Ngaba Inyaniso Uyenze Eyakho?

“Guqukani ngokutshintsha ingqondo yenu, ukuze nikungqine ngokwenu ukulunga nokwamkeleka nokugqibelela kokuthanda kukaThixo.”—ROMA 12:2.

1, 2. Kutheni kungekho lula ukuba ngumKristu wokwenyaniso namhlanje?

UKUBA ngumKristu wokwenyaniso kule mihla yokugqibela—kula ‘maxesha amanqam ekunzima ukujamelana nawo’—akulula. (2 Timoti 3:1) Eneneni, ubani umele oyise ihlabathi ukuze alandele umzekelo kaKristu. (1 Yohane 5:4) Khumbula oko kwathethwa nguYesu ngendlela yobuKristu: “Ngenani ngesango elimxinwa; ngokuba ibanzi kwaye iphangalele indlela esa entshabalalweni, yaye baninzi abangena ngayo; kanti limxinwa isango kwaye imxinwa indlela esa ebomini, yaye bambalwa abayifumanayo.” Waphinda wathi: “Ukuba nabani na ufuna ukundilandela, makazincame, athabathe isibonda sakhe sentuthumbo imihla ngemihla aze aqhubeke endilandela.”—Mateyu 7:13, 14; Luka 9:23.

² Akuba eyifumene indlela emxinwa, umKristu ujamelana nocelomngeni lokuhlala kuyo. Kutheni olo ilucelomngeni nje? Kungenxa yokuba uzahlulelo nobhaptizo lwethu lusenza amaxhoba ezenzo zikaSathana zobuqhophololo, okanye amaqhinga akhe angaqondakaliyo. (Efese 6:11; umbhalo osemazantsi weNW eneembekiselo) Uyabazi ubuthathaka bethu yaye ufuna ukusebenzisa bona ukuze asenzakalise ngokomoya. Ngapha koko, wazama ukuwisa uYesu, ngoko ebenokusiyeka njani ke thina?—Mateyu 4:1-11.

Amacebo KaSathana Achuliweyo

3. USathana wawafaka njani amathandabuzo engqondweni kaEva?

³ Elinye icebo elisetyenziswa nguSathana kukufaka amathandabuzo ezingqondweni zethu. Ukhangela iindawo ezibuthathaka kwisikrweqe sethu sokomoya. Ekuqaleni, wasebenzisa elo qhinga kuEva, wambuza esithi: “Utshilo ngokwenene na uThixo ukuba nize ningadli kuyo yonke imithi yomyezo?” (Genesis 3:1) Ngamany’ amazwi, uSathana wayesithi, ‘Ngaba ngokwenene uThixo unokwala ukuba nenze oko? Ngaba unokunibandeza into elunge kangaka? Kaloku, uThixo uyazi ukuba mhla nithe nadla kuyo aya kuvuleka amehlo enu nize nibe njengoThixo, nazi okulungileyo nokubi!’ USathana wafaka amathandabuzo engqondweni kaEva ngokungathi utyala imbewu waza walindela ukuba ikhule.—Genesis 3:5.

4. Ngawaphi amathandabuzo asenokuchaphazela abanye namhlanje?

⁴ USathana uwasebenzisa njani la maqhinga namhlanje? Ukuba siyalutyeshela ufundo lwethu lweBhayibhile, ufundisiso lwethu lobuqu, umthandazo, ubulungiseleli bethu bobuKristu neentlanganiso zethu, sinokuzibeka esichengeni samathandabuzo avela kwabanye. Ngokomzekelo: “Sazi njani ukuba le yinyaniso eyafundiswa nguYesu?” “Ngaba le yimihla yokugqibela ngokwenene? Ngapha koko, sele sikwinkulungwane yama-21.” “Ngaba sisemgubasini weArmagedon, okanye isekude?” Ukuba kunokuvela amathandabuzo anjalo, sinokwenza ntoni ukuze siwaphelise?

5, 6. Simele senze ntoni xa kuvela amathandabuzo?

⁵ UYakobi wanikela isiluleko esisebenzisekayo xa wabhala esithi: “Ukuba kukho nabani na kuni oswele ubulumko, makaqhubeke ebucela kuThixo, kuba unika bonke ngesisa, engangcikivi; yaye uya kubunikwa. Kodwa makaqhubeke ecela ngokholo, engathandabuzi konke konke, kuba lowo uthandabuzayo unjengeliza lolwandle eliqhutywa livuthuzwa ngumoya. Enyanisweni, loo mntu makangabi uya kwamkela nto kuYehova; ungumntu othingazayo, ongazinzanga kuzo zonke iindlela zakhe.”—Yakobi 1:5-8.

⁶ Yintoni ke esimele siyenze? Sifanele ‘siqhubeke sicela kuThixo’ sithandazela ukholo nokuqonda yaye sizibhokoxe kufundisiso lobuqu ngokuphathelele nayiphi na imibuzo okanye amathandabuzo. Sinokucela noncedo kwabo bomeleleyo elukholweni, singaze sithandabuze ukuba uYehova uya kusinika inkxaso esiyifunayo. UYakobi waphinda wathi: “Zithobeni, ke ngoko, kuThixo; kodwa mchaseni uMtyholi, wonibaleka. Sondelani kuThixo, naye uya kusondela kuni.” Ewe, amathandabuzo esinawo aya kuphela njengoko sisondela kuThixo ngofundisiso nangomthandazo.—Yakobi 4:7, 8.

7, 8. Yiyiphi eminye yemilinganiselo esisiseko yokwahlula uhlobo lonqulo olwafundiswa nguYesu yaye ngoobani abayifikelelayo le milinganiselo?

⁷ Ngokomzekelo, cinga ngalo mbuzo: Sazi njani ukuba siqhelisela uhlobo lonqulo olwafundiswa nguYesu? Ukuze siphendule oku, yiyiphi imilinganiselo emele iqwalaselwe? IBhayibhile ibonisa ukuba amaKristu okwenyaniso amele athandane. (Yohane 13:34, 35) Amele angcwalise igama likaThixo, uYehova. (Isaya 12:4, 5; Mateyu 6:9) Yaye amele alazise elo gama.—Eksodus 3:15; Yohane 17:26.

⁸ Olunye uphawu olwahlula unqulo lokwenyaniso kukuhlonelwa kweLizwi likaThixo, iBhayibhile. Yincwadi ekhethekileyo etyhila ubuntu bukaThixo neenjongo zakhe. (Yohane 17:17; 2 Timoti 3:16, 17) Ukongezelela, amaKristu okwenyaniso avakalisa uBukumkani bukaThixo njengobukuphela kwethemba loluntu lobomi obungunaphakade kumhlaba oyiparadesi. (Marko 13:10; ISityhilelo 21:1-4) Akazibandakanyi kwimicimbi yezobupolitika yeli hlabathi lonakeleyo neendlela zalo ezingcolisayo. (Yohane 15:19; Yakobi 1:27; 4:4) Ngoobani namhlanje abaye bayifikelela le milinganiselo? Izibakala zibonisa ukuba inye kuphela impendulo—ngamaNgqina kaYehova.

Kuthekani Ukuba Sihlala Sinamathandabuzo?

9, 10. Yintoni esinokuyenza ukuze soyise amathandabuzo angapheliyo?

⁹ Kuthekani ukuba sizifumanisa sigutyungelwe ngamathandabuzo? Yintoni ngoko esifanele siyenze? UKumkani uSolomon osisilumko unikela impendulo: “Nyana wam, ukuba uya kuwamkela amazwi am uze uyigcine kuwe imiyalelo yam, khon’ ukuze unikele ingqalelo kubulumko ngendlebe yakho, ukuba uyithobele ukuqonda intliziyo yakho; ukuba uthe, ngaphezu koko, wabiza ukuqonda, nelizwi lakho walisa ekuqondeni, ukuba uyaqhubeka ubufuna njengesilivere, ubuphande njengobuncwane obufihliweyo, uya kwandula ukukuqonda ukoyika uYehova, ukufumane ukumazi uThixo.”—IMizekeliso 2:1-5.

¹⁰ Ngaba leyo asiyongcamango emangalisayo? Ukuba sikulungele ukunikela ingqalelo kubulumko bukaThixo, siya ‘kukufumana ukumazi uThixo.’ Ewe, sinokulufumana ulwazi ngeNkosi enguMongami wendalo ukuba sikulungele ukuwamkela amazwi ayo size siwagcine. Oku kuthetha ukuphethukela kuYehova ngomthandazo nangofundisiso lobuqu. Ubutyebi obufihliweyo beLizwi lakhe bunokuwaphelisa nawaphi na amathandabuzo buze busincede sibone ukukhanya kwenyaniso.

11. Wavakalelwa njani umlindi kaElisha ngenxa yamathandabuzo?

¹¹ Umzekelo ocacileyo wendlela umthandazo owanceda ngayo umkhonzi kaThixo owayesoyika nowayethandabuza ufumaneka kweyesi-2 yooKumkani 6:11-18. Umlindi kaElisha wayengenako ukuqonda kokomoya. Wayengaqondi ukuba imikhosi yasezulwini yayilapho ize kuxhasa umprofeti kaThixo, owayerhangqwe ngumkhosi waseSiriya. Ngoloyiko umlindi wadanduluka esithi: “Awu, nkosi yam! Siza kwenza ntoni na?” Wasabela njani uElisha? Wathi: “Musa ukoyika, ngokuba baninzi ngakumbi abo bakunye nathi ngaphezu kwabo bakunye nabo.” Kodwa wayeza kweyiseka njani lo mlindi? Wayengenakuyibona imikhosi yasezulwini.

12. (a) Apheliswa njani amathandabuzo awayenawo umlindi? (b) Sinokuwaphelisa njani amathandabuzo esinokuba nawo?

¹² “UElisha wathandaza esithi: ‘Owu Yehova, khawuncede uvule amehlo akhe, ukuze abone.’ Ngoko nangoko uYehova wawavula amehlo omlindi, kangangokuba wabona; yaye khangela! ummandla weentaba wawuzele ngamahashe neenqwelo zokulwa zomlilo zijikeleze uElisha.” Kuloo meko uYehova wabangela ukuba umlindi abone imikhosi yasezulwini eyayikhusele uElisha. Noko ke, asinakulindela uhlobo olufanayo loncedo lukaThixo. Khumbula, loo mlindi womprofeti wayengenayo iBhayibhile epheleleyo ukuze afundisise aze omeleze ukholo lwakhe. Thina sinayo iBhayibhile. Ukuba siyisebenzisa kakuhle, ukholo lwethu lunokomelezwa ngendlela efanayo. Ngokomzekelo, sinokuqwalasela iingxelo eziliqela ezimchaza uYehova ekwinkundla yakhe yasezulwini. Ezi ngxelo zisenza singabi namathandabuzo konke konke okuba uYehova unentlangano yasezulwini exhasa abakhonzi bakhe kumsebenzi wokufundisa owenziwa ehlabathini lonke namhlanje.—Isaya 6:1-4; Hezekile 1:4-28; Daniyeli 7:9, 10; ISityhilelo 4:1-11; 14:6, 7.

Walumkele Amaqhinga KaSathana!

13. Ziziphi iindlela uSathana azama ngazo ukusenza singabambeleli ngokuqinileyo enyanisweni?

¹³ Ziziphi ezinye iindlela zikaSathana ezisenza buthathaka ngokomoya size singabambeleli ngokuqinileyo enyanisweni? Enye yazo kukuziphatha okubi, ngazo zonke iindlela ezahlukahlukeneyo. Kwihlabathi lanamhlanje elithe phithi sisini, oko kubizwa ngokuba kukuthandana (indlela ephucukileyo yokuchaza ukukrexeza) okanye ukuba neentlobano zesini nomntu othile ubusuku obunye kuphela (ukuhenyuza kungekho zinjongo) kuye kwaxhaphaka kwesi sizukulwana sithanda iziyolo esizimisele ukuzonwabisa kungakhathaliseki nokuba kungayiphi na indlela. Imifanekiso eshukumayo, umabonwakude neevidiyo ziyalukhuthaza olu hlobo lokuphila. Amajelo eendaba azaliswe ngamanyala, ingakumbi i-Internet. Abo bafun’ ukwazi banokuwela esilingweni.—1 Tesalonika 4:3-5; Yakobi 1:13-15.

14. Kutheni amanye amaKristu eye angamaxhoba amaqhinga kaSathana?

¹⁴ Amanye amaKristu aye anikezela kumnqweno wokufun’ ukwazi yaye aye angcolisa iingqondo neentliziyo zawo ngokubukela imifanekiso engengomanyala kangako (soft-core) okanye kwanaleyo ingamanyundululu (hard-core). Baye bazivumela ukuba babanjiswe ngumgibe kaSathana ohendayo. Ngokufuthi ukwenjenjalo kuye kwakhokelela ekwaphukelweni ngumkhombe wokomoya. Abo banjalo baye basilela ukuhlala ‘beziintsana ebubini.’ Abakhange babe “ngabakhule ngokupheleleyo emandleni okuqonda.” (1 Korinte 14:20) Nyaka ngamnye, abantu abangamawaka bavuna imivuzo yokungathobeli imigaqo nemilinganiselo eseLizwini likaThixo. Baye bakutyeshela ukwambatha nokulondoloza “sonke isikrweqe sikaThixo.”—Efese 6:10-13; Kolose 3:5-10; 1 Timoti 1:18, 19.

Masikuxabise Oko Sinako

15. Kutheni abanye benokukufumanisa kunzima ukulixabisa ilifa labo lokomoya?

¹⁵ UYesu wathi: “Niya kuyazi inyaniso, yaye inyaniso iya kunikhulula.” (Yohane 8:32) Inkoliso yamaNgqina kwaye kwafuneka iyeke indlela eyayiphila ngayo ngaphambili, iqhawule namaqhina onqulo eyayikulo. Ngoko ke, inokuyiqonda ngokukhawuleza inkululeko eziswa yinyaniso. Kwelinye icala, abanye abantu abaselula abaye bakhuliswa ngabazali abasenyanisweni banokukufumanisa kunzima ukulixabisa ilifa labo lokomoya. Abazange babe yinxalenye yonqulo lobuxoki okanye babe yinxalenye yeli hlabathi ligxininisa ekufuneni ulonwabo, ekukhotyokisweni ziziyobisi nasekuziphatheni okubi. Ngenxa yoko, banokusilela ukubona umahluko ocacileyo phakathi kweparadesi yethu yokomoya nehlabathi likaSathana elonakeleyo. Bambi basenokunikezela esilingweni ukuze bangcamle ityhefu yehlabathi baze babone oko bangakhange bakufumane!—1 Yohane 2:15-17; ISityhilelo 18:1-5.

16. (a) Yiyiphi imibuzo esinokuzibuza yona? (b) Yintoni esiyifundiswayo nesikhuthazwa ukuba siyenze?

¹⁶ Ngaba ngokwenene kufuneka sizitshise eminweni ukuze sazi ukuba zinjani iingqaqambo nenkxwaleko? Ngaba asinakufunda kumava abuhlungu abanye? Ngaba kufuneka singene “eludakeni” lweli hlabathi ukuze sibone enoba siphoswe kokuthile kusini na? (2 Petros 2:20-22) UPetros wakhumbuza amaKristu enkulungwane yokuqala awayeyinxalenye yehlabathi likaSathana ngaphambili esithi: “Lanele ixesha elidluleyo lokuba nisebenze ukuthanda kweentlanga xa naniqhubeka nezenzo zehambo evakalala, ezinkanukweni, ekuzinkcinkceni ngewayini, kwiziyunguma, ezindywaleni, nakunqulo-zithixo olungekho mthethweni.” Ngokuqinisekileyo, akuyomfuneko ukuba singene ‘kumgxobhozo woburheletyo’ wehlabathi ukuze sibone ukuba ihlabathi lonakele kangakanani na. (1 Petros 4:3, 4) Ngokwahlukileyo koko, sifundiswa imilinganiselo kaYehova ephakamileyo kwiiHolo zethu zoBukumkani, ezizizazulu zemfundo yeBhayibhile. Yaye sikhuthazwa ukuba sisebenzise amandla ethu okuqiqa ukuze sizingqine ukuba sinenyaniso size ngaloo ndlela inyaniso siyenze eyethu.—Yoshuwa 1:8; Roma 12:1, 2; 2 Timoti 3:14-17.

Igama Lethu Asilogama Nje

17. Sinokuba ngamaNgqina kaYehova aphumelelayo njani?

¹⁷ Ukuba inyaniso siyenza eyethu, siya kufuna ukwabelana nabanye ngayo ngawo onke amathuba afanelekileyo. Oku akuthethi ukuba siya kuzama ukuyinyanzela kwabo bangenamdla. (Mateyu 7:6) Kunoko, asiyi koyika ukuzazisa ukuba singamaNgqina kaYehova. Ukuba umntu ubonakalisa intlantsana yomdla ngokubuza umbuzo ngokunyanisekileyo okanye ngokuthabatha impapasho yeBhayibhile, siya kukulungela ukwabelana naye ngethemba lethu. Kakade ke, bekuya kuba kuhle ukuba sisoloko sinohlobo oluthile loncwadi, ingakhathaliseki indawo esikuyo—ekhaya, emsebenzini, esikolweni, evenkileni okanye kwiindawo zokuzihlaziya.—1 Petros 3:15.

18. Ukuzazisa ngendlela ecacileyo ukuba singamaKristu kunokuba yingenelo njani kuthi?

¹⁸ Xa sizazisa ngendlela ecacileyo ukuba singamaKristu, someleza amandla ethu okuzikhusela nxamnye neentlaselo zikaSathana ezichuliweyo. Ukuba kukho itheko lomhla wokuzalwa okanye leKrismesi okanye kuyangcakazwa emsebenzini (office lottery), ngokufuthi abantu osebenza nabo baye bathi, “Ungazikhathazi ngaye. Ngomnye wamaNgqina kaYehova.” Ngenxa yeso sizathu, abantu basenokungatyekeli ekwenzeni iziqhulo ezingcolileyo xa sikho. Ngaloo ndlela, ukuchaza ukuma kwethu njengamaKristu kuyingenelo kakhulu ebomini bethu, kwananjengokuba umpostile uPetros wabonisayo esithi: “Eneneni, ngubani onganenzakalisayo xa nisenza okulungileyo? Kodwa kwanokuba niyabandezeleka ngenxa yobulungisa, ninoyolo.”—1 Petros 3:13, 14.

19. Sazi njani ukuba singene nzulu kwimihla yokugqibela?

¹⁹ Enye ingenelo yokwenza inyaniso ibe yeyethu kukuba siya kweyiseka kukuba le ngokwenene yimihla yokugqibela yale nkqubo yezinto. Siya kwazi ukuba uninzi lweziprofeto zeBhayibhile lufikelela kuvutho-ndaba kweli xesha siphila kulo.a Isilumkiso sikaPawulos sokuba “ngemihla yokugqibela kuya kufika amaxesha amanqam ekunzima ukujamelana nawo” singqinwa ngokupheleleyo ziziganeko ezimanyumnyezi zenkulungwane edluleyo. (2 Timoti 3:1-5; Marko 13:3-37) Inqaku lakutshanje lephephandaba elithetha ngenkulungwane yama-20 lalinomxholo othi “Iya Kukhunjulwa Njengexesha Lobundlavini.” Eli nqaku lathi: “Unyaka we-1999 uye wangowona nyaka uzele kukubulala kwisiqingatha sesibini seyona nkulungwane ibizele kukubulala.”

20. Eli lixesha lokuba senze ntoni?

²⁰ Eli asiloxesha lokuthandabuza. Intsikelelo kaYehova iyabonakala ngokucacileyo kumsebenzi wokufundisa ngeBhayibhile oye wenziwa emhlabeni wonke njengobungqina ezintlangeni. (Mateyu 24:14) Yenza inyaniso ibe yeyakho uze wabelane nabanye ngayo. Ikamva lakho elingunaphakade lixhomekeke koko ukwenzayo ngoku. Ukuyekelel’ umxakatho kuya kusenza singayifanelekeli intsikelelo kaYehova. (Luka 9:62) Kunoko, lixesha lokuba ‘siqine, singabi nakushukuma, sisoloko sinokuninzi kokwenza emsebenzini weNkosi, sisazi ukuba ukusebenza kwethu akulolize eNkosini.’—1 Korinte 15:58.

[Umbhalo osemazantsi]

Uyakhumbula Na?

• Sinokuwaphelisa njani amathandabuzo?

• Yintoni esinokuyifunda kumzekelo womlindi kaElisha?

• Ziziphi izilingo zokuziphatha okubi esimele sizilinde ngokuthe rhoqo nxamnye nazo?

• Kutheni sifanele sizazise ngendlela ecacileyo ukuba singamaNgqina kaYehova?

[Imifanekiso ekwiphepha 10]

Ukufundisisa iBhayibhile rhoqo kunye nomthandazo kuya kusinceda siphelise amathandabuzo

[Umfanekiso okwiphepha 11]

Amathandabuzo omlindi kaElisha apheliswa ngumbono

[Umfanekiso okwiphepha 12]

KwiiHolo zoBukumkani sifundiswa imilinganiselo kaYehova ephakamileyo yokuziphatha njengakule yaseBenin