Isizathu Esichanileyo Sokukholelwa KuThixo
INCWADI yaseKorea ethi 31 Reasons Why Young People Leave the Church ithi abantu abaninzi bayayeka ukuhamba icawa kuba bengafumani zimpendulo ezanelisayo kwimibuzo yabo. Ngokomzekelo, babuza umbuzo othi, ‘Kutheni abantu abakholelwa kuThixo bebandezeleka?’ nothi ‘Kutheni simele samkele yonke into efundiswa ziicawa ngoxa inkoliso yezo mfundiso idida yaye iphikisana?’
Benganelisekanga ziimpendulo abazinikwa ngabefundisi babo, abantu abaninzi bagqiba kwelokuba akukho mpendulo eBhayibhileni. Xa umfundisi echaza izinto ngendlela yena azibona ngayo, abantu badla ngokungaqondi de bamgatye uThixo neBhayibhile.
Kwenzeka kanye loo nto kuAbel, owayekhuliswe njengomLuthere eMzantsi Afrika. Ukhumbula oku: “Icawa ifundisa ukuba wonke umntu ofayo ‘uthatyathwe’ nguThixo. Kodwa ndandingasiqondi isizathu sokuba uThixo wothando ‘athabathe’ abazali babantwana. Kwimimandla yasemaphandleni eAfrika apho ndandikhulele khona, sasingasixheli isikhukukazi de amantshontsho aso akhule. Ukuba sasifumanisa ukuba inkomo imithi, sasingayixheli de ithole lizalwe lize lilunyulwe. Ndandingasiqondi isizathu sokuba uThixo onothando angabonakalisi ulwazelelelo olufanayo ebantwini.”
UAram, waseKhanada, naye wayenamathandabuzo afanayo. Uthi: “Xa ndandineminyaka eli-13 ubudala, utata wafa. Emngcwabeni, umfundisi owaziwayo wathi uThixo wayefuna utata afe ukuze asondele kuye ezulwini. Wathi ‘uThixo uyabathabatha abantu abalungileyo kuba uyawathanda amalungisa.’ Ndandingasiqondi isizathu sokuba uThixo azingce ngolo hlobo.”
Ekugqibeleni, bobabini uAbel noAram baqhagamshelana namaNgqina kaYehova, bafundisisa iBhayibhile nawo, yaye ekugqibeleni, bafumana imibuzo kwiimpendulo zabo. Bahlakulela uthando ngoThixo baza banokholo olomeleleyo. Ekugqibeleni, bahlulela ubomi babo kuYehova baza baba ngabakhonzi abanyanisekileyo bakhe.
Ulwazi Oluchanileyo Lubalulekile Ukuze Ubani Akholelwe KuThixo
Yintoni esinokuyifunda kula mava? Asibonisa ukuba ukuze ubani akholelwe kuThixo, kubalulekile ukuba nolwazi oluchanileyo lweBhayibhile. Umpostile uPawulos wathi kumaKristu kwisixeko samandulo saseFilipi: “Ndiqhubeka ndithandazela ukuba uthando lwenu luphuphume ngakumbi nangakumbi lulwazi oluchanileyo nokuqonda okupheleleyo.” (Filipi 1:9) Apha uPawulos ubonisa ukuba ukuthanda uThixo nabazalwana bethu kunxulumene ngokusondeleyo nolwazi oluchanileyo ngoThixo nokuqonda oko akuthandayo.
Oku kusengqiqweni, ekubeni into yokuqala efunekayo ukuze uthembe umntu kukumazi loo mntu—okukhona umazi nangakumbi, kokukhona kubhetele. Ngokufanayo, kufuneka ulwazi oluchanileyo ukuze ukholelwe kuThixo. UPawulos wathi: “Ukholo lululindelo oluqinisekisiweyo lwezinto ezithenjiweyo, ubungqina obucacileyo bezinto zokwenene nangona zingabonwa.” (Hebhere 11:1) Ukukholelwa kuThixo ngaphandle kokuba nolwazi oluchanileyo lweBhayibhile kufana nendlu eyakhiwe ngamakhadi. Unokuyivuthela nje kube kanye ize iwe.
Ukufundisisa iBhayibhile kunokukunceda ufumane iimpendulo komnye wemibuzo onjengalowo wawudida uAbel noAram othi, Kutheni abantu besifa? IBhayibhile ithi “njengokuba isono sangena ngamntu mnye ehlabathini nokufa ngaso isono, ngaloo ndlela ukufa kwasasazeka kubo bonke abantu ngenxa yokuba bonke bonayo.” (Roma 5:12) Abantu bayaluphala baze bafe, kungekhona ngenxa yokuba uThixo ebathabatha, kodwa ngenxa yesono sika-Adam. (Genesis 2:16, 17; 3:6, 17-19) Ngokubhekele phaya, iBhayibhile ithetha ngethemba uYehova uThixo alinika abantu. Esebenzisa uNyana wakhe, uYesu Kristu, unikela ithemba lovuko kubantu abanesono.—Yohane 5:28, 29; IZenzo 24:15.
Ukuze siqonde inyaniso ngovuko, iBhayibhile inengxelo yemizekelo eliqela yabantu abavuswa nguYesu. (Luka 7:11-17; 8:40-56; Yohane 11:17-45) Njengoko ufunda la mabali eBhayibhile, phawula indlela abahlobo neentsapho zabo bavusiweyo abavuya nabachwayita ngayo. Phawula kwakhona ukuba bashukunyiselwa ukuba badumise uThixo baze babe nokholo kuYesu.
Ulwazi oluchanileyo ngoThixo neenjongo zakhe lunokubaphembelela ngendlela efanayo abantu namhlanje. Abaninzi bakhe badideka baza bakhathazwa yimibuzo ebalulekileyo ababengafumani zimpendulo kuyo. Kodwa njengoko babefundisisa iBhayibhile, bafumana iimpendulo, yaye oko kwabuguqula ngokupheleleyo ubomi babo.
Uthando NgoThixo—Esona Sizathu Sibalulekileyo Sokumkhonza
Nangona kubalulekile ukuba ubani abe nolwazi oluchanileyo ukuze akholelwe kuThixo, kufuneka okungakumbi ukuze ashukunyiselwe ekumthobeleni nasekumkhonzeni. Xa wabuzwa ngowona myalelo mkhulu ovela kuThixo, uYesu wathi: “Uze umthande uYehova uThixo wakho ngentliziyo yakho iphela nangomphefumlo wakho uphela nangengqondo yakho iphela nangamandla akho ephela.” (Marko 12:30) Ukuba umntu umthanda uThixo ngendlela uYesu achaza ngayo, uya kufuna ukumthobela nokumkhonza. Ngaba oko kunjalo ngawe?
URachel, oye waba ngumvangeli wasemazweni eKorea kangangamashumi aliqela eminyaka, uthi nasi isizathu sokuba abe nokholo: “Ndicinga ngesisa sikaYehova kwizidalwa zakhe, ukuxolela kwakhe xa eqhubana nabantu bakhe, nomnqweno wakhe wokuba sizuze ngokusixelela oko akulindele kuthi. Zonke izinto ezinjalo zenza uthando lwam ngoThixo lukhule. Yaye olo thando lundenza ndifune ukumkhonza.”
UMartha, umhlolokazi waseJamani, uye wakhonza uYehova kangangeminyaka engama-48. Uthi: “Kutheni ndikhonza uYehova? Kungenxa yokuba ndiyamthanda. Rhoqo ngokuhlwa ndithetha noYehova ngomthandazo ndize ndimxelele indlela endinombulelo ngayo ngeentsikelelo zakhe, ingakumbi ngedini lentlawulelo.”
Ewe, uthando esinalo ngoThixo lusenza sifune ukumkhonza ngokusuka entliziyweni. Kodwa ubani unokuba nalo njani olo thando? Eyona nto enokusishukumisela ekubeni sithande ngakumbi uThixo kukuba noxabiso olunzulu ngothando aye wasibonisa lona. Phawula ngesi sikhumbuzo sibangel’ imincili esivela eBhayibhileni: “Lowo ungenaluthando akamazi uThixo, kuba uThixo uluthando. Kwabonakaliswa ngale nto ukusithanda kukaThixo, ngokuthi uThixo athumele uNyana wakhe okuphela kwamzeleyo ehlabathini ukuze sizuze ubomi ngaye. Ngoko ayisithi esamthandayo uThixo, koko nguye owasithandayo waza wathumela uNyana wakhe njengombingelelo wokucamagushela izono zethu.”—1 Yohane 4:8-10.
Ngaba uyayibona indlela olubalasele ngayo olo thando? Khawube nomfanekiso ngqondweni urhaxwa ngumsinga onamandla yaye mntu uthile ubeka ubomi bakhe esichengeni ukuze akuhlangule. Ngaba ubuya kumlibala, okanye ubungayi kuba nombulelo ongazenzisiyo kuye? Ngaba ubungayi kufuna ukumenzela yonke into? Lukhulu ngakumbi uthando uThixo asibonise lona ngokunikela ngoNyana wakhe, uYesu Kristu, njengedini lentlawulelo. (Yohane 3:16; Roma 8:38, 39) Xa intliziyo yakho iye yachukunyiswa luthando lukaThixo, uya kushukunyiselwa ukuba umthande uze umkhonze ngentliziyo iphela.
Iintsikelo Ezifumaneka Ngoku Nakwikamva
Nangona senza ukuthanda kukaThixo kuba simthanda, kuyasivuyisa ukwazi ukuba uThixo uya kubavuza abo bamthandayo. Umpostile uPawulos uthi: “Ngaphandle kokholo akunakwenzeka ukumkholisa kakuhle, kuba lowo uzayo kuThixo umele akholwe ukuba ukho nokuba ungumvuzi wabo bamfuna ngenyameko.”—Hebhere 11:6.
UThixo ubasikelela ngokwenene abo bamthandayo nabamthobelayo. Abantu abaninzi baba sempilweni entle kuba nje belandela imigaqo yeBhayibhile. (IMizekeliso 23:20, 21; 2 Korinte 7:1) Abo balandela imigaqo yeBhayibhile yokuba banyaniseke baze bakhuthale, badla ngokuthenjwa ngabaqeshi babo baze ngaloo ndlela banqabiseke emsebenzini. (Kolose 3:23) Ngokuthembela kuYehova, abakhonzi bakaThixo baba noxolo lwengqondo naphantsi kweemeko ezilingayo. (IMizekeliso 28:25; Filipi 4:6, 7) Ngaphezu koko, ngentembelo bakhangele phambili kwiintsikelelo zobomi obungunaphakade kwiParadesi ezayo yasemhlabeni.—INdumiso 37:11, 29.
Abo baye bafumana iintsikelelo kuYehova baziva njani ngaye? UJacqueline, umKristu waseKhanada, uthi xa ethetha ngoxabiso analo ngoThixo: “Uhlala esipha izipho ezihle, yaye unikela ithemba eliqinisekileyo lobomi obungunaphakade.” UAbel, okhankanywe ngaphambili, uthi xa ethetha ngeemvakalelo zakhe: “Ndandiqala ukuva ngethemba lokuphila ngonaphakade kumhlaba oyiparadesi, yaye ndikhangele phambili kuwo. Noko ke, nokuba iParadesi ibingekho, bekuya kundivuyisa ukubonakalisa uthando endinalo ngoThixo ngokumkhonza.”
Nawe Unokuba Nokholo Lokwenyaniso
IBhayibhile ithi: “UYehova wemikhosi ugweba ngobulungisa; ugocagoca izintso nentliziyo.” (Yeremiya 11:20) Ewe, uYehova uhlolisisa oko sikuko ezintliziyweni. Ngamnye umele ahlolisise isizathu sokuba ekholelwa kuThixo. Kusenokwenzeka ukuba iinkolelo neengcamango ezingachananga ngoThixo ziye zasikhokelela kwizenzo ezibi kwixa elidluleyo. Kodwa ukuba nolwazi oluchanileyo ngeBhayibhile kunokusikhokelela kulwalamano oluchanileyo noMdali, uYehova uThixo.—1 Timoti 2:3, 4.
Ngelungiselelo lawo lesifundo seBhayibhile sasekhaya sesisa, amaNgqina kaYehova anceda abantu bafumane ulwazi oluchanileyo ngoThixo. (Mateyu 28:20) Abantu abaninzi abaye bamkela uncedo olunjalo baye bamthanda uThixo baza bahlakulela ukuba nokholo lokwenene kuye. Ngokufundisisa iBhayibhile, baye bafumana “ubulumko bobuqili namandla okucinga,” nto leyo eye yabanceda ‘bahamba ngonqabiseko’ kule mihla eyingozi. (IMizekeliso 3:21-23) Ngaphezu koko, ngoku banethemba ‘eliqinisekileyo neliqinileyo’ ngekamva. (Hebhere 6:19) Nawe unokuba nokholo lokwenyaniso uze unandiphe ezi ntsikelelo.
[Ibhokisi ekwiphepha 6]
Imibuzo Edidayo Eyayifuna Iimpendulo
“Ngoxa ndandisaqeqeshelwa esibhedlele xa ndandifundela ubugqirha, ndandibona abantu abalungileyo besezintlungwini ngenxa yezifo neentlekele. Ukuba ukho uThixo, kutheni zisenzeka ezi zinto nje? Ngaba ubani uya nje ecaweni ukuze afumane uxolo lwengqondo?”—Owayesakuba ngumRhabe eKorea.
“Ndandisoloko ndizibuza enoba utata, owayelinxila wayesesihogweni okanye ezulwini. Ndandiboyika abantu abafileyo nesihogo somlilo. Ndandingayiqondi into yokuba uThixo oluthando athumele umntu ukuba abandezeleke ngonaphakade kwisihogo.”—Owayesakuba ngumKatolika eBrazil.
“Liyintoni ikamva lehlabathi nabantu? Kunokwenzeka njani ukuba abantu bakwazi ukuphila ngonaphakade? Abantu banokulufumana njani uxolo lokwenyaniso?”—Owayesakuba ngumKatolika eJamani.
“Imfundiso yokuzalwa ngokutsha yayingekho ngqiqweni kum. Izilwanyana azikwazi ukunqula, ngoko ke ukuba ngenxa yesizathu esithile uye wazalwa ngokutsha usisilwanyana ukuze uphendule izono zakho, unokuzilungisa njani izinto uze wenze inkqubela xa ukwimeko enjalo?”—Owayesakuba ngumHindu eMzantsi Afrika.
“Ndikhulele kwintsapho yamaConfucius, yaye ndandidla ngokuba nenxaxheba kumsitho wokungxengxeza kwizinyanya. Njengoko ndandiba nenxaxheba ekulungiseni itafile yombingelelo yaye ndiqubuda, ndandizibuza enoba izinyanya ezifileyo zazibuya zize zitye ukutya zize zibone nokuba siqubuda kuzo.”—Owayesakuba ngumConfucius eKorea.
Bonke aba bantu bafumana iimpendulo kwimibuzo yabo xa bafundisisa iBhayibhile namaNgqina kaYehova.