxa yoqhawulo-mtshato, izigidi ezingakumbi zohluthwa ilungelo lokuba nempembelelo enothando yabazali ababini yaye intlungu yokuqhawula umtshato kwabazali ngokufuthi ihlala ikho ubomi babo bonke.

Ulutsha luhlaselwa yimpembelelo enamandla kakhulu. Kuya kuthi kufika ixesha laxa oselula waseMerika eneminyaka eli-14 ubudala, abe sele ebone ukubulawa kwabantu abali-18 000 nezinye iintlobo ezininzi zogonyamelo, zokuziphatha okubi ngokwesini, zezenzo zesini zogonyamelo, nolwaphulo-mthetho ngokusuka nje abukele umabonwakude. Kwanomculo unamandla amakhulu kulutsha, yaye uninzi lwawo awunasidima ngokothusayo, uthetha ngesini ngokuphandle okanye ude uquke izinto ezibusathanarha. Izikolo zichanaba ulutsha ngeemfundiso ezinjengendaleko ezityekele ekulusingeleni phantsi ukholo kuThixo naseBhayibhileni. Ingcinezelo yoontanga ixhokonxela uninzi ukuba lube neentlobano zesini ngaphambi komtshato yaye lusebenzise kakubi iziselo ezinxilisayo okanye iziyobisi.

Isizekabani Sokubandezeleka Kweentsapho

Ngoko ke ukuhlaselwa kweentsapho kuxhaphakile yaye kunokutshabalalisa. Yintoni enokunceda iintsapho zisinde? Umcebisi weentsapho uJohn Bradshaw unikela eli cebiso: “Imigaqo yethu engokukhulisa abantwana iye ayahlaziywa ngokunzulu kangangeminyaka eli-150. . . . Ndikholelwa kwelokuba imigaqo yakudala ayisasebenzi.” Noko ke, imigaqo eyilwe ngabantu ayisosicombululo. UYehova uThixo unguMsunguli wentsapho. Uyazi ngaphezu kwakhe nawuphi na umntu indlela ebaluleke ngayo indima yobomi bentsapho kulonwabo lwethu lobuqu noko kufunekayo ukuze intsapho yonwabe ize yomelele. Ngaba kufanele kusimangalise ukuba iLizwi lakhe, iBhayibhile, linikela isicombululo ekubandezelekeni kweentsapho?

Loo ncwadi yamandulo icacisa indlela ubomi bentsapho obaphambuka ngayo. Isibini sokuqala esingabantu, uAdam noEva, babekwa kumyezo omhle baza banikwa ucelomngeni olunomvuzo lokuba baguqulele umhlaba wonke ube yiparadisi. UThixo wayalela uAdam ukuba wayeya kuba yintloko yentsapho. UEva wayeya kusebenzisana nobuntloko bakhe ‘njengomncedi,’ okanye ‘njengomphelelisi’ wakhe. Kodwa uEva walivukela eli lungiselelo. Wabubhukuqa ubuntloko bendoda yakhe waza akasithobela isalelo esinye ekwakuphela kwaso uThixo awababekela sona. Wandula ke uAdam wabulahla ubuntloko bakhe waza wamthelela kule mvukelo yakhe.—Genesis 1:26–3:6.

Imiphumo etshabalalisayo yokutyeka kwilungiselelo likaThixo yabonakala ngoko nangoko. Bengasekho nyulu namsulwa, uAdam noEva baba neentloni yaye baziva benetyala. UAdam, owathi ngaphambilana wachaza umfazi wakhe ngamabinzana athandekayo nabumbongo, ngoku wabhekisela kuye ngokungenamdla esithi ‘umfazi ondinike yena.’ Loo mpendulo ilandulayo ngokulula yaba kukuqaleka kokubandezeleka emtshatweni. Imigudu ka-Adam elilize yokufuna ubuntloko bakhe kwakhona yayiya kuphumela ekubeni ‘amlawule.’ Kwelinye icala, “inkanuko” kaEva yayiya kuba sendodeni yakhe, kusenokuba wayeza kuba nayo ngendlela egqithiseleyo okanye engalungelelananga.—Genesis 2:23; 3:7-16.

Akumangalisi ukuba ukubandezeleka komtshato ka-Adam noEva kwaba nomphumo owonakalisayo kwinzala yabo. Izibulo labo, uKayin, waba ngumbulali ongenamfesane. (Genesis 4:8) ULameki, inzala kaKayin, wongezelela ekuwohlokeni kobomi bentsapho ngokuba ngumntu wokuqala ukutshata isithembu. (Genesis 4:19) Ngaloo ndlela uAdam noEva abazange badlulisele ilifa lesono nokufa nje kuphela kodwa bakwadlulisela umzila wentsapho egulayo oye waba yimeko yoluntu ukususela ngoko. Ebudeni bale mihla yokugqibela, ukungavisisani kwentsapho kuye kwafikelela incopho ezigqwese zonke.

Iintsapho Eziphumelelayo

Noko ke, ayizizo zonke iintsapho ezithwaxwa ziingcinezelo zanamhlanje. Ngokomzekelo, enye indoda ihlala nomfazi wayo neentombi zayo ezimbini kummandla omncinane eUnited States. Ngoxa abamelwane bayo abaninzi benomsantsa wesizukulwana phakathi kwabazali nenzala yabo, yena nomfazi wayo abanawo, bengakhathazeki ngelokuba iintombi zabo zingaqalisa ukubandakanyeka kwiziyobisi nakwisini. Ngeengokuhlwa zangoMvulo, xa olunye ulutsha luqolozele kumabonwakude, intsapho yonke ihlanganisana kwitafile ekwigumbi lokutyela ukuze ixubushe iBhayibhile. Ithi: “Ubusuku bangoMvulo bubusuku bethu obukhethekileyo bokuba sibe kunye size sincokole. Iintombi zethu ziziva zikhululekile ukuthetha iingxaki zazo nathi.”

Kwelinye icala, kukho umzali ongenaqabane lomtshato kwisiXeko iNew York naye okwanandipha umanyano olungaqhelekanga lwentsapho kunye neentombi zakhe ezimbini. Yintoni imfihlo yakhe? Uthi: “Sihlala simcimile umabonwakude de kube yimpela-veki. Siba nengxubusho yemihla ngemihla yetekisi yeBhayibhile. Sikwabekela ecaleni ingokuhlwa enye ukwenzela ingxubusho yeBhayibhile yentsapho.”

Ezi ntsapho zingamaNgqina kaYehova. Zilandela isiluleko esinikelwa kwiintsapho esandlalwe eBhayibhileni—yaye siyasebenza. Phofu ke, ayizizo zodwa. Kukho amakhulu amawaka eentsapho ezifana nazo ezifumana imiphumo emihle ngokusebenzisa imigaqo ebekelwe ubomi bentsapho efumaneka kuloo ncwadi.b Kodwa iyintoni loo migaqo? Wena nentsapho yakho ningangenelwa njani kuyo? Ukuze uphenduleke sikumema ukuba uqwalasele la manqaku aqala kwiphepha elilandelayo.

[Imibhalo esemazantsi]

[Umfanekiso okwiphepha 4]

Ukutsala nzima ngokwezoqoqosho kubangela ukubandezeleka okukhulu kwiintsapho ezikumazwe asakhasayo

[Inkcazelo]

U.S. Navy photo

[Umfanekiso okwiphepha 7]

Ngokusebenzisa imigaqo yeBhayibhile, iintsapho ezininzi ziyazixhathisa iingcinezelo zanamhlanje