Umgudu Wokunyaniseka—UYehova Uwusikelela Xa Kutheni?

“NDIYEKE ndihambe, kuba sesiphumile isifingo.”

“Andisokuze ndikuyeke uhambe de undisikelele kuqala.”

“Ungubani igama lakho?”

“NdinguYakobi.”

“Igama lakho akusayi kuba sathiwa nguYakobi kodwa liya kuba nguSirayeli, kuba usukuzene noThixo kwakunye nabantu waza ekugqibeleni woyisa.”—Genesis 32:26-28.

Loo ncoko iphakathi kwabantu ababini ingumphumo wokubonakalisa ubuchule benjuze yemidlalo bukaYakobi owayeneminyaka engama-97 ubudala. Nangona iBhayibhile ingamchazi njengomntu owayeyinjuze yemidlalo, wajijisana, okanye wasukuzana ubusuku bonke nengelosi. Kwakwenzeke ntoni? UYakobi wayexhalabe ngokunzulu ngenxa yesithembiso uYehova awasenzayo kukhokho wakhe—ilifa lakhe.

Kwiminyaka emininzi ngaphambilana umkhuluwa kaYakobi uEsawu wayemthengisele ubuzibulo bakhe ngesitya sesityu. Ngoku uYakobi uva ukuba uEsawu uyeza namadoda angama-400. Enexhala, uYakobi ufuna isiqinisekiso sikaYehova sokuba izinto ziya kuyihambela kakuhle intsapho yakhe kwilizwe elingaphaya koMlambo iYordan. Ngokuvisisana nemithandazo yakhe, uYakobi wenza okuthile. Uthumela izipho ezikhulu kuEsawu njengoko esiya esondela. Kwakhona uthabatha inyathelo lokuzikhusela, uyahlula kubini impahla yakhe aze athumele abafazi nabantwana bakhe ngaphaya kwezibuko leYabhoki. Emva kwamatile-tile angako eneenyembezi, uphinda azibhokoxe esukuzana nengelosi ubusuku bonke ukuze “azicelele ubabalo.”—Hoseya 12:4; Genesis 32:1-32.

Cinga ngomzekelo wangaphambilana, uRakeli, umfazi wesibini kaYakobi nowayemthanda gqitha. URakeli wayesazi ngesithembiso sikaYehova sokusikelela uYakobi. Udadewabo uLeya, umfazi wokuqala kaYakobi, wasikelelwa ngoonyana abane ngoxa uRakeli wayeludlolo. (Genesis 29:31-35) Kunokuba azisizele, uqhubeka embongoza uYehova ngomthandazo yaye esenza oko kuvisisana nemithandazo yakhe. Njengokuba wenzayo ukhokhokazi wakhe uSara kuHagare, uRakeli uzisa isicakazana sakhe uBhiliha aze asinike uYakobi njengomfazi wesibini ukuze, njengokuba uRakeli esitsho, “ndize nam lo, ndifumane abantwana ngaye.”a UBhiliha uzalela uYakobi oonyana ababini, uDan noNafetali. Ekuzalweni kukaNafetali uRakeli uvakalisa indlela awayexheleke ngayo emphefumlweni esithi: “Ndizamene nodade wethu imizamo eqobayo. Kwaye ndiphumelele!” Wandula ke uRakeli asikelelwe ngoonyana bakhe ababini, uYosefu noBhenjamin.—Genesis 30:1-8; 35:24.

Kwakutheni ukuze uYehova asikelele imigudu engokwenyama neyeemvakalelo kaYakobi nekaRakeli? Ukuthanda kukaYehova kwakuyeyona nto iphambili kubo yaye babelixabisa ilifa labo. Bayithandazela ngokunyanisekileyo intsikelelo yakhe kubomi babo baze bathabatha amanyathelo afanelekileyo avisisana nokuthanda kukaThixo nemithandazo yabo.

NjengoYakobi noRakeli, abaninzi namhlanje bayavuma ukuba ukuze ubani afumane iintsikelelo kuYehova ufanele enze umgudu onyanisekileyo. Ngokufuthi imigudu yabo ihambisana neenyembezi, ukudimazeka nonxunguphalo. Omnye umama ongumKristu, uElizabeth, ukhumbula umgudu awawenzayo ukuze aphinde akwazi ukuya kuzo zonke iintlanganiso zamaKristu ngokuthe rhoqo emva kokungayi ixesha elide. Ukuba noonyana abancinane abahlanu, umyeni ongakholwayo, nokuhamba iikhilomitha ezingama-30 ukuya kweyona Holo yoBukumkani ikufuphi, kwakungeyonto ilula. “Ukuzama ukuya rhoqo kwiintlanganiso kwakufuna ukuzimisela, nto leyo endandiyazi ukuba iza kundinceda mna noonyana bam. Kwabanceda nabo babona ukuba le yindlela ubani afanele ayilandele.” UYehova wawusikelela umgudu wakhe. Koonyana bakhe abathathu abakhutheleyo kwibandla lamaKristu, ababini bakwinkonzo yexesha elizeleyo. Evuyiswa yinkqubela yabo yokomoya, uthi: “Bakhule ngaphezu kwam ngokomoya.” Hayi indlela awasikelelwa ngayo ngenxa yomgudu wakhe onyanisekileyo!

Umgudu Onyanisekileyo UYehova Awusikelelayo

Ukwenza umgudu onyanisekileyo nokuzibhokoxa ngokuqinisekileyo kunomvuzo. Okukhona sisenza umgudu kumsebenzi okanye kwisabelo esithile, kokukhona sisaneliseka. Leyo yindlela uYehova awasidala ngayo. UKumkani uSolomon wabhala: “Wonk’ umntu ufanele adle, asele aze ngokwenene abone okulungileyo kuko konke ukusebenza kwakhe nzima. Sisipho sikaThixo eso.” (INtshumayeli 3:13; 5:18, 19) Noko ke, ukuze sifumane intsikelelo kaThixo, sifanele siqiniseke ukuba senza imigudu kwizinto ezifanelekileyo. Ngokomzekelo, ngaba kusengqiqweni ukulindela intsikelelo kaYehova xa ubani ebeka izinto zokomoya kwindawo yesibini ebomini bakhe? Ngaba umKristu ozahluleleyo unokulindela ukuba uYehova akholiswe nguye ukuba wamkela umsebenzi okanye isikhundla esithile esimenza aphoswe rhoqo lunxulumano nemfundiso eyomeleza ukholo kwiintlanganiso zamaKristu?—Hebhere 10:23-25.

Ukuzibhokoxa kumsebenzi wokuziphilisa okanye ukuze ubani ame kakuhle ngokwezinto eziphathekayo akusayi kuthetha ukuba ngokuzenzekelayo ubani uya ‘kubona okulungileyo’ ukuba oko ukwenza etyeshela izinto zokomoya. UYesu wayichaza imiphumo yokwenza imigudu kwizinto ezingafanelekanga kumzekeliso wakhe womhlwayeli. Ngokuphathelele imbewu ‘ehlwayelwe phakathi kwameva,’ uYesu wachaza ukuba lo “ngulowo ulivayo ilizwi, kodwa ixhala lale nkqubo yezinto namandla akhohlisayo obutyebi ayaliminxa ilizwi, aze angabi nasiqhamo.” (Mateyu 13:22) Kwakhona uPawulos walumkisa ngomgibe ofanayo waza wongezelela esithi abo bazabalazela ukuba nezinto eziphathekayo “beyela ekuhendweni nasemgibeni, nakwiminqweno emininzi engekho ngqiqweni neyenzakalisayo.” Yintoni enokusinceda ukuze siphephe ingozi enjalo ngokomoya? UPawulos uhlabela mgama esithi: ‘Saba kwezi zinto uze ungathembeli kubutyebi obungaqinisekanga, kodwa uthembele kuThixo, osinika zonke izinto ngokobutyebi ukuze sizinandiphe.’—1 Timoti 6:9, 11, 17.

Kungakhathaliseki ukuba sibadala kangakanani okanye sinexesha elide kangakanani na sikhonza uYehova, sonke sinokuzuza ngokuxelisa umgudu onyanisekileyo owenziwa nguYakobi noRakeli. Kuba babefuna ukukholisa uThixo, abazange balilibale ilifa labo, enoba imeko zabo zazisoyikisa okanye zinxunguphalisa kangakanani na. Namhlanje, iingcinezelo neengxaki esijamelana nazo zisenokusoyikisa, zisinxunguphalise okanye zisidandathekise. Kusenokuba lula ukunikezela size sibe ngamaxhoba eentlaselo zikaSathana. Unokusebenzisa nantoni na esemandleni akhe, enoba lulonwabo okanye ukuzihlaziya, imidlalo okanye imisetyenzana yokuzonwabisa, umsebenzi wokuziphilisa okanye ukufuna ukuma kakuhle ngokwezinto eziphathekayo, ukuze afeze iinjongo zakhe. Abantu badla ngokuthenjiswa izinto ezintle kodwa oko akufane kufezeke. Abo bakhohlisiweyo okanye abaye balukuhlelwa ukuba baphile ngaloo ndlela ngokufuthi bafumanisa ukuba ekugqibeleni ubukhulu becala bayaphoxeka. NjengoYakobi noRakeli bamandulo, masihlakulele umoya wokusukuzana ngokunyanisekileyo size siwoyise amaqhinga kaSathana.

UMtyholi angathanda ukusibona sinikezela, sivakalelwa kukuba ‘oku kungaphezu kwamandla am. Akukho nto inokwenziwa. Akuncedi nto.’ Ngoko ke, hayi indlela ekubaluleke ngayo ukuba sonke sikuphephe ukuba nesimo sengqondo esiyingozi, sokucinga ukuba ‘akukho mntu undithandayo’ yaye ‘uYehova undilibele.’ Ukucinga ngolo hlobo kukuzenzakalisa. Ngaba oku kusenokubonisa ukuba sinikezele yaye siluyekile usukuzwano ukuze sifumane intsikelelo? Khumbula ukuba, uYehova usikelela umgudu wethu onyanisekileyo.

Qhubeka Ukusukuzwano Lokufumana Iintsikelelo ZikaYehova

Intlalo-ntle yethu yokomoya ixhomekeke ubukhulu becala ekuqondeni iinyaniso ezimbini ezisisiseko ngobomi bethu njengomkhonzi kaYehova. (1) Akukho mntu unamandla okuzilawula zonke iingxaki, ukugula, okanye iimeko ezinzima ebomini, yaye (2) uYehova uyaziphulaphula izibongozo zabo bacela ngokunyaniseka uncedo kuye kunye neentsikelelo.—Eksodus 3:7-10; Yakobi 4:8, 10; 1 Petros 5:8, 9.

Enoba zimbi kangakanani iimeko zakho okanye uziva umncinane kangakanani na, unganikezeli ‘kwisono esisithandela ngokulula’—ukungabi nalukholo. (Hebhere 12:1) Qhubeka ukusukuzwano ude ufumane iintsikelelo. Yiba nomonde, ukhumbula uYakobi owayeluphele, owasukuzana ubusuku bonke efuna intsikelelo. Njengomlimi ohlwayela entwasahlobo aze alindele isivuno, ngomonde lindela iintsikelelo zikaYehova kwimisebenzi oyenzayo yokomoya, enoba ucinga ukuba mincinane kangakanani na. (Yakobi 5:7, 8) Yaye ungaze uwalibale amazwi omdumisi athi: “Abo bahlwayela imbewu ngeenyembezi baya kuvuna ngentswahla yovuyo.” (INdumiso 126:5; Galati 6:9) Yima uqinile, uze uhlale uphakathi kwabo bakusukuzwano.

[Umbhalo osemazantsi]