Yixabise Inkonzo Yakho Engcwele

UKUZE sifikelele naluphi na usukelo oluxabisekileyo, sifanele sikulungele ukuncama okuthile. Ukuze ube ngugqirha kufuneka ufunde iminyaka emininzi, yaye uzimisele, yaye kufuneka imali. Umntu ophumelelayo ekwenzeni imithambo uchitha ixesha elininzi lobutsha bakhe ngokuthe ngcembe eqhubeka ezama imithambo enzima ngakumbi ukuze ekugqibeleni abe yincutshe. Ngokufanayo umdlali wepiyano onobuchule unokukhangela emva kwiminyaka emininzi awayeqhelisela ngayo ngokuzinikela.

Noko ke, kukho olunye usukelo olunemivuzo emikhulu kakhulu kuko nakuphi na ukuzincama okufunekayo. Luluphi olo sukelo? Lilungelo lokuba ngumkhonzi wOsenyangweni, uYehova uThixo. Enoba sincama ixesha, imali, okanye amandla kangakanani na, ilungelo lokunikela inkonzo engcwele kuMdali wethu lizisa imivuzo engenakuthelekiswa nanto. Ayinyaniso la mazwi ompostile uPawulos: “Ukuhlonela uThixo kunceda ngako konke, kunedinga lobomi bakalokunje, nobobo buza kubakho.” (1 Timoti 4:8) Makhe sibone ukuba kuyinyaniso njani na oko.

Xa Siqala Ukufunda NgoThixo

Abaninzi abasabela ngokuvumayo kwiindaba ezilungileyo baze baqalise ukufundisisa iBhayibhile amaxesha amaninzi abaqondi ukuba oko kuya kwenza iinguqulelo ezingakanani ebomini babo. Okokuqala, umfundi weBhayibhile osemtsha usenokulahlakelwa ngabanye babahlobo bakhe abangasiqondiyo isizathu sokuba engasahambisani nabo ekwenzeni izinto ngoku azigqala zikukungahloneli Thixo. (1 Petros 4:4) Bambi basenokuchaswa entsatsheni yaye basenokuba buhlungu kukubona abo babathandayo bengamthandi, yaye bemthiyile, uYehova. (Mateyu 10:36) Kunokuba nzima ukuzincama ngaloo ndlela.

Nasemsebenzini okanye esikolweni, kuya kufuneka ukuncama okuthile. Umfundi weBhayibhile osemtsha ekuhambeni kwexesha uya kuyeka ukuba nenxaxheba kumatheko ehlabathi nakweminye imibhiyozo. Uya kuyeka ukuphulaphula intetho engacocekanga yabo asebenza okanye afunda nabo, yaye akasayi kuqhulana nabo ngeziqhulo ezingcolileyo. Kunoko, uya kuzama ukusebenzisa isiluleko esifumaneka kwabase-Efese 5:3, 4: “Umbulo, nako konke ukungcola, nokubawa, makungakhe kukhankanywe phakathi kwenu, njengoko kubafaneleyo abangcwele; kwanamanyala, nentetho yobuyatha, nobuhiba, izinto ezo ezingafanelekileyo. Makube kokukhona ninemibulelo.”

Iinguqulelo ezinjalo zisenokumenza umfundi weBhayibhile abe likheswa. Oko kusenokuba nzima, ngokukodwa koselula osesesikolweni. Ekubeni efanele ajamelane neeholide ezininzi, neemfundiso ezichaseneyo noThixo, ezinjengendaleko, nengcinezelo esoloko ikho yokuhambisana nesihlwele, amaKristu aselula amele ahlale elulwela ukholo. Ukulandela iindlela zikaThixo kuya kuwenza ahluke yaye kusenokubangela ukuba agculelwe ngabantwana afunda nabo nangabafundisi-ntsapho. Oku kunzima ukukwamkela ngokukodwa kwiminyaka enzima yeshumi elivisayo, kodwa inkoliseko kaThixo ixabisekile kunoko sikuncamayo.

Ngaba Kukuzincama Ngokwenene?

Ezinye izinto ezibonakala zikukuzincama ekuqaleni ziye zingqineke ziyintsikelelo. Bambi kufuneka bahlukane nomkhwa wokutshaya. (2 Korinte 7:1) Oku kusenokuba nzima, kodwa hayi indlela ekuyintsikelelo ngayo xa lo mkhwa ungathandekiyo ekugqibeleni woyisiwe! Kunokuthethwa okufanayo ngokoyisa ukukhotyokiswa zezinye iziyobisi okanye butywala. Hayi indlela ubomi obulunge ngakumbi ngayo ngaphandle kwemikhwa enjalo etshabalalisayo! Bambi kufuneka balungise imeko yabo yomtshato. Abo bahlalisanayo bengatshatanga bamele batshate okanye bayeke ukuhlalisana. (Hebhere 13:4) Abo bahlala nabafazi abaninzi bamele basale nomfazi wobutsha babo. (IMizekeliso 5:18) Uhlengahlengiso olunjalo lubandakanya ukuzincama, kodwa luzisa uxolo ekhayeni.

Cinga Ngemivuzo

Kakade ke, nabani na othobela imithetho kaYehova ungenelwa ngokwenene. Okwesihlandlo sokuqala ebomini bakhe, umfundi weBhayibhile uqalisa ukubiza uMdali wakhe ngegama Lakhe, elinguYehova. (INdumiso 83:18) Umfundi ufikelela ekumthandeni uYehova njengoko efunda ngezinto ezimangalisayo azenzele uluntu nasaza kulwenzela zona. Kumazwe ekuxhaphake uloyiko lwabafileyo kuwo, uyayeka ukuba nolu loyiko lubangelwa ziinkolo, esazi ukuba abafileyo balele, balindele uvuko. (INtshumayeli 9:5, 10) Yaye hayi indlela okuzisa inkululeko ngayo ukuqonda ukuba uYehova akabathuthumbisi abantu ngonaphakade esihogweni! Ewe, ngokwenene inyaniso iyamkhulula.—Yohane 8:32.

Njengoko umfundi evisisanisa ubomi bakhe ngakumbi nangakumbi nemilinganiselo kaYehova, ufumana isazela esicocekileyo nokuzihlonela. Ukufunda ukuphila njengomKristu wokwenyaniso kuyamnceda ayinyamekele kakuhle ngakumbi intsapho yakhe, nto leyo ezisa ulwaneliseko novuyo olukhulu. Kwakhona kufuneka abekho kwiintlanganiso kwiHolo yoBukumkani. Anjani ukuba myoli amava! Apha kukho abantu abalubonisa ngokwenyaniso uthando olufudumeleyo iBhayibhile ethi lufanele lwahlule abantu bakaThixo. (INdumiso 133:1; Yohane 13:35) Intetho yabo icocekile yaye iyakha njengoko bethetha “izinto ezinkulu zikaThixo.” (IZenzo 2:11) Ewe, ukunxulumana ‘nesizalwana’ kungumthombo wolonwabo. (1 Petros 2:17) Ubudlelane obuhle ngolo hlobo bunceda umfundi weBhayibhile ‘amambathe umntu omtsha, othe ngokukaThixo wadalelwa ebulungiseni, nasebungcweleni benyaniso.’—Efese 4:24.

Inyathelo Lokuzahlulela

Njengoko umntu esenza inkqubela elwazini, ekugqibeleni ukuthanda kwakhe uYehova kumshukumisela ekubeni ahlulele ubomi bakhe kuye aze alufuzisele olu zahlulelo ngokubhaptizwa emanzini. (Mateyu 28:19, 20) Isiluleko sikaYesu sikukuba ngaphambi kokuba bathabathe eli nyathelo, abafundi bakhe bafanele babale iindleko. (Luka 14:28) Khumbula, umKristu ozahluleleyo ubeka ukuthanda kukaYehova kuqala aze azicekise izinto zenyama. Usebenza nzima ukuze alahle “imisebenzi yenyama” aze ahlakulele “esoMoya isiqhamo.” (Galati 5:19-24) Isiluleko esikwabaseRoma 12:2 ngoku sisebenza ngokuzeleyo ebomini bakhe: “Ningamilisi okweli phakade; manibe kumila kumbi ngokuhlaziyeka kwengqiqo yenu, ukuze nikucikide into okuyiyo ukuthanda kukaThixo okulungileyo, okukholekileyo, okuzalisekileyo.” Ngaloo ndlela, umKristu ozahluleleyo uphila ubomi bakhe ngengqiqo entsha enenjongo.

Noko ke, khawuqwalasele oko akufumanayo. Phakathi kwezinye izinto, ngoku unolwalamano lobuqu noMdali wendalo iphela. Uvakaliswa elilungisa ngenjongo yokuba abe ngumhlobo kaThixo! (Yakobi 2:23) Ngentsingiselo enzulu ngakumbi, uThixo umbiza ngokuthi “Bawo wethu osemazulwini.” (Mateyu 6:9) Enye intsikelelo kulo mntu usandul’ ukuzahlulela kukwazi ukuba ngokwenene ubomi bunayo injongo, yaye ubomi bakhe ubuphila ngokuvisisana naloo njongo. (INtshumayeli 12:13) Ngokulandela ukhokelo lukaYesu, unokumngqina uMtyholi elixoki ngokuhlala ethembekile. Hayi indlela oko okuyivuyisa ngayo intliziyo kaYehova!—IMizekeliso 27:11.

Kambe ke, njengoko umKristu enyamezela kwikhondo lokuthembeka, usamele aqhubeke encama okungakumbi. Ukuze alifunde ngokunentsingiselo iLizwi likaThixo kwisifundo sobuqu nakwesebandla kufuneka ixesha. (INdumiso 1:1-3; Hebhere 10:25) Kufuneka ixesha lobulungiseleli basentsimini alonge ngokuncama ezinye izinto. (Efese 5:16) Kwakhona kufuneka ixesha nomgudu ukuze abekho kwiintlanganiso zamaNgqina kaYehova aze aye kwiindibano zawo ezinkulu nezincinane. Kusenokufuneka ukuzincama ukuze ube nesabelo ekuxhaseni ngemali iHolo yoBukumkani nomsebenzi wokushumayela owenziwa ehlabathini lonke. Noko ke, njengoko izigidi zamaKristu zinokungqina, ukuba nenxaxheba ngentliziyo iphela kwizinto ezinjalo kuzisa ulonwabo. UYesu wathi: “Ukupha kunoyolo ngaphezu kokuphiwa.”—IZenzo 20:35.

Imivuzo yokuxhasa umsebenzi kaYehova mininzi kakhulu kunezinto ozincamayo. Njengoko sityhalela ekuqoleni, ubulungiseleli bethu buba neziqhamo buze buvuyise ngakumbi. Ngokwenene, akukho nto enokwanelisa njengokufundisa omnye umntu inyaniso yeBhayibhile uze umbone lowo emela unqulo lukaYehova. Yaye ukuba umnquli osemtsha ulilungu lentsapho, mhlawumbi umntwana oye wafundiselwa “ekuqeqesheni nasekululekeni kweNkosi,” oko kubangela uvuyo olukhethekileyo. (Efese 6:4) Siyazibona iintsikelelo zikaThixo ezityebileyo kwimigudu yethu yokuba ‘ngabo basebenza naye.’—1 Korinte 3:9, NW.

Eminye Imivuzo Yokukhonza Ngokuthembeka

Liyinyaniso elokuba, siya kuba neengxaki logama nje le nkqubo yezinto isekho. Kusenokwenzeka ukuba iingxaki ziya kuba qatha ngakumbi njengoko ixesha likaMtyholi liphela. Sisenokutshutshiswa okanye sinyamezele isihendo. Kodwa ukwazi ukuba uThixo unathi kuyasithuthuzela yaye kusinika amandla okunyamezela. (1 Korinte 10:13; 2 Timoti 3:12) Amanye amaKristu esikhonza nawo aye anyamezela ukuphathwa kakubi kangangeminyaka emininzi, kodwa ayanyamezela ngenxa yothando lwawo ngoThixo. Lawo anyamezela izilingo ezahlukahlukeneyo ngokuphumelelayo avakalelwa ngendlela abavakalelwa ngayo abapostile xa babethwayo baza bakhululwa. IZenzo 5:41 ziyabalisa: “Bemka ke ngoko bona ebusweni bentlanganiso yamatyala, bevuya, ngokuba kuthiwe bakufanele ukuhlaziswa ngenxa yegama lakhe.”

Umvuzo wokunyamezela ukudlula kakhulu ukuzincama kwanangoku. Kodwa khumbula, ukuhlonela uThixo “kunedinga” kungekuphela nje “lobomi bakalokunje” kodwa kwakhona “nobobo buza kubakho.” (1 Timoti 4:8) Hayi indlela amangalisa ngayo amathemba alowo unyamezelayo! Ukuba uthembekile, uya kusinda kwimbandezelo enkulu ephawula isiphelo sale nkqubo yezinto. Okanye ukuba uyafa ngaphambi kokufika kweso siganeko siphawulekayo, uya kuvuselwa kwihlabathi elitsha eliya kubakho emva kwaso. (Daniyeli 12:1; Yohane 11:23-25) Khawucinge ngendlela oya kugcoba ngayo xa unokuthi: “Ngoncedo lukaYehova, ndiphumelele!” Hayi indlela okuya kuvuyisa ngayo ukuphila kuloo mhlaba, ‘oya kuzala kukwazi uYehova, njengamanzi egubungele ulwandle.’—Isaya 11:9.

Ewe, kufuneka uncame okuthile ukuze ukhonze uThixo. Kodwa xa kuthelekiswa nemivuzo, oko kuzincama akuyonto kwaphela. (Filipi 3:7, 8) Ngenxa yako konke oko uThixo akwenzela abakhonzi bakhe ngoku noko aya kubenzela kona kwixesha elizayo, siphinda amazwi omdumisi athi: “Ndingambuyisela ngantoni na uYehova konke ukundiphatha kwakhe kakuhle?”—INdumiso 116:12.