Ukukhulisa Abantwana Abaziphethe Kakuhle—Ngaba Kusenzeka?
“NGOKU siphila phakathi kwabantu abaphixeneyo, apho kudibene izithethe ngezithethe, nalapho kungekho mthetho ufanayo wokuziphatha,” utsho njalo uRobert Glossop weZiko Elijongene Nemicimbi Yezentsapho laseVanier eOttawa, eKhanada. Ube yintoni umphumo woku? Ingxelo yephephandaba iThe Toronto Star ithi: “Ukumitha kwabakwishumi elivisayo, ugonyamelo lolutsha nokuzibulala kwabakwishumi elivisayo kuthabath’ olunye unyawo.”
Le ngxaki inwenwela nangaphaya koMntla Merika. UBill Damon, umlawuli weCenter for Human Development kwiYunivesithi iBrown kwiSiqithi iRhode, eU.S.A., ebebhula esela ehlolisisa ezi ngxaki eBritani nakwamanye amazwe aseYurophu, kuquka eOstreliya, kwaSirayeli naseJapan. Yena ityala uliphosa ezicaweni, ezikolweni nakwamanye amaziko ngokuyekelela ukukhanyisela abaselula indlela. Ukholelwa kwelokuba, isithethe sethu, “sigugile kuba asikwazi okufunekayo ekuncedeni abantwana bazenzele igama baze babe ngamagcisa.” Ecaphula iingcaphephe kwimicimbi yabazali ezifundisa ukuba “ingqeqesho iyingozi kwimpilo nakwintlalo-ntle yabantwana,” lo kaDamon umi ngelithi le “yindlela yokukhulisa iinjubaqa zabantwana abangathobeliyo.”
Yintoni ke efunwa lulutsha lwanamhlanje? Lona lusoloko lufuna nje uqeqesho lothando olulungisa intliziyo nengqondo. Ulutsha alufani ibe lufuna iindlela ngeendlela zengqeqesho. Xa ishukunyiswa luthando, ingqeqesho inokudluliselwa ngokuthi kuhlalwe phantsi kuboniswane. Kungeso sizathu le nto kwiMizekeliso 8:33 sixelelwa ukuba ‘siluve uqeqesho.’ Abanye ke bethu, ‘abalungiseki ngokuthetha nje kuphela.’ Ngamanye amaxesha kusenokufuneka basiwe isandla ngomlinganiselo ofanelekileyo ngenxa yokungathobeli. (IMizekeliso 17:10; 23:13, 14; 29:19) Xa incomela oku, iBhayibhile ayikhuthazi ukungomba umntwana ufuthekile ngumsindo okanye ukumbethela oogqirha nezicaka, nto leyo esenokumshiya ebhontebhonte yimivumbo ize imenzakalise. (IMizekeliso 16:32) Kunoko, umntwana ufanele asiqonde isizathu sokuba alungiswe nokuba oku kwenziwa ngenxa yokuba umzali wakhe engafuni ukuphulukana naye.—Thelekisa amaHebhere 12:6, 11.
Icebiso leBhayibhile eliluncedo neliphile ngolo hlobo libalaseliswa kwincwadi ethi Imfihlelo Yolonwabo Lwentsapho.