Ividiyo Elungiselelwe Ukufikelela Iintliziyo Zabaselula

XA ABASELULA abaninzi babona ividiyo ethi Young People Ask—How Can I Make Real Friends?a oko kwabakhuthaza ukuba bahlolisise ihambo yabo ngenyameko. Le vidiyo iqulethe isiluleko sobulumko seZibhalo, amava obuqu amaKristu aselula, nomdlalo ochukumisayo wale mihla osekelwe kwingxelo yeBhayibhile kaDina. (Genesis, isahluko 34) La magqabaza alandelayo angale vidiyo avela eMexico.

UMartha uyabalisa: “Le vidiyo yandichukumisa gqitha. Ibonakala ngathi yayenzelwe mna ngokukhethekileyo. Ndandicinga ukuba kwakwanele ngootitshala nabantwana endandifunda nabo ukwazi ukuba ndandingomnye wamaNgqina kaYehova. Andizange ndikubonise oko ngokushumayela kubo. Ndinombulelo ngayo yonke inkcazelo ayilungiseleleyo uYehova, ngokukodwa xa isichukumisa ngokunzulu njengale vidiyo.”

UJuan Carlos uthi: “Le vidiyo ikwenza ucingisise nzulu. Njengetyendyana lomfana, ndiye ndenza iimpazamo ezithile yaye ziyafana nezabanye abalinganiswa abakulo mdlalo. Kwiminyaka ethile edluleyo, bendiphila ubomi obumbaxa, kodwa ndiye ndaqonda ukuba ubomi obunjalo bunokuba nemiphumo emibi. Emva kokubukela le vidiyo, ndizimisele ukuthembeka kuYehova.”

USulem uyavuma esithi: “Xa ndabukela le vidiyo, ndachukumiseka gqitha. Ngaphambilana, bendingasayifundi iBhayibhile yaye bendingasathandazi kangako kuYehova. Xa ndaphulaphula izinto ezazithethwa ngabantu abaselula abakule vidiyo, oko kwandenza ndaqalisa kwakhona ukufundisisa iBhayibhile nokuthandaza kuYehova.”

Namhlanje abantu abaselula bajamelene nezinto ezininzi ezilucelomngeni, yaye abahlobo ababakhethayo basenokuba nempembelelo enamandla kwindlela abaphila ngayo. (INdumiso 26:4; IMizekeliso 13:20) Ividiyo ethi Young People Ask—How Can I Make Real Friends? inceda abaninzi benze izigqibo ezifanelekileyo kule nkalo.

[Umbhalo osemazantsi]