Unyamezelo—Lubalulekile KumaKristu

“Elukholweni lwenu nongezelele . . . unyamezelo.”—2 PETROS 1:5, 6, NW.

1, 2. Kutheni sonke simele sinyamezele de kube sekupheleni?

UMVELELI ohambahambayo nenkosikazi yakhe babetyelele omnye umKristu okuma-90 eminyaka ubudala. Wayechithe amashumi eminyaka kubulungiseleli bexesha elizeleyo. Njengokuba babethetha, lo mzalwana sele ekhulile wakhumbula amanye amalungelo awayewanandiphile ukutyhubela iminyaka. Iinyembezi zisihla wakhala ngelithi, “kodwa, ngoku akusekho nto ingako ndinokuyenza nasentweni na.” Lo mveleli uhambahambayo wavula iBhayibhile yakhe waza wafunda kuMateyu 24:13, apho uYesu Kristu acatshulwe esithi: “Onyamezele kwada kwaba sekupheleni, lowo uya kusindiswa.” Wandula ke lo mveleli wajonga kulo mzalwana uthandekayo waza wathi: “Isabelo sokugqibela sethu sonke, kungakhathaliseki ukuba sinokwenza okuninzi okanye okuncinane kangakanani na, kukunyamezela de kube sekupheleni.”

² Ewe, njengamaKristu sonke simele sinyamezele de kube sekupheleni kwale nkqubo yezinto okanye ekupheleni kobomi bethu. Ayikho enye indlela esinokuyifumana ngayo inkoliseko kaYehova size sisindiswe. Sikugqatso lobomi, yaye simele “sibaleke ngonyamezelo” de silugqibe ugqatso. (Hebhere 12:1, NW) Umpostile uPetros wakubethelela ukubaluleka kolu phawu xa wabongoza amanye amaKristu wathi: “Elukholweni lwenu nongezelele . . . unyamezelo.” (2 Petros 1:5, 6, NW) Kodwa luyintoni ngokwenene unyamezelo?

Unyamezlo—Oko Lukuthethayo

3, 4. Kuthetha ukuthini ukunyamezela?

³ Kuthetha ukuthini ukunyamezela? Isenzi sesiGrike esiguqulelwe ngokuthi “nyamezela” (hy·po·meʹno) ngokoqobo sithetha “ukuhlala ungaphantsi.” Sivela izihlandlo ezili-17 eBhayibhileni. Ngokutsho kombhali wezichazi-magama uW. Bauer, uF. W. Gingrich noF. Danker, sithetha “ukuhlala kunokubaleka . . . , uqinile, ubambelele.” Isibizo sesiGrike esithetha “unyamezelo” (hy·po·mo·neʹ) sivela izihlandlo ezingaphezu kwama-30. Ithetha ngaso, iA New Testament Wordbook, ebhalwe nguWilliam Barclay, ithi: “Lungumoya onokuthwala izinto zonke, kungekhona nje ngenxa yokuncama, kodwa ngethemba lokwenene . . . Luphawu olugcina umntu engawi nangona ejamelene nomoya. Luphawu olunokwenza nesona silingo siqatha sibe luzuko ngenxa yokuba ngaphaya kwentlungu lubona usukelo.”

⁴ Ngoko, unyamezelo lusinceda sime siqinile singalilahli ithemba xa sijamelana nemiqobo okanye ubunzima. (Roma 5:3-5) Lukhangela ngaphaya kweentlungu kusukelo—umvuzo, okanye isipho, sobomi obungunaphakade, enokuba kusezulwini okanye emhlabeni.—Yakobi 1:12.

Unyamezelo—Kutheni Lufuneka?

5. (a) Kutheni onke amaKristu ‘kufuneka abe nonyamezelo’? (b) Izilingo zethu zinokwahlulwahlulwa ngokwawaphi amacandelo amabini?

⁵ NjengamaKristu, sonke “kufuneka sibe nonyamezelo.” (Hebhere 10:36, NW) Ngoba? Ngokuyintloko ngenxa yokuba ‘sigaxeleka ezilingweni ngezilingo.’ NgesiGrike le ndinyana ekuYakobi 1:2 ibonisa ukudibana nento engalindelekanga nengathandekiyo, njengaxa umntu egagana nomphangi. (Thelekisa uLuka 10:30.) Sigaxeleka ezilingweni ezinokwahlulwa ngokwamacandelo amabini: ezo ziqhelekileyo kubantu ngenxa yesono esisizuz’ ilifa, nezo zibakho ngenxa yokuba sihlonel’ uThixo. (1 Korinte 10:13; 2 Timoti 3:12) Ziziphi ezinye zezi zilingo?

6. Elinye iNgqina lanyamezela njani xa laligula ngokungaginyisi mathe?

⁶ Ukugula ngokungaginyisi mathe. NjengoTimoti, amaKristu athile amele anyamezele ‘ubulwelwe ngokufuthi.’ (1 Timoti 5:23) Kufuneka sinyamezele ngokukodwa xa sigulel’ ukufa, mhlawumbi siqaqanjelwa kakhulu, ukuze sihlale siqinile, ngoncedo lukaThixo yaye singalilahli ithemba lethu lobuKristu. Khawuqwalasele umzekelo welinye iNgqina elalikwiminyaka yalo yokuqala yama-50 elalwisana kangangethuba elide nethumba elibulalayo elalikhula ngokukhawuleza. Kuzo zozibini izihlandlo lityandwa lema liqinile kwisigqibo salo sokungalwamkeli utofelo-gazi. (IZenzo 15:28, 29) Kodwa ithumba laphinda lavela esiswini salo laza laqhubeka likhula kufutshane nomnqonqo walo. Njengokuba lalikhula, eli Ngqina laliqaqanjelwa ngendlela engathethekiyo kangangokuba kwakungekho lunyango lunokuzithomalalisa ezo ngqaqambo. Sekunjalo, lakhangela ngaphaya kwezo ntlungu kumvuzo wobomi kwihlabathi elitsha. Laqhubeka lisabelana ngethemba lalo elimangalisayo noogqirha, abongikazi nabo babelityelela. Lanyamezela de kwaba sekupheleni—ekupheleni kobomi balo. Iingxaki zakho zempilo kusenokwenzeka ukuba azisongeli ubomi njengezo wajamelana nazo loo mzalwana uthandekayo, kodwa zisenokuluvavanya ngokwenene unyamezelo lwakho.

7. Unyamezelo lubandakanya ziphi iintlungu kwabanye abazalwana noodade wethu?

⁷ Ubuhlungu beemvakalelo. Ngamathuba athile, bambi abantu bakaYehova bajamelana ‘nokubulaleka kwentliziyo’ okubangela ‘umoya odakumbileyo.’ (IMizekeliso 15:13) Ukudandatheka ngokunzulu akunto ingaqhelekanga kula “maxesha anomngcipheko ekunzima ukuhlangabezana nawo.” (2 Timoti 3:1, NW) IScience News kaDisemba 5, 1992, yanikela le ngxelo: “Udandatheko olunzulu, ngokufuthi olugqiba amandla luyanda kwisizukulwana ngasinye esidlulayo esizalwe emva kowe-1915.” Oonobangela bodandatheko olunjalo bayahluka, ukususela koonobangela abasengqondweni ukuya kumava abuhlungu angathandekiyo. KumaKristu athile, unyamezelo lubandakanya umzamo wamihla le wokuma eqinile nangona ejamelene nobuhlungu beemvakalelo. Sekunjalo, awanikezeli. Aqhubeka ethembekile kuYehova phezu kwazo nje iinyembezi.—Thelekisa INdumiso 126:5, 6.

8. Ziziphi izilingo ezihlobene nemali esinokugaxeleka kuzo?

⁸ Izilingo ezahlukahlukeneyo esigaxeleka kuzo zisenokuquka iingxaki ezinzulu zezoqoqosho. Xa omnye umzalwana eNew Jersey, eUnited States, ngesiquphe waphelelwa ngumsebenzi, ngokufanelekileyo wayekhathazekile kukuba uya kuyondla njani intsapho yakhe yaye engafuni nokuphulukana nekhaya lakhe. Noko ke, akazange aphazanyiswe kwithemba loBukumkani. Ngoxa wayefuna omnye umsebenzi, wasebenzisa elo thuba ukuba akhonze njengovulindlela ongumncedani. Ekugqibeleni, wawufumana umsebenzi.—Mateyu 6:25-34.

9. (a) Ukulahlekelwa nguthile esimthandayo ekufeni kusenokufuna njani ukuba sibe nonyamezelo? (b) Ziziphi izibhalo ezibonisa ukuba akunto iphosakeleyo ukulila xa sisentlungwini?

⁹ Ukuba uye walahlekelwa ngothandekayo ekufeni, kufuneka ube nonyamezelo oluya kuhlala ithuba elide emva kokuba izihlobo zakho zibuyele kwimisebenzi yazo yesiqhelo. Usekwanokufumanisa ukuba uba nobunzima ngokukhethekileyo nyaka ngamnye malunga nexesha awafa ngalo othandekayo wakho. Ukunyamezela ukulahlekelwa okunjalo akuthethi ukuba kuphosakele ukulila ngenxa yobuhlungu. Kuyinto yokwemvelo ukukhala xa umntu esimthandayo esifa, yaye oku akubonisi kungabi nalukholo kwithemba lovuko nangayiphi na indlela. (Genesis 23:2; thelekisa amaHebhere 11:19.) UYesu “walila” emva kokufa kukaLazaro, nangona ngolweyiseko wayexelele uMarta oku: “Umnakwenu uya kubuya avuke.” Yaye uLazaro wavuka!—Yohane 11:23, 32-35, 41-44.

10. Kutheni abantu bakaYehova ngokukodwa bafanele babe nonyamezelo?

¹⁰ Ukongezelela ekunyamezeleni izilingo eziqhelekileyo kubo bonke abantu, abantu bakaYehova bafanele babe nonyamezelo ngokukodwa. UYesu wabalumkisa wathi: “Niya kuthiywa ziintlanga zonke ngenxa yegama lam.” (Mateyu 24:9) Kwakhona wathi: “Ukuba banditshutshisa mna, bonitshutshisa nani.” (Yohane 15:20) Kutheni sithiywe yaye sitshutshiswa kangaka? Kungenxa yokuba kungakhathaliseki apho sihlala khona emhlabeni njengabakhonzi bakaThixo, uSathana uzama ukwaphula ingqibelelo yethu kuYehova. (1 Petros 5:8; thelekisa ISityhilelo 12:17.) Ukuze afeze oku ngokufuthi uSathana uye waphembelela ukuba sitshutshiswe, evavanya unyamezelo lwethu ngokuqatha.

11, 12. (a) AmaNgqina kaYehova nabantwana bawo ajamelana naluphi uvavanyo lokunyamezela ngeminyaka yee-1930 nangasekuqaleni kweyee-1940? (b) Kutheni amaNgqina kaYehova engayikhahleli imifuziselo yesizwe?

¹¹ Ngokomzekelo, ngeminyaka yee-1930 nangasekuqaleni kweyee-1940, amaNgqina kaYehova nabantwana bawo eUnited States naseKhanada atshutshiswa ngenxa yokuba ayengawukhahleli umfuziselo wesizwe ngenxa yezizathu zesazela. AmaNgqina ayayihlonela imifuziselo yezizwe aphila kuzo, kodwa athobela umgaqo owandlalwe kuMthetho kaThixo kwiEksodus 20:4, 5: “Uze ungazenzeli umfanekiso oqingqiweyo, nokuba ngowayiphi na into emilise esezulwini phezulu, nesemhlabeni phantsi, nesemanzini aphantsi komhlaba. Uze ungaqubudi kwezo nto, ungazikhonzi: kuba mna, Yehova Thixo wakho, ndinguThixo onekhwele.” Xa abantwana abathile bamaNgqina ababehamba isikolo bagxothwayo ngenxa yokuba babenqwenela ukunqula uYehova uThixo kuphela, amaNgqina aseka iZikolo zoBukumkani zokubafundisa. Aba bafundi babuyela kwizikolo zikawonke wonke xa iNkundla Ephakamileyo yaseUnited States yakuvumayo ukuma kwabo konqulo, njengokuba izizwe ezikhanyiselweyo zisenjenjalo namhlanje. Noko ke, ukunyamezela ngenkalipho kwaba baselula kungumzekelo obalaseleyo, ngokukodwa kulutsha lwamaKristu namhlanje olusenokuba lujamelana nokugculelwa ngenxa yokuba luzabalazela ukuphila ngemilinganiselo yeBhayibhile.—1 Yohane 5:21.

¹² Izilingo ezahlukahlukeneyo esijamelana nazo—ezo ziqhelekileyo kubantu nezo sijamelana nazo ngenxa yokholo lwethu njengamaKristu—zibonisa isizathu sokuba sifanele sibe nonyamezelo. Kodwa sinokunyamezela njani?

Unokunyamezela Njani Kude Kube Sekupheleni?

13. UYehova usinika njani unyamezelo?

¹³ Abantu bakaThixo banento ababodlula ngayo abo bangamnquliyo uYehova. Xa sifuna uncedo, sinokulucela ‘kuThixo osinika unyamezelo.’ (Roma 15:5, TE) Noko ke, uYehova usinika njani unyamezelo? Enye indlela akwenza ngayo oku kungemizekelo yonyamezelo ebhalwe eLizwini lakhe, iBhayibhile. (Roma 15:4) Njengokuba sicinga ngale, asikhuthazwa ukuba sinyamezele nje kuphela kodwa sikwafunda lukhulu ngendlela yokunyamezela. Khawuqwalasele imizekelo emibini ebalaseleyo—ukunyamezela ngenkalipho kukaYobhi nonyamezelo olungenasiphako lukaYesu Kristu.—Hebhere 12:1-3; Yakobi 5:11.

14, 15. (a) Ziziphi izilingo uYobhi awazinyamezelayo? (b) UYobhi wakwazi njani ukunyamezela izilingo awayejamelene nazo?

¹⁴ Ziziphi iimeko ezavavanya unyamezelo lukaYobhi? Wangena ezingxakini zezoqoqosho xa walahlekelwa zizinto zakhe ezininzi. (Yobhi 1:14-17; thelekisa uYobhi 1:3.) UYobhi weva ubuhlungu bokulahlekelwa xa bolishumi abantwana bakhe babulawa luqhwithela. (Yobhi 1:18-21) Wagula kakhulu, kabuhlungu gqitha. (Yobhi 2:7, 8; 7:4, 5) Umfazi wakhe wamnyanzelela ukuba amlahle uThixo. (Yobhi 2:9) Izinxulumani zakhe ezisenyongweni zathetha izinto ezazibuhlungu, ezazingabonisi bubele yaye ezazingeyonyaniso. (Thelekisa uYobhi 16:1-3 noYobhi 42:7.) Noko ke, kuko konke oku uYobhi wema eqinile, egcine ingqibelelo. (Yobhi 27:5) Izinto awazinyamezelayo ziyafana nezilingo abantu bakaYehova abajamelana nazo namhlanje.

¹⁵ UYobhi wakwazi njani ukuzinyamezela zonke ezo zilingo? Eyona nto yamomelezayo uYobhi lithemba. Wathi, “Kuba kukho ithemba emthini; ukuba uthe wagawulwa, wobuya uhlume, igatya lawo lingapheli.” (Yobhi 14:7) UYobhi wayenaliphi ithemba? Njengokuba kuphawulwa kwiindinyana ezimbalwa kamva, wathi: “Ukuba uthe umfo wafa, wophila na? . . . Ubungabizayo ke, ndisabele mna, uwulangazele umsebenzi wezandla zakho.” (Yobhi 14:14, 15) Ewe, uYobhi wabona ngaphaya kweentlungu awayeziva. Wayesazi ukuba izilingo zakhe zazingayi kuhlala ngonaphakade. Ubuncinane kwakufuneka anyamezele de kube sekufeni. Ulindelo awayenethemba lalo yayikukuba uYehova, ngothando onqwenela ukubavusa abafileyo, wayeya kumbuyisela ebomini.—IZenzo 24:15.

16. (a) Sifunda ntoni ngonyamezelo kumzekelo kaYobhi? (b) Ithemba loBukumkani lifanele libe lelokwenene kangakanani kuthi, yaye ngoba?

¹⁶ Sifunda ntoni kunyamezelo lukaYobhi? Ukuze sinyamezele de kube sekupheleni, asimele sililahle ithemba lethu. Kwakhona, khumbula ukuba, ukuqiniseka kwethemba loBukumkani kuthetha ukuba nakuphi na ukubandezeleka esidibana nako ‘kokomzuzwana.’ (2 Korinte 4:16-18) Ithemba lethu elixabisekileyo lisekelwe ngokuqinileyo kwidinga likaYehova lokuba kungekudala kuza kubakho ixesha apho ‘aya kuzisula zonke iinyembezi emehlweni ethu, kungabi sabakho kufa, kungabi sabakho nasijwili, nakukhala, nantlungu.’ (ISityhilelo 21:3, 4) Elo themba, ‘lingadanisiyo,’ limele lilawule ukucinga kwethu. (Roma 5:4, 5; 1 Tesalonika 5:8) Limele libe lelokwenene kuthi—libe lelokwenene kangangokuba ngamehlo okholo, sizibone sikwihlabathi elitsha—singasalwisani nokugula nodandatheko kodwa mhla ngamnye sivuka siyimiqabaqaba yaye sinengqondo ehluzekileyo; singasakhathazwa ziingcinezelo zezoqoqosho kodwa sihleli sinqabisekile; singasakhaleli abathandekayo bethu abafileyo kodwa sivuyiswa kukubabona bevuswa. (Hebhere 11:1) Ngaphandle kwethemba elinjalo sinokonganyelwa zizilingo ezisifikelayo ngoku size sinikezele. Xa sinethemba, enjani yona intshukumisa esinayo yokuqhubeka sisilwa, siqhubeke sinyamezela de kube sekupheleni!

17. (a) Ziziphi izilingo uYesu awazinyamezelayo? (b) Ubuhlungu obugqithiseleyo uYesu awabunyamezelayo bunokubonwa kwesiphi isibakala? (Bona umbhalo osemazantsi.)

¹⁷ IBhayibhile isikhuthaza ukuba “sise amehlo” kuYesu yaye ‘simqonde.’ Ziziphi izilingo awazinyamezelayo? Ezinye zazo zazibangelwa sisono nokungafezeki kwabanye. UYesu akazange anyamezele kuphela nje ‘ukuphikiswa ngaboni’ kodwa kwaneengxaki ezazivela phakathi kwabafundi bakhe, kuquka iimpikiswano zabo ezininzi ngokuba ngubani na owayengoyena mkhulu. Ngaphezu koko, wajamelana nokuvavanywa kokholo okungenakuthelekiswa nanto. “Wawunyamezela umthi wentuthumbo.” (Hebhere 12:1-3, NW; Luka 9:46; 22:24) Kunzima kwanokuyithelekelela indlela awabandezeleka ngayo engqondweni nasemzimbeni ngenxa yeentlungu zokubethelelwa nehlazo lokubulawa njengomnyelisi.a

18. Ngokutsho kompostile uPawulos, ziziphi izinto ezimbini ezomeleza uYesu?

¹⁸ Yintoni eyamncedayo uYesu wanyamezela de kwaba sekupheleni? Umpostile uPawulos ukhankanya izinto ezimbini ezomeleza uYesu: “izikhungo kwanezibongozo” yaye kwakhona ‘novuyo olwalubekwe phambi kwakhe.’ UYesu, uNyana kaThixo ofezekileyo, akazange abe nazintloni ukucela uncedo. Wathandaza ‘ngodanduluko olunamandla, neenyembezi.’ (Hebhere 5:7; 12:2) Wakufumanisa kuyimfuneko ukuthandazela amandla ngokuphindaphindiweyo nangokunyanisekileyo ngokukodwa xa olona vavanyo lwakhe lukhulu lwalusondela. (Luka 22:39-44) Ephendula izikhungo zikaYesu, uYehova akazange asisuse isilingo, kodwa wamomeleza uYesu ukuba asinyamezele. Kwakhona uYesu wanyamezela ngenxa yokuba wakhangela ngaphaya komthi wentuthumbo kumvuzo wakhe—uvuyo awayeya kulufumana ngenxa yokuba ebe negalelo ekungcwalisweni kwegama likaYehova nasekuhlawuleleni intsapho yabantu ekufeni.—Mateyu 6:9; 20:28.

19, 20. Umzekelo kaYesu usinceda njani sibe nembono esengqiqweni ngoko kubandakanyekileyo kunyamezelo?

¹⁹ Ngokusuka kumzekelo kaYesu, sifunda izinto eziliqela ezinokusinceda sibe nembono esengqiqweni ngoko kubandakanyekileyo kunyamezelo. Ikhondo lonyamezelo alilula. Ukuba sikufumanisa kunzima ukunyamezela isilingo esithile, kumele kusithuthuzele ukwazi ukuba kwakunjalo nangoYesu. Ukuze sinyamezele de kube sekupheleni, simele sithandaze ngokuphindaphindiweyo sicela amandla. Xa silingwa maxa wambi sisenokuvakalelwa kukuba asifaneleki ukuba singathandaza. Kodwa uYehova uyasimema ukuba sizityand’ igila kuye ‘kuba usikhathalele.’ (1 Petros 5:7) Yaye ngenxa yoko uYehova akuthembisileyo eLizwini lakhe, uzibophelele ukuba abanike “incamisa yamandla” abo bamcela benokholo.—2 Korinte 4:7-9.

²⁰ Maxa wambi simele sinyamezele sineenyembezi. KuYesu iintlungu zomthi wentuthumbo zizodwa zazingesosizathu sakuvuya. Kunoko, uvuyo lwalukumvuzo owawubekwe phambi kwakhe. Kwimeko yethu akunto isengqiqweni ukulindela ukuba siya kusoloko sichulumancile yaye sichwayitile xa sisekulingweni. (Thelekisa amaHebhere 12:11.) Noko ke, ngokukhangela phambili emvuzweni, sinokukwazi ‘ukukubalela ekuthini kuluvuyo’ naxa sijamelene nezona meko zilingayo. (Yakobi 1:2-4; IZenzo 5:41) Eyona nto ibalulekileyo kukuba sihlale siqinile—kwanokuba simele senjenjalo sineenyembezi. Ngapha koko, uYesu akazange athi, ‘Lowo uphalaza iinyembezi kancinane kunabanye uya kusindiswa’ kodwa wathi, “Onyamezeleyo kwada kwaba sekupheleni, lowo uya kusindiswa.”—Mateyu 24:13.

21. (a) Kweyesi-2 kaPetros 1:5, 6, sibongozwa ukuba songezelele ntoni kunyamezelo lwethu? (b) Yiyiphi imibuzo eza kuqwalaselwa kwinqaku elilandelayo?

²¹ Ngaloo ndlela unyamezelo lubalulekile ukuze sisindiswe. Noko ke, kweyesi-2 kaPetros 1:5, 6, sibongozwa ukuba kunyamezelo lwethu songezelele ukuhlonel’ uThixo. Kuyintoni ukuhlonel’ uThixo? Kuhlobene njani nonyamezelo, yaye unokukufumana njani? Le mibuzo iza kuqwalaselwa kwinqaku elilandelayo.

[Umbhalo osemazantsi]

Ubuya Kuphendula Uthini?

◻ Kuthetha ukuthini ukunyamezela?

◻ Kutheni abantu bakaYehova ngokukodwa kufuneka babe nonyamezelo?

◻ Yintoni eyanceda uYobhi wanyamezela?

◻ Umzekelo kaYesu usinceda njani sibe nembono esengqiqweni ngonyamezelo?

[Umfanekiso okwiphepha 10]

Kwasekwa iZikolo zoBukumkani ukuze kufundiswe abantwana bamaKristu ababegxothiwe ezikolweni ngenxa yokukhonza uYehova kuphela

[Umfanekiso okwiphepha 12]

Ezimisele ukuhlonela uYise, uYesu wathandazela amandla ukuze anyamezele