Wamkelekile KwiNdibano YeSithili “Yokoyika UThixo”!

EWE, azifikanga zigalelekile iindibano zesithili zamaNgqina kaYehova zowe-1994. Ukususela ngoJuni 1994 ukuya kuJanuwari 1995, ucwangciso lwendibano yeentsuku ezintathu luya kuviwa kumakhulu ezixeko zehlabathi lonke—okokuqala eMntla Merika, kulandele iMpuma neNtshona Yurophu, iAsia, uMbindi noMzantsi Merika, iAfrika, iOstreliya neziqithi zolwandle.

Onjani wona umxholo ukuxhokonx’ iingcinga—“Ukoyika UThixo”! Olu asiloloyiko lothile obomi bakhe busengozini kodwa kukoyika uThixo, uloyiko olunika uxolo lwengqondo novuyo. Umzekeliso weBhayibhile uthi: “Umvuzo wolulamo kukoyika uThixo, bubutyebi, nozuko, nobomi.” (IMizekeliso 22:4) Ukoyika uThixo kunokuphumela njani ‘kubutyebi, nozuko, nobomi’? Oko kuya kubonakala njengoko umxholo wendibano ucaciswa ebudeni beentsuku ezintathu ezizaliswe ziintetho, iingxubusho, imiboniso nomdlalo.

Umpostile uPawulos wabhala esithi asifanele ‘sikuhilizele ukuhlanganisana kwethu.’ (Hebhere 10:25) AmaNgqina kaYehova akujonga njengokubalulekileyo oko, ahlanganisana kathathu ngeveki ukuze afundisise njengebandla nokuze anqule. Noko ke, indibano yesithili yaminyaka le ikhethekile. Akhangela phambili kuyo ngovuyo yaye athetha ngayo kangangeenyanga emva koko. Sikumema ngokufudumeleyo, enoba ungowaluphi unqulo, ukuba uwathelele kwindibano yawo uze unandiphe ubudlelane obufudumeleyo bobuKristu nenkcazelo ebalulekileyo yokomoya. Ilungu lebandla lamaNgqina kaYehova elikufuphi kuwe liya kukuvuyela ukukuxelela ixesha nendawo eya kuba kuyo indibano ekufuphi kuwe.