Unako Ukunyamezela Kude Kuse Ekupheleni

“Masilubaleke ngonyamezelo ugqatso olubekwe phambi kwethu.”​—⁠HEBHERE 12:⁠1.

1, 2. Kuthetha ntoni ukunyamezela?

UMPOSTILE UPAWULOS wabhalela amaKristu angamaHebhere enkulungwane yokuqala esithi: “Kufuneka ninyamezele.” (Hebhere 10:​36) Ebethelela ukubaluleka kolu phawu, umpostile uPetros naye wabongoza amaKristu esithi: “Elukholweni lwenu nongezelele . . . unyamezelo.” (2 Petros 1:​5, 6) Kodwa luyintoni kanye kanye unyamezelo?

² Isichazi-magama esiguqulela amagama esiGrike siwase esiNgesini sichaza isenzi sesiGrike esithi “nyamezela” njengesithetha ukuthi “hlala kunokuba usabe . . . qina, ungagungqi.” Xa ithetha ngesibizo sesiGrike esithi “unyamezelo,” enye incwadi ithi: “Ngumoya wokuthwala izinto, kungekuba uncamile, kodwa kuba unethemba lokwenene . . . Luphawu olugcina umntu emi ngeenyawo ngoxa ejamelene noqhwithela. Luphawu oluhle olunokuguqula nesona silingo sinzima sibe luzuko kuba ngaphaya kwentlungu lubona usukelo.” Ngoko ke, unyamezelo lwenza ubani aqine ngoxa ejamelene nemiqobo kunye namanzithinzithi aze angalahli ithemba. Ngoobani abalufuna ngokukhethekileyo olu phawu?

3, 4. (a) Ngoobani ekufuneka banyamezele? (b) Kutheni simele sinyamezele kude kuse esiphelweni?

³ Onke amaKristu abandakanyeke ngelifuziselayo kugqatso olufuna unyamezelo. Malunga nowama-65 C.E., umpostile uPawulos wabhalela umsebenzi owayelidlelane naye, nowayekwangugxa wakhe othembekileyo awayehambahamba naye la mazwi aqinisekisayo: “Ndiwulwile umlo omhle, ugqatso ndilubaleke kwada kwesa ekugqibeleni, ukholo ndilugcinile.” (2 Timoti 4:⁠7) Xa wayesithi “ugqatso ndilubaleke kwada kwesa ekugqibeleni,” uPawulos wayefanisa ubomi bakhe njengomKristu nogqatso, ekubekwe kulo umendo kunye nentambo ekumele kufikwe kuyo. Ngelo xesha, uPawulos wayesondela ngoloyiso entanjeni, kwaye ekhangele phambili ngentembelo ekufumaneni umvuzo. Wahlabela mgama esithi: “Ukususela ngeli xesha kuse phambili ndibekelwe isithsaba sobulungisa, eya kuthi iNkosi, umgwebi olilungisa, indinike sona njengomvuzo ngaloo mini.” (2 Timoti 4:⁠8) UPawulos wayeqinisekile ukuba uza kuwufumana umvuzo kuba wayenyamezele kwada kwasa ekupheleni. Kuthekani ngathi sonke?

⁴ Ekhuthaza abo baye bangenela olu gqatso, uPawulos wabhala: “Masilubaleke ngonyamezelo ugqatso olubekwe phambi kwethu.” (Hebhere 12:⁠1) NjengamaKristu, singenela olu gqatso lonyamezelo xa sizahlulela kuYehova uThixo ngoYesu Kristu. Kubalulekile ukuba nesiqalo esihle kulo mendo wokuba ngumfundi, kodwa ke oyena ndoqo kukufikelela esiphelweni saloo mendo. UYesu wavakalisa oku: “Lowo unyamezele kwada kwasekupheleni ngulowo oya kusindiswa.” (Mateyu 24:​13) Umvuzo ogcinelwe abo baya kude bafikelele esiphelweni solu gqatso bubomi obungunaphakade! Ngenxa yoko, sinosukelo ezingqondweni zethu, simele sinyamezele kude kuse esiphelweni. Yintoni eya kusinceda ukuze silufikelele olo sukelo?

Simele Sifumane Ukutya OkunesondloOk for X

5, 6. (a) Ukuze sinyamezele kugqatso lobomi, yintoni esimele sinikele ingqalelo kuyo? (b) Ngawaphi amalungiselelo okomoya esimele siwaxhakamfule, yaye ngoba?

⁵ Kude kufuphi nesixeko saseKorinte, eGrisi, kwakukho indawo ekwakuqhutywa kuyo iMidlalo yeIsthmus yamandulo. Ngokuqinisekileyo uPawulos wayesazi ukuba abazalwana baseKorinte babeqhelene nokhuphiswano lwemidlalo nolwezinye izinto olwalubakho apho. Ekubeni babelwazi, wabakhumbuza ngogqatso lobomi ababebandakanyeke kulo esithi: “Anazi na ukuba iimbaleki elugqatsweni zibaleka zonke, kodwa inye kuphela eyamkela ibhaso? Balekani ngendlela yokuba nilifikelele.” UPawulos wabethelela ukubaluleka kokuhlala uselugqatsweni nokuxhinela phambili de uye kufika entanjeni. Kodwa yintoni eyayiza kubanceda benjenjalo? Walek’ umsundulo esithi: “Wonke umntu oba nenxaxheba kusukuzwano uqhelisela ukuzeyisa kuzo zonke izinto.” Kunjalo kanye, abo babethabath’ inxaxheba kukhuphiswano lwemidlalo yamandulo babeziqeqesha kakhulu, bebeke iliso elibukhali kwinto abayityayo nabayiselayo, yaye belawula yonke into abayenzayo ukuze baphumelele.​—⁠1 Korinte 9:​24, 25.

⁶ Kuthekani ngogqatso alungeneleyo amaKristu? Omnye umdala webandla lamaNgqina kaYehova uthi: “Kufuneka unikele ingqalelo kukutya kokomoya ukuba ufuna ukunyamezela kugqatso lobomi.” Khawucinge nje ngokutya kokomoya uYehova, “uThixo onika unyamezelo,” aye wasilungiselela kona. (Roma 15:⁠5) Owona mthombo oyintloko wokutya kokomoya liLizwi lakhe, iBhayibhile. Ngaba asifanele siqhubeke silugcina ucwangciso lokufunda iBhayibhile? Esebenzisa “ikhoboka elithembekileyo neliyingqondi,” kwakhona uYehova uye walungiselela oolindixesha abasexesheni, IMboniselo noVukani! nezinye iimpapasho ezisekelwe eBhayibhileni. (Mateyu 24:​45) Ukuzifundisisa ngenkuthalo ezi ncwadi kuya kusomeleza ngokomoya. Ewe, simele siziphe ixesha​—⁠‘sizithengele ixesha elifanelekileyo’​—⁠lofundisiso lobuqu.​—⁠Efese 5:⁠16.

7. (a) Kutheni singamele sanele kukwazi iimfundiso ezisisiseko zamaKristu? (b) Sinokwenza njani ukuze “sixhinele ekuqoleni”?

⁷ Ukuze sihlale kumendo wokuba ngabafundi abangamaKristu, kufuneka senze okungakumbi kunokufunda “imfundiso esisiqalelo” yaye “sixhinele ekuqoleni.” (Hebhere 6:⁠1) Ngoko simele sihlakulele umdla ‘kububanzi nobude nomphakamo nobunzulu’ benyaniso size sizondle ‘ngokutya okuqinileyo kwabantu abaqolileyo.’ (Efese 3:​18; Hebhere 5:​12-14) Masenze umzekelo ngeengxelo ezine ezinokuthenjwa zobomi bukaYesu basemhlabeni​—⁠iVangeli kaMateyu, kaMarko, kaLuka nekaYohane. Xa sizifundisisa ngenyameko ezi ngxelo zeVangeli, asiyi kuphelela ekwazini izenzo zikaYesu nokuba wayengumntu onjani na kodwa siya kuqonda nendlela yokucinga eyayiphembelela izenzo zakhe. Siya kwandula ke sibe ‘nengqondo kaKristu.’​—⁠1 Korinte 2:⁠16.

8. Iintlanganiso zamaKristu zisinceda njani ukuba sinyamezele kugqatso lobomi?

⁸ UPawulos wabongoza amanye amaKristu esithi: “Masiqwalaselane ukuze sivuselelane eluthandweni nasemisebenzini emihle, singakutyesheli ukuhlanganisana kwethu ndawonye, njengoko kulisiko labathile ukwenjenjalo, kodwa masikhuthazane, ngokungakumbi njengoko nibona ukuba imini iyasondela.” (Hebhere 10:​24, 25) Hayi indlela ezilukhuthazo ngayo iintlanganiso zamaKristu! Kwaye hayi indlela esihlaziyeka ngayo xa sikunye nabazalwana noodade abanothando abanomdla kuthi nabafuna ukusinceda sinyamezele kude kuse ekupheleni! Asikwazi nje tu kwaphela ukulithabatha lula eli lungiselelo lothando likaYehova. Ngofundisiso lwethu lobuqu esilukhuthaleleyo nangokuya rhoqo ezintlanganisweni, masibe “ngabakhule ngokupheleleyo emandleni okuqonda.”​—⁠1 Korinte 14:⁠20.

Kukho Ababukeli Abakuntyontyelayo

9, 10. (a) Ababukeli banokuba lukhuthazo njani kugqatso olufuna unyamezelo? (b) Liyintoni ‘ilifu elikhulu lamangqina elisingqongileyo’ elikhankanywe kweyamaHebhere 12:⁠1?

⁹ Noko ke, kungakhathaliseki ukuba imbaleki ikulungele kangakanani na ukubaleka, zikho izinto ezinokwenzeka endleleni ezinokuyiphazamisa. UPawulos wabuza: “Benibaleka kakuhle. Ngubani onithinteleyo ekuqhubekeni nithobela inyaniso?” (Galati 5:⁠7) Kuyabonakala ukuba amanye amaKristu aseGalati arhintyelwa lunxulumano olubi aza, ngenxa yoko, aphazamiseka kugqatso lobomi. Kwelinye icala, inkxaso kunye nokhuthazo oluvela kwabanye abantu lunokwenza kube lula ukulunyamezela ugqatso. Le nto ifana negalelo abanokuba nalo ababukeli kwabo banenxaxheba kumdlalo othile. Izihlwele zabantu abanehlombe zifaka uchatha kwimincili ebangela ukuba abo banenxaxheba kukhuphiswano batyhalele phambili ukususela ekuqaleni kude kuse ekupheleni. Loo mikhwazo ekhuthazayo yababukeli, edla ngokukhatshwa ngamagwijo atsholo phezulu nokuqhwatywa kwezandla, inokwenza abo banenxaxheba batsale namandla okugqibela ayimfuneko ukuze bafike entanjeni. Okunene, ababukeli abanovelwano banokuba negalelo elakhayo kwabo baselugqatsweni.

¹⁰ Ngoobani ababukeli kugqatso lobomi aye alungenela amaKristu? Emva kokubala amangqina kaYehova athembekileyo awayephila ngaphambi kwexesha lamaKristu, njengoko kubhalwe kwisahluko 11 seyamaHebhere, uPawulos wabhala: “Ngoko ke, ngenxa yokuba sinelifu elikhulu kangaka lamangqina elisingqongileyo, . . . masilubaleke ngonyamezelo ugqatso olubekwe phambi kwethu.” (Hebhere 12:⁠1) Xa wayesebenzisa isikweko selifu, uPawulos akazange asebenzise igama lesiGrike elichaza ubungakanani kunye nokumila kwelifu. Kunoko, wasebenzisa elo ngokutsho kombhali wesichazi-magama uW. E. Vine “lithetha ingqimba yamafu egubungele isibhakabhaka.” Kucacile ukuba uPawulos wayecinga ngendimbane enkulu yamangqina​—⁠amaninzi kangangokuba abe ngathi yingqimba yelifu.

11, 12. (a) Amangqina athembekileyo awayephila ngaphambi kwexesha lamaKristu anokusikhuthaza njani ukuba sinyamezele ekubalekeni ugqatso? (b) Sinokungenelwa njani ngokuzeleyo ‘kwilifu elikhulu lamangqina’?

¹¹ Ngaba amangqina athembekileyo awayephila ngaphambi kwexesha lamaKristu anokuba ngababukeli bokoqobo kule mihla? Hayi, akuthethwa loo nto. Kaloku onke alele ukufa, alinde uvuko. Noko ke, ayeziimbaleki eziphumeleleyo ngexesha lawo, yaye imizekelo yawo isekho eBhayibhileni. Njengoko sifundisisa iZibhalo, aba bantu bathembekileyo basenokubonakala ezingqondweni zethu baze, ngokungathi kunjalo, basikhuthaze ukuba silugqibe ugqatso.​—⁠Roma 15:⁠4.a

¹² Ngokomzekelo, xa silingwa ngamathuba okuzifica kwizinto zehlabathi, ngaba ukucinga ngendlela uMoses awaluchasa ngayo uzuko lwaseYiputa akusishukumiseli ekubeni sihlale emendweni? Xa isilingo esijamelene naso sibonakala siqatha, ngokuqinisekileyo ukukhumbula uvavanyo olunzima awayejamelene nalo uAbraham xa wacelwa ukuba anyuse unyana wakhe uIsake njengedini kuya kusikhuthaza ukuba singayekeleli kukhuphiswano lokholo. Umkhamo elithi eli “lifu elikhulu” lala mangqina lisintyontyele ngawo kule ndlela uxhomekeke ekubeni silibona ngokucace kangakanani na ngamehlo ethu engqondo.

13. AmaNgqina kaYehova ale mihla asintyontyele ngayiphi indlela kugqatso lobomi?

¹³ Kweli xesha siphila kulo singqongwe nangamanye amaNgqina kaYehova amaninzi. Onjani ukuzuka umzekelo wokholo oye wamiselwa ngamaKristu athanjisiweyo kunye namadoda namabhinqa ‘esihlwele esikhulu’! (ISityhilelo 7:⁠9) Sinako ukufunda amabali obomi bawo ngamaxesha athile kweli phephancwadi nakwezinye iimpapasho zeWatch Tower.b Xa sicinga ngokholo lwawo, siyakhuthazeka ukuze sinyamezele kude kuse ekupheleni. Kwaye hayi indlela ekumnandi ngayo ukuxhaswa ngabahlobo nezalamane ezisondeleyo ezikhonza uYehova ngokuthembeka! Ewe, baninzi abantu abasintyontyelayo kugqatso lobomi.

Zibekele Isantya Obaleka Ngaso Ngobulumko

14, 15. (a) Kutheni kubalulekile ukuzibekela isantya esibaleka ngaso ngobulumko? (b) Kutheni sifanele sibe nengqiqo xa sibeka usukelo?

¹⁴ Xa ibaleka ugqatso olude, imbaleki imele izibekele isantya ebaleka ngaso ngobulumko. Iphephancwadi iNew York Runner ithi: “Ukuqalisa ngesantya esiphakame kakhulu kusenokukwenza ungaphumeleli. Umphumo udla ngokuba kukutsala nzima kakhulu xa kusele iimayile [iikhilomitha] ezimbalwa okanye ube kukurhoxa elugqatsweni.” Enye imbaleki yogqatso olude ikhumbula oku: “Isithethi esasihlohla izifundo endazithabathayo xa ndandilungiselela olu gqatso sasikhupha sacaca isilumkiso sisithi: ‘Ningakhuphisani neembaleki ezinamendu. Zibekeleni esenu isantya. Kungenjalo niya kudinwa nize ninyanzeleke ukuba nirhoxe elugqatsweni.’ Ukuthabatha eli cebiso kwandinceda ndalugqiba olo gqatso.”

¹⁵ Kugqatso lobomi, abakhonzi bakaThixo bamele bazibhokoxe ngamandla. (Luka 13:​24) Noko ke, umfundi uYakobi wabhala esithi: ‘Ubulumko obuvela phezulu bunengqiqo.’ (Yakobi 3:​17) Ngoxa umzekelo omhle wabanye usenokusikhuthaza ukuba senze nangakumbi, ukuba nengqiqo kuya kusinceda sibeke usukelo olusengqiqweni ngokwamandla nangokweemeko zethu. IZibhalo ziyasikhumbuza: “Ngamnye makangqine oko ukuko umsebenzi wakhe, yaye uya kwandula ke abe nonobangela wokugcoba ngokubhekisele kuye yedwa, ibe kungekhona ngokuzithelekisa nomnye umntu. Kuba ngamnye uya kuthwala umthwalo wakhe.”​—⁠Galati 6:​4, 5.

16. Ukuthozama kusinceda njani xa sizibekela usukelo?

¹⁶ KuMika 6:⁠8, (NW) sibuzwa lo mbuzo uxhokonxa iingcinga: “Yintoni uYehova ayifunayo kuwe ingekuko ukuba . . . uhambe noThixo wakho ngokuthozamileyo?” Ukuthozama kubandakanya ukuzazi iintsilelo zethu. Ngaba impilo enkenenkene okanye ukwaluphala kusenza sisilele ngandlela ithile koko sinokukwenza enkonzweni kaThixo? Masingatyhafiswa yiloo nto. UYehova uyayamkela imigudu nezinto esizincamayo ‘ngokoko sinako, kungekhona ngokoko singenako.’​—⁠2 Korinte 8:​12; thelekisa uLuka 21:​1-⁠4.

Gcina Amehlo Akho Esemvuzweni

17, 18. Kukugcina amehlo akhe esentwenini okwanceda uYesu wanyamezela isibonda sentuthumbo?

¹⁷ Xa wayechazela amaKristu aseKorinte ngemfuneko yokunyamezela kugqatso lobomi, uPawulos wakhankanya enye inkalo yeMidlalo yeIsthmus awayefanele anikele ingqalelo kuyo. Ethetha ngabo babenenxaxheba kukhuphiswano, uPawulos wabhala: “Kambe ke, bona ngoku [babaleka] ukuze bafumane isithsaba esinokonakala, kodwa thina eso singenakonakala. Ngoko ke, indlela endibaleka ngayo asiyiyo eyokungaqiniseki; indlela endalathisa ngayo izithonga zam yeyokuze ndingabethi umoya.” (1 Korinte 9:​25, 26) Umvuzo walowo uphumeleleyo kuloo midlalo yamandulo wawuba sisithsaba esenziwe ngompayina okanye ngezinye izityalo, okanye imifuno ethile yasendle eyomisiweyo​—⁠“isithsaba esinokonakala” ngokwenene. Noko ke, yintoni eza kufunyanwa ngamaKristu aza kunyamezela kude kuse ekupheleni.

¹⁸ Xa wayethetha ngoMzekelo wethu, uYesu Kristu, umpostile uPawulos wabhala esithi: “Ngenxa yovuyo olwalubekwe phambi kwakhe wasinyamezela isibonda sentuthumbo, elidela ihlazo, waza wahlala phantsi ngakwisandla sasekunene setrone kaThixo.” (Hebhere 12:⁠2) UYesu wanyamezela kwada kwasa ekupheleni kobomi bakhe njengomntu ngenxa yokuba wayejonge umvuzo wakhe owawungaphaya kwesibonda sentuthumbo, owawuquka uvuyo awayeza kuba nalo ngenxa yokufak’ isandla ekungcwalisweni kwegama likaYehova, ukuhlawulela intsapho yoluntu ekufeni, nokulawula njengoKumkani noMbingeleli Omkhulu njengoko ebuyisela uluntu oluthobelayo kubomi obungenasiphelo kumhlaba oyiparadesi.​—⁠Mateyu 6:​9, 10; 20:​28; Hebhere 7:​23-⁠26.

19. Yintoni esifanele siyinikele ingqalelo njengoko siqhubeka nomendo wokuba ngabafundi abangamaKristu?

¹⁹ Khawucinge nje ngovuyo olubekwe phambi kwethu njengoko siqhubeka kumendo wokuba ngabafundi abangamaKristu. UYehova usinike umsebenzi owanelisa ngokwenene wokushumayela iindaba ezilungileyo zoBukumkani bukaThixo nowokudlulisela kwabanye ulwazi lweBhayibhile olusindisa ubomi. (Mateyu 28:​19, 20) Hayi indlela ekuchulumancisa ngayo ukufumana umntu onomdla kuThixo wokwenyaniso nokumnceda loo mntu ukuba angene kugqatso lobomi! Kwaye kungakhathaliseki ukuba basabela njani na abantu esibashumayezayo, kulilungelo kuthi ukuba nesabelo kumsebenzi onxibelelene nokungcwaliswa kwegama likaYehova. Xa sibanyamezela abo bakwintsimi esinikela kuyo ubungqina nangona bengasihoyi okanye besichasa, siyavuya kuba siyenza ibe nemihlali intliziyo kaYehova. (IMizekeliso 27:​11) Kwaye usithembisa umvuzo omkhulu wobomi obungunaphakade. Hayi indlela okuvuyisa ngayo oko! Kufuneka zihlale ziqaqambile emehlweni ethu ezi ntsikelelo kwaye sizingise elugqatsweni.

Njengoko Isiphelo Sisondela

20. Ugqatso lobomi lusenokuya lusiba nzima njani njengoko isiphelo sisondela?

²⁰ Kolu gqatso lobomi, simele sijamelane notshaba lwethu lokuqala nolokugqibela, uSathana uMtyholi. Njengoko sisondela entanjeni, akayeki ukuzama ukusikhubekisa okanye ukusenza sithobe isantya. (ISityhilelo 12:​12, 17) Kwaye akulula ukuhlala ungumvakalisi woBukumkani othembekileyo kugquba ezi mfazwe, iindlala, iindyikityha zokufa, nawo onke amanye amanzithinzithi aluphawu ‘lwexesha lokuphela.’ (Daniyeli 12:⁠4; Mateyu 24:​3-14; Luka 21:​11; 2 Timoti 3:​1-⁠5) Ngaphezu koko, maxa wambi isiphelo sisenokubonakala sikude kunokuba besicinga, ngokukodwa ukuba sele sinamashumi eminyaka silubaleka olu gqatso. Kodwa ke iLizwi likaThixo liyasiqinisekisa ukuba isiphelo siya kufika. UYehova uthi asiyi kulibazisa. Isiphelo sele sibonakala.​—⁠Habhakuki 2:⁠3; 2 Petros 3:​9, 10.

21. (a) Yintoni eya kusomeleza njengoko siqhubeka nogqatso lobomi? (b) Yintoni esifanele sizimisele ngayo njengoko isiphelo sisondela?

²¹ Ngoko ke, ukuze siphumelele kugqatso lobomi, simele sizomeleze ngamalungiselelo othando kaYehova okusondla ngokomoya. Kwakhona silufuna lonke ukhuthazo esinokulufumana ngokunxulumana rhoqo namanye amakholwa, nawo abaleka kolu gqatso. Kwanokuba lunokwenziwa nzima nangakumbi yintshutshiso eqatha kwanezinye izinto ezinokuvela esithubeni, sinako ukunyamezela kude kuse ekupheleni kuba kaloku uYehova unika “amandla angaphaya koko kuqhelekileyo.” (2 Korinte 4:⁠7) Hayi indlela ekusiqinisekisa ngayo ukwazi ukuba uYehova ufuna siye kufika entanjeni! “Masilubaleke ngonyamezelo ugqatso olubekwe phambi kwethu” sinozimiselo olukhulu, siqiniseke ngokupheleleyo ukuba “ngexesha elililo siya kuvuna ukuba asidinwa.”​—⁠Hebhere 12:⁠1; Galati 6:⁠9.

[Imibhalo esemazantsi]

Ngaba Usakhumbula?

◻ Kutheni simele sinyamezele kude kuse ekupheleni?

◻ Ngawaphi amalungiselelo kaYehova esifanele singawatyesheli?

◻ Kutheni kubalulekile ukuzibekela isantya ngobulumko?

◻ Luluphi uvuyo olubekwe phambi kwethu njengoko siqhubeka nogqatso?

[Umfanekiso okwiphepha 18]

Zuza ukhuthazo kwiintlanganiso zamaKristu