Unako Ukuhlangabezana Nokudimazeka!
INDODA esisilumko yakha yabhala isithi: “Ngaba uzibonakalise udimazekile ngomhla wokubandezeleka? Uya kuphelelwa ngamandla.” (IMizekeliso 24:10) Ukuba wakha wadimazeka, mhlawumbi uya kuvumelana naloo mazwi.
Akukho namnye ungenakuchatshazelwa yimiphumo yokudimazeka. Ukudimazeka okungephi kunokuhlala usuku olunye okanye ezimbini, emva koko kudambe. Kodwa xa kukho ukukhathazeka nengqumbo, loo ngxaki inokuqhubeka ixesha elide. Amanye amaKristu abethembekile kangangeminyaka aye adimazeka kangangokuba aye ada ayeka nokuya kwiintlanganiso zebandla nokuba nesabelo kubulungiseleli basentsimini.
Ukuba uziva udimazekile, ungalahl’ ithemba! Abakhonzi abathembekileyo bamandulo bahlangabezana ngokuphumelelayo nokudimazeka, yaye ngoncedo lukaThixo, nawe unokwenjenjalo.
Xa Abanye Bekwenza Buhlungu
Akunakulindela ukuba ukhuseleke kuwo onke amazwi okanye izenzo zokungakhathali. Noko ke, unako ukungakuvumeli ukungafezeki kwabanye ukuba kuphazamisane nokukhonza kwakho uYehova. Ukuba kukho bani okukhathazileyo, unokukufumanisa kuluncedo ukucinga ngendlela uHana, unina kaSamuweli, awahlangabezana ngayo nemeko edimazayo.
UHana wayebafuna kakhulu abantwana, kodwa wayeludlolo. Umfazi wesibini wendoda yakhe, uPenina, wayesele emzalele oonyana neentombi. Kunokuba abe nosizi ngale meko kaHana, uPenina wasuka wakhuphisana naye waza wabonisa isimo sengqondo esabangela ukuba uHana ‘alile yaye angadli.’—1 Samuweli 1:2, 4-7.
Ngenye imini uHana wenyuka waya emnqubeni eye kuthandaza. UEli, umbingeleli omkhulu wakwaSirayeli, waphawula ukuba imilebe yakhe iyashukuma. Engaqondi ukuba uHana uyathandaza, uEli wagqiba kwelokuba unxilile. Wabuza: “Kuya kude kube nini na unxila? Yisuse iwayini yakho kuwe.” (1 Samuweli 1:12-14) Ngaba unokuyithelekelela indlela amele ukuba wavakalelwa ngayo uHana? Wayeze emnqubeni ukuze afumane intuthuzelo. Ngokuqinisekileyo wayengalindelanga ukuba atyholwe yenye yawona madoda adumileyo kwaSirayeli!
Le meko yayisenokubangela ukuba uHana adimazeke kakhulu. Wayesenokuphuma ngoko nangoko emnqubeni, afunge ukuba akasayi kuze abuyele apho ngoxa uEli esakhonza njengombingeleli omkhulu. Noko ke, ngokucacileyo uHana wayeluxabisa ulwalamano lwakhe noYehova. Wayesazi ukuba wayengayi kukholiswa kukuthabatha kwakhe inyathelo elinjalo. Umnquba wawusisazulu sonqulo olunyulu. UYehova wayelibeke apho igama lakhe. Yaye engafezekanga enjalo, uEli wayengummeli kaYehova onyuliweyo.
Indlela awasabela ngayo uHana ebonisa ukuhlonel’ uThixo xa wayetyholwa nguEli ingumzekelo obalaseleyo kuthi namhlanje. Akazange avume ukutyholwa, kodwa wasabela ngendlela ebonisa intlonelo enzulu. Waphendula esithi: “Hayi, nkosi yam! Ndingumfazi obandezelekileyo emoyeni; andiselanga wayini nasiselo sinxilisayo, koko ndiphalaza umphefumlo wam phambi koYehova. Musa ukulenza ngathi lingumfazi olitshivela ikhobokazana lakho, kuba kungenxa yokuxhalaba kwam nengqumbo yam enkulu ukuba mandithethe kude kube ngoku.”—1 Samuweli 1:15, 16.
Ngaba uHana wayidlulisela ingongoma? Ngokuqinisekileyo. Ukanti, wathetha noEli ngobuchule, akazange abe nabuganga bakumgxeka ngenxa yokumtyhola kwakhe. Naye wamphendula ngobubele, esithi: “Hamba ngoxolo, yaye ngamana uThixo kaSirayeli angenza ngokwesibongozo sakho osicelileyo kuye.” Emva kokuba lo mbandela uzinzisiwe, uHana “wahamba . . . wadla, nobuso bakhe ababi saba bobuxhalabileyo.”—1 Samuweli 1:17, 18.
Yintoni esiyifundayo kule ngxelo? UHana wakulungisa ngokukhawuleza ukungaqondani, kodwa wakwenza oko ngentlonelo enzulu. Ngenxa yoko, walondoloza ulwalamano oluhle noYehova kwakunye noEli. Hayi indlela unxibelelwano oluhle nokusebenzisa ubuchule okunokuzithintela ngayo iingxaki ezincinane ukuba zingakhuli zibe nkulu!
Kumele kuqondwe ukuba ukuze sizinzise iimbambano nabanye kufuneka ukuzithoba nokuba bhetyebhetye kumacala omabini. Ukuba elinye ikholwa alisabeli kwimigudu oyenzayo yokuzinzisa imbambano, loo mbandela unokuwuyekela kuYehova, unethemba lokuba uya kuwusingatha ngelakhe ixesha nangendlela yakhe.
Ngaba Uye Walahlekelwa Lilungelo Lenkonzo?
Abanye baye badandatheka ngenxa yokuba kuye kwafuneka baphulukane nelungelo ebebelixabisile enkonzweni kaThixo. Bebekunandipha ukukhonza abazalwana babo, yaye bathe bakuphulukana nelo lungelo, bavakalelwa kukuba abaseloncedo kuYehova okanye kwintlangano yakhe. Ukuba uvakalelwa ngaloo ndlela, unokuzuza ukuqonda ngokuqwalasela umzekelo wombhali weBhayibhile uMarko, owayekwabizwa ngokuba nguYohane Marko.—IZenzo 12:12.
UMarko wapheleka uPawulos noBharnabhas kuhambo lwabo lokuqala lobuvangeli basemazweni, kodwa bathi besephakathi kolo hambo, wabashiya waza wabuyela eYerusalem. (IZenzo 13:13) Kamva, uBharnabhas wafuna ukuba bahambe noMarko kolunye uhambo. Noko ke, iBhayibhile ithi: “UPawulos akazange acinge ukuba kufanelekile ukuhamba naye, ekubeni wayebashiyile ePamfiliya akahamba nabo ukuya emsebenzini.” UBharnabhas akazange avumelane noko. Le ngxelo ihlabela mgama isithi: “Ngako oku kwabakho ukudubuleka kabukhali komsindo, kangangokuba [uPawulos noBharnabhas] bahlukana; waza uBharnabhas wathabatha uMarko wanduluka ngesikhephe esiya eSipro. UPawulos wakhetha uSilas waza wemka.”—IZenzo 15:36-40.
UMarko umele ukuba wadandatheka kakhulu akufumanisa ukuba umpostile uPawulos ohloniphekileyo akafuni kusebenza naye nokuba impikiswano eyayikho ngokuphathelele ukufaneleka kwakhe yabangela ukuba kuvuleke umsantsa phakathi kukaPawulos noBharnabhas. Kodwa oku akuphelelanga apho.
UPawulos noSilas babesalifuna iqabane ababeza kuhambahamba nalo. Ekufikeni kwabo eListra, bafumana omnye umntu owayeza kungena endaweni kaMarko, umfana ogama linguTimoti. Ngeli xesha lokunyulwa kwakhe, uTimoti umele ukuba wayeneminyaka emibini okanye emithathu ebhaptiziwe. Kwelinye icala, uMarko waqalisa ukunxulumana nebandla lobuKristu ukususela ekusekweni kwalo—eneneni, ngaphambi kokuba noPawulos lowo anxulumane nalo. Ukanti, nguTimoti owafumana esi sabelo sililungelo.—IZenzo 16:1-3.
Wasabela njani uMarko akufumanisa ukuba endaweni yakhe kungene umfana omcinane nongenamava kunaye? IBhayibhile ayichazi. Sekunjalo, ibonisa ukuba uMarko waqhubeka ekhuthele enkonzweni kaYehova. Wawaxhakamfula amalungelo awayefumaneka kuye. Nangona engazange akwazi ukukhonza noPawulos noSilas, wakwazi ukuya noBharnabhas eSipro, intsimi yakuloBharnabhas. UMarko wakhonza noPetros eBhabhiloni. Ekugqibeleni, walifumana ilungelo lokusebenza noPawulos—noTimoti—eRoma. (Kolose 1:1; 4:10; 1 Petros 5:13) Kamva, uMarko wada waphefumlelwa ukuba abhale enye yeeVangeli ezine!
Kukho isifundo esibalulekileyo kuko konke oku. UMarko akazange akhathazeke ngenxa yelungelo awayephulukene nalo kangangokude angawaxabisi amalungelo awayesafumaneka kuye. UMarko wahlala exakekile enkonzweni kaYehova, yaye uYehova wamsikelela.
Ngoko, ukuba uphulukene nelungelo, ungadimazeki. Ukuba uhlala unesimo sengqondo esifanelekileyo yaye uxakekile, usenokunikwa amanye amalungelo. Ininzi into enokwenziwa emsebenzini weNkosi.—1 Korinte 15:58.
Umkhonzi Othembekileyo Uyadimazeka
Akulula ukulwa umlo wokholo. Maxa wambi, usenokudimazeka. Usenokude ube nesazela ngenxa yokudimazeka, ugqibe kwelokuba umkhonzi kaThixo akafanele avakalelwe ngaloo ndlela. Cinga ngoEliya, omnye wabaprofeti bakwaSirayeli ababalaseleyo.
Xa uKumkanikazi wakwaSirayeli uIzebhele, owayekhuthaza inzondelelo yempambano kunqulo lukaBhahali, wafumanisa ukuba uEliya ubabulele abaprofeti bakaBhahali, wafunga esithi uza kumbulala. UEliya wayekhe wajamelana neentshaba ezingaphezu kukaIzebhele, kodwa wasuka wadimazeka kangangokuba wayefuna ukufa. (1 Kumkani 19:1-4) Kwakunokwenzeka njani oko? Kukho nto wayeyilibele.
UEliya wayelibele ukukhangela kuYehova njengoMthombo wamandla akhe. Ngubani owayenike uEliya amandla okuvusa abafileyo nawokujamelana nabaprofeti bakaBhahali? NguYehova. Ngokuqinisekileyo, uYehova wayenokumnika amandla okujamelana nengqumbo kaKumkanikazi uIzebhele.—1 Kumkani 17:17-24; 18:21-40; 2 Korinte 4:7.
Nabani na unokuhexa okwethutyana kwintembelo yakhe kuYehova. NjengoEliya, maxa wambi ingxaki ethile unokuyijonga ngokwembono yabantu kunokuba usebenzise “ubulumko obuvela phezulu” xa uhlangabezana nayo. (Yakobi 3:17) Noko ke, uYehova akazange amshiye uEliya ngenxa yoku kuphambuka kwakhe kokomzuzwana.
UEliya wasabela eBher-shebha waza waya entlango, apho wayecinga ukuba akukho mntu unokumfumana. Kodwa uYehova wamfumana. Wathumela ingelosi ukuba iye kumthuthuzela. Ingelosi yaqinisekisa ukuba uEliya ufumana isonka esisandul’ ukubhakwa namanzi ahlaziyayo okusela. Emva kokuba uEliya ephumle, ingelosi yamalathisa ukuba ahambe malunga neekhilomitha ezingama-300 aye kwiNtaba yaseHorebhe, apho wayeza komelezwa nguYehova ngokubhekele phaya.—1 Kumkani 19:5-8.
ENtabeni yaseHorebhe, uEliya wabona umbono owomeleza ukholo wamandla kaYehova. Wandula ke uYehova ngelizwi elipholileyo, neliphantsi wamqinisekisa ukuba akayedwa. UYehova wayekunye naye, nabazalwana bakhe abangama-7 000 babekunye naye, nangona yena uEliya wayengakwazi oko. Ekugqibeleni, uYehova wamnika umsebenzi. Wayengamlahlanga uEliya njengomprofeti wakhe!—1 Kumkani 19:11-18.
Uncedo Luyafumaneka
Ukuba maxa wambi uhlaselwa kukudimazeka okungephi, uya kufumanisa ukuba uya kuziva ubhetele emva kokuba uye waphumla ngokuthe chatha okanye ufumane isidlo esinesondlo. UNathan H. Knorr, owakhonza njengelungu leQumrhu Elilawulayo lamaNgqina kaYehova de kwasekufeni kwakhe ngowe-1977, wakha wabonisa ukuba ngokufuthi iingxaki ezinkulu zibonakala zincinane emva kokulala ngokwaneleyo ebusuku. Noko ke, xa ingxaki izingisa, elo yeza lisenokunganeli—uya kufuna uncedo ukuze ulwe nokudimazeka.
UYehova wathumela ingelosi ukuba iye komeleza uEliya. Namhlanje, uThixo unikela ukhuthazo ngabadala namanye amaKristu aqolileyo. Ngokwenene, abadala ‘banokuba njengendawo yokuzimela umoya.’ (Isaya 32:1, 2) Kodwa ukuze ufumane ukhuthazo kubo, kusenokufuneka ukuba uthabathe inyathelo lokuqala. Edimazeke enjalo, uEliya wahamba waya kwiNtaba yaseHorebhe ukuze ayalelwe nguYehova. Sifumana uyalelo olomelezayo ngebandla lamaKristu.
Xa sisamkela uncedo size sijamelane ngenkalipho nezilingo, njengokukhathazeka okanye ukuphulukana namalungelo, sima ngakwicala likaYehova kwimbambano ebalulekileyo. Yiyiphi loo mbambano? USathana wathi abantu bakhonza uYehova ngenxa nje yokuzingca. USathana akalikhanyeli elokuba siya kumkhonza uThixo xa yonk’ into ebomini ihamba kakuhle, kodwa umi ngelithi siya kuyeka ukukhonza uThixo xa sijamelana neengxaki. (UYobhi, isahluko 1 nesesi-2) Ngokuqhubeka sisenza inkonzo kaYehova ngokungaxengaxengiyo nangona sidimazeka, sinokunceda ekunikeleni impendulo kwisityholo sikaMtyholi songcikivo.—IMizekeliso 27:11.
UHana, uMarko noEliya bonke babeneengxaki ezabaphanga uvuyo okwexeshana. Noko ke, bahlangabezana ngokuphumelelayo neengxaki zabo baza baphila ubomi obunentsingiselo. Ngoncedo lukaYehova, nawe unokuhlangabezana nokudimazeka ngokuphumelelayo!