Imibuzo Evela Kubafundi
Ngokutsho kukaMateyu 17:20, abapostile babengakwazi ukunyanga inkwenkwe eyayigula ‘ngenxa yokholo lwabo oluncinane.’ Noko ke, kuMarko 9:29, ukungakwazi kwabo kunxulunyaniswa nemfuneko yokuthandaza. Kutheni kunikelwa izizathu ezahlukahlukeneyo kwiincwadi zeVangeli ezahlukahlukeneyo?
Eneneni, ezi ngxelo zimbini ziyavisisana aziphikisani. Okokuqala, khangela uMateyu 17:14-20. Indoda yanikela ingxelo yokuba unyana wayo wayenesathuthwane nokuba abafundi bakaYesu babengakwazanga ukulinyanga eli gatyana. Emva koko uYesu wayinyanga le nkwenkwe ngokukhalimela idemon eyayiyigulisa. Abafundi babuza isizathu sokuba bengakwazanga ukukhalimela idemon. Ngokutsho kwengxelo kaMateyu, uYesu waphendula wathi: “Kungenxa yokholo lwenu oluncinane. Kuba enyanisweni ndithi kuni, Ukuba ninokholo olulingana nokhozo lwemostade, niya kuthi kule ntaba, ‘Suka apha uye phaya,’ yaye iya kusuka, ibe akuyi kubakho nto ingenakwenzeka kuni.”
Ngoku tyhila kuMarko 9:14-29, apho sifumana iinkcukacha ezongezelelekileyo. Ngokomzekelo, uMarko 9:17 unikela iinkcukacha zokuba kule meko oku kugula kulolu hlobo kubangelwe ngumoya ongendawo. Imele iphawulwe into yokuba iBhayibhile ithi kwenye indawo uYesu wanyanga abantu abanesathuthwane nabo beneedemon. (Mateyu 4:24) Kule meko ingaqhelekanga, oko kuxhuzula kwakubangelwa ‘ngumoya ongathethiyo nosisithulu,’ lowo ngumoya ongendawo, ongqinwa ngugqirha onguLuka. (Luka 9:39; Kolose 4:14) Phawula kuMarko 9:18 ibinzana elithi, “Yaye naphi na apho [idemon] umxhakamfula khona.” Ngoko le nkwenkwe yayingakhathazwa yidemon ngalo lonke ixesha, kodwa kwakungezihlandlo ezithile kuphela. Sekunjalo, abafundi babengakwazi ukugxotha idemon baze banyange eli gatyana. Xa babuza isizathu, uYesu waphendula: “Olu hlobo alunako ukuphuma nangantoni na ngaphandle komthandazo.”
Ngoko ke, ukufundisisa ingxelo kaMarko, kubonisa ukuba akukho mpikiswano koko uMateyu akubhalileyo. KuMarko 9:19, sifunda ukuba uYesu wakukhalazela ukungabi nalukholo kweso sizukulwana. Yaye kwindinyana 23, kuthiwa waxelela uyise wale nkwenkwe oku: “Zonke izinto zinako ukwenzeka kubani ukuba ubani unokholo.” Ngoko ke kwakhona noMarko ubalaselisa ukuba nokholo. Kukwindinyana 29 kuphela apho uMarko anikela iinkcukacha ezongezelelekileyo. UMarko unikela iinkcukacha ezongezelelekileyo ngoko uYesu wakuthethayo ngomthandazo, ezingekhoyo kuMateyu nakuLuka.
Ngoko ke, sinokugqiba ngelithini? Ngezinye izihlandlo abapostile abali-12 nabafundi abangama-70 bakhupha imimoya engendawo. (Marko 3:15; 6:13; Luka 10:17) Kodwa ngesi sihlandlo abafundi babengakwazi ukukhupha le demon. Ngoba? Ukuba sidibanisa iinkcukacha kwezi ngxelo zahlukahlukeneyo, simele sigqibe ngelithi babengazimiselanga ukwenjenjalo ngesi sihlandlo. Mhlawumbi inxalenye yengxaki yayiluhlobo lwedemon olwalubandakanyekile, ekubeni kubonakala ukuba iidemon zisenokungafani ngobuntu, ngezilangazelelo, nangamandla azo. Ngokuphathelele le, ngokukhethekileyo kwakufuneka ukholo olomeleleyo nomthandazo ozingisileyo woncedo lukaThixo. Kakade ke, uYesu wayenalo olo kholo. Wayexhaswa nanguMphulaphuli wemithandazo, uYise. (INdumiso 65:2) UYesu wayengenakuyinyanga le nkwenkwe yayigula ngokukhupha idemon kuphela kodwa wenjenjalo.