Ukuhlala Unyanisekile KuYehova

UKUNYANISEKA, nangona kunqabile namhlanje, luphawu olwahlula abakhonzi boThixo oyinyaniso, uYehova. Umntu onyanisekileyo uhlala omelele nangona evavanywa yaye akathi ngokuhamba kwexesha agungqe. Khawukhangele ngokomzekelo uKumkani uHezekiya owayelungile. IBhayibhile ithi: “Emva kwakhe akuzange kubekho unjengaye kubo bonke ookumkani bakwaYuda, kwanabo babephambi kwakhe.” Yintoni eyamenza wahluka uHezekiya? “Waqhubeka enamathele kuYehova,” nangona wayengqongwe ngabantu ababenqula uthixo wobuxoki uMoleki. Ewe, uHezekiya ‘akazange aphambuke ekumlandeleni uYehova, kodwa waqhubeka eyigcina imiyalelo yakhe.’—2 Kumkani 18:1-6.

Omnye umntu owahlala enyanisekile kuYehova ngumpostile uPawulos. Ingxelo yobulungiseleli bukaPawulos efumaneka kwiZibhalo ZamaKristu ZesiGrike inikela ubungqina obubalaseleyo ngokunikela kwakhe inkonzo yomphefumlo uphela kuThixo ngokungaguquguqukiyo. Ngasekupheleni kobomi bakhe basemhlabeni, uPawulos wakwazi ukuthi ngaye siqu: “Ndiwulwile umlo omhle, ugqatso ndilubaleke kwada kwesa ekugqibeleni, ukholo ndilugcinile.”—2 Timoti 4:7.

Onjani wona ukuba mhle umzekelo wokunyaniseka esawumiselwa nguHezekiya noPawulos! Ngamana singaxelisa ukholo lwabo ngokuhlala sinyanisekile kuThixo wethu Ozukileyo, uYehova.—Hebhere 13:7.