Imibuzo Evela Kubafundi
UYehova wayebhekisa kubani kwiGenesis 3:22 xa wathi “njengomnye wethu”?
Kubonakala ukuba uYehova uThixo wayebhekisa kuye nakuNyana wakhe ekuphela kwamzeleyo xa wathi: “Umntu usuke waba njengomnye wethu ukwazi okulungileyo nokubi.” (Genesis 3:22) Makhe siqwalasele isizathu sokuba sitsho.
UYehova wawathetha la mazwi emva kokudlulisela isigwebo kubantu bokuqala ababini. Bambi bathi kwibinzana elithi “njengomnye wethu” kusetyenziswe isininzi ukubonisa ubungangamsha, njengokuba ukumkani esenokuthi “asiyithandi le nto” ngoxa ethetha ngaye kuphela. Noko ke, ngokubhekisele kwiGenesis 1:26 neGenesis 3:22, umphengululi weBhayibhile uDonald E. Gowan uthi: “Ingcamango yokusetyenziswa kwesininzi ukubonisa ubungangamsha . . . okanye ukubonisa iziqu ezininzi kuThixo omnye ayixhaswa yiTestamente Endala. . . . Akukho nanye kwezi nkcazelo esengqiqweni ukuchaza ibinzana elithi ‘ngomnye wethu’ [kwiGenesis] 3:22.”
Ngaba uYehova wayesenokuba ubhekisa kuSathana uMtyholi, owayesele eqalile ukuzenzela izigqibo ‘ngokulungileyo nokubi’ nowayephembelele abantu bokuqala ababini ukuba nabo benjenjalo? Akukho ngqiqweni oko. Apha uYehova wasebenzisa ibinzana elithi “omnye wethu.” USathana wayengasabalwa phakathi kwehlokondiba leengelosi zikaYehova ezithembekileyo, ngoko ke wayengenakubalwa phakathi kwabo babengakwicala likaYehova.
Ngaba uThixo wayebhekisela kwiingelosi ezithembekileyo? Asiqinisekanga. Noko ke, amabinzana afanayo asetyenziswe kwiGenesis 1:26 nakwiGenesis 3:22 asinika ufifi. KwiGenesis 1:26, uYehova wathi: “Masenze umntu ngokomfanekiso wethu, ngokufana nathi.” Wayewabhekisa kubani la mazwi? Ethetha ngesidalwa somoya esaba ngumntu ofezekileyo onguYesu, umpostile uPawulos wathi: “Ungumfanekiso kaThixo ongabonakaliyo, izibulo kwindalo yonke; ngenxa yokuba zadalwa ngaye zonke ezinye izinto emazulwini nasemhlabeni.” (Kolose 1:15, 16) Ewe, kubonakala kusengqiqweni ukuthi kwiGenesis 1:26, uYehova wayethetha noNyana wakhe okuphela kwamzeleyo, ‘umsebénzi onobuchule,’ owayesebenza naye ekudalweni kwamazulu nomhlaba. (IMizekeliso 8:22-31) Amazwi afanayo akwiGenesis 3:22 abonisa ukuba uYehova kwakhona wayethetha nothile osenyongweni, uNyana wakhe okuphela kwamzeleyo.
Kucacile ukuba uNyana kaThixo okuphela kwamzeleyo wayekwazi “okulungileyo nokubi.” Ngokusuka kulwalamano lwakhe lwexesha elide nolusenyongweni noYehova, ngokuqinisekileyo wayeyifunde ngokucokisekileyo indlela uYise acinga ngayo, ngemigaqo nangemilinganiselo yakhe. Eqinisekile ukuba uNyana wakhe uqhelene nayo yaye ubambelele kuyo ngokunyaniseka, kusenokwenzeka ukuba uYehova wamnika inkululeko ethile kwindlela yokusingatha izinto kungeyomfuneko ukuba adlule Kuye sihlandlo ngasinye. Ngoko ke, uNyana ngomlinganiselo othile wayekwazi yaye enegunya lokugqiba ngokulungileyo nokubi. Ngoko, ngokungafaniyo noSathana, noAdam noEva, yena akazange amise imilinganiselo engqubanayo nekaYehova.