Imibuzo Evela Kubafundi
Ngaba kuyimfuneko ukumntywilisela ubani ofuna ukubhaptizwa ukuba ungumlwelwe okanye unempilo enkenenkene, nto leyo enokwenza kube nzima ukumntywilisela?
Igama elithi “ukubhaptiza” livela kwisenzi sesiGrike esithi baʹpto, esithetha “ukuthi nkxu.” (Yohane 13:26) EBhayibhileni, “ukubhaptiza” kuthetha “ukuntywilisela.” Ngokuphathelele ukubhaptizwa kwethenwa elingumTiyopiya nguFilipu, iThe Emphasised Bible kaRotherham, ithi: “Bobabini bangena emanzini, uFilipu nethenwa,—waza wamntywilisela.” (IZenzo 8:38) Ngaloo ndlela, umntu obhaptizwayo uthiwa nkxu ngaphantsi kwamanzi.—Mateyu 3:16; Marko 1:10.
UYesu wayalela abafundi bakhe: “Hambani ke ngoko niye kubenza abafundi abantu beentlanga zonke, nibabhaptiza.” (Mateyu 28:19, 20) Ngokuvisisana noko, amaNgqina kaYehova abhaptizela kumadama okuqubha, kumachibi, emilanjeni nakwezinye iindawo ezinamanzi aneleyo okuntywilisela. Ekubeni ukubhaptiza ngokuntywilisela kuyinto efunwa ziZibhalo, abantu abanalungelo lakuthi kubani akuyomfuneko ukuba abhaptizwe. Ngenxa yoko, umntu ufanele abhaptizwe enoba oko kuthetha ukuthabatha amanyathelo angaqhelekanga ngenxa yemeko yakhe. Ngokomzekelo, ukubhaptizelwa kwiibhafu ezinkulu kuye kwaba luncedo kubantu abakhulileyo nabo banempilo enkenenkene. Amanzi asebhafini anokufudunyezwa, lowo uza kubhaptizwa usenokufakwa kancinane emanzini aze, xa sele ewaqhelile amanzi, andule ke abhaptizwe.
Kwanabantu abayimilwelwe yokwenene baye babhaptizwa. Ngokomzekelo, abantu abaye benziwa utyando kuqhoqhoqho (tracheotomy) yaye, ngenxa yoko, banomngxuma ongenakuvaleka emqaleni, okanye abo baphefumla ngomatshini baye bantywiliselwa. Kakade ke, kufanele kwenziwe amalungiselelo acokisekileyo xa kuza kubhaptizwa abantu abanjalo. Kuya kuba bubulumko ukuba kubekho umongikazi ovunyiweyo okanye ugqirha ukuba bayafumaneka. Noko ke, nabani na unokubhaptizwa phantse enoba ukwiyiphi na imeko, ukuba nje kwenziwe amalungiselelo afanelekileyo ngenyameko. Ngoko ke, kufanele kwenziwe nawuphi na umgudu ukumbhaptizela emanzini umntu, ukuba lowo ngumnqweno wakhe onyanisekileyo yaye ukuba ukulungele ukujamelana nayo nantoni na enokwenzeka.