Ngaba Intonga Yobukhosi Yomrharnate Ivela Endlwini KaYehova?

ABEMBI bezinto zakudala kwaSirayeli baye bafumana iintonga zobukhosi ezininzi, iintonga ezaziphathwa ngabantu abasemagunyeni. (Genesis 49:10; Estere 8:4; Hezekile 19:14) Ezinye zezi ntonga zobukhosi ezafunyanwa eLakishe zazinentloko emile okwerharnate. Esi siqhamo sasisaziwa kakhulu ngabantu bakaThixo.—Duteronomi 8:8; INgoma yazo iiNgoma 4:13.

Umrharnate otyatyambileyo owenziwe ngebamba lendlovu oboniswe ngasekhohlo, usandul’ ukufunyanwa. Uziimilimitha ezingama-43 ukuphakama yaye umngxuma okwisiseko sawo uchaza ukuba wawuyinxalenye yentonga yobukhosi. Phawula oonobumba ababhalwe ngohlobo lwakudala lwesiHebhere ababhalwa ngenkulungwane yesibhozo ngaphambi Kwexesha Eliqhelekileyo.

Inxalenye yebamba yophuka mandulo, ngoko oonobumba abambalwa ababonakali okanye abavelanga ngokupheleleyo. Ukanti, iingcaphephe zemibhalo yamandulo ziceba ukubuyisela oonobumba ababebhalwe ngezantsi. (Isekelwe kwiphephancwadi iBiblical Archaeologist) Izikhewu ezingaqhelekanga eziphakathi koonobumba ziye zabangela oonobumba bafundeke ngeendlela ezimbini eziyintloko. Umphengululi womFrentshi uAndré Lemaire uthi bafundeka ngamazwi athi: “YeyaseTem[pileni yeNko]si [uYahweh], ingcwele kubabingeleli.” UNahman Avigad ucebisa oku: “Umnikelo ongcwele wababingeleli kwiNdlu kaYahweh.”

Bona nabanye abaphengululi baye bagqiba kwelokuba le ntonga yobukhosi ekuqaleni yayibhalwe oonobumba abane besiHebhere begama lobuqu likaThixo—uYehova. Ngoko imele ukuba yayikhankanya “indlu kaYehova,” ibinzana elixhaphakileyo eBhayibhileni.—Eksodus 23:19; 1 Kumkani 8:10, 11.

Abaninzi basavakalelwa kukuba le ntonga yobukhosi yayiyeyombingeleli kwitempile eyakhiwa nguSolomon okanye yayingumnikelo etempileni apho. Okubangel’ umdla kukuba, umhombiso weerharnate ngokufuthi wawubonakala etempileni kaThixo.—Eksodus 28:31-35; 1 Kumkani 7:15-20.

[Inkcazelo Ngomfanekiso okwiphepha 32]

Israel Museum, Jerusalem