Uyakhumbula Na?

Ngaba uye wacingisisa ngenyameko ngeenkupho zakutshanje zeMboniselo? Ukuba kunjalo, mhlawumbi uya kukufumanisa kubangel’ umdla ukukhumbula oku kulandelayo:

▫ Uyintoni “umqondiso wokulungileyo” uYehova awenzela abo balandela emanyathelweni kaYesu? (INdumiso 86:17)

‘Yayiluvuyo lomoya oyingcwele’ olomeleza amaKristu okuqala ukuba anyamezele iindlela ezahlukeneyo awayetshutshiswa ngazo. (1 Tesalonika 1:6) Ngokufanayo nanamhlanje, yaye uYehova, onguMniki ‘waso sonke isipho esilungileyo naso sonke isipho esigqibeleleyo,’ uyakuvuyela ‘ukubapha umoya oyingcwele abo bamcelayo.’ (Yakobi 1:17; Luka 11:13) Ngoko luvuyo lomoya oyingcwele oluvelisela abalandeli bakaYesu “umqondiso wokulungileyo.”—12/15, iphepha 18-19.

▫ Kutheni kubalulekile ngathi ukwamkela imbono kaThixo ngokuxoka?

INdumiso 5:6 ithi uThixo “uyabatshabalalisa abathetha amanga.” ISityhilelo 21:8 sihlabela mgama sisithi isabelo sawo onke amaxoki “kukufa kwesibini.” Ngenxa yoko, ukwamkela imbono kaThixo ngokuxoka kusinika isizathu esiqinileyo sokuthetha inyaniso size ngaloo ndlela sifumane isipho sakhe sobomi.—12/15, iphepha 23.

▫ Yintoni eyayiyila uhlobo lokunqula lwamaSamariya? (Yohane 4:20)

AmaSamariya, kunqulo lwawo oluxubileyo, amkela kuphela njengeSibhalo iincwadi ezintlanu zokuqala zikaMoses, ekuthiwa yiPentatiki. Malunga nenkulungwane yesine Ngaphambi kweXesha Lethu Eliqhelekileyo, akha itempile kwiNtaba yeGerizim, ngenjongo yokukhuphisana netempile kaThixo eyayiseYerusalem. Nangona itempile yamaSamariya yatshatyalaliswayo, unanamhla isikhumbuzo sePasika saminyaka le asenzela eGerizim.—1/1, iphepha 25.

▫ Ngaba amaKristu afanele akhuthaze ukupheliswa kongcoliso okanye akhuthaze imilinganiselo yokucoceka?

Xa wayesemhlabeni, uYesu akazange azame ukucombulula zonke iingxaki zentlalo ezazikho ngomhla wakhe. Xa uYehova ngoBukumkani bakhe obungoMesiya ephumeza imigaqo yakhe yobulungisa emhlabeni wonke, iingxaki zemeko-bume ziya kuconjululwa ngokusisigxina. Ngenxa yoko, amaNgqina kaYehova anembono elungeleleneyo. Uthando ngommelwane luwashukumisela ukuba abonise intlonelo ngezinto zabanye, kodwa ngokufanelekileyo abeka ukushunyayelwa kwesigidimi soBukumkani bukaThixo tanci. (Mateyu 6:33)—1/1, iphepha 31.

▫ UYesu waba ngumthwali wokukhanya ngaziphi iindlela? (Yohane 8:12)

UYesu wazinikela ekushumayeleni iindaba ezilungileyo zoBukumkani bukaThixo. (Luka 4:43; Yohane 18:37) Kwakhona wabubhenca ubuxoki bonqulo waza ngaloo ndlela wanikela inkululeko yokomoya kwabo babekhotyokiswe lunqulo. (Mateyu 15:3-9) Okona kubalaseleyo kukuba, wangqineka elukhanyiselo lwehlabathi ngokunikela ngobomi bakhe obufezekileyo bobuntu ukuba bube yintlawulelo. (Mateyu 20:28; Yohane 3:16)—1/15, iphepha 10-11.

▫ Ziziphi ezinye zezizathu ezenza kufuneke simthobele uYehova uThixo?

UYehova nguMongami Wendalo Iphela, yaye ngenxa yesi sizathu sifanele simthobele. Kwakhona, ekubeni uYehova engusomandla, akukho namnye onokumchasa ngokuphumelelayo, ngoko asinakukutyeshela ukumthobela. Zonke izidalwa ezinengqiqo zadalelwa ukufezekisa injongo yoMenzi wazo, yaye oku kuzenza zibe nembopheleleko yokuzithoba kuThixo kuzo zonke izinto.—2/1, iphepha 10-11.

▫ Yintoni eyanceda uYosefu ukuba akuxhathise ukuhenyuza nomfazi kaPotifare?

UYosefu wayenamandla awayelawula ingqondo yakhe. Wayeluxhalabele ulwalamano lwakhe noYehova yaye wayeqonda ukuba isenzo sohenyuzo sasiya kuba sisono kungekuphela nje nxamnye nomyeni wakhe kodwa, okubaluleke ngakumbi, nxamnye noThixo. 2/15, iphepha 21.

▫ Wayethetha ukuthini uYesu xa wathi: “Ndim . . . inyaniso”? (Yohane 14:6)

UYesu akazange nje athethe aze afundise inyaniso; wayiphila waza wayimntwisa. Ngaloo ndlela, ubuKristu abuyongcamango nje kuphela; buyindlela yobomi.—3/1, iphepha 15.

▫ Sisiphi isifundo esithuthuzelayo esiqulethwe kwiNdumiso 51?

Le ndumiso iyasinceda siqonde ukuba, ukuba seyela esonweni size siguquke ngokunyanisekileyo, uBawo wethu onothando wasezulwini uya kukuva ukucela kwethu ukwenzelwa inceba aze asisindise ekuphelelweni lithemba. Noko ke, simele siluxhalabele ngokuyintloko naluphi na ugculelo esiye saluzisa egameni likaYehova.—3/15, iphepha 18.

▫ Yintoni efuziselwa lubhaptizo lwamanzi?

Ubhaptizo lungumfuziselo wasekuhleni wokuzahlulela kukabani kuYehova uThixo. Ukuntywiliselwa phantsi kwamanzi kubonisa ukuba abo babhaptizwayo bayafa kwikhondo lokuziphilela ubomi babo. Ukunyuswa kwabo bephuma emanzini kubonisa ukuba ngoku baphilela ukwenza ukuthanda kukaThixo, bekubeka kuqala ebomini babo. (Mateyu 16:24)—4/1, iphepha 5-6.