“Kuqhubeka Ntoni EFransi?”

“Inkululeko, inkululeko ethandwayo,” lawo ngamazwi acatshulwe kwi-“La Mar-seillaise,” umhobe wesizwe wase-Fransi. Ngokuqinisekileyo, inkululeko yinto exabisekileyo. Ukanti, iziganeko zakutshanje eziye zenzeka eFransi ziya-xhalabisa ngenxa yokuba inkululeko ephathelele izinto ezisisiseko ayikhathalelwanga. Kungenxa yoko le nto, ngoLwesihlanu, ngoNovemba 3, 2000, amaNgqina kaYehova angamashumi amawaka asasaza imibhalo yephecana ezizigidi ezili-12 elinomxholo othi “What Is Brewing in France? Could Freedom Regress? [Kuqhubeka Ntoni EFransi? Ngaba Inkululeko Iyapheliswa?]”

KANGANGEMINYAKA eliqela ngoku, amaNgqina kaYehova aseFransi ebehlaselwa ngamaqela awahlukahlukeneyo ezobupolitika namaqela achasene namahlelo. Oku kuye kwabangela ukuba amaNgqina ajamelane nobunzima njengabantu ngabanye, njengebandla nakulo lonke elo lizwe. Noko ke, ngoJuni 23, 2000, iConseil d’État, eyona nkundla iphakamileyo yaseFransi, yenza isigqibo esibalulekileyo esasivumelana nembono eqhelekileyo kwiinkundla ezingaphantsi ezingama-31 kumatyala angaphezu kwe-1 100. Le nkundla iphakamileyo yavuma ukuba unqulo lwamaNgqina kaYehova luyavisisana ngokupheleleyo nomthetho waseFransi nokuba anelungelo lokungayihlawuli irhafu yeeHolo zawo zoBukumkani njengezinye iinkonzo.

Noko ke, lisigatya ngokupheleleyo esi sigqibo, iSebe Lezemali LaseFransi alikavumi ukuwakhulula amaNgqina kaYehova ekuhlawuleni irhafu ngokuvisisana nomthetho omiselwe iintlangano zonqulo. Eli Sebe liye lamisela ukuba kuhlawulwe ama-60 ekhulwini erhafu kwiminikelo eyenziwa ngamaNgqina nangabo banxulumana namabandla asekuhlaleni ali-1 500 kwelo laseFransi. Eli tyala lisaxoxwa.

Injongo yokuba kwenziwe eli phulo likhankanywe ngasentla yayikukubhenca oku kuphikisana kuze kubalaseliswe nengozi enokubakho ngenxa yaloo rhafu ifunwa ngobuqhetseba nemithetho emiselwayo enokuyisingela phantsi inkululeko yonqulo yabo bonke.a

Usuku Olude

Ngentsimbi yesibini kusasa, kwamanye amabandla amaNgqina aqalisa ukusasaza iphecana ngaphandle kwezikhululo zikaloliwe nakwimizi-mveliso emva koko aya kwizikhululo zeenqwelo-moya. Ngentsimbi yesithandathu, kuqalisa ukuphithizela kwelaseParis. Amatsha-ntliziyo amalunga nama-6 000 ema kwiindawo anokukwazi ukubona kuzo abantu abaya emsebenzini. Elinye ibhinqa lithi: “Intle le nto niyenzayo ukuze kufumaneke inkululeko yonqulo. AsingomaNgqina kaYehova kuphela abandakanyekileyo.” EMarseilles, amaNgqina angaphezu kwama-350 ahambisa iphecana kwizikhululo ezingaphantsi komhlaba nasesitratweni. Kwisithuba esingangeyure, isikhululo sikanomathotholo sasekuhlaleni sithetha ngeli phulo, sixelela abaphulaphuli ukuba bangamangaliswa xa bedibana namaNgqina kaYehova. EStrasbourg, ikomkhulu leNkundla YaseYurophu Elwela Amalungelo Abantu, abahambi benza umkrozo kwisikhululo salapho esikhulu belinde ngomonde ukuze bafumane owabo umbhalo wephecana. Elinye igqwetha lithi, nangona lingakukholelwa oko sikukholelwayo, linomdla kweli tyala lethu, ekubeni oko sikulwelayo kubalulekile yaye kufanelekile.

Ngentsimbi yesibhozo, nangona imvula yayisina ngamandla, amaNgqina angama-507 ahlala kwisixeko saseGrenoble esikwiiAlps ayezalise izitrato okanye efaka iphecana kwiibhokisi zeposi. Bathi abaqhubi beenqwelo-mafutha nezinye izithuthi, bakubona oko kuqhubekayo, bamisa izithuthi zabo ukuze bacele iphecana. Kwisixeko sasePoitiers esingasentshona, abantu abahamba ngololiwe abafika ngentsimbi yethoba babefika sele belifumene kwindawo ababesuka kuyo. EMulhouse, kufuphi nomda waseJamani, kwakusele kuhanjiswe imibhalo engama-40 000.

Ngentsimbi yeshumi, amabandla amaninzi ayesele ehambise ngaphezu kwesiqingatha samaphecana awo. Njengoko imini ihamba, babembalwa abantu ababengalamkeli iphecana, yaye kwakukho iingxubusho ezibangel’ umdla. EBesançon, kumgama ongaphezulu kuhle kuma-80 eekhilomitha ukusuka kumda waseSwitzerland, omnye umfana wavakalisa umdla anawo eBhayibhileni yaye wabuza umbuzo othi kutheni uThixo evumela ubungendawo. Elinye iNgqina lammemela kwiHolo yoBukumkani ekufuphi ukuze baqhubeke nengxubusho, yaye kwaqaliswa isifundo seBhayibhile ngoko nangoko ngencwadana enemifanekiso ethi Yintoni UThixo Ayifunayo Kuthi?

Emini emaqanda amaNgqina amaninzi ayeshumayela isithuba esingangeyure okanye ezimbini ngexesha lesidlo sawo sasemini. Ukutyhubela imva kwemini, ayeqhubeka esasaza eli phecana, yaye amabandla aliqela agqiba ngentsimbi yesithathu okanye yesine emva kwemini. Kwisixeko saseReims, abanye abantu ababefunda okanye ababenxulumana namaNgqina kaYehova kwixa elidluleyo bavakalisa umnqweno wabo wokuvuselela uqhagamshelwano lwabo nebandla. EBordeaux kwaqaliswa izifundo zeBhayibhile zamakhaya ezithathu. Kwakweso sixeko, elinye iNgqina langena evenkileni liye kuthenga iphephandaba laza labona imfumba yamaphecana phezu kwekhawuntara. Umnini-venkile, owayefudula eliNgqina, wayefumene iphecana waza, emva kokubona ukubaluleka kwalo, wenza imibhalo ekhutshelweyo awayeza kuyihambisa ngokwakhe.

ELe Havre, eNormandy, elinye ibhinqa elingumProtestanti elalive kunomathotholo ukuba amaNgqina kaYehova ahlawuliswa irhafu ngeminikelo yawo lothuka. Lalamkela ngolangazelelo eli phecana laza lawancoma amaNgqina ngokuthetha phandle nxamnye nokuphathwa ngokungekho sikweni. Ngeye-7:20 ebusuku, ijelo leendaba kumabonwakude wenqila waseLyons lagqabaza ngokusasazwa kweli phecana, lisithi: “Ngale ntsasa bekulula ukuphepha amaqabaza emvula kunokuphepha amaphecana amaNgqina kaYehova.” Kwenziwa udliwano-ndlebe namaNgqina amabini yaye achaza izizathu zokuba kwenziwe elo phulo.

AmaNgqina awayefuna ukuba nesabelo emva komsebenzi wawo wempangelo asasaza amaphecana kubantu ababevela emsebenzini yaye amanye awafaka kwiibhokisi zeposi. Kwiidolophu ezifana neBrest neLimoges—ezibalasele ngokwenza izitya zodongwe olutshisiweyo—abantu ababevela kubukela umfanekiso oshukumayo ngentsimbi ye-11 ebusuku babephakathi kwabantu bokugqibela ukufumana eli phecana. Amaphecana aseleyo asasazwa ngentsasa elandelayo.

Umphumo

Elinye iNgqina labhala lisithi: “Iintshaba zethu zicinga ukuba ziyasityhafisa. Eneneni, kwenzeka into eyahlukileyo koko.” Kwinkoliso yamabandla, amaNgqina angaphezu kwama-75 ekhulwini aba nesabelo ngaloo mini, amanye echitha iiyure ezili-10, ezili-12 okanye ezili-14 kulo msebenzi. EHem, kumntla weFransi, emva kokusebenza ebusuku, elinye iNgqina lasasaza iphecana ukususela ngentsimbi yesihlanu kusasa ukusa kwintsimbi yesithathu emva kwemini. EDenain, kufuphi nalapho, apho ibandla laqala ukubakho ngowe-1906, amaNgqina angama-75 achitha iiyure ezingama-200 esasaza iphecana ngaloo Lwesihlanu. Abanye, nangona baluphele, beneziphene yaye nangona imozulu yayingentle, babezimisele ukuba nesabelo. Ngokomzekelo, eLe Mans, amanye amabhinqa amathathu akwiminyaka yama-80 ubudala achitha iiyure ezimbini efaka iphecana kwiibhokisi zeposi, yaye elinye iNgqina elihlala kwisitulo esinamavili sabaguli, lalihambisa iphecana phambi kwesikhululo sikaloliwe. Yaye hayi indlela ekukhuthaza ngayo ukubona amaNgqina aliqela ebepholile ngaphambili, esiba nenxaxheba kulo msebenzi ukhethekileyo!

Ngokungathandabuzekiyo, ukusasazwa kweli phecana kwanikela ubungqina kakhulu. Abantu bazo zonke iintlobo, uninzi lwabo olungafane lufumaneke emakhayeni alo, lwafumana umbhalo weli phecana. Abantu abaliqela bavakalelwa kukuba eli phulo lafeza okungakumbi kunokukhusela nje izilangazelelo zamaNgqina. Abaninzi baligqala njengelithethelela inkululeko yesazela neyonqulo kubo bonke abantu baseFransi. Njengobungqina boku, abantu bacela imibhalo eyongezelelekileyo yephecana ukuze banike abahlobo babo, abantu abasebenza nabo okanye izalamane.

Ewe, amaNgqina kaYehova aseFransi anelunda ngokwazisa igama likaYehova nangokukhusela izilangazelelo zoBukumkani. (1 Petros 3:15) Ngokunyanisekileyo, anethemba ‘lokuqhubeka ephila ubomi bokuzola noboxolo ngozinikelo lobuthixo nokundileka okupheleleyo’ yaye athemba ukuba amawaka abantu abangakumbi aya kuwathelela ekudumiseni uYise osemazulwini, uYehova.—1 Timoti 2:2.

[Umbhalo osemazantsi]