Bazali—Yanelisani Iintswelo Zabantwana Benu!

ABANTWANA bafuna ukhokelo nengqeqesho enothando, ingakumbi evela kubazali babo. Ngokuphathelele oku, umfundisi-ntsapho waseBrazil, uTania Zagury, uthi: “Bonke abantwana banotyekelo lokufuna ulonwabo. Kubalulekile ukubabekela imida. Ngabazali abamele benze oko. Xa bengakwenzi oko, abantwana bayazilawula.”

Noko ke, kumazwe amaninzi impembelelo yebutho labantu abangoovula-zibhuqe ababalaselisa inkululeko yokuziphatha inokwenza kube nzima ukulandela eli cebiso lingasentla. Ngoko, abazali banokulufumana phi uncedo? Abazali aboyika uThixo bayaqonda ukuba abantwana babo “balilifa elivela kuYehova.” (INdumiso 127:3) Ngoko bakhangela kwiLizwi likaThixo, iBhayibhile, ukuze bafumane ukhokelo lokubakhulisa. Ngokomzekelo, IMizekeliso 13:24 ithi: “Oyiyekileyo intonga yakhe umthiyile unyana wakhe, kodwa omthandayo umfunela ingqeqesho.”

Akumele kucingwe ukuba ibinzana elithi “intonga” elisetyenziswe eBhayibhileni lithetha ukubetha kuphela; kunoko libhekisela kwiindlela zokululeka, nokuba ziziphi na. Eneneni, ngokufuthi kusenokwenzeka ukuba ekuphela kwento efunekayo ukuze kulungiswe iindlela zomntwana eziphum’ ecaleni kukuthetha naye. IMizekeliso 29:17 ithi: “Mbethe unyana wakho yaye uya kukuzisela ukuphumla awuyolise umphefumlo wakho.”

Abantwana bafuna ukuqeqeshwa ngothando ukuze bayeke imikhwa emibi. Isiluleko esiqinileyo nesobubele ngolo hlobo sibubungqina bokuba umzali umkhathalele umntwana wakhe. (IMizekeliso 22:6) Ngoko bazali, ninganikezeli! Ngokulandela icebiso leBhayibhile elisebenzisekayo nelisengqiqweni, niya kumkholisa uYehova uThixo nize nenze abantwana benu banihlonele.