Ufuna Abantwana Bakho Babe Nekamva Elinjani?

NGABA abantwana bakho ubagqala njengelifa elixabisekileyo? (INdumiso 127:3) Okanye ngaba ukubakhulisa kwakho ukugqala njengento etya imali ongaqinisekanga nokuba iza kuphumelela? Kunokuba kube nengeniso eyimali, ukukhulisa abantwana kutya imali de babe bayakwazi ukuziphilela. Kanye njengokulondoloza ubutyebi obufumene njengelifa kufuna ukucwangciswa kakuhle, kukwanjalo nangokuphumelela ekukhuliseni abantwana.

Abazali abanenkathalo bafuna ukunika abantwana babo isiqalo esihle sobomi. Nangona kusenokwenzeka izinto ezimbi nezibuhlungu kweli hlabathi, abazali banokwenza lukhulu ekukhuseleni abantwana babo. Cinga ngemeko kaWerner noEva, ekuthethwe ngabo kwinqaku elandulelayo.a

Abazali Abanenyameko Ngokwenene

UWerner uthi kunokuba babe ngoovula zibhuqe, abazali bakhe babonisa umdla wokwenene koko kwakuqhubeka esikolweni. Uthi: “Ndandiwaxabisa ngokwenene amacebiso ababendinika wona, yaye ndandivakalelwa kukuba babendikhathalele yaye bendixhasa. Njengabazali, babengqongqo, kodwa ndandisazi ukuba babengabahlobo bam bokwenene.” Yaye xa uEva wayekhathazeke gqitha ngenxa yomsebenzi wakhe wesikolo kangangokuba wayedandathekile yaye ephuthelwa, abazali bakhe, uFrancisco noInez, nabo babechitha ixesha elininzi bethetha naye bemnceda ukuba azinzis’ ingqondo aze alungelelane ngokomoya.

UFrancisco noInez babezama njani ukukhusela abantwana babo baze babalungiselele ubomi bobuntu obukhulu? Kaloku, ukususela ngexesha abantwana babeziintsana, aba bazali banenyameko babesoloko bebabandakanya kwimisebenzi yekhaya yemihla ngemihla. Kunokuba banxulumane nje nabahlobo babo abakhulileyo, uInez noFrancisco babesoloko behamba nabantwana babo naphi na apho babesiya khona. Njengabazali abanothando, kwakhona babeyifundisa ngendlela efanelekileyo intombi nonyana wabo. UInez uthi: “Sabafundisa ukuba banyamekele ikhaya, babe noqoqosho, baze banyamekele nempahla yabo. Yaye sanceda ngamnye wabo ukuba azikhethele umsebenzi aze aqiniseke ukuba awungqubani neembopheleleko zakhe nezilangazelelo zokomoya.”

Hayi indlela ekubaluleke ngayo ukubazi abantwana bakho nokubafundisa njengomzali! Masihlolisise iindlela ezintathu onokukwenza ngazo oku: (1) Bancede abantwana bakho bakhethe umsebenzi ofanelekileyo wempangelo; (2) baxhobisele ukuhlangabezana neengxaki zasesikolweni nasemsebenzini; (3) babonise indlela abanokuzanelisa ngayo iimfuno zabo zokomoya.

Bancede Bakhethe Umsebenzi Ofanelekileyo

Ekubeni umsebenzi wokuziphilisa kabani ungachaphazeli imeko yakhe yezoqoqosho kuphela kodwa ufuna ixesha elininzi, ukuba ngumzali olungileyo kuquka ukuqwalasela izinto anomdla kuzo umntwana ngamnye nanokukwazi ukuzenza. Ekubeni kungekho mntu usezingqondweni onokufuna ukuba ngumthwalo kwabanye, abazali bamele bacingisise nzulu ngendlela umntwana anokuzilungiselela ngayo ukuze akwazi ukuzixhasa yena nentsapho yakhe. Ngaba unyana okanye intombi yakho kufuneka ifundele ubugcisa obuthile ukuze ikwazi ukuphila ubomi obufanelekileyo? Njengomzali onenyameko yokwenene, zibhokoxe ekuncedeni umntwana wakho abe neempawu ezinjengokukhuthala, alungele ukufunda, aze asebenzisane kakuhle nabanye.

Khawucinge ngoNicole. Uthi: “Abazali bam babefuna ndisebenze nabo kwishishini lokucoca. Bandicebisa ukuba kwinxalenye yomvuzo wam mandincedise kwiindleko zasekhaya ndize ndisebenzise eseleyo kwiimfuno zam okanye ndiyigcine. Oku kwandenza ndakwazi ukwamkela imbopheleleko nto leyo eyaba luncedo kamva ebomini.”

ILizwi likaThixo, iBhayibhile, alichazi ukuba luluphi uhlobo lomsebenzi wokuziphilisa afanele awukhethe umntu. Kodwa linikela ukhokelo olululo. Ngokomzekelo, umpostile uPawulos wathi: “Ukuba nabani na akafuni kusebenza, ningamyeki adle.” Ebhalela amaKristu aseTesalonika, kwakhona wathi: “Siva ukuba abathile bahamba ngokungalungelelananga phakathi kwenu, bengasebenzi konke konke kodwa begxuphuleka koko kungafuni bona. Kubantu abanjalo sinika umyalelo nesibongozo kwiNkosi uYesu Kristu ukuba ngokusebenza ngokuzolileyo bafanele badle ukutya abazizuzele ngokwabo.”—2 Tesalonika 3:10-12.

Sekunjalo, ukufumana umsebenzi nokwenza imali asikuko kodwa okubalulekileyo ebomini. Ekugqibeleni, abo banamabhongo baye bangoneliseki yaye basenokufumanisa ukuba ‘basukelana nomoya.’ (INtshumayeli 1:14) Kunokuba babongoze abantwana babo ukuba bazifunele udumo nokuba zizityebi, abazali benza kakuhle xa bebanceda ukuba babone ubulumko bamazwi kampostile uYohane aphefumlelwe nguThixo athi: “Musani ukulithanda ihlabathi okanye izinto ezisehlabathini. Ukuba nabani na uyalithanda ihlabathi, uthando lukaBawo alukho kuye; ngenxa yokuba yonk’ into esehlabathini—umnqweno wenyama nomnqweno wamehlo nokubonisa kukabani ngokuqhayisa ngezinto zakhe zobomi—ayiphumi kuBawo, kodwa iphuma ehlabathini. Ngapha koko, ihlabathi liyadlula yaye kunjalo nangomnqweno walo, kodwa lowo wenza ukuthanda kukaThixo uhleli ngonaphakade.”—1 Yohane 2:15-17.

Unokuzanelisa Njani Iimfuno Zabo Zokweemvakalelo?

Njengomzali, kutheni ungafani nomqeqeshi wabadlali? Akagxininisi nje kuphela ekubeni abadlali abanyamekelayo babe namandla okubaleka okanye okutsiba. Kusenokwenzeka ukuba, kwakhona uye abancede ukuba boyise isimo sengqondo esingafanelekanga, ngaloo ndlela esomeleza amandla abo angokweemvakalelo. Kwimeko yakho, unokubakhuthaza, ubomeleze uze ubaxhase njani abantwana bakho?

Khawucinge ngoRogério, oselula noneminyaka eli-13 ubudala. Esaphazanyiswe lutshintsho olwenzeka emzimbeni, wayekhathazwa kukungavisisani kwabazali bakhe nokungamkhathaleli kwabo. Yintoni enokwenziwa ngabaselula abafana naye? Nangona usenokungakwazi ukubakhusela abantwana bakho kuwo onke amaxhala neempembelelo ezimbi, ungaze unikezele kwindima yakho njengomzali. Ungayikhuselanga ngokugqith’ emgceni, qeqesha abantwana bakho unokuqonda, usoloko ukhumbula ukuba mntwana ngamnye wahlukile komnye. Ngokubonisa ububele nothando, unokwenza lukhulu ekwenzeni oselula azive enqabisekile. Kwakhona oku kuya kumkhusela ekubeni akhule engazithembi yaye engazihloneli.

Kungakhathaliseki indlela ababenempumelelo ngayo abazali bakho ekwaneliseni iimvakalelo zakho, kukho izinto ezintathu ezinokukunceda ukuba ube ngumzali oluncedo ngokwenene: (1) Kuphephe ukuzixakekisa ngeengxaki zakho ude utyeshele iingxaki ezibonakala zincinane zabantwana bakho; (2) zama ukuba nonxibelelwano oluhle nolonwabisayo nabantwana bakho yonke imihla; (3) yiba nesimo sengqondo esihle ngokuphathelele indlela yokucombulula iingxaki nokuqhubana nabantu.

Xa ekhangela emva kwiminyaka awayeselula ngayo, uBirgit uthi: “Ndafunda ukuba akunakubaguqula abantu babe yiloo nto ufuna babe yiyo. Umama waqiqa nam ngelithi ukuba ndandibona iimpawu endingazithandiyo ebantwini, ndandimele nje ndikuphephe ukufana nabo. Kwakhona wathi elona xesha lokuba ndikwazi ukuguqula iindlela zam lelo laxa ndandiselula.”

Sekunjalo, abantwana bakho bafuna okungaphezu komsebenzi nokomelezwa ngokweemvakalelo. Zibuze, ‘Ngaba ukukhulisa abantwana ndikugqala njengembopheleleko endiyinikwe nguThixo?’ Ukuba kunjalo, kuya kufuneka unyamekele iimfuno zokomoya zabantwana bakho.

Iindlela Yokwanelisa Iimfuno Zabo Zokomoya

KwiNtshumayelo yakhe yaseNtabeni, uYesu Kristu wathi: “Banoyolo abo bayiphapheleyo intswelo yabo yokomoya, ekubeni ubukumkani bamazulu ibobabo.” (Mateyu 5:3) Yintoni ebandakanyekileyo ekwaneliseni iimfuno zokomoya? Abantwana bangenelwa ngakumbi ukuba abazali bamisela umzekelo omhle ekubonakaliseni ukholo kuYehova uThixo. Umpostile uPawulos wabhala: “Ngaphandle kokholo akunakwenzeka ukumkholisa kakuhle [uThixo], kuba lowo uzayo kuThixo umele akholwe ukuba ukho nokuba uba ngumvuzi wabo bamfuna ngokunyamekileyo.” (Hebhere 11:6) Ukuze ukholo lube nentsingiselo yokwenene, kufuneka umthandazo. (Roma 12:12) Ukuba uyayibona intswelo yakho yokomoya, uya kufuna ukhokelo lukaThixo, njengokuba wenzayo uyise womntwana owaba nguMgwebi owaziwayo wakwaSirayeli uSamson. (ABagwebi 13:8) Akuyi kuthandaza kuphela kodwa uya kuya nakwiLizwi likaThixo eliphefumlelweyo, iBhayibhile, ukuze ufumane uncedo.—2 Timoti 3:16, 17.b

Nangona kungumsebenzi onzima ukunikela ukhokelo olululo, inkxaso ngokweemvakalelo, noncedo lokomoya, ukukhulisa abantwana kunokuba nomvuzo. Omnye uyise wabantwana ababini eBrazil uthi: “Andibi nawo nomfanekiso wam ndingahlali nabantwana bam. Zininzi izinto ezilungileyo esabelana nabo ngazo.” Ekucaciseni isizathu sokuba abantwana baqhube kakuhle, umama wongezelela esithi: “Sisoloko sikunye, yaye siye sizame ukuba kube mnandi yaye konwatywe. Yaye, okubaluleke ngakumbi, sisoloko sibathandazela abantwana.”

UPriscilla ukhumbula uthando nomonde owawubonakaliswa ngabazali bakhe kuye nanini na kukho ingxaki. Uthi: “Babengabahlobo bam bokwenene yaye babendinceda kuyo yonke into. Njengomntwana, ngokwenene ndandivakalelwa kukuba ndandiphethwe ‘njengelifa elivela kuYehova.’” (INdumiso 127:3) Njengokuba abanye abazali abaninzi besenza, kutheni ungalungiseleli ixesha nabantwana bakho ukuze nifundisise iBhayibhile neempapasho zamaKristu kunye? Ukuqwalasela iingxelo zeBhayibhile nemigaqo nikwimeko entle kunokunceda abantwana bakho baqiniseke yaye babe nethemba lokwenene ngekamva.

Xa Bonke Abantwana Beya Kuba Benqabisekile

Nangona ikamva lisenokubonakala limfiliba kubantwana abaninzi namhlanje, iLizwi likaThixo lisiqinisekisa ukuba umhlaba kungekudala uya kuba likhaya elinqabisekileyo labo bonke abantu. Khawube nomfanekiso ngqondweni wehlabathi elitsha elithenjiswe nguThixo xa abazali kungayi kufuneka bakhathazeke ngenkuseleko yabantwana babo! (2 Petros 3:13) Zama ukuyibona ngeliso lengqondo inzaliseko ezukileyo yesi siprofeto: “Ingcuka iya kuhlala nemvana, ingwe ibuthe netakane lebhokhwe; kubuthe ndawonye ithole lenkomo, nengonyama entsha, nenkomo etyetyisiweyo; nomntwana aziqhube ezo zinto.” (Isaya 11:6) Nanamhlanje, ukunqabiseka ngokomoya okuchazwe ngala mazwi kunenzaliseko yokwenene kwabo bakhonza uYehova. Xa uphakathi kwabo, uya kufumana uthando nenkathalo kaThixo. Ukuba ubonakalisa uthando ngoThixo, unokuqiniseka ukuba uyaziqonda iimvakalelo zakho njengomzali yaye uya kukunceda ukuba uhlangabezane namaxhala nezilingo onokujamelana nazo. Fundisisa iLizwi lakhe uze ubeke ithemba lakho kuBukumkani bakhe.

Bancede abantwana bakho kwindlela esa kubomi obungenasiphelo ngokumisela umzekelo omhle. Ukuba umenza igwiba lakho uYehova uThixo, ikamva lakho nelabantwana bakho linokodlula yonke iminqweno yakho. Unokuba nentembelo njengokuba waba nayo nomdumisi owacula wathi: “Ziyolise ngoYehova; wokunika okunqwenelwa yintliziyo yakho.”—INdumiso 37:4.

[Imibhalo esemazantsi]