Ukuhlanganisana “Kwinkaba Yehlabathi”

Ngaba wakha waweva amazwi athi “Te Pito o Te Henua”? NgesiRapa Nui, ulwimi oluphambili oluthethwa e-Easter Island, la mazwi athetha ukuthi “Inkaba Yehlabathi.” Yintoni eyenza ukuba indibano eyayilapha ikhetheke kangaka?

IKWANTI, iyamangalisa yaye ayiqhelekanga. La ngamanye amagama asetyenziswayo ukuchaza iEaster Island, okanye iRapa Nui njengoko abemi balapho beyibiza njalo. Ngokwenene iyindawo ekwanti, kuLwandlekazi olukuMzantsi wePasifiki, malunga neekhilomitha ezingama-3 790 ukusuka eSantiago, eChile. NgoSeptemba 9, 1888 yaba liphondo laseChile.

Esi siqithi singunxantathu, sinommandla oziiskwekhilomitha ezili-166 oneentaba-mlilo ezintathu ezayeka ukuqhushumba. Eneneni, njengeziqithi ezininzi zasePasifiki, sineentaba ezinkulu eziphantsi kwamanzi. Sonke esi siqithi saziwa njengendawo esisikhumbuzo sokwemvelo. Alithandabuzeki elokuba sidume ngemifanekiso yaso eqingqiweyo nengaqhelekanga eyenziwe ngamatye, eyaziwa ngokuba yimoai.a

Ukongezelela kubuhle bayo nezakhiwo zayo zembali, iEaster Island inezinto ezimnandi ezahlukahlukeneyo ezityiwayo. Kukho iziqhamo ezinjengeepayinapile, iiavokado, iipopo neentlobo ezisithoba zeebhanana. Yaye elwandle kukho iintlobo ezininzi ezahlukahlukeneyo zeentlanzi.

Imozulu yase-Easter Island izolile, yaye kusoloko kunetha kuze kubekho umnyama, nto leyo eyenza ukuba abo batyeleleyo bafumane umoya ococekileyo baze babone neendawo ezintle. Ngoku, kukho abemi abamalunga nama-3 800. Abantu balapha bayinzala yabaphambukeli bokuqala, kuquka nabemi baseYurophu, baseChile nabanye. Abakhenkethi abaninzi abavela eYurophu naseAsia batyelela esi siqithi, besenza ukhenketho lube nendima ebalulekileyo kwezoqoqosho.

Ukutyalwa Kwembewu YoBukumkani Okwesihlandlo Sokuqala

Kwi-1982 Yearbook of Jehovah’s Witnesses kwanikelwa le ngxelo: “Okwangoku sinomvakalisi omnye kuphela e-Easter Island. Uye wancedwa ngokomoya ngokubhalelana nodade ongumvangeli wasemazweni okwisebe [laseChile]. Nangona ngoku ebuyele eChile, sinengxelo yabo barhumela IMboniselo kwesi siqithi. NgoAprili 1980 samangaliswa kukufowunelwa ngumntu owayehlala kude onomdla owayefuna ukwazi usuku lweSikhumbuzo. Kwandula ke kamva kwangaloo nyaka isibini saseValparaiso safudukela apho, yaye sasiqhuba izifundo zeBhayibhile nabantu abanomdla. NgoAprili 1981 kwabakho iSikhumbuzo kwesi siqithi okwesihlandlo sokuqala, yaye kwakukho abantu abali-13. Hayi indlela esivuya ngayo ukubona ‘iindaba ezilungileyo’ zifikelela kulo mmandla ukwanti!”

Kamva, ngoJanuwari 30, 1991, isebe lathumela isibini esingabavangeli basemazweni, uDario noWinny Fernandez, kwesi siqithi. UMzalwan’ uFernandez ukhumbula oku: “Sathabatha uhambo lweeyure ezintlanu ngenqwelo-moya ukuza kufika kweyona ndawo ikwanti emhlabeni, nenabantu abaneenkolelo ezininzi.” Ngokukhawuleza kwenziwa amalungiselelo okuqhutywa kweentlanganiso nomsebenzi wokushumayela owaxhaswa ngumzalwana wasekuhlaleni kunye nodade owayesandul’ ukufika nabantwana bakhe ababini. Phezu kwazo nje iingcinezelo zentsapho, intlonelo enzulu ngonqulo, nezinye iindlela zokuphila eziqhelekileyo kwizithethe zabantu basePolynesia, baye bayibona indlela uYehova ayixhasa ngayo imigudu yabo. UMzalwana noDade Fernandez abasengabo oovulindlela abakhethekileyo, kodwa basahlala kwesi siqithi, bekhulisa unyana wabo, owazalelwa apho. Namhlanje, kukho abavakalisi boBukumkani abonwabileyo abangama-32. Phakathi kwabo kukho abemi bomthonyama baseRapa Nui, kuquka nabo baye baphambukela kwesi siqithi okanye bafudukela kuso ukuze bakhonze apho kukho imfuneko enkulu yabavakalisi boBukumkani.

Amalungiselelo Endibano Yesiphaluka

Ngenxa yomgama omde phakathi kwesiqithi nelizwekazi laseMzantsi Merika, kathathu ngonyaka ibandla liye lifumane iiteyiphu zevidiyo ezinocwangciso lwendibano ekhethekileyo, indibano yesiphaluka nolwendibano yesithili. Kodwa ekupheleni kowama-2000, iKomiti yeSebe eChile yaqwalasela umbandela wokuba kubekho indibano yokuqala kwesi siqithi. Ekugqibeleni, kwagqitywa kwelokuba kubekho indibano yesiphaluka ngoNovemba 2001, kwamenywa inani elithile labazalwana noodade abavela kwiindawo ezahlukahlukeneyo zaseChile ukuba beze kwesi sihlandlo sikhethekileyo. Ngenxa yamaxesha okuhamba eenqwelo-moya, le ndibano yayiza kuba ngeCawa nangoMvulo.

Iindwendwe ezimenyiweyo ezivela kwamanye amazwe ezingama-33 zazivuyiswe kukuba zaziza kuya kwesi siqithi zize zibe nenxaxheba kwindibano yesiphaluka yokuqala eyayiza kuba kuloo mmandla ukwanti. Emva kokuba zithabathe uhambo olude ngenqwelo-moya phezu koLwandlekazi iPasifiki, kwazikhuthaza ukwamkelwa ngabazalwana basekuhlaleni ababezilindele kwisikhululo seenqwelo-moya. Ezi ndwendwe zabuliswa zaza zafakwa iintyatyambo emqaleni, isipho esiqhelekileyo kwesi siqithi. Ukusuk’ apho zasiwa kwindawo eziza kuhlala kuyo, yaye emva kokufumana nje ixesha elifutshane lokukhenketha kwesi siqithi, bonke abo babeza kuba nenxaxheba kucwangciso lwendibano bahlanganisana kwiHolo yoBukumkani.

Isaziso Esenziwa Ngumntu Ongalindelekanga

Ngoxa zisiya endibanweni, ezinye iindwendwe zamangaliswa kukuva umfundisi wasekuhlaleni ethetha kunomathotholo ngotyelelo lwazo. Wathetha ngabakhenkethi abavela kwilizwekazi laseMzantsi Merika abaza kutyelela izindlu ngezindlu bethetha ngesiphelo sehlabathi esizayo. Nangona wabongoza amarhamente akhe ukuba angaziphulaphuli ezi ndwendwe, isaziso sakhe senza bonke abantu bazi ngobukho beqela elikhulu lamaNgqina kaYehova kwesi siqithi. Oku kwavus’ umdla kubemi besi siqithi. Ebudeni beentsuku ezilandelayo, ngobuchule ezi ndwendwe zabelana nabo ngesigidimi esikhuthazayo seendaba ezilungileyo.

INdibano Iyaqala

Ngentsasa yangeCawa, abazalwana basekuhlaleni babeme kwindlela engena kwiHolo yoBukumkani ukuze bamkele iindwendwe ezivela kwamanye amazwe njengoko zazifika kusuku lokuqala lwendibano. Babesithi “Iorana Koe! Iorana Koe!” “Namkelekile!” Abanye oodade babenxibe iimpahla zalapho yaye behombise iinwele zabo ngeentyatyambo ezintle kanye ngendlela yabantu basePolynesia.

Emva komculo odlalwa ngaphambi kokuba kuqaliswe, abantu abamalunga nekhulu bacula kunye ingoma ethi “Qinani, Ningabi Nakushukuma!” ngendlela engazange yaviwa ngaphambili. Ngenxa yokuchukumiseka, abazalwana basekuhlaleni balila xa beva usihlalo ebamkela ngokufudumeleyo ngolwimi lwabo lomthonyama, isiRapa Nui. Ebudeni bonqumamo lwasemini, amaNgqina amathathu amatsha afuzisela uzahlulelo lwawo kuThixo ngokubhaptizwa emanzini. Emva kokuba usuku lokuqala lwendibano luphelile, wonke umntu waziva esondele ngakumbi kuYehova nakubo bonke abazalwana.—1 Petros 5:9.

Ukushumayela Ekuseni

Ngenxa yeemeko ezikhethekileyo kwesi siqithi, ucwangciso losuku lwesibini lwendibano yesiphaluka lwaqalisa emva kwemini. Ngoko ke, iindwendwe zasebenzisa eli thuba zaza ekuseni zaya entsimini. Zaziza kujamelana nantoni?

Elinye ibhinqa elikhulileyo elinabantwana abasibhozo laxelela amaNgqina ukuba alinakuthetha nawo kuba lingumKatolika. Emva kokuba elixelele ukuba athetha ngeemeko wonk’ ubani ajamelana nazo, njengokusetyenziswa kakubi kweziyobisi neengxaki zentsapho, lavuma ukuphulaphula.

Elinye ibhinqa elikhulileyo lasekuhlaleni alizange liwamkele ngobubele amanye amaNgqina amabini. Lawaxelela ukuba makahambe aye kuthetha nabantu abahlala kwilizwekazi laseMzantsi Merika abaphathana ngenkohlakalo. La maNgqina mabini alixelela ukuba isigidimi ‘seendaba ezilungileyo zobukumkani’ sichazelwa wonk’ ubani yaye kwesi siqithi aze kwindibano eza kunceda bonke abantu bakhulise uthando lwabo ngoThixo. (Mateyu 24:14) Abuza ukuba belingayi kukuvuyela kusini na ukuphila ngonaphakade eparadesi, kwiimeko ezifana nezo zikwesi siqithi kodwa kungekho ukugula nokufa. Emva kokuba eqiqe nalo ngeentaba-mlilo ezineminyaka emininzi zikwesi siqithi, eli bhinqa lacingisisa nzulu ngendlela ubomi obubufutshane ngayo laza labuza: “Kutheni siphila ubomi obufutshane kangaka?” Lamangaliswa xa lafunda INdumiso 90:10.

Kusenjalo, la maNgqina eva ingxolo eyayisenziwa ngabamelwane. Nangona ayengaqondi ukuba baxambulisana ngantoni, eli bhinqa lawaxelela ukuba aba bamelwane babethukisa yaye besitsho ngokuphandle ukuba abafuni kutyelelwa ngamaNgqina. Noko ke, eli bhinqa laliyinua, okanye umafungwashe kwintsapho yakowalo. Ekubeni utata walo wayefile, yayingumsebenzi walo ukugqiba ngoko kufanelekileyo entsatsheni. Liphambi kwezalamane zalo, labathethelela abazalwana lithetha ngolwimi lwalo lomthonyama laza ngobubele lamkela iincwadi elalizinikwa. Kamva ngaloo veki, xa lalidlula kumaNgqina ngemoto, laxelela umntakwalo ukuba amise. Nangona umntakwalo wayengakuthandi oku, laxelela abazalwana ukuba bahambe kakuhle laza labanqwenelela impumelelo kubulungiseleli babo.

Nangona ekuqaleni abanye abemi besi siqithi babesichasile isigidimi esishunyayelwa ngamaNgqina avela kwilizwekazi laseMzantsi Merika, iindwendwe zabona ukuba abantu baseRapa Nui ngokwemvelo banobubele yaye banobuhlobo. Inkoliso yabo yaziphulaphula iindaba ezilungileyo. Enyanisweni, amaNgqina abhaptiziweyo ama-6 kwangama-20 akweso siqithi ngabemi basekuhlaleni. Omnye wawo wafunda inyaniso yeBhayibhile okwesihlandlo sokuqala ngokuphulaphula kwigumbi elikufutshane xa kwakuqhutyelwa inkosikazi yakhe isifundo seBhayibhile. Le ndoda nenkosikazi yayo ngoku bangamaNgqina abhaptiziweyo, yaye isisicaka solungiselelo ebandleni.

Ucwangciso Lokomoya Luyaqhubeka

Emva kwemini, kwaqalisa ucwangciso losuku lwesibini. Kwakhona, abazalwana noodade basekuhlaleni abangama-32 neendwendwe ezivela kwamanye amazwe ezingama-33 babehlanganisene kunye neqela labantu abanomdla. Ucwangciso lwaluphulaphulwe ngabantu abamalunga nekhulu, kuquka nentetho yesidlangalala enomxholo othi “Indlela Uthando Nokholo Eziloyisa Ngayo Ihlabathi.” Eneneni, abo babekho babelubona uthando oluphakathi kwabantu bakaYehova, kwanaphakathi kwabo banezithethe ezahlukahlukeneyo.—Yohane 13:35.

Ebudeni beli xesha lendibano yesiphaluka, umveleli wesiphaluka nowesithili baba nentlanganiso ekhethekileyo noovulindlela. Kule ntlanganiso kwakukho oovulindlela abathe ngxi abathathu bakwesi siqithi kwakunye neendwendwe ezivela kwamanye amazwe ezingoovulindlela abathe ngxi okanye abakhethekileyo. Bonke bakhuthazwa gqitha.

Ngosuku olulandelayo, abanye abazalwana basekuhlaleni abangabakhenkethisi babonisa iindwendwe esi siqithi. Batyelela indawo ekombiwa kuyo amatye apho yenziwa khona imifanekiso eqingqiweyo eyaziwa ngokuba yimoai, iintaba-mlilo ekwakusenziwa kuzo ukhuphiswano lwamandulo, kuquka nonxweme oluhle iAnakena, apho abemi bokuqala besi siqithi bafikela khona.b

Iindwendwe zafumana ithuba lokugqibela lokuba kunye nabazalwana basekuhlaleni kwiSifundo Sencwadi Sebandla. Emva kwale ntlanganiso, amaNgqina asekuhlaleni enzela iindwendwe zawo isidlo salapho esiqhelekileyo nto leyo ezazingayilindelanga. Kamva, enxibe iimpahla zalapho, angqungqa ngohlobo lwalapho. Iindwendwe ezivela kwamanye amazwe, kuquka abazalwana noodade abangamaRapa Nui, babeqinisekile ukuba imigudu eyenziweyo ukulungiselela le ndibano yayingelolize.

Zonke iindwendwe ezivela kwamanye amazwe zaziva zisondele ngokunzulu kubazalwana bazo noodade abakwanti, abaye bachitha kunye nabo iveki echulumancisayo. Kwakubuhlungu kuzo ukushiya esi siqithi. Ziya kuhlala zibakhumbula abahlobo abatsha ezibafumeneyo kuquka nokhuthazo lokomoya ezilufumeneyo. Kwisikhululo seenqwelo-moya, abazalwana basekuhlaleni bafaka emiqaleni yeendwendwe izacholo ezintle abazenze ngoonokrwece.

Njengoko iindwendwe zazihamba, zathembisa zisithi: “Iorana! Iau he hoki mai e Rapa Nui ee,” okuthetha ukuthi: “Sala kakuhle! Ndiya kuphinda ndibuye, Rapa Nui.” Ewe, zilangazelela ukuya kutyelela kwakhona abahlobo bazo abatsha namalungu entsapho yokomoya e-Easter Island engaqhelekanga, ekwanti, emangalisayo nenabantu abanobuhlobo!

[Imibhalo esemazantsi]

[Ibhokisi ekwiphepha 24]

Ukushumayela E-Easter Island

Malunga neminyaka emibini ngaphambi kwale ndibano ingasayi kuze ilibaleke, omnye umveleli wesithili nenkosikazi yakhe batyelela esi siqithi baza bafumana amava amaninzi amnandi. Ngokomzekelo, cinga indlela abamangaliswa ngayo xa udade owabasa kwindawo abaza kuhlala kuyo wabakhumbuza ukuba bafundisisa iBhayibhile naye emazantsi eChile xa wayekwishumi elivisayo malunga neminyaka eli-16 ngaphambilana. Kamva loo mbewu yazala isiqhamo eRapa Nui.

Kwakhona babalisa la mava abangel’ umdla: Omnye umphathi wevenkile yezipho wamkela INguqulelo Yehlabathi Elitsha YeZibhalo Ezingcwele kunye nencwadi yokufundisisa iBhayibhile ethi Ulwazi Olukhokelela Kubomi Obungunaphakade, zombini zipapashwe ngamaNgqina kaYehova. Xa babuyela kuye, wabaxelela ukuba akakwazi ukuyifunda iBhayibhile. Babemshiyele iBhayibhile yesiFrentshi, kungekhona eyeSpanish! Le ngxaki yaconjululwa ngokukhawuleza, yaye ngoncedo lwamaNgqina asekuhlaleni kuquka neBhayibhile ebhalwe ngolwimi lwakhe, wafumanisa ukuba iBhayibhile ayikho nzima kangako.

[Imaphu ekwiphepha 22]

(Ukuba ufuna inkcazelo ehlahlelwe kakuhle, yiya kwimpapasho)

EASTER ISLAND

CHILE

[Imifanekiso ekwiphepha 23]

Ababini kwabo babhaptizwa kwindibano yesiphaluka

[Imifanekiso ekwiphepha 25]

Ithambeka lentaba-mlilo iRano Raraku; umfanekiso omncinane: Isiqhamo sasendle esibizwa ngokuba yi-“guayaba” esikhula kwesi siqithi