Unokuphethukela Phi Ukuze Ufumane Icebiso Elihle?

Ngoku “ishishini lamacebiso” liye laba lishishini elenza izigidi zezigidi zeerandi ngonyaka. Abantu bafuna uncedo. Ingcali yezigulo zengqondo uHeinz Lehmann ithi: “[Kwibutho loluntu lanamhlanje] kukho ukusilela kwezemfundo nakwezentlalo. Imilinganiselo yonqulo ayisekho njengoko yayifudula injalo. Ukungazinzi ezintsatsheni kuyanda . . . , yaye ngenxa yoko abantu abazinzanga.” Umbhali ogama linguEric Maisel uthi: “Abo bakha baya kwi-shaman, kumfundisi okanye kugqirha wentsapho beye kufuna uncedo ngeengxaki zokugula ngengqondo, ezokomoya okanye ezomzimba ngoku bakhangela kwiincwadi ezinamacebiso ngendlela yokuzinceda ngokwabo ukuze bafumane iimpendulo.”

IAMERICAN Psychological Association yenza iphulo lokuphanda ngeli shishini lihambele phambili. Lathi ngoxa kukho “ithemba elingummangaliso lokuba abantu bancedwe ukuze baziqonde bona baze baqonde nabanye abantu . . . , izibhengezo neentengiso zokukhuthaza ukuthengwa kwezi zinto ziya zibaxwa ngokubaxwa kwaye zenzelwe ukuba zibangel’ imincili.” Umbhali weToronto Star uthi: “Lumkela inkohliso yezinto ezibonakala izizinto zonqulo nezokomoya. . . . Lumkela ngokukodwa zonke iincwadi, iikhasethi okanye iingqungquthela ezithetha ngeendlela zokuzinceda, ezinikela uncedo oluninzi ngokugqithiseleyo, ngexeshana nje elingephi, ungakhange wenze mgudu ungako.” Kuyavunywa ukuba, baninzi abantu abafuna ngokunyanisekileyo ukuxhasa abo baneentswelo. Noko ke, inyaniso ebuhlungu yeyokuba iqela labantu abanganyanisekanga lisebenzisa ubulolo nokubandezeleka kwabantu, libe eneneni lingabancedi okanye libanike izicombululo zokwenene.

Ngenxa yale meko, uyintoni umthombo osisiseko woncedo esinokuwuthemba? Sinokusifumana phi isiluleko esisebenzisekayo esiya kusebenza ngokungaguquguqukiyo?

Umthombo Wokhokelo Oluphumelelayo

Umshumayeli wenkulungwane ye-19 waseMerika uHenry Ward Beecher wathi: “IBhayibhile yimaphu kaThixo yokuba uhambe ngayo, yeyokukunceda ukuba ungaziki elwandle, nokukubonisa apho izibuko likhoyo, nendlela onokufikelela ngayo kulo ngaphandle kokubetheka ematyeni okanye ezindongeni.” Enye indoda yathi ngeBhayibhile: “Akukho mntu esithi ekuhambeni kwexesha singasebenzi kuye iSibhalo; le ncwadi iya iphangalala yaye isiba nzulu njengoko sikhula ngeminyaka.” Kutheni ufanele uwuqwalasele ngokunzulu lo mthombo?

Xa izincomela ngokwayo, iBhayibhile ithi: “Sonke iSibhalo siphefumlelwe nguThixo kwaye siyingenelo ekufundiseni, ekohlwayeni, ekulungelelaniseni izinto, ekuqeqesheleni ebulungiseni, ukuze umntu kaThixo awufanelekele aze awuxhobele ngokupheleleyo wonke umsebenzi olungileyo.” (2 Timoti 3:16, 17) Oko kuqulathwe yiBhayibhile kuvela kuMthombo wobomi, uYehova uThixo. (INdumiso 36:9) Ngenxa yoko, uyiqonda kakuhle indlela esenziwe ngayo, njengoko iNdumiso 103:14 isikhumbuza isithi: “Yena uyakwazi ukuyilwa kwethu, ekhumbula ukuba siluthuli.” Ngoko ke, sinokuba nentembelo ezeleyo ngokuxabiseka kweBhayibhile.

Eneneni, iBhayibhile inentabalala yemigaqo nokhokelo olunokusetyenziswa ngokuyingenelo nakuyiphi na imeko onokuzifumanisa ukuyo. Esebenzisa yona uThixo uthi kuthi: “Nantsi indlela. Hambani ngayo.” (Isaya 30:21) Ngaba iBhayibhile inokuhlangabezana ngokwenene neentswelo zabantu ngabanye namhlanje? Makhe sibone.

IBhayibhile Ihlangabezana Neentswelo Zethu . . . 

Ekuhlangabezaneni Namaxhala. IBhayibhile isixelela oku: “Musani ukuxhalela nantoni na, kodwa ezintweni zonke zaziseni izibongozo zenu kuThixo nomthandazo nesikhungo nombulelo; yaye uxolo lukaThixo olungaphaya kokuqonda luya kuzilinda iintliziyo zenu namandla enu engqondo ngoKristu Yesu.” (Filipi 4:6, 7) Ngaba umthandazo uye wangqineka uluncedo ekuhlangabezaneni neemvakalelo zokuba nexhala ngokunxulumene nobunzima bezoqoqosho, ukuxhatshazwa ngokwesini nangamazwi, okanye ukufelwa ngulowo umthandayo? Khawuphulaphule la mava alandelayo.

UJackie, emva kokufumanisa ukuba intombi yakhe yayixhatshazwa ngokwesini, uyavuma esithi: “Isazela sokungabi namandla okukhusela umntwana wakho singaphaya kwengqondo. Kuye kwafuneka ndilwe neemvakalelo zokuba buhlungu, ukuba nentiyo nomsindo. Ezi mvakalelo zaziqalisa ukubonakalisa ubomi bam. Ndandifuna ngamandla ukuba uYehova alondoloze intliziyo yam.” Emva kokufunda ngokuphindaphindiweyo eyabase-Filipi 4:6,7, wazibhokoxa ukuze asebenzise isiluleko sayo. “Ndithandaza yonke imihla, ndicela ngokuphindaphindiweyo ukuba ndingazivumeli ukuba ndonakaliswe ziimvakalelo ezingakhiyo, yaye uYehova uye wandinceda ukuba ndihlakulele ukuba nentliziyo ezolileyo neyonwabileyo. Ngokwenene ndiziva ndinoxolo lwangaphakathi,” uJackie uyabalisa.

Nawe usenokuzifumanisa ukwimeko ongakwaziyo ukuyilawula okanye uyicombulule nebangela ukuba unxunguphale ngokweemvakalelo. Ngokulandela isiluleko seBhayibhile sokuba uthandaze, unako ukuhlangabezana nayo ngempumelelo. Umdumisi uyasikhuthaza ngala mazwi: “Yiqengqele kuYehova indlela yakho, uze uthembele ngaye, kwaye yena uya kwenza.”—INdumiso 37:5.

Ekufumaneni Ukhuthazo. Umdumisi wavakalisa uxabiso esithi: “Yehova, ndiyithandile indawo yokuhlala yendlu yakho nendawo yokuhlala yozuko lwakho. Unyawo lwam luya kuma endaweni ethe tyaba; phakathi kweendimbane ezihlanganiseneyo ndiya kumbonga uYehova.” (INdumiso 26:8, 12) IBhayibhile iyasikhuthaza ukuba sihlanganisane ndawonye ngokuthe rhoqo ukuze sinqule uYehova. Olu nxulumano lunokuzanelisa njani iintswelo zakho? Yintoni eye yafunyaniswa ngabanye?

UBecky uyabalisa: “Abazali bam abamkhonzi uYehova, ngoko bayachasa xa ndizama ukwenza nantoni na ephathelele nokukhonza uThixo. Kuba ngumgudu kakhulu kum ukuya kwiintlanganiso.” UBecky uvakalelwa kukuba uye wafumana iintsikelelo ezininzi ngenxa yokuba eye wazibhokoxa ukuze aye rhoqo kwiintlanganiso zamaKristu. “Iintlanganiso ziyalomeleza ukholo lwam, ukuze ndikwazi ukujamelana neengcinezelo zamihla le zokuba ngumfundi, intombazana nomkhonzi kaYehova. Abantu abakwiHolo yoBukumkani bahluke kakhulu kubafundi abasesikolweni! Banenkathalo yaye baluncedo, yaye ngalo lonke ixesha incoko yethu iyakha. Bangabahlobo bokwenene.”

Ewe, ngokulandela ulwalathiso lweBhayibhile lokuhlanganisana ndawonye rhoqo, uYehova unokuyanelisa intswelo yethu yokufuna ukukhuthazwa. Apha kulapho sibona ubunyaniso bamazwi omdumisi athi: “UThixo uyindawo yokusabela namandla kuthi, uncedo olufumaneka ngokukhawuleza ekubandezelekeni.”—INdumiso 46:1.

Ekufumaneni Umsebenzi Owanelisayo Noneengenelo. “Qinani, ningabi nakushukuma, nisoloko ninokuninzi kokwenza emsebenzini weNkosi, nisazi ukuba ukusebenza kwenu akulolize eNkosini,” iBhayibhile iyabongoza. (1 Korinte 15:58) Ngaba ‘umsebenzi weNkosi’ uyanelisa ngokwenene? Ngaba kukho okuthile okuyingenelo okuphunyezwa bubulungiseleli bobuKristu?

UAmelia uchaza indlela avakalelwa ngayo: “Ndafundisisa iBhayibhile nesibini esasisele sisecicini lokwahlukana. Ndanceda nebhinqa elalinentombi eyayibulewe ngogonyamelo. Eli bhinqa lalingcungcutheka ngenxa yokungaqiniseki ngemeko yabafi. Kuzo zombini ezi meko, ukusetyenziswa kwemigaqo yeBhayibhile kwazisa uxolo nethemba ebomini babo. Ndinovuyo olungummangaliso nolwaneliseko ngenxa yokuba ndiye ndanenxaxheba ekubancedeni.” UScott uthi: “Ukuba kukho amava amnandi kubulungiseleli basentsimini, kukuqalisa isifundo seBhayibhile esitsha, okanye ukuphumelela ekunikeleni ubungqina obungacwangciswanga, kuya kuhamba iminyaka uthetha ngako. Ezi mvakalelo nale mincili zivuseleleka ngalo lonke ixesha ubalisa ngawo! Kubulungiseleli ufumana olona vuyo lukhulu noluhlala luhleli.”

Ngokucacileyo, ukusebenzisa ulwalathiso lweBhayibhile lokuba ngabalungiseleli abakhutheleyo kuye kwayanelisa intswelo yabo yokwenza umsebenzi owanelisayo noneengenelo. Uyamenywa nawe ukuba ube nesabelo kulo msebenzi wokufundisa abanye ngeendlela nemigaqo kaThixo, kwangaxeshanye nawe ungenelwa kuwo.—Isaya 48:17; Mateyu 28:19, 20.

Ukungenelwa KwiLizwi LikaThixo

Ngokungathandabuzekiyo, iBhayibhile ngumthombo onokuthenjwa wolwalathiso olusebenzisekayo kwihlabathi lanamhlanje. Ukuze singenelwe kuyo, kufuneka sizingise ekwenzeni umgudu. Kufuneka siyifunde, siyifundisise size sicamngce ngayo. UPawulos waluleka esithi: “Ziphonononge ezi zinto; wendele kuzo, ukuze ukuhambela kwakho phambili kubonakale ebantwini bonke.” (1 Timoti 4:15; Duteronomi 11:18-21) UThixo uyaqinisekisa ukuba ukuba uyazama ukusisebenzisa isiluleko sakhe njengoko sifumaneka eBhayibhileni, uya kuphumelela. Uyathembisa esithi: “Kholosa ngoYehova . . . Uze umgqale yena ezindleleni zakho zonke, kwaye uya kuwenza uthi tye umendo wakho.”—IMizekeliso 3:5, 6.

[Imifanekiso ekwiphepha 31]

Ukulandela isiluleko seBhayibhile kwenza ubomi banelise yaye bube nentsingiselo