“Umzekelo Womanyano”

WAWUSITSHO umxholo wenqaku lomhleli elalipapashwe kwiphephandaba elithile laseIndaiatuba, eSão Paulo, eBrazil. Ngumzekelo kabani lowo? “AmaNgqina kaYehova, aceba ukwakha ‘iHolo yoBukumkani’ entsha, njengoko iitempile okanye iiholo zawo zibizwa njalo, amisela umzekelo wentsebenziswano omhle nobonakalayo ongamele kutyeshelwa,” watsho umbhali.

Umanyano lwamaNgqina kaYehova luyabonakala ngezihlandlo ezinje. Ngenxa yoko, eli nqaku lathi: “Kuyachukumisa ukubona amatshantliziyo angamadoda, angamabhinqa nakwishumi elivisayo esebenza ngaxhathalinye ukuze akhe indawo anokuhlanganisana aze anqule uThixo kuyo.”

AmaNgqina kaYehova amisela umzekelo omhle nangezinye iindlela. “Ukongezelela ekufundisiseni nasekuthandazeni, usukelo lwawo kukunceda amakhoboka otywala neziyobisi abuyele kwimeko yawo yangaphambili, nokubonisa abantu indlela yomanyano nothando,” lalek’ umsundulo latsho eli nqaku lomhleli. Akwenza njani oku? AmaNgqina ayazi ukuba ukufunda nokusebenzisa isiluleko seBhayibhile kuyamnceda umntu ahlukane nezenzo ezingendawo. Kungoko ezabalazela ukufundisa abanye oko akufunde eBhayibhileni. Eli nqaku lomhleli liqukumbela ngokuthi “ngokuqinisekileyo, umzekelo wawo umele ulandelwe ngokukhawuleza.”

Nabani na unokuya kwiintlanganiso zamaNgqina kaYehova, yaye akufunwa nkongozelo. Umenywa ngokufudumeleyo ukuba utyelele iHolo yoBukumkani ekufutshane nawe.