Zimela NgoYehova
“Ndizimela ngawe, Yehova.”—INDUMISO 31:1.
1. INdumiso 31 iyivakalisa njani intembelo kumandla kaYehova okulungiselela indawo yokuzimela?
UMNTU onelizwi elimyoli ucula ngendoda ethi, nangona idiniwe engqondweni nasemzimbeni, izilahlele kuYehova. Amazwi aloo ngoma ingcwele athi, ukholo luyoyisa. Kwiingalo ezikhuselayo zikaSomandla, le ndoda ifumana ikhusi kubatshutshisi bayo abayizingelayo. Iqhubeka ngolu hlobo le ndumiso yakhe: “Ndizimela ngawe, Yehova, mandingaze ndidaniswe; ndisize ngobulungisa bakho.”—INdumiso 31:1.
2. (a) Sinokukholosa ngoYehova njengenqaba yethu ngokusekelwe kweziphi iintsika ezimbini? (b) UYehova unguThixo onjani?
2 Umdumisi inye kuphela indawo azimela kuyo—yeyona ilungileyo! Zingathandatyuzwa zonke ezinye izinto, kodwa le yona into iqinisekile: uYehova uligwiba lakhe, inqaba yakhe. Intembelo yakhe yayame kwiintsika ezimbini ezomeleleyo. Eyokuqala, lukholo lwakhe, uYehova angayi kuludanisa, yaye eyesibini, bubulungisa bukaYehova, obuthetha ukuba Yena akasayi kuze amshiye ngokusisigxina umkhonzi Wakhe. UYehova akangoThixo obadanisayo abakhonzi bakhe abathembekileyo; akazaphuli izithembiso. Kunoko, unguThixo wenyaniso nomvuzi wabo bakholosa ngaye ngokunyanisekileyo. Ekugqibeleni, uya kuluvuza ukholo lwabo! Abasindise!—INdumiso 31:5, 6.
3. Umdumisi umzukisa njani uYehova?
3 Ngokuqamba iingoma zakhe zitsho ngamahlandinyuka zisuka kwizandi eziphantsi zokukhathazeka nokuba sezintsizini ziye kutsho kwincopho yokuzithemba, umdumisi ufumana amandla angaphakathi. Uyamzukisa uYehova ngenxa yothando Lwakhe olunyanisekileyo. Ucula athi: “Makabongwe uYehova, ngokuba endenzele inceba ebalulekileyo emzini onqabileyo.”—INdumiso 31:21.
Ikwayara Enamandla Yabavakalisi BoBukumkani
4, 5. (a) Yiyiphi ikwayara enamandla edumisa uYehova namhlanje, yaye ikwenze njani oko kulo nyaka wenkonzo udlulileyo? (Bona isicangca kwiphepha 12-15.) (b) Inani labo babekho eSikhumbuzweni libonisa njani ukuba kukho abantu abangakumbi abangxangele ukuthelela le kwayara yabavakalisi boBukumkani? (Bona isicangca.) (c) Kwibandla lakho liliphi iqela elisenokuba lilungele ukuthelela le kwayara?
4 Namhlanje, kwakhona amazwi aloo ndumiso anentsingiselo eyongezelelekileyo. Akukho namnye umchasi ongendawo, intlekele ebangelwa ngamandla emvelo okanye nabuphi na ubunzima bezoqoqosho obunokuzithibaza iingoma zokudumisa uYehova; ububele obunothando bukaYehova kubantu bakhe bumangalisa ngokwenene. Ehlabathini lonke kunyaka wenkonzo ophelileyo, ikwayara enamandla, yabantu abazizi-4 709 889 kumazwe angama-231, ibicula isigidimi soBukumkani bukaThixo. Urhulumente wasezulwini kaYehova olawulwa nguKristu Yesu uyindawo yokuzimela engayi kubadanisa. Kunyaka ophelileyo, aba bavakalisi boBukumkani abakumabandla angama-73 070 bachithele iiyure ezili-1 057 341 972 xa zizonke kumsebenzi wokuhambisa ivangeli. Oku kuye kwaphumela ekubeni abantu abangama-296 004 bafuzisele uzahlulelo lwabo kuThixo ngokubhaptizwa emanzini. Yaye hayi indlela abavuye ngayo bonke abo bebekho kwiNdibano Yezizwe Ngezizwe Yemfundiso Yobuthixo eqhutyelwe eKiev, eUkraine, kuAgasti ophelileyo. Babone isiganeko esibaluleke ngokwenene, babone ukubhaptizwa kwelona qela likhulu lamaKristu okwenyaniso lakha labhaptizwa! Njengokuba kwaprofetwayo kuIsaya 54:2, 3, abantu bakaThixo banda ngamanani angazange abonwe ngaphambili.
5 Noko ke, kukho abanye abakulungeleyo ukuba ngabalawulwa boBukumkani bukaThixo abangxangele ukuthelela le kwayara. Kunyaka ophelileyo, kwiSikhumbuzo sokufa kukaYesu kwakukho inani elimangalisayo labantu abali-11 865 765. Siyathemba ukuba abaninzi kwaba baya kukufanelekela ukuvuma ingoma yoBukumkani kwindlu ngendlu kulo nyaka wenkonzo. Hayi indlela elo themba elimele ukuba liluvuthisa ngomsindo ngayo utshaba lwenyaniso, uSathana uMtyholi!—ISityhilelo 12:12, 17.
6, 7. Chaza indlela indoda enomdla eyakoyisa ngayo ukukhathazwa ziidemon ngoncedo lukaYehova.
6 USathana uya kuzama ukubathintela abanye bangatheleli ngamazwi abo kuloo kwayara inamandla. Ngokomzekelo, eThailand abavakalisi bafumanisa ukuba kukho inani elandayo labantu abakhathazwa ziidemon. Noko ke, abaninzi abanyanisekileyo baye bakhululeka ngoncedo lukaYehova. Emva kokutyelela igqirha kuba nje ifuna ulwazi, enye indoda yayilawulwa ziidemon kangangeminyaka elishumi. Yayizamile ukuphuncuka kumandla azo ngokuncedwa ngumfundisi othile, kodwa akuzange kubekho kuphucuka kubhekele phi. Umlungiseleli wexesha elizeleyo wamaNgqina kaYehova waqalisa ukufundisisa iBhayibhile nale ndoda waza wayifundisa ngokusuka eBhayibhileni ekuphela kwendlela yokukhululeka kumandla eedemon—ukwamkela ulwazi oluchanileyo lwenyaniso, ukukholwa kuYehova uThixo nokumkhunga emthandazweni.—1 Korinte 2:5; Filipi 4:6, 7; 1 Timoti 2:3, 4.
7 Ngobusuku obulandela le ngxubusho, le ndoda yayiphuphe uyise ongasekhoyo eyisongela ukuba yayingaphindi isebenzelane nemimoya. Intsapho yayo yaqalisa ukwehlelwa zizinto ezibuhlungu. Ingavumi kugungqiswa, le ndoda yaqhubeka nofundisiso lwayo lweBhayibhile yaza yaqalisa ukubakho kwiintlanganiso. Ebudeni besinye sezo zihlandlo zokufundisisa, uvulindlela wacacisa ukuba maxa wambi izinto ezisetyenziswayo xa kusetyenzelwana nemimoya zinokuvulela iidemon ikroba lokukhathaza abantu abazama ukukhululeka kumandla azo. Le ndoda yakhumbula ukuba yayinamafutha eyayiwasebenzisa njengekhubalo. Ngoku yaqonda ukuba kwakufuneka iwalahle. Kususela oko yawalahlayo, imimoya engendawo ayikaphindi iyikhathaze. (Thelekisa eyabase-Efese 6:13; Yakobi 4:7, 8.) Yona nomfazi wayo benza inkqubela entle kwisifundo sabo yaye babakho rhoqo kwiintlanganiso ukuze bafundiswe ngeBhayibhile.
8, 9. Yiyiphi eminye yemiqobo bambi abavakalisi boBukumkani abaye bayoyisa?
8 Eminye imiqobo inokubangela iindaba ezilungileyo zingavakali kakuhle. Ngenxa yeemeko ezinzima gqitha zezoqoqosho eGhana, abasebenzi bayadendwa. Iindleko zokuphila zintinge kakhulu, nto leyo eyenza kube nzima ngokwenene ukufumana nezona zinto ziyimfuneko ebomini. Abantu bakaYehova bebemelana njani nale meko? Ngokukholosa ngoYehova, kungekhona ngeziqu zabo. Ngokomzekelo, ngenye imini, indoda ethile yashiya imvulophu evaliweyo kwidesika yokwamkela iindwendwe kwiofisi yesebe. Kule mvulophu kwakukho ama-R660, okanye umvuzo weenyanga ezintathu. Le mvulophu yayivela kumntu owayenikela engazichazanga igama lakhe, kodwa kuloo nto kwakusongelwe ngayo kubhalwe la mazwi: “Ndiphelelwe ngumsebenzi, kodwa uYehova wenze ndafumana omnye. Ndinombulelo kuye noNyana wakhe, uKristu Yesu. Ukuze ndincedise ukusasazweni kweendaba ezilungileyo zoBukumkani ngaphambi kokuba isiphelo sifike, ndithumela nanko umnikelo ongephi.”—Thelekisa eyesi-2 kwabaseKorinte 9:11.
9 Ukubakho kwiintlanganiso kuluncedo ekuqeqesheni abo bathelela le kwayara inamandla idumisa uYehova. (Thelekisa INdumiso 22:22.) Ngaloo ndlela, kumazantsi eHonduras, kukho ibandla elibizwa ngokuba yiEl Jordán. Yintoni le ikhetheke kangaka ngeli qela lincinane? Kukubakho kwalo ngokuthembeka kwiintlanganiso. Kubavakalisi abali-19, abali-12 bamele bawele umlambo obanzi ukuze babekho kwiintlanganiso veki nganye. Oku akuyongxaki kangako ngamaxesha ekungekho mvula ngawo, ekubeni benokuwuwela umlambo kumchankcatho wamatye. Noko ke, ebudeni bamaxesha eemvula, iimeko ziyaguquka. Oko bekufudula kungamanzi nje angoyikekiyo kuba ngumkhukula otshayela yonke into esendleleni yawo. Ukuze boyise lo mqobo, abazalwana noodade kufuneka babe ziincutshe zeendadi. Ngaphambi kokuwela, bafaka iimpahla zabo zeentlanganiso kwitina (ibhafu yecangci) baze bayigqume ngeplastiki. Eyona ndadi inamandla idada ngale tina ize ikhokele eli qela liwele. Bekhuselekile kwelinye icala bayazisula, banxibe, baze bafike kwiHolo yoBukumkani bechwayitile yaye bebahle bekhazimla!—INdumiso 40:9.
Inqaba Esinokuhlala Kuyo
10. Kutheni sinokuphethukela kuYehova ngamaxesha okubandezeleka?
10 Enoba uhlaselwa ziidemon ngokuthe ngqo okanye ungaphantsi kwenye ingcinezelo, uYehova unokuba ligwiba lakho. Mcele emthandazweni. Uphulaphula ngenyameko kwanaxa abantu bakhe begcuma kancinane gqitha. Umdumisi wakufumanisa kuyinyaniso oko waza wabhala wathi: “Ndithobele indlebe yakho, ungxame undihlangule; yiba liliwa eliligwiba kum, indlu yemboniselo yokundisindisa. Ngokuba ingxondorha yam nemboniselo yam nguwe; ngenxa yegama lakho uya kundikhapha undithundeze. Uya kundirhola esibatheni ababesigqumele mna, ngokuba uyinqaba yam.”—INdumiso 31:2-4.
11. Chaza isizathu sokuba inqaba kaYehova ingeyondawo yokomzuzwana.
11 UYehova akayondawo yokuzimela yokomzuzwana nje kuphela kodwa uyinqaba engenakuhlaselwa esinokuhlala kuyo sinqabisekile. Akakaze asilele ukubakhokela abantu bakhe. Amandla kaThixo aya kuwenza angasebenzi onke amacebo achuliweyo kaSathana namahlakani akhe. (Efese 6:10, 11) Njengokuba sikholosa ngoYehova ngokupheleleyo, uya kusikhupha kwizabatha zikaSathana. (2 Petros 2:9) Kule minyaka mine idlulileyo, umsebenzi wokushumayela wamaNgqina kaYehova uye wavulwa kumazwe amalunga nama-35. Kwakhona, kwimimandla yomhlaba apho iimeko zasentlalweni, ezoqoqosho okanye ezobupolitika zikuthintelayo ukushunyayelwa kweendaba ezilungileyo, bambi abantu ababumvu baye bafudukela apho banokufikelelwa ngokukhululeke ngakumbi khona. IJapan yenye yeendawo ezinjalo.
12. Uvulindlela othile eJapan wamenza njani uYehova inqaba yakhe?
12 Abantu abaninzi abasuka kumazwe aphesheya kweelwandle baye bathontelana eJapan ngenjongo yokuza kusebenza okwethutyana, yaye kuye kwasekwa amabandla amaninzi ekuthethwa iilwimi zasemzini kuwo. Amava omzalwana okwelinye ibandla laseJapan abonisa indlela le ntsimi yeelwimi zasemzini enemveliso ngayo. Wayefuna ukuya kukhonza apho imfuneko inkulu khona. Noko ke, wayesele eqhuba izifundo zeBhayibhile ezilishumi apho wayekhona. Omnye wabahlobo bakhe emqhula wathi: “Ukuba uya apho imfuneko inkulu khona, kuya kufuneka uqhube izifundo zeBhayibhile ezingama-20 apho!” Wafumana isabelo waza waya eHiroshima. Noko ke, emva kweenyanga ezine wayenesifundo seBhayibhile esinye kuphela. Ngenye imini watyelela indoda esuka eBrazil eyayithetha isiPhuthukezi kuphela. Ekubeni lo mzalwana wayengakwazi ukuthetha nale ndoda, wathenga incwadi yokufunda isiPhuthukezi. Emva kokufunda amazwi ambalwa encoko, waphinda wayityelela le ndoda. Xa lo mzalwana wayibulisa ngolwimi lwesiPhuthukezi, le ndoda yamangaliswa yaza, ngolungakanani lona uncumo, yaluvula genge ucango yaza yathi makangene. Kwaqaliswa isifundo seBhayibhile. Kungekudala lo mzalwana wayeqhuba izifundo ezingama-22, ezili-14 ngesiPhuthukezi, ezi-6 ngeSpanish, yaye ezi-2 ngesiJapan!
Ukushumayela Ngentembelo
13. Kutheni kungafanele kubekho namnye usibangela sikhonze uYehova ngenxa yeentloni?
13 Abantu bakaYehova bayivuma ngentembelo ingoma yoBukumkani benokholo ngokupheleleyo lokuba uYehova uyindawo yabo yokuzimela. (INdumiso 31:14) Abayi kudaniswa—uYehova akayi kubaphoxa, kuba uya kulizalisekisa ilizwi lakhe. (INdumiso 31:17) UMtyholi namahlakani akhe aziidemon baya kudana. Ekubeni abantu bakaYehova benothumo lokushumayela isigidimi esingadanisiyo, abashumayeli ngenxa yokuba abanye abantu bebenza bazive beneentloni. Leyo asiyondlela uYehova okanye uNyana wakhe, ababashukumisa ngayo abantu ukuba bamnqule. Xa iintliziyo zabantu zizaliswe lukholo noxabiso ngokulunga nobubele obunothando bukaYehova, kukulunga kweentliziyo zabo okushukumisela ukuba imilomo yabo ithethe. (Luka 6:45) Ngaloo ndlela, naliphi na ixesha esilichithela enkonzweni nyanga nganye, ngokukodwa ukuba elo xesha kokona kulungileyo sinokukunikela, lilungile, alidanisi. Ngaba imalana encinane yomhlolokazi ayizange ixatyiswe nguYesu noYise?—Luka 21:1-4.
14. Unokugqabaza uthini ngomsebenzi wobuvulindlela? (Bona kwanesicangca.)
14 Kwinani elandayo labavakalisi, ukuzinikela ngomphefumlo uphela kunqulo lwabo kuquka ukukhonza njengoovulindlela—incopho yonyaka ophelileyo ibingama-890 231! Ukuba inkqubela yonyaka ophelileyo iyaqhubeka, kusenokwenzeka ukuba eli nani lidlule kwisi-1 000 000. Amava alandelayo abonisa indlela omnye udade waseNigeria awabungenela ngayo ubuvulindlela. Ubhala athi: “Xa ndandisele ndiza kugqiba kwisikolo samabanga aphakamileyo, ndaya kuncedisa ekuphekeleni abo babekwisikolo sobuvulindlela samaNgqina kaYehova. Apho ndadibana noodade ababini ababebadala kunomakhulu wam. Xa ndafumanisa ukuba babengoovulindlela ababeze esikolweni, ndazibuza, ‘Ukuba aba babini banokuba ngoovulindlela, yintoni enokundinzimela?’ Ngoko ndakuba ndigqibile esikolweni, nam ndaba nguvulindlela othe ngxi.”
15. Ubungqina obungacwangciswanga bunokuyihlahla njani indlela yokuba abanye bazimele ngoYehova?
15 Asingabo bonke abanokuba ngoovulindlela, kodwa bonke banako ukunikela ubungqina. EBelgium udade oneminyaka engama-82 ubudala waya kuthenga inyama. Waphawula ukuba umfazi kanosilarha wayephazamiseke ngokwenene ziziphendu zobupolitika ezazisandul’ ukwenzeka. Ngoko lo dade wadibanisa iphecana elithi Yintoni Ayikholelwayo AmaNgqina KaYehova? nemali xa wayehlawula. Xa lo dade wabuyela kule venkile, umfazi kanosilarha, ngaphandle kokulibazisa, wabuza oko iBhayibhile ikuthethayo ngemfazwe yehlabathi yesithathu ebonakala ngathi isenokubakho. Lo dade wamphathela incwadi ethi Uxolo Nonqabiseko Lokwenyaniso—Unokulufumana Njani? Emva kweentsuku ezimbalwa, njengokuba lo dade ukhulileyo wayengena kwesi silarha, umfazi kanosilarha wayemlinde ngemibuzo engakumbi. Lo dade waba novelwano ngulo mfazi; wacela ukumqhubela isifundo seBhayibhile, waza wasamkela. Ngoku, lo mfazi kanosilarha ufuna ukubhaptizwa. Kuthekani ngonosilarha? Walifunda iphecana ibe naye ufundisisa iBhayibhile sithetha nje.
‘Ubutyebi Bokulunga’
16. UYehova ubagcinele njani ubutyebi bokulunga abantu bakhe?
16 Kule mihla yokugqibela inoxinezeleko, ngaba uYehova ‘akabenzeli ububele obunothando obumangalisayo’ (NW) abo bazimela ngaye? Njengobawo onothando nokhuselayo, uYehova ubagcinele ubutyebi bokulunga abantwana bakhe basemhlabeni. Ebebathululela ulonwabo emehlweni abo bonke ababukeleyo, kanye njengokuba umdumisi esitsho: “Hayi, ubukhulu bokulunga kwakho, obuqwebele abakoyikayo, obenzele abazimela ngawe, ebusweni boonyana babantu!”—INdumiso 31:19, 21.
17-19. EGhana, kukuphi ukulunga okwaba ngumphumo wokubhalisa kwendoda esele ikhulile umtshato wayo ngokusemthethweni?
17 Ngoko ke, abantu behlabathi bayazibonela ukunyaniseka kwabo banqula uYehova, yaye bayamangaliswa. Ngokomzekelo, eGhana indoda eneminyaka engama-96 ubudala yaya kwiofisi yomtshatisi yaza yacela ukuba umtshato wayo wesintu weminyaka engama-70 ngoku ubhaliswe. Umtshatisi wothuka waza wabuza wathi: “Ngaba uqinisekile ukuba ufuna ukukwenza oku? Umdala unje?”
18 Le ndoda yacacisa: “Ndifuna ukuba ngomnye wamaNgqina kaYehova nokuba nesabelo kowona msebenzi ubalulekileyo ngaphambi kokupheliswa kweli hlabathi—umsebenzi wokushumayela iindaba ezilungileyo zoBukumkani bukaThixo. Lo msebenzi ukhokelela kubomi obungunaphakade. AmaNgqina kaYehova ayayithobela imithetho karhulumente, kuquka nomthetho wokubhalisa imitshato. Ngoko nceda ubhalise umtshato wam.” Lo mtshatisi wafana wee nkamalala. Wawubhalisa lo mtshato, yaza le ndoda ikhulileyo yemka yonwabile kuba ngoku yayitshate ngokusemthethweni.—Thelekisa amaRoma 12:2.
19 Emva koko, lo mtshatisi wacinga nzulu ngezinto awayezivile. ‘AmaNgqina kaYehova . . . owona msebenzi ubalulekileyo . . . ukupheliswa kwehlabathi . . . uBukumkani bukaThixo . . . ubomi obungunaphakade.’ Edidekile kukuba konke oku kwakubaluleke ngantoni kubomi bexhego elineminyaka engama-96 ubudala, wagqiba kwelokuba awafune amaNgqina ukuze awuqwalasele nzulu lo mbandela. Wamkela isifundo seBhayibhile sekhaya waza wenza inkqubela ngokukhawuleza. Namhlanje, lo mtshatisi liNgqina elibhaptiziweyo. Ngoko, xa sithobela uYehova nakwimicimbi abanye abasenokuyijonga njengemincinane, kusenokuphumela kukulunga okungathethekiyo kuthi nakwabo babukele ihambo yethu.—Thelekisa eyoku-1 kaPetros 2:12.
20. EMyanmar, ukunyaniseka komnye udade oselula kwakhokelela njani kubungqina obuhle?
20 Abantu abakhulu abavumele inyaniso ibaxonxe babe ngabantu abanyanisekileyo bamisela umzekelo omhle kwabaselula kweli hlabathi linganyanisekanga. EMyanmar kuhlala udade oselula onjalo. Uphuma kwintsapho ehlwempuzekileyo nethobekileyo enabantwana abalishumi. Ubawo, odla umhlala-phantsi, unguvulindlela othe ngxi. Ngaminazana ithile esikolweni, lo dade wachola umsesane wedayimani, awawusa kumfundisi-ntsapho wakhe ngoko nangoko. Ekungeneni kweklasi ngosuku olulandelayo, umfundisi-ntsapho wachazela iklasi ngendlela loo msesane owawufunyenwe ngayo waza waziswa ukuze ubuyiselwe kumnikazi wawo. Wandula ke wacela ukuba lo dade uselula eme phambi kweklasi yonke achaze isizathu sokuba enze oku, esazi ukuba abanye abantwana ngebekhethe ukuwugcina. Lo dade wachaza ukuba wayeliNgqina likaYehova yaye uThixo wakhe akabuthandi ubusela okanye naluphi na uhlobo lokunganyaniseki. Sonke isikolo seva ngoku, nto leyo eyanika udade wethu oselula ithuba elihle lokunikela ubungqina kubafundisi-ntsapho nakubafundi ngokufanayo.
21. Njengokuba abantu abaselula bekholosa ngoYehova, ihambo yabo yalatha njani kuye?
21 EBelgium umfundisi-ntsapho othile wathetha okuthile okubangel’ umdla ngamaNgqina kaYehova eklasini. Wayephawule ihambo yomnye wabafundi bakhe, naye owayekwangudade oselula, waza wathi: “Ngoku ndinenye imbono ngamaNgqina kaYehova. Ukuwacingela kakubi bekundibangele ndacinga ukuba angabona bantu bangabanyamezeliyo abanye. Angqineke engabona babanyamezelayo abanye, nangona engalalanisi kwimigaqo yawo.” Nyaka ngamnye abafundisi-ntsapho banikela ibhaso kwabona bafundi babalaseleyo. Phakathi kwamanye kukho ibhaso lemilinganiselo yokuziphatha. Kangangeminyaka emithathu elandelelanayo, lo mfundisi-ntsapho wayenikela ngamabhaso kwabathathu abahamba phambili kubantwana bamaNgqina kaYehova. Ngoko izihlandlo ezininzi kuba njalo kwabo bakholosa ngoYehova ngokunyanisekileyo.—INdumiso 31:23.
22. Yiyiphi indlela yoloyiso equkunjelwa ngayo INdumiso 31, yaye oko kusinceda njani ebudeni bale mihla yokugqibela yale nkqubo yezinto?
22 INdumiso 31 iqukumbela ngendlela yoloyiso: “Yomelelani, ikhaliphe intliziyo yenu nonke nina nithembele kuYehova.” (INdumiso 31:24) Ngoko ke, njengokuba sijamelene nale mihla yokugqibela yenkqubo kaSathana engendawo, kunokuba asishiye, uYehova uya kusondela kakhulu kuthi aze asifake amandla akhe. UYehova uthembekile yaye akaze asilele. Uyindawo yethu yokuzimela; uyinqaba yethu.—IMizekeliso 18:10.
Uyakhumbula Na?
◻ Kutheni ngentembelo uYehova sinokumenza indawo yethu yokuzimela?
◻ Bubuphi ubungqina obukhoyo bokuba ikwayara enamandla icula iindumiso zoBukumkani ngenkalipho?
◻ Kutheni sinokuqiniseka ukuba umnatha kaSathana awuyi kubarhintyela abantu bakaYehova?
◻ Bubuphi ubutyebi uYehova abugcinele abo bazimela ngaye?
[Isicangca esikwiphepha 12-15]
INGXELO YONYAKA WENKONZO WE-1993 YAMANGQINA KAYEHOVA EMHLABENI WONKE
(Bona imiqulu)
[Imifanekiso ekwiphepha 16, 17]
Abo bazimela ngoYehova babumba ikwayara enkulu yabavakalisi boBukumkani—enamandla yabazizi-4 709 889!
1. ESenegal
2. EBrazil
3. EChile
4. EBolivia