IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w95 10/15 iphe. 14-17
  • Ukufikelela Zonke Iintlobo Zabantu KwiAtene Yanamhlanje

No video available for this selection.

Sorry, there was an error loading the video.

  • Ukufikelela Zonke Iintlobo Zabantu KwiAtene Yanamhlanje
  • IMboniselo Evakalisa UBukumkani BukaYehova—1995
  • Imixholwana
  • Intsimi Eyahlukahlukeneyo
  • Abo Banqwenelekayo Beentlanga Bayangena
  • Ukusikelelwa Ngemiphumo Emihle
IMboniselo Evakalisa UBukumkani BukaYehova—1995
w95 10/15 iphe. 14-17

Ukufikelela Zonke Iintlobo Zabantu KwiAtene Yanamhlanje

XA UMPOSTILE uPawulos watyelela eAtene malunga nowama-50 C.E., esi sixeko sasiseliziko lezorhwebo elibalulekileyo, nangona sasingasadumanga njengakuqala. Enye incwadi yembali ithi: “[IAtene] yaqhubeka isisixeko seGrisi ngezokomoya nezobugcisa, kwanendawo yokutyelela enqwenelekayo kwabafundileyo nakwabanamandla ngelo xesha.”

Ngoxa uPawulos wayelapho, kunokwenzeka ukuba waba nethuba lokushumayela kumaYuda, kubantu baseAtene abangabahedeni, nakubantu beendawo ezininzi ezahlukahlukeneyo. Engumfundisi ophaphileyo nonobuchule, kwenye intetho wathi uThixo wanika “bonke ubomi, nomphefumlo,” nokuba “wazenza ngagazi-nye zonke iintlanga zabantu,” nokuze ‘bonke ezindaweni zonke baguquke’ ngenxa yokuba Yena uya kugweba ‘elimiweyo.’ (Akekeliswe sithi.)—IZenzo 17:25-31.

Intsimi Eyahlukahlukeneyo

Kumashumi eminyaka yakutshanje kwakhona iAtene iye yaba sisixeko esinomtsalane kubantu abasuka kwiindawo ngeendawo. Abameli bamazwe nabasebenzi basemkhosini baye bafika bezele imicimbi ethile yamazwe asemzini. Abantu abaselula abasuka eAfrika nakuMbindi Mpuma baye bangabahlali abafunda eyunivesithi. Abasebenzi abangabemi basemzini abavela eAfrika, eAsia nakumazwe akwiMpuma Yurophu baye bathontelana apho. Baninzi abemi bakwiiPhilippines nabanye abasuka kuMzantsi-mpuma Asia, abaye beza kufuna umsebenzi wokuba babe zizicaka zasekhaya. Yaye azipheli iimbacu ezisuka kumazwe angabamelwane nakwiindawo ezineziphithiphithi emhlabeni wonke.

Le meko ilucelomngeni kubashumayeli basekuhlaleni beendaba ezilungileyo zoBukumkani. Inkoliso yabemi basekuhlaleni ithetha isiNgesi, kodwa bambi bathetha kuphela iilwimi zabo zomthonyama. Aba bantu bamela iindawo ezininzi ezahlukahlukeneyo ngokwempucuko nonqulo. Phakathi kwabo batyeleleyo, unokufumana abo bazibanga bengamaKristu, amaSilamsi, amaHindu, amaBhuda, abantu abakholelwa ekubeni umphefumlo wahlukile emzimbeni, abo bathi uThixo akanakwaziwa nabo bangakholelwayo kubukho bukaThixo. AmaNgqina kaYehova amele afunde ukuvumelanisa iintshumayelo zawo naba bantu basuka kwiindawo ezahlukahlukeneyo.

Ekubeni uninzi lwaba bantu bafikayo luye lwatyhubela ebunzimeni, ngokufuthi luba nemibuzo ngentsingiselo yobomi nangamathemba ekamva. Bambi banentlonelo ngeBhayibhile kwaye abanangxaki ekwamkeleni oko ikutshoyo. Uninzi kule ntsimi yahlukahlukeneyo luthobekile, lululamile yaye lulambele inyaniso. Luziva lukukhululekele ngakumbi ukufuna inyaniso ngenxa yokuba lukude neentsapho zalo nakwimeko-bume yasekhaya.

Ngowe-1986 kwalungiselelwa ibandla lokuqala labathetha isiNgesi eAtene ukuze kugutyungelwe le ntsimi. Kuye kwakho ulwando olungummangaliso. Ebudeni beminyaka emihlanu edluleyo, kuye kwabhaptizwa abasebatsha abamalunga nama-80. Umphumo ngowokuba eAtene kuye kwamiselwa ibandla labathetha isiArabhu, ibandla labathetha isiPolish, yaye kangangexesha elithile, iqela labathetha isiFrentshi. Abanye abasuka kwibandla lesiNgesi baye baya kunceda amanye amabandla namaqela anjalo eTesalonika ukusa emantla, eHeraklion, eKrete nasePiraeus, izibuko laseAtene. Ngaba ungathanda ukwazi abathile babo basemzini abaye bafunda inyaniso eAtene?

Abo Banqwenelekayo Beentlanga Bayangena

UThomas wazalelwa eAsmara, e-Eritrea, yaye wakhula engumKatolika ozinikeleyo. Xa wayeneminyaka eli-15 ubudala, waya kuhlala kwikhaya leemonki. Wabuza umphathi weemonki oku: “Kwenzeka njani ukuba uThixo omnye abe ngooThixo abathathu?” Umphathi weemonki waphendula: “Ngenxa yokuba samkela oko upopu akutshoyo ngezinto zokomoya. Ngapha koko, le yimfihlelo, kwaye usemncinane gqitha ukuba ungayiqonda.” Emva kweminyaka emihlanu ekwikhaya leemonki, uThomas wahamba, engakholisekanga yaye ekhathazekile yihambo naziimfundiso zecawa. Sekunjalo, wayengaliyekanga iphulo lakhe lokufuna uThixo oyinyaniso.

Esandul’ ukufudukela eAtene ngenye imini, wafumana kumnyango wakhe umbhalo weMboniselo, ngaphandle wawunomxholo othi “Unokuba Sempilweni Uze Wonwabe.” Wawufunda izihlandlo ezininzi. Kwakweli phephancwadi, wafunda ukuba sifanele sifune kuqala uBukumkani bukaThixo nobulungisa bakhe. (Mateyu 6:33) UThomas waguqa waza wacela uThixo ukuba ambonise indlela yokwenza oku, ethembisa: “Ukuba uyandibonisa indlela yokufuna uBukumkani bakho, ndiya kunikela ngeenyanga ezintandathu zobomi bam ukuba ndifunde indlela yokukukhonza.” Ngeveki yesine emva koko, kwankqonkqoza amaNgqina amabini. Ngokukhawuleza uThomas wasamkela isifundo seBhayibhile, kwaye emva kweenyanga ezilishumi wabhaptizwa. Uthi: “UYehova ngokwenene wawuphendula umthandazo wam, waza wandinika ithuba lokuba ndibe ngomnye wamaNgqina akhe. Ngoku uthando lwakhe lundishukumisela ukuba ndifune uBukumkani nobulungisa bakhe kuqala ebomini bam.”

Ngoxa eshumayela kwindlu ngendlu, amanye amaNgqina amabini afumana igama leelwimi zasemzini ecaleni kwentsimbi yokunkqonkqoza emnyango.

Kwavakala ilizwi lebhinqa kwi-intercom lisithi: “Ufuna ntoni?”

Omnye wamaNgqina wathi babekhangela abantu abathetha isiNgesi abanomdla eBhayibhileni.

Eli nenekazi labuza: “Ningena kweyiphi icawa?”

“SingamaNgqina kaYehova.”

“O, kuhle! Nyukani nize kumgangatho ophezulu.”

Benjenjalo yaye, kwathi xa kuvuleka umnyango wezinyusi (elevator), kwabe kumi isigantsontso sendoda engatyhilekanga. Kodwa lo mfazi wakhwaza engaphakathi.

“Bavulele. Ndifuna ukuthetha nabo.”

Lo mfazi wawaxelela ukuba wayejikeleza ihlabathi neqela lemidlalo indoda yakhe eyayidlala kulo, yaye ngezolo, wayethandazela ukufumana amaNgqina kaYehova. Ngoko nangoko kwaqaliswa isifundo seBhayibhile. Njengoko ixesha labo lokuba seGrisi lalilifutshane, kwalungiselelwa ukuba bafunde izihlandlo ezithathu ngeveki, incwadi ethi Unokuphila Ngonaphakade igqitywe ngeeveki nje ezilishumi.

Kwakufika ixesha lemidlalo kwakhona babuyela eGrisi. Le nkosikazi yaqalisa isifundo sayo kwakhona yaye yenza inkqubela engummangaliso. Emva kweenyanga ezimbalwa, yathelela amaNgqina kumsebenzi wokushumayela njengomvakalisi ongabhaptizwanga yaza kungekudala yaqalisa isifundo sayo sokuqala seBhayibhile. Nabani? Nomyeni wayo, owayechukumiseke gqitha ngamaNgqina naziinguqulelo ezazisenziwa ngumfazi wakhe.

UAllan, unyana womfundisi ongumProtestanti, wakhulela eMzantsi Afrika. Esemncinane kakhulu, wayeyisekile kwelokuba iBhayibhile sisityhilelo esiphefumlelweyo esivela kuThixo. Enganelisekanga lunqulo lwakhe, wabhenela kwintandabulumko nakwezobupolitika, kodwa oku kwamenza walikhamte ngakumbi kunangaphambili. Emva kokuba efudukele eGrisi, waziva esiya esiba likhamte ngakumbi. Wavakalelwa kukuba ubomi bakhe babungenayo injongo, kwaye wayesendleleni eya apho angaziyo.

Kwenzeka into ethile ngobunye ubusuku. UAllan uyabalisa: “Ndaguqa ngamadolo ndaza ndazityand’ igila kuThixo. Ndineenyembezi zentlungu ngekhondo lam lobomi, ndamcela uThixo ukuba andikhokelele kubalandeli bakhe bokwenyaniso. Ndathembisa ukuba ndandiza kuhamba ngokhokelo lwakhe.” Kwangaloo veki, wayesevenkileni waza wancokola nomnini-venkile, ibhinqa, ekwathi kanti liliNgqina. Loo ncoko yaba yindlela yokutshintsha kobomi buka-Allan. “Kwiintsuku ezilandelayo, iinkolelo endandikade ndizixabisile zatshabalala: UBathathu Emnye, isihogo somlilo, ukungafi komphefumlo—ngokucacileyo zonke asizomfundiso zeBhayibhile.” KwiHolo yoBukumkani, isibini esingamaNgqina sacela ukufundisisa naye iBhayibhile. Wavuma waza wenza inkqubela ekhawulezileyo. UAllan ukhumbula oku: “Inyaniso yandenza ndalila luvuyo ibe yandikhulula.” Emva konyaka wabhaptizwa. Namhlanje uvuyiswa kukukhonza njengesicaka solungiselelo kwibandla lasekuhlaleni.

UElizabeth usuka eNigeria, apho aye wafuna uThixo kwiicawa ezahlukahlukeneyo kodwa enganeliseki. Eyona nto yayimoyikisa kakhulu yimfundiso yokuthuthunjiswa ngonaphakade esihogweni somlilo. Xa weza eAtene kunye nentsapho yakhe, kwafika amaNgqina amabini kwakhe, kwaza kwaqaliswa isifundo seBhayibhile. UElizabeth wavuya kukuva ukuba uThixo akathuthumbisi bantu, kodwa unikela ithemba lobomi obungunaphakade kwiparadisi esemhlabeni. Wayekhulelwe umntwana wakhe wesine, awayefuna ukumqhomfa. Wandula ke wafunda eBhayibhileni imbono kaYehova ngobungcwele bobomi. Ngoku unentombi entle. UElizabeth wenza inkqubela ngokukhawuleza kakhulu yaye kungekudala wabhaptizwa. Nangona enabantwana abane nomsebenzi osisigxina, uyakwazi ukuba nguvulindlela ongumncedani phantse nyanga zonke. Uye wasikelelwa ngokubona umyeni wakhe eqalisa ukufunda iBhayibhile. Uthi: “Ekugqibeleni ndimfumene uThixo oyinyaniso nonqulo lokwenyaniso, ngoncedo lukaYehova nentlangano yakhe enothando.”

Uninzi lwabantu abakule ntsimi yahlukahlukeneyo lufunyanwa kumsebenzi wasesitratweni, kodwa kufuneka uzingise ukuze ukhulise umdla wabo. Oku kwaba njalo ngebhinqa eliselula elinguSallay, elisuka eSierra Leone. Lanikwa iphecana liNgqina elithile, lathabatha idilesi yakhe, laza lalungiselela ukuba liphinde limtyelele. USallay waba nomdla waza wasamkela isifundo seBhayibhile, kodwa ngenxa yeengcinezelo zomsebenzi nezinye iingxaki, sasingaqhutywa rhoqo. Wandula ke wafuduka ngequbuliso engayidluliselanga idilesi yakhe entsha. Eli Ngqina lazingisa laya kwindawo awayekade ehlala kuyo, yaye ekugqibeleni uSallay wathumela umyalezo wokuba eli Ngqina liye ekhayeni lakhe elitsha.

Ngoku bafunda ngokuthe rhoqo ngakumbi nangona uSallay wayesele ekhulelwe kakhulu. Akuba ebelekile, uSallay waba ngumvakalisi ongabhaptizwanga. Oku kusenokuvakala kulula, kanti kwakungenjalo. Nge6:30 kusasa, kufuneka alungele uduladula othabatha isiqingatha seyure ase usana lwakhe kwisikolo sokugcina abantwana, emva koko athabathe omnye uduladula othabatha iyure aye emsebenzini. Emva kokusebenza kumsebenzi wakhe wokucoca, uyagoduka. Ngobusuku beentlanganiso, okanye xa esiya kwinkonzo yasentsimini, uhamba ngoduladula iyure ukuya neyure ukubuya, phezu kwayo nje inkcaso yomyeni wakhe. Ngoxa wayebonakalisa uthando nomonde kuye, wenza inkqubela ukusa kwinqanaba lokuba azahlulele aze abhaptizwe. Kuthekani ngomyeni wakhe? Wayekho kwiSikhumbuzo sokufa kukaKristu yaye wavuma ukuba aqhutyelwe isifundo seBhayibhile.

Ukusikelelwa Ngemiphumo Emihle

Kwinkoliso yaba bantu, ukuhlala eAtene kokwexeshana. Abaninzi babuyela kumazwe ababesuka kuwo ukuze babelane nezalamane nabahlobo ngeendaba ezilungileyo. Bambi bafudukela kumazwe aseNtshona baze baqhubeke bekhonza uYehova. Abo bahlala eGrisi banandipha imiphumo emihle yokunikela ubungqina kubantu belizwe labo abafudukele apho ukuze babe ngabemi basemzini. Kwezinye iimeko iziqhamo zembewu yenyaniso zibonakala kuphela emva kokuba iindwendwe zifudukele kwelinye ilizwe zize zidibane namaNgqina.

Konke oku kububungqina bokuba uYehova akakhethi buso. Wamkela abantu bazo zonke iintlanga abamoyikayo nabathanda ubulungisa. (IZenzo 10:34, 35) Kwabo bantu banjengezimvu, ukufudukela kwabo kwelinye ilizwe ukwenzela ingenelo yezinto eziphathekayo kuye kwaphumela kwiintsikelelo ezingakumbi kunokuba bebelindele—ulwazi ngoThixo oyinyaniso, uYehova, nangedinga lakhe lobomi obungenasiphelo kwihlabathi elitsha elinobulungisa. Ewe, eneneni uYehova uye wayisikelela ngokutyebileyo imigudu yokufikelela abantu abathetha iilwimi zasemzini kwiAtene yanamhlanje!

[Imifanekiso ekwiphepha 16]

Abantu abasuka kumazwe amaninzi beva iindaba ezilungileyo eAtene

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share