Kwenzeka Ntoni Kuzo?
INOFU neNo ngamagama aseBhayibhileni ezixeko ezazingamakomkhulu aseYiputa awayedumile iMemphis neThebes. INofu (Memphis) yayimi malunga neekhilomitha ezingama-23 kumzantsi weCairo, ngasentshona yoMlambo umNayile. Noko ke, ekuhambeni kwexesha, iMemphis yayeka ukuba likomkhulu laseYiputa. Ekuqaleni kwenkulungwane ye-15 B.C.E., iYiputa yaba nekomkhulu elitsha, iNo (Thebes), eyayimalunga neekhilomitha ezingama-500 kumzantsi weMemphis. Phakathi kwetempile ezininzi ezingamabhodlo zaseThebes kukho eyaseKarnak, egqalwa njengesona sakhiwo sikhulu sakha sakhiwa esineeveranda. IThebes netempile yayo yaseKarnak zazakhelwe unqulo luka-Amon, uthixo omkhulu wamaYiputa.
Sathini isiprofeto seBhayibhile ngokuphathelele iMemphis neThebes? Sathetha ngokugwetywa kukaFaro waseYiputa noothixo bakhe, ingakumbi uthixo omkhulu, ‘uAmon waseNo.’ (Yeremiya 46:25, 26) Izihlwele zabanquli ababesiya apho babeya ‘kunqunyulwa.’ (Hezekile 30:14, 15) Yaye kwabanjalo kanye. Ekuphela kwento eseleyo kunqulo luka-Amon ngamabhodlo etempile. Idolophu yezi mini yaseLuxor ikwindawo eyayikuyo iThebes yamandulo, yaye zikho nezinye iidolophana ezakhiwe kumabhodlo ayo.
Akukho nto ingako eyasalayo eMemphis, ngaphandle nje kwamangcwaba ayo. Umphengululi weBhayibhile uLouis Golding uthi: “Kangangeenkulungwane ezininzi ama-Arabhu awathimba iYiputa asebenzisa amanxuwa amakhulu aseMemphis njengomhlaba wokwakha ikomkhulu lawo [iCairo] ngaphesheya komlambo. Esebenzisa umhlaba omhle womNayile, ama-Arabhu akha kakuhle kangangokuba kweso sixeko sikhulu samandulo akukho nelitye elinye elivelayo ngaphezu kwaloo mhlaba walapho umnyama.” Eneneni, njengoko iBhayibhile yaprofetayo, iMemphis yaba ‘yinto nje ekhwankqisayo engenammi.’—Yeremiya 46:19.
Le yimizekelo nje emibini kwemininzi ebonisa ukuchana kweziprofeto zeBhayibhile. Ukuphanziswa kweThebes neMemphis kusinika isizathu esiqinileyo sokuba nentembelo kwiziprofeto zeBhayibhile ezingekazaliseki.—INdumiso 37:10, 11, 29; Luka 23:43; ISityhilelo 21:3-5.
[Inkcazelo Ngomfanekiso okwiphepha 32]
Photograph taken by courtesy of the British Museum