Ngaba Yindumiso Okanye Yinkohliso?

MNTU uthile uthi kuwe, “Indlela ozilungise ngayo iinwele zakho isemagqabini!” Ngaba yindumiso okanye yinkohliso? “Loo suti ingathi yayithungelwe kuwe!” Ngaba yindumiso okanye yinkohliso? “Oku kokona kutya kuluncuthu ndakha ndakungcamla!” Ngaba yindumiso okanye yinkohliso? Xa sinconywa ngolo hlobo, sinokuzibuza enoba loo mntu usincoma ngokunyanisekileyo kusini na okanye ufuna nje ukusanelisa abe yena engakukholelwa oko akutshoyo.

Sinokwazi njani ukuba oko kuthethwa ngumntu kuthi yindumiso okanye yinkohliso? Ngaba oko kunomsebenzi? Ngaba besingenakwamkela loo nto ithethwayo size sivuye? Kuthekani ngokudumisa abanye? Ngaba sakha sazihlolisisa iintshukumisa zethu? Ukucinga ngale mibuzo kusenokusinceda sisebenzise ingqiqo size sisebenzise ulwimi lwethu ngendlela ezisa indumiso kuYehova uThixo.

Indlela Echazwa Ngayo Indumiso Nenkohliso

Ukudumisa ngokweWebster’s Dictionary ligama elithetha ukugqalwa njengofanelekileyo okanye ukuncoma, kwakhona eli gama linokuthetha ukunqula okanye ukunika uzuko. Ngokucacileyo ezi ntsingiselo zimbini zokugqibela zibhekisela ngokungqalileyo kuYehova uThixo. Oku kuyimfuneko kunqulo lokwenyaniso, njengokuba umdumisi ophefumlelweyo ebongoza: “Ngokuba kulungile . . . , ngokuba kumnandi, ifanelekile indumiso.” “Yonke into ephefumlayo mayimdumise uYehova.”—INdumiso 147:1; 150:6.

Noko ke, oku akuthethi ukuba abantu abanakudunyiswa. Basenokudunyiswa, ngendlela yokunconywa, ukugqalwa befanelekile, okanye benenkoliseko. Kumzekeliso owanikelwa nguYesu, inkosi ixelela umkhonzi wayo isithi: “Wenze kakuhle, khoboka elilungileyo nelithembekileyo!”—Mateyu 25:21.

Kwelinye icala, inkohliso ichazwa njengendumiso ebubuxoki, enganyanisekanga okanye egqithiseleyo, apho lowo ukhohlisayo ngokuqhelekileyo enentsusa yokuzingca. Ukuncoma ngobuqhetseba okanye ngokukhohlisayo kwenziwa ngenxa yokufuna inkoliseko okanye ukungenelwa kwizinto eziphathekayo komnye umntu okanye ubani lowo ukhohlisayo azive enyanzelekile ukuba adumise. Ngoko abo bakhohlisayo bashukunyiswa kukuzingca. NgokukaYude 16, ‘bakulindele ukukhohlisa abanye abantu xa befuna inzuzo.’—The Jerusalem Bible.

Imbono EngokweZibhalo

Iyintoni imbono yeZibhalo ngokudumisa abanye abantu? UYehova usinika umzekelo wokuba siwulandele ngokuphathelele oku. EBhayibhileni sixelelwa ukuba siza kudunyiswa ukuba senza ukuthanda kukaYehova. Umpostile uPawulos uthi “ngamnye abe nendumiso yakhe isiza kuye ivela kuThixo.” UPetros usixelela ukuba umlinganiselo wokholo lwethu “ufunyanwe ungunobangela wendumiso.” Ngoko into yokuba uYehova uya kubadumisa abantu isibonisa ukuba ukudumisa ngokwenene kusisenzo sobubele, sothando, nesiyingenelo, esingamele sityeshelwe.—1 Korinte 4:5; 1 Petros 1:7.

Omnye umthombo indumiso enokuza ngawo kuthi, ngokutsho kweBhayibhile, kukudunyiswa ngabasemagunyeni abaphawula ihambo yethu entle baze basincome ngokunyanisekileyo. Sixelelwa oku: “Hlala usenza okulungileyo, yaye liya kukudumisa.” (Roma 13:3) Kwakhona sisenokudunyiswa ngabantu abakholelwa ngokunyanisekileyo koko bakuthethayo bengenazinjongo ezingaphaya koko. IZibhalo eziphefumlelweyo zithi kwiMizekeliso 27:2: “Mawudunyiswe ngomnye, ingabi ngowakho umlomo.” Oku kubonisa ukuba ukudunyiswa ngabantu kufanelekile.

Oku akunjalo ngokuphathelele ukukhohlisa okanye ukukhohliswa. Kutheni intetho ekhohlisayo ingamkholisi kangaka nje uYehova? Phakathi kwezinye izinto, ayinyanisekanga, yaye uYehova uyakugweba ukunganyaniseki. (Thelekisa IMizekeliso 23:6, 7.) Ngapha koko, asikokuthembeka. Echaza abantu abafanele bangamkelwa nguThixo, umdumisi uthi: “Konke abakwenzayo kukuxokisana, imilebe ekhohlisayo, bethetha ngokusuka kwintliziyo embaxa. Ngamana uYahweh angayinqumla yonke imilebe ekhohlisayo.”—INdumiso 12:2, 3, JB.

Ngaphezu koko, ukukhohlisa kukungabonakalisi uthando. Kubangelwa kukuzingca. Emva kokuthetha ngabo bakhohlisayo, umdumisi uDavide uthi bathi: “Ulwimi lwethu siyalupheza; imilomo yethu yeyethu; ngubani na oyinkosi kuthi?” UYehova uchaza abo bazingcayo njengabo ‘babhuqa iintsizana.’ Baye basebenzisa ulwimi lwabo olukhohlisayo, kungekhona ukwakha abanye, kodwa ekubabhuqeni nasekubacinezeleni.—INdumiso 12:4, 5.

Inkohliso—Umgibe

“Umfo ocengacenga ummelwane wakhe uthiyela iinyawo zakhe ngomnatha.” Utsho uKumkani osisilumko uSolomon, yaye hayi indlela ayinyaniso ngayo loo mazwi! (IMizekeliso 29:5) AbaFarisi bazama ukufaka uYesu emgibeni ngokumkhohlisa. Bathi: “Mfundisi, siyazi ukuba unenyaniso kwaye ufundisa indlela kaThixo ngenyaniso, kwaye akukhathalele nabani na, kuba akukhangeli imbonakalo yangaphandle yabantu.” Enjani yona inkohliso! Kodwa uYesu akazange akholiswe yintetho yabo egudileyo. Wayesazi ukuba babengakholelwa kwimfundiso yakhe eyinyaniso kodwa babezama ukumfaka emgibeni kumbandela awayethetha ngawo wokuhlawula irhafu kuKesare.—Mateyu 22:15-22.

Umntu owayehluke mpela kuYesu yayinguKumkani uHerode wenkulungwane yokuqala. Xa wayenikela intetho esidlangalaleni kwidolophu yaseKesareya, abantu basabela besithi: “Lilizwi lothixo elo, yaye asilamntu!” Kunokubakhalimela abantu ngaloo ndumiso icace mhlophe ukuba bubuxoki, uHerode wayamkela loo nkohliso. Ingelosi kaYehova yamohlwaya ngokukhawuleza njengoko uHerode wadliwa ziimpethu nto leyo eyabangela ukuba afe.—IZenzo 12:21-23.

UmKristu oqolileyo uya kukuphaphela ukuyiqonda into eyiyo inkohliso. Ngokukhethekileyo abadala bebandla bafanele balumke xa uthile obandakanyeke kumbandela onzulu encoma ngokugqithiseleyo, mhlawumbi ade afikelele kwinqanaba lokuthelekisa umdala nomnye yaye echaza indlela lowo athetha naye anobubele nanovelwano ngayo.

IBhayibhile iwubonisa ngokucacileyo omnye umgibe onokudalwa yinkohliso xa icacisa indlela umfana othile awakhohliswa ngayo lihenyukazi ukuze aziphathe kakubi. (IMizekeliso 7:5, 21) Esi silumkiso sinxulumene nemeko yanamhlanje. Phakathi kwabo basuswayo kubudlelane kwibandla lamaKristu minyaka le, uninzi lwabo lususwa ngenxa yokuziphatha okubi. Ngaba kunokwenzeka ukuba ukuwela kwisono esibi kangako kuqale ngenkohliso? Ekubeni abantu benomnqweno wokunconywa nowokuba kuthethwe kakuhle ngabo, intetho egudileyo esuka kwimilebe ekhohlisayo isenokuwaqoba amandla omKristu okuxhathisa aze abandakanyeke kwihambo ephosakeleyo. Ukuba oku akulunyukelwa, kusenokukhokelela kwimiphumo enzulu.

Zikhusele Kwinkohliso

Inkohliso yanelisa uthando lobuqu okanye ukuzingca kwalowo ukhohlisayo. Umntu utyekela ekubeni azicingele ngaphezu kokuba kuyimfuneko, ngandlel’ ithile azive ephakamile kunabanye. Isithandi sobulumko uFrançois de La Rochefoucauld wafanisa inkohliso nemali engumgunyathi, “kodwa ekubeni ingenaxabiso, ayinakusetyenziswa.” Ngoko, indlela onokuzikhusela ngayo kukuthobela isibongozo esisebenzayo sompostile uPawulos esithi: “Ndixelela wonk’ ubani apho phakathi kwenu ukuba angazicingeli ngakumbi kunokuba kuyimfuneko ukuzicingela; kodwa makacinge khon’ ukuze abe nengqondo ephilileyo, ngamnye njengoko uThixo amabele umlinganiselo wokholo.”—Roma 12:3.

Nangona sityekele ekufuneni ukuva oko kukholisayo ezindlebeni zethu, ngokwenene oko sikufuna kakhulu kumaxesha amaninzi licebiso noqeqesho olusekelwe eBhayibhileni. (IMizekeliso 16:25) UKumkani uAhabhi wayefuna ukuva kuphela oko kwakumkholisa; abakhonzi bakhe bacela kwanomprofeti uMikaya ukuba ilizwi lakhe libe ‘njengelizwi labo [abaprofeti baka-Ahabi abakhohlisayo], athethe okuhle.’ (1 Kumkani 22:13) Ukuba uAhabhi wayekulungele ukuphulaphula intetho engqalileyo waza waguqula iindlela zakhe zemvukelo, ngewayekuthintele ukoyiswa kwakhe okukhwankqisayo edabini lakwaSirayeli yaye ngewayesindise ubomi bakhe. Ukuze silondoloze imeko yethu yokomoya, sifanele sisabele ngokukhawuleza kwisiluleko esiqatha, sekunjalo esinothando, esisuka kwabo bamiselwe njengabadala abangamaKristu, abafuna ukusinceda ukuze sihlale sikwindlela ethe tye yenyaniso, kunokuba sikhangele abantu abaqhubeka besixelela indlela esithandeka ngayo, besinyumbaza ngentetho ekhohlisayo!—Thelekisa eyesi-2 kuTimoti 4:3.

Nangasiphi na isizathu amaKristu akasokuze atyekele kwinkohliso. NjengoElihu othembekileyo, athandaza ngokuzimisela esithi: “Mandingakhe ndikhethe ubuso bukabani, ndingakhe ndikhohlise nabani na; kuba andikwazi ukukhohlisa, okanye ubeya kundisusa kalula uMenzi wam.” Ngoko, njengoPawulos, baya kukwazi ukuthi: “Asizange nangaliphi na ixesha size enoba kungentetho yokunyhweleza . . . okanye ngembonakalo yobuxoki yenkanuko.”—Yobhi 32:21, 22, An American Translation; 1 Tesalonika 2:5, 6.

Indumiso Apho Ifaneleka Khona

Umzekeliso ophefumlelweyo ubonisa ukuba indumiso inokusebenza njengovavanyo, xa usithi: “Ukhamba lolokunyibilikisa isilivere yaye iziko lelokunyibilikisa igolide, kodwa indumiso luvavanyo lomntu.” (IMizekeliso 27:21, The New English Bible) Ewe, indumiso isenokubangela ubani azive ephakamile okanye enekratshi, nto leyo ekhokelela ekuweni kwakhe. Kwelinye icala, kusenokubonakalisa ukuthozama kwanokuthobeka komntu ukuba uyavuma ukuba nantoni na ayenzileyo eye yamzisela indumiso kungenxa kaYehova.

Indumiso enyanisekileyo yehambo entle okanye yempumelelo iyamakha lowo unikela indumiso nalowo udunyiswayo. Ibangela ukuba abo bantu baxabisane gqitha. Ikhuthaza ukulwela usukelo olufanele indumiso. Indumiso efanelekileyo eya kwabaselula isenokubenza bafune ukusebenza ngamandla. Isenokubanceda ukuba bakhe ubuntu babo njengoko benenjongo yokuphila ngemilinganiselo elindelekileyo kubo.

Ngoko ke, masiyiphephe inkohliso—enoba siyakhohlisa okanye siyakhohliswa. Masithobeke xa sidunyiswa. Yaye masinikele indumiso ngesisa nangomphefumlo uphela—ngokuthe rhoqo kuYehova ngonqulo lwethu yaye sibancome size sibaxabise ngokunyanisekileyo abanye, sikhumbula ukuba “ilizwi elithethwe ngexa elililo, azi lihle!”—IMizekeliso 15:23.