Yongezelelani Uzinikelo Lobuthixo Ekunyamezeleni Kwenu
“Elukholweni lwenu nongezelele . . . unyamezelo, ekunyamezeleni uzinikelo lobuthixo.”—2 PETROS 1:5, 6.
1, 2. (a) Umntwana ulindeleke ukuba akhule ngayiphi indlela? (b) Kubaluleke kangakanani ukukhula ngokomoya?
UKUKHULA kubalulekile emntwaneni, kodwa akulindelekanga ukuba akhule nje emzimbeni kuphela. Kukwalindeleke ukuba akhule engqondweni nangokweemvakalelo. Ekuhambeni kwexesha, uya kuzishiya iindlela zobuntwana aze akhulele ekubeni yindoda okanye umfazi okhulileyo. Umpostile uPawulos wayebhekisela koku xa wabhala: “Xa ndandilusana, ndandifudula ndithetha ngokosana, ndicinga ngokosana, ndiqiqa ngokosana; kodwa ekubeni ngoku ndiyindoda, ndizibhangisile iimpawu zobusana.”—1 Korinte 13:11.
2 Amazwi kaPawulos atyhila ingongoma ebalulekileyo ngokukhula ngokomoya. Kufuneka amaKristu enze inkqubela ukususela ekubeni ziintsana ngokomoya ukusa ekubeni “ngabakhule ngokupheleleyo emandleni okuqonda.” (1 Korinte 14:20) Afanele azibhokoxe ezabalazela ukufikelela “kumlinganiselo wobukhulu bokuzala kukaKristu.” Ngoko ke akasayi kuba ‘ziintsana, ezikhukuliswa ngamaza yaye ziphetshethwa yiyo yonke imimoya yeemfundiso.’—Efese 4:13, 14.
3, 4. (a) Yintoni esimele siyenze ukuze sikhule ngokupheleleyo ngokomoya? (b) Ziziphi iimpawu zobuthixo esifanele sizibonakalise, yaye zibaluleke kangakanani?
3 Sinokukhula njani ngokupheleleyo ngokomoya? Nakuba ukukhula emzimbeni kuyinto ezenzekelayo kwiimeko eziqhelekileyo, kona ukukhula ngokomoya kufuna umgudu. Kuqala ngokuzuza ulwazi oluchanileyo ngeLizwi likaThixo size senze ngokuvisisana noko sikufundayo. (Hebhere 5:14; 2 Petros 1:3) Oku kusinceda sibonakalise iimpawu ezimkholisayo uThixo. Njengokuba kunjalo ngokukhula ngokwasemzimbeni nezinto ezihambisana nako, ukukhula kweempawu ezahlukahlukeneyo ezingokobuthixo ngokuqhelekileyo kwenzeka ngaxeshanye. Umpostile uPetros wabhala: “Ngoko ke, yenzani umgudu wenyameko, nize elukholweni lwenu nongezelele isidima, esidimeni ulwazi, elwazini ukuzeyisa, ekuzeyiseni unyamezelo, ekunyamezeleni uzinikelo lobuthixo, kuzinikelo lobuthixo umsa wobuzalwana, kumsa wobuzalwana uthando.”—2 Petros 1:5-7.
4 Uphawu ngalunye uPetros athethe ngalo lubalulekile, yaye alukho olunokutyeshelwa. Wongezelela esithi: “Ukuba ezi zinto zikho kuni yaye ziyaphuphuma, ziya kunithintela ekubeni ngabangasebenzi nto okanye abangenasiqhamo ngokubhekisele kulwazi oluchanileyo lweNkosi yethu uYesu Kristu.” (2 Petros 1:8) Makhe sinikele ingqalelo kwimfuneko yokongezelela uzinikelo lobuthixo kunyamezelo lwethu.
Imfuneko Yokunyamezela
5. Kutheni kufuneka sinyamezele?
5 UPetros noPawulos banxulumanisa uzinikelo lobuthixo nonyamezelo. (1 Timoti 6:11) Ukunyamezela kuthetha okungaphezulu kunokumelana nje neenzima. Kuquka ukuba nomonde, inkalipho, ukungagungqi nokungaphelelwa lithemba xa sijamelene neemvavanyo, imiqobo, izilingo, okanye intshutshiso. Njengoko siphila “ngozinikelo lobuthixo ngokunxulumene noKristu Yesu,” silindele ukutshutshiswa. (2 Timoti 3:12) Simele sinyamezele ukuze sibonakalise ukuba siyamthanda uYehova sihlakulele iimpawu ezifunekayo ukuze sisinde. (Roma 5:3-5; 2 Timoti 4:7, 8; Yakobi 1:3, 4, 12) Ngaphandle kokunyamezela, asinakuze sifumane ubomi obungunaphakade.—Roma 2:6, 7; Hebhere 10:36.
6. Kuthetha ukuthini ukunyamezela kude kube sekupheleni?
6 Enoba siye sanesiqalo esihle kangakanani na, eyona nto ibalulekileyo kukunyamezela. UYesu wathi: “Lowo unyamezele kwada kwasekupheleni uya kusindiswa.” (Mateyu 24:13) Ewe, simele sinyamezele kude kube sekupheleni, enoba eso sisiphelo sobomi bethu okanye ukuphela kwale nkqubo ingendawo yezinto. Enoba kwenzeka ntoni na, simele silondoloze ingqibelelo yethu kuThixo. Noko ke, ngaphandle kokongezelela uzinikelo lobuthixo kunyamezelo lwethu, asinakumkholisa uYehova, yaye asiyi kubufumana ubomi obungunaphakade. Kodwa luyintoni uzinikelo lobuthixo?
Oko Kuthethwa Luzinikelo Lobuthixo
7. Luyintoni uzinikelo lobuthixo, yaye lusibangela ukuba senze ntoni?
7 Uzinikelo lobuthixo luthetha ukuhlonela, ukunqula nokunikela inkonzo kuYehova uThixo ngokunyaniseka kulongamo lwakhe lwendalo iphela. Ukuze sibonakalise uzinikelo lobuthixo kuYehova, sifanele sibe nolwazi oluchanileyo ngaye nangeendlela zakhe. Sifanele sifune ukumazi uThixo ngokusondeleyo nangokobuqu. Oku kuya kusinceda sakhe ulwalamano olusenyongweni naye, olubonakaliswa ngezenzo zethu nendlela esiphila ngayo. Sifanele sinqwenele ukumxelisa uYehova kangangoko kunokwenzeka—sixelise iindlela zakhe size sibonakalise iimpawu nobuntu bakhe. (Efese 5:1) Eneneni, uzinikelo lobuthixo lusenza sifune ukukholisa uThixo kuzo zonke izinto esizenzayo.—1 Korinte 10:31.
8. Lunxulumene njani uzinikelo lobuthixo nokuzinikela kuye kuphela?
8 Ukuze sibonakalise uzinikelo lobuthixo lokwenyaniso, simele sinqule uYehova kuphela, singavumeli nantoni na ukuba ithabathe indawo yakhe ezintliziyweni zethu. NjengoMdali wethu, unelungelo lokufuna sinqule yena kuphela. (Duteronomi 4:24; Isaya 42:8) Sekunjalo, uYehova akasinyanzeli ukuba simnqule. Ufuna sizinikele kuye ngokuzithandela. Luthando lwethu ngoThixo, olusekelwe kulwazi oluchanileyo ngaye, olusenza ukuba sicoce ubomi bethu size sizahlulele kuye singagogotye nto size siphile ngokuvisisana nalo.
Yakha Ulwalamano NoThixo
9, 10. Sinokulwakha size silulondoloze njani ulwalamano olusenyongweni noThixo?
9 Emva kokufuzisela uzahlulelo lwethu kuThixo ngokubhaptizwa, kusafuneka sakhe ulwalamano olusenyongweni naye. Ngoko ke umnqweno wethu wokwenjenjalo nokukhonza uYehova ngokuthembeka usenza siqhubeke sifundisisa iLizwi lakhe size sicamngce ngalo. Njengoko sivumela umoya kaThixo uphembelele iingqondo neentliziyo zethu, uthando lwethu ngoYehova luyakhula. Ulwalamano lwethu naye luqhubeka luyeyona nto ibalulekileyo ebomini bethu. UYehova simgqala njengoyena Mhlobo wokwenene yaye sifuna ukumkholisa ngalo lonke ixesha. (1 Yohane 5:3) Uvuyo lwethu ngokuba nolwalamano noThixo luyakhula, yaye sinombulelo kuba esiyalela ngothando yaye esilungisa xa kuyimfuneko.—Duteronomi 8:5.
10 Ulwalamano lwethu oluxabisekileyo noYehova lunokuba buthathaka, ukuba asiqhubeki sithabatha amanyathelo okulomeleza. Ukuba oko kunokwenzeka, akuyi kuba lityala likaThixo, kuba ‘akakude kuye ngamnye wethu.’ (IZenzo 17:27) Hayi indlela esivuya ngayo kuba uYehova eye wakwenza kwalula ukuthetha naye! (1 Yohane 5:14, 15) Kakade ke, simele senze umgudu wokulondoloza ulwalamano lwethu noYehova. Noko ke, uyasinceda ukuba sisondele kuye ngokusenzela amalungiselelo ayimfuneko ukuze sakhe size silondoloze uzinikelo lwethu lobuthixo. (Yakobi 4:8) Sinokuwasebenzisa njani ngokupheleleyo onke la malungiselelo othando?
Hlala Womelele Ngokomoya
11. Ziziphi iindlela esinokubonakalisa ngazo uzinikelo lwethu lobuthixo?
11 Uthando lwethu olunzulu ngoThixo luya kusenza ukuba sibonakalise ubunzulu bozinikelo lwethu lobuthixo, ngokuvisisana nesiluleko sikaPawulos esithi: “Yenza unako-nako ukuba uzinikele ukholekile kuThixo, ungumsebénzi ongenazintloni nganto, uliphatha ngokufanelekileyo ilizwi lenyaniso.” (2 Timoti 2:15) Ukwenza oko kufuna ukuba silondoloze ucwangciso oluhle lokufundisisa iBhayibhile rhoqo, ukuya kwiintlanganiso nokuya entsimini. Kwakhona sinokuhlala sisondele kuYehova ‘ngokuthandaza ngokungapheziyo.’ (1 Tesalonika 5:17) Ezi ziindlela ezifanelekileyo esinokubonisa ngazo uzinikelo lwethu lobuthixo. Ukutyeshela naziphi na kwezi kunokusenza sigule ngokomoya size sibe ngamaxhoba amaqhinga kaSathana.—1 Petros 5:8.
12. Sinokumelana njani nezilingo?
12 Ukuhlala somelele yaye sixakekile ngokomoya kusinceda sijamelane nezilingo ezininzi ezinokusehlela. Izilingo zisenokuba luvavanyo oluqatha ngokwenene. Kusenokuba nzima ukunyamezela ukungakhathali kwabantu, inkcaso nentshutshiso xa oko kuvela kumalungu asondeleyo entsapho, izalamane okanye abamelwane. Emsebenzini okanye esikolweni kusenokuvela ingcinezelo ngendlela echuliweyo ukuze silalanise imigaqo yethu yobuKristu. Ukudimazeka, ukugula, nokudandatheka kunokusenza sibe buthathaka emzimbeni kuze kwenze kube nzima ngakumbi ukumelana neemvavanyo zokholo. Kodwa sinokumelana nazo zonke izilingo ukuba siyazingisa ‘ngokuphathelele ihambo engcwele nezenzo zozinikelo lobuthixo, sihlale sibulindile yaye sibukhumbula ubukho bemini kaYehova.’ (2 Petros 3:11, 12) Yaye sinokulondoloza uvuyo lwethu ekwenzeni oko, sinentembelo yokuba uThixo uya kusisikelela.—IMizekeliso 10:22.
13. Yintoni esimele siyenze ukuze sihlale sibonakalisa uzinikelo lobuthixo?
13 Nangona uSathana ehlasela abo bazinikele kuThixo, akukho mfuneko yokuba soyike. Ngoba? Kuba “uYehova uyakwazi ukubahlangula esilingweni abantu abanozinikelo lobuthixo.” (2 Petros 2:9) Ukuze sinyamezele izilingo size sihlangulwe, simele “sizilumle kuko ukungabi nabuthixo nakwiminqweno yehlabathi size siphile ngengqondo ephilileyo nangobulungisa nangozinikelo lobuthixo phakathi kwale nkqubo yezinto yangoku.” (Tito 2:12) NjengamaKristu, simele sihlale siphaphile ukuze nabuphi na ubuthathaka obuquka iminqweno nezenzo zokwenyama bungasiphazamisi buze buphelise uzinikelo lwethu lobuthixo. Ngoku makhe siqwalasele ezinye izinto ezinokuba yingozi.
Zilumkele Izinto Ezinokuba Yingozi Kuzinikelo Lwakho Lobuthixo
14. Yintoni esifanele siyikhumbule ukuba sibanjiswa ngumgibe wezinto eziphathekayo?
14 Izinto eziphathekayo zingumgibe kwabaninzi. Sisenokuzikhohlisa, ‘sicinga ukuba uzinikelo lobuthixo yinto yokufumana inzuzo [yezinto eziphathekayo].’ Ngaloo ndlela, sisenokude sixhaphaze amanye amakholwa kuba esithembile. (1 Timoti 6:5) Siphazama, sisenokude sicinge ukuba kuyinto efanelekileyo ukunyanzela umKristu ome kakuhle ukuba asiboleke imali esinokungakwazi ukuyihlawula. (INdumiso 37:21) Kodwa luzinikelo lobuthixo, ingekuko ukufumana izinto eziphathekayo ‘olusinika ithemba kobu bomi nakobo buzayo.’ (1 Timoti 4:8) Ekubeni ‘singangenanga nanto ehlabathini, yaye singenakuphuma nanto,’ masizimisele ukuphila ‘ngozinikelo lobuthixo kunye nokwanela,’ size “sinesixhaso nesambatho, saneliswe zezo zinto.”—1 Timoti 6:6-11.
15. Sinokwenza ntoni ukuba ukuthanda ulonwabo kuminxanisa uzinikelo lwethu lobuthixo?
15 Ukuthanda ulonwabo kunokuluminxanisa uzinikelo lwethu lobuthixo. Ngaba kusenokwenzeka ukuba ngoku sifanele senze uhlengahlengiso kulo mba? Liyinyaniso elokuba, kukho iinzuzo ekuqeqesheni umzimba nasekuzihlaziyeni. Ukanti, ezo nzuzo zincinane xa zithelekiswa nobomi obungunaphakade. (1 Yohane 2:25) Namhlanje, abaninzi ‘bangabathandi beziyolo kunokuba bathande uThixo, benembonakalo yozinikelo lobuthixo kodwa bengaphili ngokuvisisana nalo,’ yaye sifanele sikhwebuke kubantu abanjalo. (2 Timoti 3:4, 5) Abo bagxininisa kuzinikelo lobuthixo “baziqwebela isiseko esihle nesikhuselekileyo sekamva, esikhokelela kubomi benene.”—1 Timoti 6:19.
16. Yiyiphi iminqweno yesono ethintela abanye ukuba bangaphili ngemigaqo kaThixo yobulungisa, yaye sinokuyoyisa njani le minqweno?
16 Ukusebenzisa kakubi utywala neziyobisi, ukuziphatha okubi neminqweno yesono kunokuphelisa uzinikelo lwethu lobuthixo. Ukuzivumela soyiswe zezi zinto kunokusenza singaphili ngokwemilinganiselo kaThixo yobulungisa. (1 Korinte 6:9, 10; 2 Korinte 7:1) KwanoPawulos kwafuneka aqhubeke esilwa nenyama enesono. (Roma 7:21-25) Sifanele sithabathe amanyathelo aqatha ukuze siphelise iminqweno emibi. Ngokuqinisekileyo, simele sizimisele ukuhlala sicocekile ngokuziphatha. UPawulos uyasixelela: “Bhubhisani . . . amalungu enu omzimba asemhlabeni, uhenyuzo, ukungahlambuluki, inkanuko yesini, umnqweno owenzakalisayo, nokubawa, okulunqulo-zithixo.” (Kolose 3:5) Ukuze sizishenxise size siziphelise izinto ezisisono, sifanele sizimisele ukubhubhisa amalungu ethu omzimba ngokuphathelele izinto ezinjalo. Ukuluthandazela ngokunyaniseka uncedo lukaThixo kuya kusenza sizilumle kwiminqweno emibi size siphile ngobulungisa nozinikelo lobuthixo kule nkqubo ingendawo yezinto.
17. Sifanele silujonge njani uqeqesho?
17 Ukudimazeka kunokusenza singakwazi ukunyamezela kuze oko kube yingozi kuzinikelo lwethu lobuthixo. Abakhonzi bakaYehova abaninzi bakhe badimazeka. (Numeri 11:11-15; Ezra 4:4; Yona 4:3) Ukudimazeka kunokuba yingozi ingakumbi ukuba kuhambisana nengqumbo kuba sicinga ukuba soniwe okanye siye sohlwaywa ngokuqatha okanye salulekwa. Noko ke, ukukhalinyelwa nokuqeqeshwa kubonisa ukuba uThixo unomdla kuthi yaye uyasithanda. (Hebhere 12:5-7, 10, 11) Uqeqesho lufanele lugqalwe kungekhona njengesohlwayo kodwa njengendlela yokusifundisa indlela yobulungisa. Ukuba sithobekile, siya kusixabisa size sisamkele isiluleko, siqonda ukuba “izohlwayo zengqeqesho ziyindlela yobomi.” (IMizekeliso 6:23) Oku kunokusinceda senze inkqubela entle ngokomoya ekuphileni ngozinikelo lobuthixo.
18. Yintoni esimele siyenze xa sonene?
18 Ukungaqondani nokukhubekisana kusenokuba lucelomngeni kuzinikelo lwethu lobuthixo. Ezi zinto zisenokubangela unxunguphalo okanye zibangele abanye benze izinto ezingabonisi ubulumko njengokuzinxwema kubazalwana nakoodade bokomoya. (IMizekeliso 18:1) Kodwa kubalulekile ukukhumbula ukuba, ukuba nenzondo okanye ukuba nezixhiba nabanye kunokulonakalisa ulwalamano lwethu noYehova. (Levitikus 19:18) Enyanisweni, “lowo ungamthandiyo umzalwana wakhe, ambonileyo, akanako ukumthanda uThixo, angambonanga.” (1 Yohane 4:20) KwiNtshumayelo yakhe yaseNtabeni, uYesu wagxininisa imfuneko yokuthabatha amanyathelo akhawulezileyo ukucombulula iingxaki zobuqu. Wabaxelela oku abo babemphulaphule: “Ukuba, ngoko, uzisa isipho sakho esibingelelweni, uthi ulapho ukhumbule ukuba umzalwana wakho unento ngakuwe, sishiye isipho sakho apho phambi kwesibingelelo, uze uhambe uye kuxolelana nomzalwana wakho kuqala, wandule ke, wakubuya, unikele isipho sakho.” (Mateyu 5:23, 24) Ukucel’ uxolo kusenokulipholisa inxeba elibangelwe ngamazwi okanye sisenzo solunya. Ukucel’ uxolo nokuvuma impazamo kusenokuzingciba iintanda kulwalamano lwenu. Kwakhona uYesu wanikela esinye isiluleko sokuzinzisa iingxaki. (Mateyu 18:15-17) Hayi indlela esivuya ngayo xa imigudu yokucombulula iingxaki iphumelela!—Roma 12:18; Efese 4:26, 27.
Landela Umzekelo KaYesu
19. Kutheni kubaluleke kangaka ukuxelisa umzekelo kaYesu?
19 Ngokuqinisekileyo siya kwehlelwa zizilingo, kodwa oko akuthethi ukuba zifanele zisiphazamise kugqatso lwethu lobomi obungunaphakade. Khumbula ukuba uYehova unokusihlangula kwizilingo. Njengoko “sibothule bonke ubunzima” size “silubaleke ngonyamezelo ugqatso olubekwe phambi kwethu,” ‘masikhangele ngenyameko kuMmeli Oyintloko noMgqibelelisi wokholo lwethu, uYesu.’ (Hebhere 12:1-3) Xa siqwalasela umzekelo kaYesu size sizame ukumxelisa ngamazwi nangezenzo, oko kuya kusinceda ukuba sihlakulele uzinikelo lobuthixo size silubonakalise ngomlinganiselo omkhulu.
20. Nguwuphi umvuzo ofumaneka ngokunyamezela nangokuphila ngozinikelo lobuthixo?
20 Ukuze siqiniseke ukuba siyasindiswa, sifanele sibe nonyamezelo nozinikelo lobuthixo. Ngokubonakalisa ezi mpawu zixabisekileyo, sinokuqhubeka ngokuthembeka kwinkonzo yethu engcwele kuThixo. Naxa sijamelene novavanyo, siya kuba novuyo njengoko sizuza uthando neentsikelelo zikaYehova ngenxa yokuba siye sanyamezela saze saphila ngozinikelo lobuthixo. (Yakobi 5:11) Ngaphezu koko, uYesu uyasiqinisekisa esithi: “Ngokunyamezela kwenu niya kuyizuza imiphefumlo yenu.”—Luka 21:19.
Ubunokuphendula Njani?
• Kutheni kubalulekile ukunyamezela?
• Luyintoni uzinikelo lobuthixo, yaye lubonakaliswa njani?
• Sinokulwakha size silulondoloze njani ulwalamano olusenyongweni noThixo?
• Ziziphi izinto ezinokuba yingozi kuzinikelo lwethu lobuthixo, yaye sinokuziphepha njani?
[Imifanekiso ekwiphepha 12, 13]
Uzinikelo lobuthixo lubonakaliswa ngeendlela ezininzi
[Imifanekiso ekwiphepha 14]
Zilumkele izinto ezinokuba yingozi kuzinikelo lwakho lobuthixo