‘Zisindise Wena Nabo Bakuphulaphulayo’
“Zilumkele wena nemfundiso yakho. . . . Ngokwenza oko uya kuzisindisa wena nabo bakuphulaphulayo.”—1 TIMOTI 4:16.
1, 2. Yintoni eshukumisa amaKristu okwenyaniso ukuba aqhubeke nomsebenzi wawo wokusindisa ubomi?
KWENYE ilali esemagqagaleni kumntla weThailand, kukho isibini esingamaNgqina kaYehova esizama ukusebenzisa ubuchule baso bokuthetha ulwimi esisandul’ ukulufunda kubantu besizwe esihlala kuloo nduli. Ukuze sabelane ngeendaba ezilungileyo zoBukumkani bukaThixo nabantu baloo lali, kutshanje esi sibini siye safunda ulwimi lwesiLahu.
2 Umyeni uyachaza: “Aluchazeki uvuyo nolwaneliseko esinalo ngokusebenza phakathi kwaba bantu babangel’ umdla. Eneneni siziva sibandakanyekile kwinzaliseko yeSityhilelo 14:6, 7, sivakalisa isigidimi esichulumancisayo ‘kuzo zonke iintlanga nezizwe neelwimi.’ Kusekho imihlaba embalwa apho iindaba ezilungileyo zingekafikeleli khona, ibe lo ngomnye wayo. Izifundo zeBhayibhile esinazo ziphantse zibe ngaphezulu kwesinokuziqhuba.” Kucacile ukuba, esi sibini sinethemba lokusindisa kungekuphela nje iziqu zaso kodwa nabo basiphulaphulayo. NjengamaKristu, ngaba asinathemba lokwenza okufanayo sonke?
“Zilumkele Wena”
3. Ukuze sisindise abanye, yintoni esimele siyenze kuqala?
3 Umpostile uPawulos waluleka uTimoti esithi, “Zilumkele wena nemfundiso yakho,” ibe loo nto isebenza kuwo onke amaKristu. (1 Timoti 4:16) Enyanisweni, ukuze sincede abanye bafumane usindiso, kuqala simele sizilumkele thina. Sinokukwenza njani oku? Phakathi kwezinye izinto, simele sihlale siliphaphele ixesha esiphila kulo. UYesu wanikela umqondiso oyintlanganisela ukuze abalandeli bakhe bazi ixesha okuya kufika ngalo ‘ukupheliswa kwenkqubo yezinto.’ Ukanti, uYesu wakwathi asinakulazi elona xesha esiya kuza ngalo isiphelo. (Mateyu 24:3, 36) Sifanele sisabele njani kwesi sibakala?
4. (a) Sisiphi isimo sengqondo esifanele sibe naso ngexesha eliseleyo kule nkqubo? (b) Sisiphi isimo sengqondo esifanele sisiphephe?
4 Ngamnye kuthi usenokubuza, ‘Ngaba ndisebenzisa naliphi na ixesha eliseleyo kule nkqubo ukuze ndisindise isiqu sam kunye nabo bandiphulaphulayo? Okanye ngaba ndiqiqa ngelithi, “Ekubeni singalazi elona xesha esiya kufika ngalo isiphelo, andiyi kuzikhathaza ngaso”?’ Esi simo sengqondo sichazwe mva siyingozi. Siphikisana ngokungqalileyo nesibongozo sikaYesu esithi: “Hlalani nilungile, kuba uNyana womntu uza ngelixa eningacinganga ukuba lilo.” (Mateyu 24:44) Ngokuqinisekileyo eli asiloxesha lakuphelelwa lihlombe ngenkonzo kaYehova okanye lokubhenela ehlabathini ukuze sifumane unqabiseko okanye ulwaneliseko.—Luka 21:34-36.
5. Yiyiphi imizekelo eyamiselwa ngamangqina kaYehova awayephila ngaphambi kwexesha lamaKristu?
5 Enye yeendlela esinokubonisa ngazo ukuba sinikela ingqalelo kwiziqu zethu kukunyamezela ngokuthembeka njengamaKristu. Kwixesha elidluleyo abakhonzi bakaThixo baye banyamezela, kungakhathaliseki enoba bebelindele ukuhlangulwa ngokukhawuleza okanye bekungenjalo. Emva kokucaphula imizekelo yamangqina awayephila ngaphambi kwexesha lamaKristu anjengoAbheli, uEnoki, uNowa, uAbraham noSara, uPawulos wathi: ‘Abazange bayifumane inzaliseko yazo izithembiso, kodwa bazibona zisekude, bazithakazelela baza bavakalisa esidlangalaleni ukuba babengabasemzini nabemi bokwexeshana elizweni elo.’ Abazange banikezele kuyo nayiphi na iminqweno yokuphila ubomi obulula, bengazange kananjalo boyiswe ziingcinezelo zokuziphatha okubi ezazibangqongile, kodwa bakhangela phambili ngolangazelelo ‘kwinzaliseko yazo izithembiso.’—Hebhere 11:13; 12:1.
6. Indlela amaKristu enkulungwane yokuqala awayelujonga ngayo usindiso yayichaphazela njani indlela awayephila ngayo?
6 AmaKristu enkulungwane yokuqala nawo azibona “njengabaphambukeli” kweli hlabathi. (1 Petros 2:11) Kwanasemva kokusindiswa xa kwakutshatyalaliswa iYerusalem ngowama-70 C.E., amaKristu okwenyaniso akazange ayeke ukushumayela okanye angene kwindlela yokuphila yehlabathi. Ayesazi ukuba abo bahlala bethembekile babeza kufumana usindiso oluzukileyo. Enyanisweni, ngasekupheleni kowama-98 C.E., umpostile uYohane wabhala: “Ihlabathi liyadlula nenkanuko yalo, kodwa lowo wenza ukuthanda kukaThixo uhleli ngonaphakade.”—1 Yohane 2:17, 28.
7. AmaNgqina kaYehova aye anyamezela njani kule mihla?
7 AmaNgqina kaYehova kule mihla aye azingisa kumsebenzi wamaKristu, nangona ebejamelana nentshutshiso ekrakra. Ngaba ukunyamezela kwawo kuye kwalilize? Ngokuqinisekileyo akunjalo, kuba uYesu wasiqinisekisa esithi: “Lowo unyamezele kwada kwasekupheleni uya kusindiswa,” enoba unyamezele kwada kwasekupheleni kwenkqubo endala yezinto okanye kwada kwasekupheleni kobomi bakhe. Eluvukweni, uYehova uya kubakhumbula aze abavuze bonke abakhonzi bakhe abathembekileyo abaye bafa.—Mateyu 24:13; Hebhere 6:10.
8. Sinokubonisa njani ukuba siyaluxabisa unyamezelo lwamaKristu exesha elidluleyo?
8 Ngaphezu koko, kuyasivuyisa ukuba amaKristu athembekileyo exesha elidluleyo engazange axhalabele usindiso lwawo odwa. Ngokuqinisekileyo thina baye bafunda ngoBukumkani bukaThixo ngenxa yemigudu yawo sinombulelo kuba eye anyamezela ekuphumezeni uthumo lukaYesu oluthi: “Hambani ke ngoko niye kubenza abafundi abantu beentlanga zonke, . . . nibafundisa ukuba bazigcine zonke izinto endiniyalele zona.” (Mateyu 28:19, 20) Logama nje ithuba lisavuma, sinako ukubonakalisa ukuba sinombulelo ngokushumayela kwabanye abangekaziva iindaba ezilungileyo. Noko ke, ukushumayela kulinyathelo nje lokuqala elikhokelela ekwenzeni abafundi.
‘Lumkela Imfundiso Yakho’
9. Isimo sengqondo esakhayo sinokusinceda njani siqalise izifundo zeBhayibhile?
9 Isabelo sethu asipheleli ekushumayeleni kodwa siquka nokufundisa. UYesu usithume ukuba sifundise abantu ukuba bazigcine zonke izinto aziyaleleyo. Kuyinyaniso ukuba, kweminye imihlaba, bambalwa abantu ababonakala befuna ukufunda ngoYehova. Kodwa ukuyijonga ngeliso eligxekayo intsimi kunokusithintela kwimigudu yethu yokuqalisa izifundo zeBhayibhile. UYvette, onguvulindlela kwintsimi abanye abathi ayinaziqhamo, wafumanisa ukuba abantu abatyeleleyo kuloo mmandla, ababengenasimo sengqondo sigxekayo, babeziqalisa izifundo zeBhayibhile zamakhaya. Emva kokuba eye wahlakulela isimo sengqondo esakhayo, uYvette naye wafumana abantu ababefuna ukufundisisa iBhayibhile.
10. Yiyiphi indima esisiseko esimele siyiphumeze njengabafundisi beBhayibhile?
10 Amanye amaKristu asenokuba mathidala ukucela ukuqhubela umntu onomdla isifundo seBhayibhile kuba evakalelwa ukuba akanakukwazi ukuqhuba isifundo. Kuyavunywa ukuba ubuchule bethu abufani. Kodwa akuyomfuneko ukuba side sibe ngangayiwayo amaciko ukuze siphumelele njengabafundisi beLizwi likaThixo. Isigidimi esisulungekileyo seBhayibhile sinamandla, kwaye uYesu wathi ababumvu bayalazi ilizwi loMalusi wokwenyaniso xa beliva. Ngoko ke, eyona nto ifunekayo nje kuthi kukudlulisela isigidimi soMalusi Olungileyo, uYesu, ngendlela ecace kangangoko sinako.—Yohane 10:4, 14.
11. Unokuphumelela njani xa unceda umfundi weBhayibhile?
11 Unokusidlulisela ngokuphumelelayo njani isigidimi sikaYesu? Okokuqala, ziqhelanise noko iBhayibhile ikutshoyo ngaloo mbandela uza kuthetha ngawo. Kufuneka uwuqonde wena kuqala ngaphambi kokuba ufundise abanye. Kwakhona, zama ukugcina imo endilisekileyo kodwa enobuhlobo ebudeni besifundo. Abafundi, kuquka nabo baselula kakhulu, bafunda bhetele xa bekhululekile yaye lowo ubafundisayo ebaphatha ngentlonelo nangobubele.—IMizekeliso 16:21.
12. Unokuqiniseka njani ukuba umfundi uyayiqonda le nto umfundisa yona?
12 Njengomfundisi, akufanelanga ubekele umfundi izibakala ukuze azicengceleze. Mncede ayiqonde le nto ayifundayo. Imfundo yaloo mntu ufunda naye, izinto ahlangabezane nazo ebomini, nomlinganiselo aqhelene ngawo neBhayibhile ziya kuyichaphazela indlela akuqonda ngayo oko ukutshoyo. Ngoko ke, usenokuzibuza, ‘Ngaba lo mntu uyayiqonda intsingiselo yezibhalo ezicatshulwe kulo mbandela siwufundayo?’ Usenokumxhokonxa ngemibuzo engenakuphendulwa ngokuthi ewe okanye hayi nje kuphela, kodwa unokusebenzisa imibuzo efuna ingcaciso. (Luka 9:18-20) Kwelinye icala, abanye abafundi baba mathidala ukubuza umntu obafundisayo. Ngenxa yoko, basenokulandela nje kanti abayiqondi ngokupheleleyo le nto bayifundiswayo. Khuthaza umfundi ukuba akubuze yaye akuxelele xa engayiqondi ngokupheleleyo ingongoma ethile.—Marko 4:10; 9:32, 33.
13. Unokumnceda njani umfundi ukuba abe ngumfundisi?
13 Injongo ebalulekileyo yokuqhuba isifundo seBhayibhile kukunceda umfundi abe ngumfundisi. (Galati 6:6) Ukuze wenze oko, xa nisenza impinda yoko nikufundisisileyo, usenokumcela akucacisele ingongoma ethile ngendlela elula nje, ngokungathi ucacisela umntu oqalayo ukuyiva. Kamva, xa sele efanelekela ukuya kubulungiseleli, unokummema ukuba akuthelele entsimini. Kusenokwenzeka ukuba uya kuziva ekhululekile ukusebenza nawe, kwaye loo nto iya kumnceda akhulise ukuzithemba de akulungele ukuzihambela kubulungiseleli.
Nceda Umfundi Abe Ngumhlobo KaYehova
14. Luyintoni usukelo lwakho oluphambili njengomfundisi, yaye yintoni eya kukunceda uphumelele ekulufikeleleni?
14 Usukelo oluphambili lwakhe ngamnye umfundisi ongumKristu kukunceda umfundi abe ngumhlobo kaYehova. Ukuze uphumeze oko awuyi kuphelela ekuthetheni kodwa uya kumisela nomzekelo. Ukufundisa ngomzekelo kunempembelelo enamandla kwiintliziyo zabafundi. Kuba bhetele ukufundisa ngezenzo kunokufundisa ngamazwi, ngokukodwa xa kufikwa kumba wokugxininisa imigaqo yokuziphatha nasekukhuthazeni umfundi ukuba abe nenzondelelo. Xa ebona ukuba oko ukuthethayo nokwenzayo kuqhutywa lulwalamano oluhle noYehova, loo nto isenokumshukumisela ukuba aluhlakulele ulwalamano olunjalo.
15. (a) Kutheni kubalulekile ukuba umfundi ahlakulele intshukumisa elungileyo yokukhonza uYehova? (b) Unokumnceda njani umfundi ukuba aqhubeke esenza inkqubela ngokomoya?
15 Ufuna lo mfundi akhonze uYehova, angamkhonzi nje kuba engafuni kutshatyalaliswa eArmagedon kodwa ngenxa yokuba emthanda. Xa umnceda ukuba ahlakulele loo ntshukumisa icocekileyo, uya kuba wakha ngezinto ezingatshiyo eziya kutyhubela iimvavanyo zokholo lwakhe. (1 Korinte 3:10-15) Intshukumisa ephosakeleyo, enjengomnqweno ongafanelekanga wokulinganisa wena okanye nawuphi na omnye umntu, ayiyi kumomeleza ukuba axhathise iimpembelelo ezingezozabuKristu, ingenako kananjalo ukumnika inkalipho yokwenza okulungileyo. Khumbula, akuyi kuba ngumfundisi wakhe naphakade. Ngoxa usenalo ithuba, unako ukumkhuthaza ukuba aqhubeke esondela ngakumbi kuYehova ngokufunda iLizwi likaThixo imihla ngemihla yaye acinge ngalo. Ngale ndlela uya kuqhubeka engenisa ‘amazwi aphilileyo’ asuka eBhayibhileni nakwiimpapasho ezisekelwe kuyo kwanasemva kwexesha ugqibile ukufundisisa naye.—2 Timoti 1:13.
16. Unokumfundisa njani umfundi ukuba athandaze ngokusuka entliziyweni?
16 Kwakhona unokumnceda umfundi asondele nangakumbi kuYehova ngokumfundisa ukuthandaza ngokusuka entliziyweni. Unokukwenza njani oku? Mhlawumbi unokumbonisa umthandazo kaYesu ongumzekelo, neminye imithandazo esuka entliziyweni ebhalwe eBhayibhileni, enjengaleyo ifumaneka kwiindumiso. (Iindumiso 17, 86, 143; Mateyu 6:9, 10) Ukongezelela koko, xa umfundi wakho ekuva uthandaza xa kuqalisa naxa kuqukunjelwa isifundo, uya kuziva iimvakalelo onazo ngoYehova. Ngaloo ndlela, ngalo lonke ixesha imithandazo yakho ifanele ibonise ukunyaniseka yaye uthethe ngokuphandle, kwaye ilungelelane ngokomoya nangokweemvakalelo.
Ukusebenzela Ukusindisa Abantwana Bakho
17. Abazali banokubanceda njani abantwana babo ukuba bahlale bekwindlela esa kusindiso?
17 Kakade ke, phakathi kwabo sifuna ukubasindisa, kukho namalungu eentsapho zethu. Uninzi lwabantwana bamaKristu lunyanisekile yaye ‘luqinile elukholweni.’ Noko ke, kwabanye isenokuba ayikamiliselwa kakuhle inyaniso ezintliziyweni zabo. (1 Petros 5:9; Efese 3:17; Kolose 2:7) Abaninzi kolu lutsha bayayishiya indlela yamaKristu xa besondela okanye xa bengena kubuntu obukhulu. Ukuba ungumzali, yintoni onokuyenza ukuze ingafane yenzeke loo nto? Okokuqala, unokusebenzela ekubeni kubekho umoya omhle entsatsheni. Ubomi bentsapho obumnandi bakha isiseko sokuba nembono efanelekileyo ngegunya, ukuxabisa iimpawu ezifanelekileyo nolwalamano oluhle nabanye. (Hebhere 12:9) Ngaloo ndlela, ukusondelelana kwentsapho kusenokuba sisiqalo esihle apho ulwalamano lomntwana kunye noYehova lunokukhula khona. (INdumiso 22:10) Iintsapho ezomeleleyo zenza izinto kunye—kwanokuba loo nto ithetha ukuba abazali mabancame ixesha abebenokulisebenzisela ukufumana iingenelo zobuqu. Ngale ndlela unokumisela umzekelo ofundisa abantwana bakho ukuba benze izigqibo ezilungileyo ebomini. Bazali, eyona nto ifunwa kakhulu ngabantwana benu kuni, asizozinto eziphathekayo, kodwa nini—ixesha, amandla nothando lwenu. Ngaba niyabanika abantwana benu ezi zinto?
18. Hlobo luni lwemibuzo abamele abazali bancede abantwana babo bayiphendule?
18 Abazali abangamaKristu abafanele bacinge ukuba abantwana babo baya kuba ngamaKristu ngokuzenzekelayo. UDaniel, umdala onabantwana abahlanu, uthi: “Abazali bamele baziphe ixesha lokuphelisa amathandabuzo abantwana babo abawafumana esikolweni nakwezinye iindawo. Ngomonde bamele bancede abantwana babo bafumane iimpendulo kwimibuzo enjengethi: ‘Ngaba ngokwenene siphila kwixesha lesiphelo? Ngaba ngokwenene lunye unqulo lokwenyaniso? Kutheni umntwana endifunda naye esikolweni obonakala elungile engesosinxulumani silungileyo? Ngaba kusoloko kuphosakele ukuba neentlobano zesini ngaphambi komtshato?’” Bazali, ninako ukukholosa ngoYehova ukuba uya kuyisikelela imigudu yenu, kuba kaloku naye unomdla kwimpilo-ntle yabantwana benu.
19. Kutheni kuyeyona nto ilungileyo ukuba abazali bafundisise nabantwana babo?
19 Bambi abazali basenokuziva bengafaneleki xa kufikwa kumba wokufundisisa nabantwana babo. Noko ke, musani ukuvakalelwa ngolo hlobo, kuba akakho omnye okufanelekela ngaphezu kwenu ukufundisa abantwana benu. (Efese 6:4) Ukufundisisa nabantwana benu kuya kuninceda nizibonele ngokwenu okusezintliziyweni nasezingqondweni zabo. Ngaba bathetha ngokusuka entliziyweni okanye bathetha nje ngokungakhathali? Ngaba bayikholelwa ngokwenene loo nto bayifundayo? Ngaba uYehova ungumntu wokwenene kubo? Unokuzifumana iimpendulo zale mibuzo neminye ebalulekileyo kuphela ukuba nguwe ofundisisa nabantwana bakho.—2 Timoti 1:5.
20. Abazali banokusenza njani isifundo sentsapho sibe mnandi yaye sibe yingenelo?
20 Unokulugcina njani ucwangciso lokufundisisa lwentsapho yakho xa sele uqalisile? UJoseph, umdala ononyana nentombi, uthi: “Njengazo zonke izifundo zeBhayibhile, isifundo sentsapho simele sibe mnandi, wonke umntu akhangele phambili kuso. Ukuze sisenze sibe njalo, kweyethu intsapho asikho ngqongqo xa kufikwa kumba wexesha. Isifundo sethu sisenokuqhubeka kangangeyure, kodwa kwanokuba maxa wambi sinemizuzu nje elishumi, siyafundisisa. Enye yezinto eyenza ukuba isifundo sethu sibe yimbalasane yeveki kubantwana bethu kukuba siye silinganise amabali athile kwiNcwadi Yam Yamabali EBhayibhile.a Umlinganiselo abetheleleka aze aqondakale ngawo ubaluleke ngaphezulu lee kunenani leziqendu esizigubungelayo.”
21. Abazali banokubafundisa nini abantwana?
21 Kakade ke, ukufundisa abantwana bakho akupheleli kwixesha elisikelwe isifundo. (Duteronomi 6:5-7) INgqina laseThailand elikhankanywe ekuqaleni lithi: “Ndisakhumbula kakuhle ukuba uTata wayedla ngokuhamba nam kumsebenzi wokushumayela, sikhwele iibhayisekile sisiya kwintsimi yebandla lethu esemagqagaleni. Ngokuqinisekileyo, yayingumzekelo omhle owawumiselwa ngabazali bethu kunye nokusifundisa kwabo phantsi kwazo zonke iimeko okwasinceda sagqiba kwelokuba singenele inkonzo yexesha elizeleyo. Kwaye loo mfundiso imele ukuba yendela. Nangoku ndisasebenza kwintsimi esemagqagaleni!”
22. Uya kuba yintoni umphumo ‘wokuzilumkela kwakho nemfundiso yakho’?
22 Ngenye imini engekude, ngexesha kanye elilungele loo nto, uYesu uza kuza ezokuphumeza umgwebo kaThixo kule nkqubo. Emva koko eso siganeko sikhulu siya kungena kwimbali yendalo iphela, kodwa abakhonzi bakaYehova abathembekileyo baya kuqhubeka bemkhonza bejonge kusindiso olungunaphakade. Ngaba unethemba lokuba phakathi kwabo, wena nabantwana bakho nezifundo zakho zeBhayibhile? Khumbula ke: “Zilumkele wena nemfundiso yakho. Hlala kwezi zinto, kuba ngokwenza oko uya kuzisindisa wena nabo bakuphulaphulayo.”—1 Timoti 4:16.
[Umbhalo osemazantsi]
a Ipapashwe yiWatchtower Bible and Tract Society of New York, Inc.
Ngaba Unokuchaza?
• Sifanele sibe njani isimo sethu sengqondo ekubeni singalazi elona xesha lomgwebo kaThixo?
• Ziziphi iindlela ‘esinokuyilumkela ngazo imfundiso yethu’?
• Unokumnceda njani umfundi ukuba abe ngumhlobo kaYehova?
• Kutheni kubalulekile ukuba abazali bazinike ixesha lokuba kunye nabantwana babo?
[Umfanekiso okwiphepha 15]
Kuba lula ukufunda kwimo endilisekileyo kodwa enobuhlobo
[Umfanekiso okwiphepha 18]
Ukulinganisa amabali eBhayibhile, anjengelikaSolomon xa wayegweba amahenyukazi amabini, kwenza izifundo zentsapho zibe mnandi