“Unyanisile, Ubomi Bumnandi Ngokwenene!”

NGABA ungathanda ukufunda ngentsingiselo yokwenene yobomi? UMagdalena oneminyaka eli-18 ubudala, omnye wamaNgqina kaYehova ohlala eSzczecin, ePoland, wanceda umntwana afunda naye kwisikolo samabanga aphakamileyo uKatarzyna ukuba kanye enjenjalo. UKatarzyna wayengakholelwa kwaphela ukuba uThixo ukho, kodwa xa uMagdalena wathetha naye ngeBhayibhile, wabonisa umdla onyanisekileyo.

Nangona uKatarzyna wayekuthanda oko wayekuxelelwe nguMagdalena ngeBhayibhile, wayengakwazi ukukwamkela ngokupheleleyo. Njengoko wayethetha noMagdalena ngabahlobo bokwenene, ngenye imini uKatarzyna wathi: “Wena ukholelwa eBhayibhileni; uyayazi imigaqo ofanele uyilandele nendawo onokubafumana kuyo abahlobo bokwenene. Kodwa kuthekani ngabo, okwangoku, abangayamkeliyo loo migaqo?”

Izinto zaguquka xa uKatarzyna waya eLondon, eNgilani. Xa wayelapho watyelela iofisi yesebe yamaNgqina kaYehova, yaye wachukumiseka gqitha bububele obabonakaliswa kuye. Ukuvulelwa nje ucango nomdla onyanisekileyo owabonakaliswa koko wayekuthetha kwamchukumisa gqitha.

Kunyaka omtsha wokuvulwa kwezikolo ngoSeptemba 2001, uKatarzyna wagqiba kwelokuba amkele isifundo seBhayibhile esithe rhoqo. Uya eyixabisa ngakumbi imigaqo yeBhayibhile yaye sele eqalisile ukuyisebenzisa kubomi bakhe bemihla ngemihla. Kutshanje, echukumisekile uye wathi kuMagdalena: “Ingathi ndiqalisa ubomi obutsha.” Kwakhona uye wamshiyela umyalezo omfutshane kwicellular phone esithi: “Ndibamba ngazibini ngesifundo sethu sanamhlanje! Unyanisile, ubomi bumnandi ngokwenene! Kumnandi ukumazi lowo esifanele simbulele ngabo.”