Usebenza Njani Umoya KaThixo Namhlanje?

WAYESISIQHWALA kwasesizalweni sikanina. Yonke imihla, wayehlala kumnyango wetempile owawubizwa ngokuthi Omhle ukuze acele izipho zenceba kwabo babengena etempileni. Noko ke, ngesinye isihlandlo lo mngqibi unesiphene wafumana isipho esasixabisa ngaphezulu lee kuneengqekembe ezimbalwa ezincinane. Waphiliswa!—IZenzo 3:2-8.

Nangona umpostile uPetros noYohane ingabo ‘abamphakamisayo’ kangangokude ‘iintende zeenyawo zakhe . . . ziqiniswe,’ abazange bazizukise ngenxa yoko kuphilisa. Ngoba? UPetros wachaza esithi: “Madoda akwaSirayeli, kutheni namangaliswa koku, okanye kutheni nondela kuthi ngokungathi simenze wahamba ngawethu amandla okanye ngozinikelo lobuthixo?” Eneneni, bobabini uPetros noYohane baqonda ukuba, oko kwakungenakwenzeka ngamandla abo, kodwa kwenzeka ngomoya oyingcwele kaThixo.—IZenzo 3:7-16; 4:29-31.

Ngelo xesha, loo ‘misebenzi yamandla’ yayisenziwa ukuze ibonise ukuba ibandla lamaKristu elitsha lalixhaswa nguThixo. (Hebhere 2:4) Kodwa emva kokuba iyifezile injongo yayo, yayiza “kubhangiswa,” watsho njalo umpostile uPawulos.a (1 Korinte 13:8) Ngaloo ndlela, ngoku kwibandla lamaKristu enyaniso asiboni bantu bamiselwe nguThixo ukuba baphilise, baprofete okanye bakhuphe iidemon.

Noko ke, ngaba oku kuthetha ukuba umoya oyingcwele kaThixo awusasebenzi? Ngokuqinisekileyo akunjalo! Makhe siqwalasele ezinye iindlela owawusebenza ngazo umoya kaThixo ngenkulungwane yokuqala nendlela osebenza ngayo kumhla wethu.

“Umoya Wenyaniso”

Enye indlela osebenza ngayo umoya oyingcwele kaThixo kukwazisa, ukukhanyisa, nokutyhila iinyaniso. Ngaphambi nje kokuba afe, uYesu waxelela abafundi bakhe oku: “Ziseninzi izinto endinokuzithetha kuni, kodwa aninakukwazi ukuzithwala okwangoku. Noko ke, xa efika yena, umoya wenyaniso, uya kunikhokelela kuyo yonke inyaniso.”—Yohane 16:12, 13.

“Umoya wenyaniso” wathululwa ngePentekoste yowama-33 C.E. xa abafundi abamalunga ne-120 ababehlanganisene kwigumbi eliphezulu eYerusalem babhaptizwa ngomoya oyingcwele. (IZenzo 2:1-4) Umpostile uPetros wayephakathi kwabo babekho kuloo msitho wawusenziwa minyaka le. Ezaliswe ngumoya oyingcwele, uPetros “wema” waza wachaza ngokubanzi, okanye wacacisa, iinyaniso ezithile ngoYesu. Ngokomzekelo wabalisa ngendlela “uYesu umNazarete” ‘awaphakanyiselwa ngayo ngasekunene kukaThixo.’ (IZenzo 2:14, 22, 33) Kwakhona umoya kaThixo washukumisela uPetros ukuba avakalise ngenkalipho kubaphulaphuli bakhe abangamaYuda oku: “Ngoko ke yonke indlu kaSirayeli mayazi ngokuqinisekileyo ukuba uThixo umenze iNkosi wamenza noKristu, lo Yesu nambethelelayo nina.” (IZenzo 2:36) Ngenxa yeso siprofeto sikaPetros siphefumlelweyo, abantu abamalunga namawaka amathathu “balamkela ngokusuk’ entliziyweni ilizwi lakhe” baza babhaptizwa. Ngale ndlela, umoya oyingcwele kaThixo waba luncedo ekubakhokeleleni kwinyaniso.—IZenzo 2:37-41.

Kwakhona umoya oyingcwele kaThixo wawusebenza njengomfundisi nomkhumbuzi. UYesu wathi: “Umncedi, umoya oyingcwele, lowo uBawo aya kumthumela egameni lam, yena uya kunifundisa zonke izinto aze anikhumbuze zonke izinto endinixelele zona.”—Yohane 14:26.

Wawusebenza njani umoya oyingcwele njengomfundisi? Umoya kaThixo watyhila ezingqondweni zabafundi izinto ababezivile kuYesu ngaphambili kodwa ababengazange baziqonde ngokuzeleyo. Ngokomzekelo, abapostile babesazi ukuba xa kwakuthethwa ityala lakhe, uYesu waxelela umlawuli ongumRoma welakwaYuda, uPontiyo Pilato oku: “Ubukumkani bam abuyonxalenye yeli hlabathi.” Ukanti, ngexesha lokunyukela kukaYesu ezulwini ngaphezu kweentsuku ezingama-40 kamva, abapostile ngempazamo, babesacinga ukuba uBukumkani babuza kumiselwa apha emhlabeni. (Yohane 18:36; IZenzo 1:6) Kuyabonakala ukuba, abapostile abazange bayiqonde ngokuzeleyo intsingiselo yamazwi kaYesu de kwasemva kokuthululwa komoya oyingcwele kaThixo ngePentekoste yowama-33 C.E.

Umoya kaThixo wawusebenza nanjengomkhumbuzi ngokubakhumbuza iimfundiso ezahlukahlukeneyo zikaYesu. Ngokomzekelo, iziprofeto eziphathelele ukufa nokuvuka kukaKristu, zaba nentsingiselo entsha ngoncedo lomoya oyingcwele. (Mateyu 16:21; Yohane 12:16) Ukukhumbula iimfundiso zikaYesu kwanceda abapostile ukuba basikhusele ngenkalipho isigxina sabo phambi kookumkani, oomantyi neenkokeli zonqulo.—Marko 13:9-11; IZenzo 4:5-20.

Ukongezelela, umoya oyingcwele kaThixo wanceda ngokukhokelela amaKristu okuqala kwintsimi enemveliso ngoxa ayekubulungiseleli. (IZenzo 16:6-10) Kwakhona umoya kaThixo waphembelela amaKristu okuqala ukuba abe nesabelo ekubhaleni iLizwi likaThixo, iBhayibhile, ukuze kungenelwe lonke uluntu. (2 Timoti 3:16) Ngoko, ngokucacileyo umoya oyingcwele wawusebenza ngeendlela ezahlukahlukeneyo ngenkulungwane yokuqala. Wawungelolungiselelo lokwenza imimangaliso kuphela.

Umoya Oyingcwele Kumhla Wethu

Ngokufanayo umoya oyingcwele ubusebenza ngenxa yamaKristu okwenyaniso kumhla wethu. Oku kwabonakala kwiqaqobana labafundi beBhayibhile eAllegheny, ePennsylvania, eUnited States, ngasekupheleni kwesiqingatha senkulungwane ye-19. Aba bafundi beBhayibhile banenzondelelo babekulangazelela ukwazi “inyaniso.”—Yohane 8:32; 16:13.

Elinye ilungu leli qela, uCharles Taze Russell, ethetha ngokunxanelwa kwakhe inyaniso yeZibhalo wathi: “Ndathandaza . . . ukuze ndincedwe ndisuse entliziyweni nasengqondweni yam naliphi na ikratshi elinokuxaba endleleni ukuze umoya wakhe undikhokelele ekuqondeni okufanelekileyo.” UThixo wawusikelela lo mthandazo wokuthobeka.

Njengoko lo kaRussell kunye namaqabane akhe babehlolisisa iZibhalo ngenzondelelo, izinto ezininzi zacaca ngakumbi. URussell uthi xa echaza: “Sifumanise ukuba kangangeenkulungwane amahlelo namaqela awahlukahlukeneyo aye ahlulelana ngeemfundiso zeBhayibhile, ezivanga neembono neengcamango eziphosakeleyo zabantu.” Oku kwaphumela koko wakubiza ngokuba “kukusetyenziswa kwenyaniso kakubi.” Ngokwenene, iinyaniso zeZibhalo zazigqunyelelwe yingxuba-kaxaka yeemfundiso zobuhedeni ezazingene kwiNgqobhoko kangangeenkulungwane. Kodwa lo kaRussell wayezimisele ukuba ayazi aze ayivakalise inyaniso.

NgeZion’s Watch Tower and Herald of Christ’s Presence, lo kaRussell kunye namaqabane akhe bazigxeka ngenkalipho iimfundiso zonqulo ezibubuxoki ezazimmela kakubi uThixo. Baqonda ukuba—ngokwahlukileyo kwiimbono eziqhelekileyo zonqulo—umphefumlo uyafa, nokuba xa sisifa siya engcwabeni, yaye uYehova kuphela koThixo oyinyaniso yaye ngoko ke akayiyo inxalenye kaBathathu Emnye.

Noko ke, njengoko unokuthelekelela, ukubhencwa okunjalo kweemfundiso zobuxoki kwabacaphukisa abefundisi beNgqobhoko. Bezimisele ukubambelela kwizikhundla zabo eziphezulu, abefundisi abaninzi bamaKatolika namaProtestanti balungiselela iphulo ngenjongo yokuhlazisa uRussell. Kodwa yena kunye nezinxulumani zakhe abazange banikezele. Benentembelo, bafuna ulwalathiso kumoya kaThixo. URussell wathi: “Isiqinisekiso seNkosi yethu sikukuba . . . siya kufundiswa ngumoya oyingcwele kaBawo, owathunyelwa ngenxa yokuba wawucelwe nguYesu uMkhululi, uMlamleli neNtloko yethu.” Enyanisweni ke wabafundisa! Aba Bafundi beBhayibhile banyanisekileyo baqhubeka bethabatha amanzi acocekileyo enyaniso eBhayibhileni yaye bewavakalisa ehlabathini lonke.—ISityhilelo 22:17.

Kangangethuba elingaphezu kwenkulungwane ngoku, intlangano yamaNgqina kaYehova yanamhlanje iye yaqhubeka ithobela ukhokelo lomoya oyingcwele kaThixo. Njengoko umoya kaYehova uqhubeka ukhanyisela ukubona kwawo ngokomoya, ngokuzithandela amaNgqina enza uhlengahlengiso oluyimfuneko ukuze azivisisanise nokuqonda okuhlaziyiweyo.—IMizekeliso 4:18.

“Niya Kuba Ngamangqina Am”

UYesu wachaza enye imbonakaliso yomoya oyingcwele kaThixo xa waxelela abafundi bakhe oku: “Niya kwamkela amandla xa umoya oyingcwele ufika kuni, yaye niya kuba ngamangqina am . . . kuse nakwezona nxalenye zikude zomhlaba.” (IZenzo 1:8) Isithembiso sikaYesu sokuthululela abafundi bakhe “amandla” ‘nomoya oyingcwele’ ukuze baphumeze umsebenzi wabo abawunikwe nguThixo sisasebenza nanamhlanje.

Njengeqela, amaNgqina kaYehova aziwa ngokwenza umsebenzi wokushumayela. (Bona ibhokisi.) Eneneni, amaNgqina kaYehova athetha ngesigidimi senyaniso kumazwe angaphezu kwama-230 namaqela eziqithi. Phantsi kwazo naziphi na iimeko onokucinga ngazo, kuquka nokubeka ubomi bawo esichengeni kwimimandla ekugquba imfazwe kuyo, aphakamisa amazwi awo ngenkalipho exhasa uBukumkani bukaThixo. Inzondelelo yawo ngobulungiseleli bamaKristu inikela ubungqina obunamandla bokuba umoya oyingcwele uyasebenza namhlanje. Yaye kucace mhlophe ukuba uYehova uThixo uyayisikelela imigudu yawo.

Ngokomzekelo, kunyaka ophelileyo, kuchithwe amawaka ezigidi zeeyure kumsebenzi wokushumayela iindaba ezilungileyo zoBukumkani bukaThixo. Ube yintoni umphumo? Abantu abamalunga nama-323 439 baye bafuzisela uzahlulelo lwabo kuThixo ngokubhaptizwa emanzini. Ukongezelela, kuqhutywe izifundo zeBhayibhile zamakhaya ezingama-4 433 884 nabantu abasundul’ ukuba nomdla. Lilonke, kuhanjiswe iincwadi ezingama-24 607 741, amaphephancwadi angama-631 162-309 iincwadana kunye neencwadana ezinemifanekiso ezingama-63 495 728. Obunjani ukuba namandla ubungqina bokuba umoya kaThixo uyasebenza!

Umoya KaThixo Nawe

Xa ubani esabela ngokuvumayo kwiindaba ezilungileyo, avisisanise ubomi bakhe nemilinganiselo kaThixo, aze avakalise ukholo kwilungiselelo lentlawulelo, kuvuleka ithuba lokuba abe nokuma okucocekileyo phambi koThixo. Kwabo banjalo umpostile uPawulos wathi: ‘UThixo uninika umoya wakhe oyingcwele.’—1 Tesalonika 4:7, 8; 1 Korinte 6:9-11.

Ukuba nomoya kaThixo kuphumela kwiintsikelelo eziyintabalala. Luhlobo luni lweentsikelelo? Phakathi kwezinye izinto, iLizwi likaThixo eliphefumlelweyo lithi: “Ke sona isiqhamo somoya luthando, uvuyo, uxolo, ukuzeka kade umsindo, ububele, ukulunga, ukholo, ubulali, ukuzeyisa.” (Galati 5:22, 23) Ngoko ke, umoya oyingcwele kaThixo ungamandla aluncedo ekwenzeni okulungileyo, unceda ubani avelise iimpawu zobuthixo.

Ukongezelela, ukuba ufunda iBhayibhile uze ukusebenzise oko ukufundayo, umoya kaThixo unokukunceda uhambele phambili ebulumkweni, elwazini, ekuqondeni, ekusebenziseni ingqiqo nengqondo. UKumkani uSolomon wafumana “ubulumko nokuqonda ngomlinganiselo omkhulu kakhulu nobubanzi bentliziyo” ngenxa yokuba wayefuna ukukholisa uThixo kunabantu. (1 Kumkani 4:29) Ekubeni uYehova wanika uSolomon umoya oyingcwele, ngokuqinisekileyo akayi kuwubandeza umoya wakhe oyingcwele kwabo bafuna ukumkholisa namhlanje.

Umoya oyingcwele kaThixo ukwanceda amaKristu ukuba alwe noSathana needemon, le nkqubo ingendawo yezinto notyekelo lwesono lwemizimba yawo ebuthathaka. Kunokwenzeka njani oku? Umpostile uPawulos uyaphendula esithi: “Ezintweni zonke ndinamandla ngenxa yalowo undomelezayo.” (Filipi 4:13) Umoya oyingcwele usenokungazishenxisi iimvavanyo okanye izilingo; noko ke, unako ukusinceda sizinyamezele. Ngokuthembela kumoya kaThixo, singamkela “amandla angaphaya koko kuqhelekileyo” ukuze sihlangabezane nazo naziphi na iingxaki okanye ukubandezeleka.—2 Korinte 4:7; 1 Korinte 10:13.

Xa uqwalasela bonke obu bungqina, akuthandabuzeki ukuba umoya oyingcwele kaThixo uyasebenza namhlanje. Umoya kaYehova unika abakhonzi bakhe amandla okunikela ubungqina ngeenjongo zakhe ezizukileyo. Uyaqhubeka utyhila imitha yokukhanya kokomoya, yaye womeleza ukholo lwethu, usinceda sihlale sinyanisekile kuMdali wethu. Hayi indlela esimele sibe nombulelo ngayo kuba uThixo eye wahlala enyanisekile kwisithembiso sakhe sokubanika umoya oyingcwele abakhonzi bakhe abathembekileyo namhlanje!

[Umbhalo osemazantsi]

[Ibhokisi ekwiphepha 10]

Oko Kuthethwa Ngabanye NgamaNgqina KaYehova

“Ngoxa ezinye iicawa ziqesha abacebisi ukuba barhwebeshele abantu kwizihlalo zetyalike okanye zisukuzana ngemibandela efana nobufanasini nokuqhomfa, amaNgqina akalalanisi kweli hlabathi liguquguqukayo. Ngendlela elungelelanisiweyo aqhubeka eshumayela eMhlabeni wonke.”—IThe Orange County Register yaseOrange County, eKhalifoniya, eUnited States.

“Ngokuphathelele ukusasazwa kokholo, azikho ninzi iimvaba ezinenzondelelo . . . efana neyamaNgqina kaYehova.”—IThe Republic yaseColumbus, eIndiana, eUnited States.

“Ngawo kuphela aya kwiminyango ngeminyango ‘neendaba ezilungileyo,’ esebenzisa imigaqo yeBhayibhile.”—IŻycie Literackie, yasePoland.

“Kwelona phulo lokushumayela lakha lenziwa, amaNgqina kaYehova aye asasaza isigidimi sikaYehova ehlabathini lonke.”—INews-Observer, yaseTamaqua, ePennsylvania, eUnited States.

[Imifanekiso ekwiphepha 9]

Umoya oyingcwele kaThixo uyasikhanyisela ngokomoya,

. . . wenza sibe neempawu ezintle zobuKristu,

. . . yaye uyasixhasa kumsebenzi wokushumayela owenziwa ehlabathini lonke