ITetragrammaton KwiSeptuagint
IGAMA likaThixo, uYehova, limelwe yiTetragrammaton, oko kukuthi, oonobumba abane besiHebhere abangaba, יהוה (YHWH). Kangangethuba elide, bekukho inkolo yokuba iTetragrammaton ayizange ibekho kwimibhalo yeSeptuagint. Ukuba oko kwakunjalo, xa ababhali beZibhalo zamaKristu zesiGrike becaphula kwiZibhalo zesiHebhere, ngebengazange balisebenzise igama likaThixo kwimibhalo yabo.
Kwiminyaka elikhulu edluleyo, kuye kwafunyanwa izinto eziye zatyhila ukuba igama likaThixo lalikho kwiSeptuagint. Enye incwadi ithi: “Ngenxa yokuba ayefuna ukulilondoloza igama elingcwele likaThixo, amaYuda awayethetha isiGrike, akhuphela kanye oonobumba beTetragrammaton phakathi kwamagama esiGrike, xa ayeguqulela iBhayibhile yesiHebhere kwisiGrike.”
Isiqwenga sombhalo-ngqangi esiboniswe ngasekhohlo singomnye wemizekelo emininzi eyasindayo. Esi siqwenga esafunyanwa eOxyrhynchus, e-Egypt, saze sanikwa inombolo 3522, kuthiwa sabhalwa ngenkulungwane yokuqala yeXesha Eliqhelekileyo.a Siziisentimitha ezisi-7 ububanzi nezili-10,5 ubude yaye siqulethe amazwi akuYobhi 42:11, 12. Le Tetragrammaton, eboniswe apha, ivela ngoonobumba besiHebhere bamandulo.b
Ngoko ke, ngaba igama likaThixo lalikho kwimibhalo yangaphambili yeZibhalo zamaKristu zesiGrike? Umphengululi uGeorge Howard uthi: “Ekubeni iTetragram yayisabhalwa kwimibhalo yeBhayibhile yesiGrike [iSeptuagint] eyayiyila iZibhalo zecawa yokuqala, kusengqiqweni ukukholelwa kwelokuba ababhali beT[estamente] E[ntsha], xa babecaphula kwiZibhalo, babeyigcina iTetragram kwizibhalo.” Kubonakala ukuba kungekudala emva koko, abakhupheli balishenxisa igama likaThixo baza endaweni yalo bafaka isibizo esinjengesithi Kyʹri·os (Nkosi) nesithi The·osʹ (Thixo).
[Imibhalo esemazantsi]
a Ukuze ufumane inkcazelo engakumbi ngemibhalo-ngqangi eyafunyanwa eOxyrhynchus, bona IMboniselo, kaFebruwari 15, 1992, iphepha 26-8.
b Ukuze ubone ezinye iindawo igama likaThixo elivela kuzo kwimibhalo yamandulo yesiGrike, bona iNew World Translation of the Holy Scriptures−With References, kwi-appendix 1C.
[Inkcazelo Ngomfanekiso okwiphepha 30]
Courtesy of the Egypt Exploration Society